ЭМЯ-ны Шинжлэх ухаан, технологийн нарийн бичгийн дарга Э.Оюунсүрэн:

“Дэлхийн хэмжээнд нийт 2,490 эмнэл зүйн туршилт судалгаа явагдаж байгаа бөгөөд одоогоор 194-ийнх нь судалгаа дууссан байна. Харин вакцин бүтээх 160туршилт хийгдэж байгаа юм. Тухайлбал, БНХАУ-ын Синовак эмийн компанийн бүтээсэн SARS өвчний үед туршигдаж байсан вакцин эмнэл зүйн туршилт судалгааныхаа гуравдугаар шатандаа орсон. Мөн Их Британи улсын Оксфордын их сургуулийн эрдэмтдийн бүтээсэн Мers, томуу, сүрьеэгийн өвчний эсрэг туршигдаж байгаа хоёр вакцин туршилтынхаа сүүлийн шатыг эхлүүлсэн.

Герман, Австрали улсын эрдэмтэд олон улсын аялал жуулчлал болон цар тахлын хамааралтай холбоотой эдийн засгийн судалгааг хийжээ. Ингэхдээ улс орнуудын гадаад жуулчлалын тоог коронавирусийн халдвар авсан иргэдийн тоотой нь харьцуулан судалсан аж. Судалгааны үр дүнд, улс орнуудын жуулчдын тоо нэг хувиар нэмэгдэхэд л коронавирусийн халдвар авсан иргэдийн тоо 1.2 хувиар, нас барсан иргэдийн тоо 1.4 хувиар нэмэгдэж байна гэх тооцоолол гарсан байна.

Иран улсын эрдэмтдийн баг коронавирусийн эмгэг судлалын чиглэлээр хэвлэлийн тойм судалгаа хийжээ. Судалгааны үр дүнд, коронавирусийн халдвар нь зөвхөн уушгийг өвчлүүлээд зогсохгүй бүдүүн болон нарийн гэдэс, элэг, бөөр, арьс, зүрх, цөс, тархи зэрэг эрхтнүүдийг өвчлүүлдэг гэдгийг тогтоосон. Өвчлөлийн зарим эмгэг SARS, MERS зэрэг өвчнийхтэй төстэй байгаа бөгөөд эрдэмтэд уушгинаас бусад эрхтэнд эмчилгээ хийх тал дээр эмч нар анхаарах нь зүйтэй хэмээн зөвлөмж гаргажээ.

АНУ-д COVID-19-ийн халдвар авсан 38 настай эрэгтэйд тулгуур булчингийн эд доройтох хам шинж илэрсэн байна. Коронавируст халдварын үед булчин өвдөх шинж тэмдэг элбэг тохиолдож байгаа. Иймд эрдэмтэд коронавирусийн халдвар булчингийн системд үзүүлж буй нөлөөллийг цааш дэлгэрэнгүй судлах шаардлагатай гэж үзэж байна.

Лондонгийн Био анагаах ухааны судалгааны төвийн эрдэмтэд коронавирусийн халдвар аваад эмнэлэгт хэвтэн эмчлүүлж буй 406, 793 хүний дунд тус тус судалгаа хийжээ. Судалгаагаар багтраа өвчтэй иргэд 17.9 хувийг эзэлж байжээ. Иймд судлаачид багтраа өвчтэй хүн коронавирусийн халдвар авбал цаашид биеийн байдал нь хүндрэх магадлал өндөр байгааг анхааруулжээ.

