Month: May 2020

Улс төрийн хилс хэрэгт хэлмэгдэгчдийг цагаатгах ажлыг удирдан зохион байгуулах Улсын комиссын дарга, УИХ-ын гишүүн Я.Санжмятав, Нийслэлийн Цагаатгах ажлыг удирдан зохион байгуулах салбар комиссын дарга, Нийслэлийн ИТХ-ын дарга Р.Дагва болон албаны хүмүүсийн хамтаар уулзлаа. Уулзалтаар хэлмэгдэгчдийг цагаатгах ажлын явц, цаашид авч хэрэгжүүлэх ажлуудаа төлөвлөн ярилцсан байна.

Энэ үеэр Цагаатгах ажлыг удирдан зохион байгуулах Нийслэлийн салбар комиссын нарийн бичгийн дарга М.Халтар “2018 онд Цагаатгалын хуульд орсон өөрчлөлттэй холбоотойгоор хамрагдаж чадахгүй байгаа иргэд ихэвчлэн хандаж байна. Тэд лавлагаа мэдээллээ авах, тусламж дэмжлэг, тэр дундаа орон сууцны тусламж дэмжлэг хүсэж байгаа асуудал нэлээн байгаа. Бид Нийслэлийн орон сууц корпорацтай цагаатгалын ажлын шугамаар гэж ярилцаад шилжүүлсэн. Энэ хүрээнд гурван хүний орон сууцны асуудлыг шийдвэрлээд байна. Мөн Нийслэлийн цагаатгах ажлыг удирдан зохион байгуулах комисс маань дүүргүүдийнхээ салбар комиссуудтай хамтран ажиллаж байна. Улсын комисс дээр цагаатгах ажлын хүрээнд нөхөх олговор олгох ажлыг хийдэг бол Нийслэлийн комисс маань тусламж дэмжлэг, орон сууцны асуудлыг шийдвэрлэж байгаа. Харин манай дүүргүүдийн салбар комисс хэлмэгдэгчдийн төрөл төрөгсдийг хүлээн авч, хүндэтгэл үзүүлэх, хүлээн авах, тэднийг нийгмийн үйлчилгээнд хамруулах зэрэг ажлыг хариуцан ажилладаг” хэмээн Нийслэлийн ажлын явцыг танилцуулсан. Харин Нийслэлийн ИТХ-ын дарга, Нийслэлийн Цагаатгах ажлыг удирдан зохион байгуулах салбар комиссын дарга Р.Дагва цаашид хэлмэгдэгчдийн төрөл төрөгсдөд орон сууцны дэмжлэг үзүүлэх ажлын хүрээнд НОСК-аас хэрэгжүүлж буй “Түрээсийн орон сууц” хөтөлбөрт квот гарган, хамруулах боломжтой хэмээх саналыг хэлж байв.

Мөн уулзалтын үеэр Цагаатгах ажлыг зохион байгуулах Улсын комисс байгуулагдсаны 30 жилийн ой энэ онд тохиож буй тохиож байгаа бөгөөд энэ хүрээнд түүхэнд хэзээ ч мартаж үл болох хар мөр үлдээсэн их хэлмэгдүүлэлтийн үнэн түүхийг залуу хойч үедээ сургамж болгон үлдээх ажлууд хийх ёстойг онцоллоо. Мөн хэлмэгдэгчдийн музей байгуулах саналыг Манба Дацан МУЭСТ-ийн Тэргүүн, Хамба лам Д.Нацагдорж гаргасныг дэмжсэн юм.

Дашрамд дуулгахад, Улс төрийн хилс хэрэгт хэлмэгдэгчдийг цагаатгах тухай хууль анх 1998 онд батлагдаж байв. Түүнээс хойш хорин жилийн хугацаанд 32 мянга орчим иргэнийг цагаатгаж, дийлэнх хэсэгт нь нөхөх олговор олгосон байдаг. Тэгвэл 2018 оны нэгдүгээр сард тус хуульд нэмэлт, өөрчлөлт оруулж, тухайн үед хилс хэргээр цаазлуулсан болон шоронд хоригдож байсан хэлмэгдэгчдэд 40-80 сая төгрөг олгохоор шийдвэрлэн, ажиллаж байна.

Автомашин зогсоол дээрээс хулгайлсан этгээдүүдийг илрүүлжээ. Өнгөрсөн сарын 19-20-нд шилжих шөнө Баянгол дүүргийн 13 дугаар хорооны 1-р байрны хойд талын ил зогсоол дээрээс 2719 УБӨ улсын дугаартай Тоёота Пробокс маркийн автомашин хулгайд алдсан гэх мэдээлэл Цагдаагийн байгууллагад ирсэн байна.

Мэдээллийн дагуу тус дүүргийн хэлтсийн Эрүүгийн цагдаагийн тасгийн алба хаагч нар шуурхай эрэн сурвалжлан 2719 УБӨ улсын дугаартай Тоёота Пробокс маркийн автомашиныг тавдугаар сарын 7-ны өдөр Чингэлтэй дүүрэг 16 дугаар хороо Согоотын 905 дугаарын хашааны үүднээс олжээ.

