Month: May 2020

Улсын болон нийслэлийн төсвөөр энэ онд Улаанбаатарт нийт 52,8 км авто зам шинээр тавигдаж, 17,8 км уулзвар шинэчлэлтийн ажил хийгдэхээр төлөвлөгдөн, IV сарын 1-нээс ажлууд эхэлсэн. Баянгол дүүрэг Тасганы овооноос Баянбүрдийн тойрог хүртэлх 1.09 км замын засвар шинэчлэлтийн ажил хийгдэж байна. Энэхүү ажлын явцын талаар нийслэлийн Засаг даргын орлогч, Зам тээврийн асуудал хариуцсан төслүүдийн удирдагч Б.Отгонсүхээс тодруулахад “Өнөөдөр Тасганы овооноос Эх нялхсын уулзвар хүртэлх авто замын суурь асфальт, бетон хучилтын ажил хийгдэж байна. Замын ажилд хоёр техник асфальт, бетон дэвсэгч, хоёр хийн дугуйт, хоёр булт индүү, хоёр ачаа болон нэг усны машин ажиллаж байна. Одоогийн байдлаар Тасганы овооноос Баянбүрдийн тойрог хүртэлх замын бүтээн байгуулалтын ажлыг төлөвлөгөөт хугацаанд дуусгахын тулд 100 гаруй замчид 24 цагаар замын ажилд ажиллаж байна” гэв. Тасганы овооноос Баянбүрдийн тойрог хүртэлх чиглэлийн хойд хэсгийн зам засвар шинэчлэлтийн ажил энэ сарын 13-нд дуусах бөгөөд үргэлжлүүлэн урд замын ажил эхлэх юм байна.

Бүгд Найрамдах Энэтхэг улс өнгөрсөн III сард коронавирусийн халдвараас сэргийлэн олон улсын нислэгүүдээ цуцлан, хөл хорио тогтоосон. БНЭУ-аас эх орондоо ирэхээр Монгол Улсын 480 гаруй иргэн хүсэлтээ гаргажээ. Эдгээр иргэдийн 21 нь эрүүл мэндийн, 164 нь оюутан, 260 нь насанд хүрээгүй хүүхэд, 44 нь бусад шалтгаантай иргэд байгаа юм байна. Тиймээс Монгол Улс ирэх долоо хоногт Энэтхэг улс руу захиалгат нислэг үйлдэж иргэдээ татан авах болжээ.

Эх дэлхий өөрөө амар амгалангийн туйл юм. Голын урсгал, модны найгаан, цэцэгсийн анхилам үнэр, өнгө төрхөө гайхуулсан ан амьтдыг юутай ч зүйрлэшгүй.

Хатаж, гандсан мод, ширгэж дууссан гол мөрөн, ховордсон амьтдыг яагаад үл хайрлан хороосоор байна вэ?

Иргэн бүр байгаль орчноо хамгаалах журамт үүрэгтэй. Та ч бас…

Сүүлийн өдрүүдэд хуурайшилт ихтэй байгаагаас ой хээрийн гал түймэр их гарч байна. Энэ нь хэн нэгний буруутай үйлдлээс ч болдог. Жишээ нь, хашааныхаа шар өвсийг шатааж байгаад гал алдчихлаа, муу хувцасаа шатааж байгаад, халуун үнснээс болоод гэх хариуцлагагүй зүйлс ярьдаг.

Мөн хууль бусаар мод бэлтгэх, ан агнах, ашигт малтмал хайх, олборлох, байгалийн ургамал бэлтгэх зэрэг үйлдэл гарч байна. Гэвч энэ мэт гэмт хэрэг, зөрчлүүдийг харсан хэрнээ чимээгүй өнгөрөх явдал гарсаар байна. Та өвөг дээдсээсээ ямар байгаль дэлхий авч үлдсэн түүнийгээ үр хүүхэд, хойч үедээ сайжруулж өгдөггүй юмаа гэхэд тэр хэвээр нь үлдээж өгөөрэй.