Их Британи улсын Кембриджийн их сургуулийн судлаачид коронавирусийн халдвар хүүхдэд хэрхэн нөлөөлж байгаа талаар судалгаа хийж хэвлэлийн тойм бэлтгэжээ. Судалгаанд 2-14 насны 2,141 хүүхэд хамрагдсан байна.Тэдгээрийн 49 хувь нь ханиалгах, 47 хувь нь халуурах шинж тэмдэг илэрч байсан аж. Мөн коронавирусиийн халдвартай эхээс төрсөн 58 нярайд буюу 6.8 хувьд нь халдвар авсан нь батлагдсан байна. Нярай хүүхдүүдийг төрснөөс хойш 1-2 хоногийн дараа шинжилгээ авсан учир төрсний дараа халдвар авсан магадлал өндөр байна гэж үзэж байна. Халдвар авсан эхийн ихэс болон сүүнээс коронавирус илрээгүй бөгөөд нярай уг өвчнөөр өвчилсөн тохиолдол маш ховор бүртгэгдэж байна” хэмээв.

Х.ЕСҮ

Нийслэлийн Засаг даргын Тамгын газраас нийслэлийн төсвийн тухай мэдээллийг иргэдэд ил тод нээлттэй, ойлгомжтой байдлаар боловсруулсан “Нийслэлийн иргэдийн төсөв-2020” эмхэтгэлийг батлагдсан төсвийн хүрээнд хоёр дахь жилдээ бэлтгэн өнөөдөр иргэд, олон нийтэд танилцуулав. Танилцуулгыг Нийслэлийн Засаг даргын Тамгын газрын Хөгжлийн бодлого, төлөвлөлтийн хэлтсийн дарга Н.Отгонбаяр, Санхүү, төрийн сангийн хэлтсийн дарга Э.Ганхүү, тус хэлтсийн мэргэжилтэн Б.Төгслхам, Германы Олон Улсын хамтын ажиллагааны нийгэмлэгийн “Монгол дахь барилга байгууламжийн эрчим хүчний үр ашгийг дээшлүүлэх нь” төслийн засаглалын хөтөлбөрийн менежер Г.Пүрэвтогтох нар хүргэлээ.

Эмхэтгэлийг боловсруулахад Дэлхийн Банк, Германы Олон Улсын Хамтын ажиллагааны нийгэмлэг (GIZ) техникийн туслалцаа үзүүлжээ. Тус эмхэтгэлд Нийслэл хотын 2020 оны хөгжлийн бодлого, төсвийн орлого, зарлага, хөрөнгө оруулалт, гадаадын зээл, тусламж, төрөөс, мөн нийслэлийн удирдлагын зүгээс иргэдийнхээ төлөө, ямар арга хэмжээ хэрэгжүүлж байгаа талаар мэдээлэл багтсанаас гадна “Нийслэлийг хөгжүүлэх хэтийн зорилт”, “ХОТ” бодлого, иргэдэд чиглэсэн ямар төрлийн үйлчилгээ, дэмжлэгийг хаанаас хэзээ авч болох зэрэг иргэдийн хөтөч, туслагч болохуйц мэдээллийг агуулснаараа өмнөх жилийнхээс онцлогтой юм байна.

Энэхүү эмхэтгэл нь Нийслэлийн татвар төлөгч иргэн таны болон нийслэлийн олон аж ахуйн нэгж байгууллагын хөдөлмөрийн үр шимээс бүрдэж байгаа төсвийг юунд зарцуулж, ямар үр дүнд хүрэх талаар нээлттэй мэдээлэл өгч, цаашлаад иргэдийн хяналт, оролцоог дэмжихэд чиглэгдсэн гэдгийг НЗДТГ-ын Санхүү, төрийн сангийн хэлтсийн дарга Э.Ганхүү онцлон хэлэв.

Тус иргэдийн төсвийн эмхэтгэлийг цахим хэлбэрээр www.ulaanbaatar.mn, www.irgen-tur.mn цахим хуудаснаас татах боломжтой.

Нийслэлийн прокурорын газраас С.Баярцогт, Б.Ариунсан, Б.Бямбасайхан, Б.Бадрал, Д.Ганболд нарт холбогдуулан яллах дүгнэлт үйлдэж ирүүлсэн 461 хавтаст эрүүгийн хэргийг тус дүүргийн шүүх 2020 оны 03 дугаар сарын 23-ны өдөр хүлээн авч шүүх хуралдаанаар хянан хэлэлцэж байгаа.