Тээврийн хэрэгслийг хулгайлсан этгээдүүд нь гэр бүлийн харилцаатай 27, настай,эрэгтэй Н.Ч , 32 настай, эмэгтэй Э.У нар нь бүлэглэн үйлдэж уг автомашины арлын дугаарыг өөрчлөн зарж борлуулах зорилготой байсан нь шалгалтын явцад тогтоогдсон байна.

Мөн хэргийн үзлэгээр эзэмшигч нь тодорхойгүй 97-82 УНД, 73-85 УНО, 07-21 УБӨ, 24-47 УНЗ , 50-93 УНЛ 25-28 УНЛ, 98-09 УНТ улсын дугаарууд хураагдсан ба эдгээр номерууд нь хулгайд алдагдсан тээврийн хэрэгсэл байж магадгүй байх тул холбогдох шалгалтын ажиллагааг үргэлжлүүлэн явуулж байна гэж Тээврийн цагдаагийн албанаас мэдээллээ.

Терроризмтой тэмцэх зөвлөл улирал тутамд хуралдаж дээрх хугацаанд хийж хэрэгжүүлсэн ажлыг гишүүдэд тайлагнадаг. Мөн цаг үеийн болон болзошгүй терроризмын аюул, эрсдэлээс урьдчилан сэргийлэх асуудлуудыг хэлэлцдэг уламжлалтай. Тодруулбал, тус зөвлөлийг Тагнуулын ерөнхий газрын дарга тэргүүлж, бүрэлдэхүүнд төрийн 19 байгууллагын удирдлагууд багтдаг.
Өнөөдөр тус зөвлөлийн 2020 оны хоёрдугаар улирлын ээлжит хуралдаан боллоо. Хуралдаанаар гурван асуудлаар танилцуулга хийж, дөрвөн асуудлыг хэлэлцэн шийдвэрлэв. Тухайлбал, тагнуулын байгууллагаас зэвсэг дэлгэрүүлэх, терроризмтой тэмцэх чиглэлээр хийсэн ажлын тайлан, “Терроризмтой байгууллагын санхүүжилт”, түүний эх үүсвэр, тэмцэх асуудал, “Террорист этгээдийн харилцаа холбоонд гарч буй өөрчлөлт, чиг хандлага” зэрэг сэдвээр мэдээлэл танилцуулга хийсэн байна. Одоогоор манай улсад терроризмтой холбоотой зөрчил гараагүй хэдий ч зөвлөлийн үйл ажиллагаа нь ирээдүйд учирч болох эрсдэл, эмзэг сул байдлыг олж тогтоох, түүнээс урьдчилан сэргийлэх чиглэлд түлхүү ажиллаж байгааг Терроризмтой тэмцэх зөвлөлийн Нарийн бичгийн дарга Л.Энхбаяр онцоллоо.

ХӨВСГӨЛ АЙМГИЙН ЗАСАГ ДАРГА Л.ГАНБОЛД ТАНАА

2020 оны 5 дугаар сарын 15-ны өдөр

Мэдэгдэл хүргүүлэх тухай

Монгол Улсын Үндсэн хууль, Монгол Улсын хэвлэлийн эрх чөлөөний тухай хуулиар хэвлэн нийтлэх эрх чөлөөг баталгаажуулсны дагуу Монголын өдөр тутмын сонин “Өдрийн сонин” үйл ажиллагаагаа явуулж байна.

Монгол Улсын Их хурлаас 2005 оны 10 дугаар сарын 27-ны өдөр Авилгалын эсрэг НҮБ-ын Конвенцийг соёрхон баталснаар Конвенцид нэгдэн орсон бөгөөд Авлигын эсрэг тухай хууль 2006 онд баталсан болно.

Авилгалыг устгах нь бүх улсын хариуцлага байдаг бөгөөд иргэний нийгэм, төрийн албанд үл хамаарах хувь хүн, байгууллагын дэмжлэг оролцоотойгоор Ард түмний мөнгийг өөрийн болгож байгаа албан тушаалтнуудтай Монгол Улс тэмцэж байна.

Монголын хэвлэл мэдээллийн хэрэгслэлүүд ч Авлигатай тэмцэхэд тэргүүн эгнээнд явж байгаа гэдгийг Монголын иргэд өнөөдөр ойлгодог болсон бөгөөд “Өдрийн сонин” ч хувь нэмрээ оруулан тэмцэж байгааг гэдгийг хариуцлагатайгаар мэдэгдэе.

Авлигатай тэмцэхэд нийгмийн идэвхитэй оролцоо нэн шаардлагатай бөгөөд авилгал оршиж байгаа, түүний үүсэх шалтгаан, цар хүрээ, учруулж аюул, хор уршигийг олон нийтэд ойлгуулан олон нийт, уншигчдаа мэдээлэл авах боломжийг бүрдүүлэх нь Өдрийн сонины нийгмийн өмнө хүлээсэн хариуцлага гэж үзэж байна.