Цагдаагийн байгууллага хүрээлэн буй орчны эсрэг гэмт хэргээс урьдчилан сэргийлэх, гэмт хэрэг, зөрчлийг бууруулах, энэ төрлийн мэдээ мэдээллийг иргэд, олон нийтэд хүргэх зорилгоор “Байгалиа хамгаалъя” аяныг “Таны дуу хоолой байгалийг хамгаалж чадна” уриан дор зохион байгуулж байна.

Хамгийн гол нь байгаль орчинд учрах хор хохирлыг тооцож баршгүй. Жишээ татахад, хууль бусаар ашигт малтмалын олборлолт явуулсантай холбоотой хохирол гэхэд ихэвчлэн гол мөрний ой сав газрыг сүйтгэх, гол горхи ширгэх, ой модыг огтлох, унагааж байна. Энэ үйл ажиллагааны улмаас гол, горхи ширгэж цөлжилт явагддаг. Усыг эргүүлэн нөхөж чадахгүй учраас хор хөнөөлийг тооцох боломжгүй юм. Байгалийн тэнцвэртэй байдлыг хадгалахын тулд амьтан, ургамал, мод бүгд харилцан уялдаатай оршиж байдаг.

Та хэн нэгний хууль бус, аюултай үйлдлийг харсан бол цагдаагийн байгууллагад мэдэгдэх, өөрөө шаардлага тавих ч эрхтэй. Таны хэлсэн үг, тавьсан зөв шаардлага бүр хэр үнэ цэнэтэйг та мэдэх үү?

Өвөг дээдсээс хүлээн авсан онгон тагшин байгаль, эх дэлхийгээ хойч үедээ энэ хэвээр нь үлдээе.

“Таны дуу хоолой байгалийг хамгаалж чадна”

• Ажилчдын биеийн халууныг үзэж нэвтрүүлэх

• Ажлын малгай, хувцас, гутал, улавч өмсөх
• Маск, тусгай амны хаалт зүүх
• Хүнтэй 1.5-2 метрийн зайнаас харьцах
• Хүнс, хоол үйлдвэрлэх, худалдах зэрэг шат дамжлага бүрт спиртэн суурьтай гар ариутгагч байршуулж хэрэглэх
• Нэг удаагийн бээлий хэрэглэж тайлах бүрт гараа заавал савандаж угаах
• Хоол бэлтгэх өрөө, талбай, хатуу гадаргууг ахуйн хэрэглээний халдваргүйжүүлэх бодисоор 2 цаг тутам цэвэрлэх
• Аяга, таваг, халбага, сэрээг ахуйн хэрэглээний халдваргүйжүүлэх бодисоор сайтар угаах
• Түүхий, хагас боловсруулсан болон бэлэн бүтээгдэхүүнийг зориулалтын дагуу хадгалах
• Хүргэлтийн үйлчилгээний ажилтан амны хаалт зүүж, бээлий өмсөх
• Ажилчдад коронавируст халдварын эмнэлзүйн шинж тэмдэг, урьдчилан сэргийлэлтийн талаар мэдээлэл өгөх
• Коронавируст халдвараас урьдчилан сэргийлэх зөвлөмжийг ил тод байршуулах
• Ажилчдыг урьдчилан сэргийлэх үзлэгт тогтмол хамруулах
• Хоол хүнс бэлтгэх, хадгалах өрөөг шавьж мэрэгчээс хамгаалах

Цаг агаар:

Өнгөрсөн хоногт: Улаанбаатар хот болон Дорнод, Сүхбаатар, Сэлэнгэ, Төв, Хөвсгөл, Хэнтий аймгийн нутгаар хур тунадас орсон. Бусад нутгаар цаг агаар тогтуун байлаа.

Өнөөдөр: Говь болон зүүн аймгуудын нутгаар солигдмол үүлтэй, зүүн аймгуудын нутгийн зүүн өмнөд хэсгээр бороо, нойтон цас орно. Бусад нутгаар багавтар үүлтэй. Хур тунадас орохгүй. Салхи баруун хойноос 6-11 м/с, говь тал, хээрийн нутгаар зарим үед 14-16 м/с хүртэл ширүүсч шороон шуурга шуурна. Хангай, Хөвсгөл, Хэнтэйн уулархаг нутаг, Туул, Тэрэлж, Хэрлэн, Онон, Улз, Халх голын хөндийгөөр 8-13 градус, Их Нууруудын хотгор, Орхон-Сэлэнгийн сав, говийн бүсийн баруун хэсгээр 17-22 градус, бусад нутгаар 12-17 градус дулаан байна.