Ардын хувьсгалын 99 жилийн ой, Үндэсний их баяр наадмын хурдан морины уралдаан 2020 оны долоодугаар сарын 10-12-ны өдрүүдэд зохион байгуулагдана.

Иймд Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрын дарга М.Энх-Амар Монгол Улсын Шадар сайд, Үндэсний их баяр наадмыг зохион байгуулах хорооны дарга Я.Содбаатар болон Үндэсний их баяр наадмыг зохион байгуулах салбар хорооны дарга, бригадын генерал Х.Батбилэг нарт 2020 оны оны долдугаар сарын 10-ны өдөр 01/448 тоот саналыг хүргүүллээ.

Тус саналд:

Монгол Улсын нийт хүн амын 35.8 хувийг 0-18 хүртэлх насны хүүхэд эзэлж байна. Монгол Улсын Засгийн газраас хүүхэд, гэр бүлийн асуудалд онцгойлон анхаарсны үр дүнд гэр бүл төвтэй хүүхэд хамгааллын тогтолцоог бэхжүүлэх эрх зүйн орчин бий болж, хүүхэд хамгааллын үйлчилгээний хэрэгжилт сайжирч, тодорхой бүтэц, санхүүжилт үр дүнтэйгээр шийдвэрлэгдэж байна.

Тус агентлаг нь жил бүрийн Улсын баяр наадмаар Нэгдсэн Үндэстний Байгууллагын Хүүхдийн эрхийн тухай конвенц, Монгол Улсын Хүүхдийн эрхийн тухай хууль, Хүүхэд хамгааллын тухай хууль, Үндэсний баяр наадмын тухай хуулийн 9 дүгээр зүйлийн 9.2 дахь хэсэг, Үндэсний морин уралдааны морь унаач хүүхдийн хамгаалалтын хувцас, морины хэрэгсэлд тавих шаардлага MNS 6264:2018 стандартын хэрэгжилтэд хяналт тавьж, хурдан морины уралдаанч хүүхдийн эрхийг хангаж, болзошгүй эрсдэлээс урьдчилан сэргийлэх чиглэлээр ажилладаг.

“Наадмын хөтөлбөрт өөрчлөлт оруулсан нь холбогдох хууль, тогтоомж, хүүхдийн эрхийг зөрчиж байна”

Өнөөдрийн байдлаар Хүй долоон худагт зохион байгуулагдах Үндэсний их баяр наадмын хурдан морины уралдаанд 387 хүүхэд, 1,293 морь бүртгүүлсэн байна.

“Коронавируст (Ковид-19) цар тахлын үед үндэсний их баяр наадмыг зохион байгуулах түр журам”-ын дагуу хурдан морины уралдааныг долдугаар сарын 10, 11, 12-ны өдрүүдэд 6 насны морьдыг уралдуулахаар шийдвэрлэсэн.

Гэвч Үндэсний их баяр наадмыг зохион байгуулах хорооны 2020 оны долдугаар сарын 9-ний өдрийн хурлаар эрлийз 3 насны морьдыг уралдуулахаар болж, баяр наадмын хөтөлбөрт өөрчлөлт оруулсан нь холбогдох хууль, тогтоомж, хүүхдийн эрхийг зөрчсөн, улмаар олон сөрөг үр дагавар гарч болзошгүй бодитой нөхцөл байдал үүсэж болзошгүй байна.

Энэ асуудалтай холбоотой дараах хууль тогтоомжууд үйлчилж байна.

1. Монгол Улсын Үндсэн хууль
2. Хүүхдийн эрхийн тухай хууль
3. Хүүхэд хамгааллын тухай хууль
4. Үндэсний их баяр наадмын тухай хууль
5. Хөдөлмөрийн тухай хууль
6. Зөрчлийн тухай хууль
7. Эрүүгийн тухай хууль

Мөн баяр наадмын өдрүүдэд бороо, хур их орж, зам талбай халтиргаа үүссэнээс гадна хүйтэн, шуургатай бороо орж байгаа нь морь халтирч, хүүхэд унаж бэртэх, бороонд даарч осгох зэрэг эрсдэл үүсч болзошгүй байна.