Улаанбаатар хотод: Үүлшинэ, хур тунадас орохгүй, салхи баруун хойноос 6-11 м/с, зарим үед 13-15 м/с хүрч ширүүснэ, өдөртөө 10-12 градус дулаан байна.

Төлөв байдал: 11-нд зүүн аймгуудын нутгийн зарим газраар, 13-нд баруун болон төвийн аймгуудын нутгийн хойд хэсгээр, 14-нд төв болон зүүн аймгуудын нутгийн хойд хэсгээр хур тунадас орно. Салхи 11,12-нд говь, тал, хээрийн нутгаар түр зуур 16-18 м/с, 13-14-нд зарим газраар 12-14 м/с хүрч шороон шуурга шуурна. Ихэнх хугацаанд нутгийн баруун хагаст дулаан, Туул, Тэрэлж, Хэрлэн, Онон, Улз, Халхын голын хөндийгөөр шөнөдөө 3-8 градус хүйтэн, өдөртөө 8-13 градус дулаан, Хангай, Хөвсгөл, Хэнтэйн уулархаг нутаг, Хүрэнбэлчир орчмоор шөнөдөө 2 градус хүйтгээс 3 градус дулаан, өдөртөө 13-18 градус, Их нууруудын хотгор, говийн бүс нутгийн баруун хэсгээр шөнөдөө 7-12 градус, өдөртөө 20-25 градус, бусад нутгаар шөнөдөө 2-7 градус, өдөртөө 14-19 градус дулаан байна. 13-наас ихэнх нутгаар дулаарна.

Гал түймэр:

Хувийн өмчид гарсан: Хэнтий аймгийн Хэрлэн сумын 2 дугаар багийн “Цацал”-ын 8 дугаар гудамжинд иргэн Н-ийн 4 ханатай гэр шатаж байна гэсэн дуудлагыг 05.09-ний өдрийн 06:46 цагт хүлээн авсан. Тус аймгийн Онцгой байдлын газрын Гал түймэр унтраах, аврах 32 дугаар ангийн алба хаагчид 1 км зам туулан 06:48 цагт очиж 10 минут ажиллаж унтраасан.

Нийслэлийн Чингэлтэй дүүргийн 19 дүгээр хорооны “Яргайтын богино”-ын зуслангийн “Задгай”-д иргэн А-ын 6х8 метрийн хэмжээтэй байшин шатаж байна гэсэн дуудлагыг 05.09-ний өдрийн 10:29 цагт хүлээн авсан. Сүхбаатар дүүргийн Онцгой байдлын хэлтсийн Гал түймэр унтраах, аврах 74 дүгээр ангийн алба хаагчид 6 км зам туулан 10:37 цагт, мөн дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчид 11 км зам туулан 11:09 цагт тус тус очиж 50 минут ажиллаж унтраасан.

Нийслэлийн Баянгол дүүргийн 1 дүгээр хорооны “Алтай” хотхоны 12 дугаар байр хогийн сувагт хог шатаж байна гэсэн дуудлагыг 05.10-ны өдрийн 06:06 цагт хүлээн авсан. Хан-Уул дүүргийн Онцгой байдлын хэлтсийн Гал түймэр унтраах, аврах 14 дүгээр ангийн алба хаагчид 1 км зам туулан 06:08 цагт очиж 10 минут ажиллаж унтраасан. Утаажилтын бүсээс 37 иргэнийг гаргасан.

Ой, хээрийн түймэр:

Хээрийн түймэр: Дорнод аймгийн Халхгол сумын Ташгай багийн “Гүү-Уул” гэдэг газар /сумын төвөөс баруун урд зүгт 60 км-т/ хээрийн түймэр гарсан тухай дуудлагыг 05.09-ний өдрийн 19:50 цагт хүлээн авсан. Тус аймгийн Онцгой байдлын газрын тус сум дахь Гал түймэр унтраах 62 дугаар ангийн алба хаагчид, орон нутгийн иргэд хээрийн түймрийг унтраахаар ажиллаж мөн өдрийн 22:50 цагт унтраан тус сумын Засаг даргын Тамгын газрын бэлчээрийн мал аж ахуй хариуцсан төслийн мэргэжилтэн Б.Оргилболдод хүлээлгэн өгсөн. Уг гал түймэрт 450 га талбай шатсан.

Эрэн хайх, аврах ажиллагаа:

Эрэн хайх ажиллагаа /сураггүй болсон/: Өвөрхангай аймгийн Зүүнбаян-Улаан сумын Цахиурт багийн “Галуут” гэдэг газар /сумын төвөөс зүүн хойд зүгт 21 км-т/ Тус багийн харьяат иргэн О /35 настай, эрэгтэй, сэтгэцийн эмгэгтэй/ сумын эмнэлэгт эмчлүүлж байгаад 05.09-ний өдрийн 14:00 цагт гарч яваад сураггүй болсон тухай дуудлагыг 05.09-ний өдрийн 20:25 цагт хүлээн авсан. Тус аймгийн Онцгой байдлын газрын алба хаагчид, орон нутгийн иргэд эрэн хайх ажиллагааг зохион байгуулж байх явцад 05.10-ны өдрийн 07:45 цагт тус аймгийн Арвайхээр сумын Өлзийт багт амьдрадаг ах Г-д эсэн мэнд ирсэн гэсэн тул эрэн хайх ажиллагааг зогсоосон.

ОБЕГ-ын дарга, хошууч генерал Т.Бадрал Хэнтий аймгийн Бор-Өндөр, Баян-Адарга, Норовлин, Жаргалтхаан сумдад ажиллалаа. Ажиллах үеэрээ Засгийн газрын 2019 оны 331 дүгээр тогтоолоор Баян-Адарга, Жаргалтхаан суманд байгуулагдсан Эрэн хайх, аврах ангийн барилгын ажил болон Бэрх тосгон дахь Гал түймэр унтраах, аврах 42 дугаар ангийн үйл ажиллагаатай танилцаж, алба хаагчидтай уулзалт хийсэн юм. Гал түймэр унтраах, аврах 42 дугаар анги нь Норовлин, Дадал, Батноров, Баян-Адарга, Баян-Овоо сумын нутаг дэвсгэрийн хэмжээнд гарсан гамшиг, ослын дуудлагаар үүрэг гүйцэтгэн ажилладаг.

Энэ үеэр алба хаагчдад ОБЕГ-ын дэд дарга, хурандаа Ц.Ганзориг Гамшгаас хамгаалах тухай хуульд орсон нэмэлт, өөрчлөлт, хууль эрхзүйн шинэчлэлийн талаар танилцуулгыг хийлээ. Гамшгаас хамгаалах тухай хуулийн 35 хувьд нэмэлт, өөрчлөлт оруулж УИХ-ын Аюулгүй байдал, гадаад бодлогын байнгын хороо, УИХ-ын нэгдсэн хуралдааны анхны хэлэлцүүлгээр оруулж дэмжүүлээд байгаа юм. Хуулийн нэмэлт, өөрчлөлтөөр гамшгаас хамгаалах арга хэмжээг хэрэгжүүлэхэд нэн шаардлагатай зохицуулалтуудыг тусгасан бөгөөд хууль батлагдсанаар Монгол Улсын үндэсний аюулгүй байдал, нийгэм, эдийн засгийн тогтвортой хөгжлийг хангахад чиглэсэн нийгмийн хэвийн үйл ажиллагаа, хүн амын аюулгүй, эрүүл, таатай орчинд амьдрах нөхцлийг бүрдүүлэх эрхзүйн орчин боловсронгуй болох юм гэж онцоллоо.

БЕГ-ын дарга, хошууч генерал Т.Бадрал, өөрсдийн ажиллаж, амьдрах орчин, нөхцлөө сайжруулахад идэвхи, санаачлагатай ажиллаж, дотоод нөөц бололцоогоо дайчлан ажлын байрны тохижилт, өнгө үзэмжийг сайжруулахад анхаарч ажиллахыг ангийн удирдлага, алба хаагчдад үүрэг болголоо гэж Онцгой байдлын ерөнхий газраас мэдээллээ.