Иймд дараах санал, санаачилгыг дэмжиж Үндэсний их баяр наадмыг зохион байгуулах хороо, салбар комисс, Аймаг, нийслэлийн Засаг дарга бөгөөд Онцгой комиссын дарга нарт “хүүхдийн эрхийг хангах тухай хууль тогтоомжийг хэрэгжүүлэх арга хэмжээг авч ажиллах” талаар дараах санал, санаачилгыг дэмжих, нутаг дэвсгэрийн хэмжээнд зохион байгуулах, хэрэгжүүлэх чиглэлийг өгч, бидний ажилд дэмжлэг үзүүлэхийг хүслээ. Үүнд:

• Хэт их бороотой, зам халтиргаатай үед хурдан морь уралдах замын зайг (км) богиносгох талаар хэлэлцэн шийдвэрлэх;
• Дуу цахилгаантай, хүчтэй аадар бороо орж байгаа нөхцөлд хүүхэд осгох, замаас гарч төөрөх зэрэг эрсдэлээс урьдчилан сэргийлж, хурдан морины уралдааны товыг хойшлуулах;
• Уралдаанч хүүхдийг өдөрт 2-оос дээш удаа уралдаанд оролцуулахгүй байх, эсвэл 2-оос дээш удаа уралдаан зохион байгуулахгүй байх;
• Хурдан морины уралдааныг аймаг, нийслэлийн Гэр бүл, хүүхэд, залуучуудын хөгжлийн газраас автомашинтай дагах зөвшөөрөл олгох;
• Хурдан морины уралдаан зохион байгуулж байгаа салбар комисс болон уяачдад хүүхдийн эрх, аюулгүй байдлыг хангаж ажиллахад онцгойлон анхаарах зэрэг хүүхдэд ээлтэй санаачилга гаргаж ажиллах чиглэлийг хүргүүлэх;

Энэ жил Хүй долоон худагт халуун хоол, хүнсний худалдаа гараагүй тул уралдаанч хүүхдүүдэд халуун хоол, цайгаар үйлчлэх боломж нөхцөлийг судлан, шийдвэрлэх саналыг үүгээр уламжилж байна гэжээ.

Зураг дээр дарж томруулж үзнэ үү.

ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа:

АНУ-ын долдугаар сарын 9-ний өдөр 64,700 гаруй тохиолдол, 991 нас баралт шинээр бүртгэгдлээ. Ингэснээр тус улсын хэмжээнд нийт халдвар авсан хүний тоо 3,047,000 -д хүрч, 132,000 гаруй хүн эндсэн гэж АНУ-ын Өвчний хяналт, сэргийлэлтийн төвөөс мэдээллээ Түүнчлэн тус улсад COVID-19-өөр өвчлөөд эдгэрсэн хүний тоо 1.3 саяд хүрсэн байна.

Бразил улсад өчигдөр 42,600 тохиолдол, 1,220 нас баралт бүртгэгдэж, нийт батлагдсан халдварын тоо өссөн дүнгээр 1,755,000 гаруй боллоо. Халдвар авсан хүмүүсээс 1,054,000 гаруй нь эдгэрсэн бол 632,000 хүн идэвхтэй халдвартай байна гэж Бразилын Эрүүл мэндийн яамнаас мэдээлжээ.

Энэтхэг улсад сүүлийн 24 цагийн хугацаанд нийт 24,800 тохиолдол бүртгэгдлээ. Ингэснээр тус улсын хэмжээнд бүртгэгдсэн нийт халдварын тохиолдол 767,200-д хүрлээ.

Номхон далайн баруун бүсийн Япон улсад Пүрэв гарагт 355 шинэ тохиолдол бүртгэгдсэн байна. Шинэ тохиолдлуудын 224 нь Токиод бүртгэгджээ. Токиод бүртгэгдсэн тохиолдол нь дөрөвдүгээр сарын 14-ний өдрөөс хойш нэг өдрийн дотор тус хотод бүртгэгдсэн хамгийн өндөр үзүүлэлт болсон гэж эх сурвалжууд онцолсон байна.

Австралийн холбооны улсад өчигдөр 182 тохиолдол бүртгэгдлээ. Шинэ тохиолдлуудын дийлэнх нь буюу 165 нь Виктория мужид бүртгэгдсэн байна.

Солонгос
улсад Пүрэв гарагт шинээр 45 тохиолдол бүртгэгдэж, нэг хүн эндлээ. Бүртгэгдсэн шинэ
тохиолдлуудын 22 нь дотоодын халдвар байсан бол 23 нь гаднаас зөөвөрлөгджээ. Дотоодын халдварын
хувьд сүмийн үйл ажиллагаатай холбоотой багц халдваруудаас шинэ
тохиолдол батлагдах явдал огтхон ч буурахгүй байгаа талаар БНСУ-ын Өвчний хяналт, сэргийлэлтийн төвийн мэдээлэлд
онцолжээ. Тиймээс Баасан гарагаас эхлэн сүмд очих бүх
иргэнийг QR кодоор бүртгэж, залбирал үйлдэхээс бусад үйл ажиллагааг сүмд
зохион байгуулахыг хориглосон.

БНХАУ-ын эх газарт дотоодын халдвар бүртгэгдээгүй. Харин гадаад улсаас дөрвөн тохиолдол зөөвөрлөгдсөн байна. Бээжин хотын Шиньфади хүнсний захтай холбоотой халдвар зургаадугаар сарын 11-нээс хойш бүртгэгдэж байсан ч сүүлийн дөрвөн өдөр дараалан дахин халдвар гараагүй. Шиньфади хүнсний захаас эх уурхайтай 335 халдварын тохиолдлоос өчигдөр дахин 12 хүн эдгэрч. Одоогоор дээрх голомтын халдвараас нийт 72 хүн эдгэрээд байна.

БНХАУ-ын Засаг захиргааны онцгой бүс Хонг Конгт өчигдөр 42 тохиолдол шинээр бүртгэгдлээ. Шинэ халдваруудын 34 нь дотоодынх нь халдвар байсан бөгөөд тэдгээрийн 23 нь өндөр настны асрамжийн газарт бүртгэгдсэн аж. Хонг Конгт бүртгэгдсэн нийт халдварын тохиолдол 1,300 гаруй болоод байгаа юм.

Х.ЕСҮ

Голомт банк

2020 оны долдугаар сарын 11-13-ны өдөр “Солонго” салбар 11:00-19:00 цагийн хооронд, долдугаар сарын 11-15 өдөр “Хан-Уул И-март” салбар 09:00-21:00 цагийн хооронд ажиллана. Бусад салбарууд амарна.

Хаан банк

Долдугаар сарын 11-16-ны өдрүүдэд Улаанбаатар хот дахь бүх салбар амарна.

Хас банк

Баяр наадмын өдрүүдэд “Сансар дахь И-март тооцооны төв” 10:00-23:00 цагийн хооронд ажиллана.

Төрийн банк

Долдугаар сарын 11-ний өдөр “Чулуун овоо” тооцооны төв, “Мустанг” тооцооны төв,

Долдугаар сарын 12-ны өдөр “Занабазар” салбар , “3-р хороолол” тоцооны төв

Долдугаар сарын 13-ны өдөр “Мөнгөн завьяа” тоцооны төв, “Өнөр” тоцооны төв

Долдугаар сарын 14-ны өдөр “50 мянгат” тооцооны төв, “13-х хороолол” тооцооны төв

Долдугаар сарын 15-ны өдөр “120 мянгат” тооцооны төв, “Өргөө” тооцооны төвүүд 11:00-17:00 цагийн хооронд ажиллана.

Х.ЕСҮ