Авилгалтай холбоотой мэдээлэл эрэх, авах, хэвлэн нийтлэх эрхийн хүрээнд “Өдрийн сонин” 2020 оны 4 дүгээр сарын 21-ний өдөр “Хөвсгөл аймгийн Засаг дарга Л.Ганболдыг авлига, хээл хахуулийн хэрэгт АТГ-аас шалгаж эхэлжээ.” мэдээллийг нийтэлсэн бөгөөд Таны тус сонинд ирүүлсэн хүсэлтэд хариу өгөх зорилгоор “Батжин ундрах” компанийн захирал Ө.Батцэнгэлтэй ярилцлагыг хийж нийтэлсэн түүнийгээ аудио бичлэгээр хуулийн дагуу баталгаажуулсан гэдгийг албан ёсоор мэдэгдэж байна.

“Өдрийн сонин” Авлигатай тэмцэх нийгмийн оролцоог хангах, уншигчдаа аливаа худал, мэдээллийг нийтлээгүй гэдгийг албан ёсоор хариуцлагатайгаар мэдэгдэе.

“Өдрийн сонин”-г аливаа худал мэдээлэл тараасан мэтээр, хууль шүүхийн бус журмаар аливаа цахим хэлбэрээр мэдээлэл тарааж байгааг бид анхааралтай ажиглаж байгаа бөгөөд энэ байдлаа өнөөдөр таслан зогсоогүй бол “Өдрийн сонин” өөрөө хууль, шүүхийн байгуулагад хандаж үнэн зөвийг тогтоолгох болно.

Хувийг: “Батжин ундрах” компанийн захирал Ө.Батцэнгэлд

МОНГОЛЫН ӨДӨР ТУТМЫН СОНИН-ӨДРИЙН СОНИН

Нийслэлийн Засаг даргаас 2020 оныг “Нэг хот-Нэг стандарт’’ зорилтот жил болгон зарласантай холбогдуулан Нийслэлийн нутгийн захиргааны болон харьяа байгууллагуудын ажлыг эрчимжүүлэх, арга зүйн зөвлөгөө өгөх ажлыг Нийслэлийн Засаг даргын тамгын газар, Хотын стандарт, орчны аюулгүй байдлын хяналт зохицуулалтын газартай хамтран зохион байгууллаа. Энэхүү арга хэмжээг 2 ангилалаар зохион байгуулсан юм. Үүнд:

Нийслэлийн 9 дүүргийн Засаг даргын Тамгын газрын удирдах түвшний 107 албан хаагчдад 04 -р сарын 27-оос 05-р сарын 01-ны өдрүүдэд зохион байгуулсан мэргэжил, арга зүйн зөвлөгөөнд Нийслэлийн Засаг даргын 2020 оны “Хотын стандартын баримт бичгийг мөрдүүлэх тухай” А/456 дугаар захирамжаар батлагдсан 14 төрлийн хотын стандарт, техник зохицуулалтын баримт бичгийн агуулга, ач холбогдол, түүнийг худалдан авах ажиллагаа, хөрөнгө оруулалтын төсөл, арга хэмжээнд хэрхэн ашиглах, төсвийн хөрөнгөөр хэрэгжүүлж буй хот тохижилт, нийтийн аж ахуйн ажил, үйлчилгээний чанар, стандартыг хангуулах талаар цогц ойлголт өгч ажиллалаа. Дараагийн ангилалд Нийслэлийн Засаг даргын хэрэгжүүлэгч агентлаг, харьяа 31 байгууллагын 85 хэлтсийн дарга, удирдах албан хаагчдад 2020 оны 05 сарын 12, 13-ны өдрүүдэд 4 ээлжээр хэсэгчилэн сургалт, арга зүйгээр хангах арга хэмжээг Улаанбаатар инновацийн төвд зохион байгууллаа. Энэхүү сургалт нь дараах агуулгын дагуу явагдав.

• Чанарын удирдлагын тогтолцоо- ISO 9001:2015 стандартыг нэвтрүүлэх ач холбогдол
• Хотын стандартын баримт бичгийн тогтолцоо
• Цахим системд /www.manaikhoroo.mn/ оруулж буй зөрчлийн мэдээлэл, түүний шийдвэрлэлт
• Хот байгуулалтын дундын мэдээллийн сангийн ашиглалт, хэрэглээ
• “Зорилтот жилийн төлөвлөгөөнд тусгагдсан арга хэмжээний биелэлтийг үнэлэх талаар” сэдвүүдээр илтгэл, харилцан яриа асуулт хариулт, туршлага солилцох хэлбэрээр үргэлжилсэн юм.

Сургалтад оролцогчдод нэг удаагийн бээлий, амны хаалт, гар ариутгагч зэргээр үйлчилж Шинэ коронавирус (Covid-19)-ын халдвараас сэргийлэх аюулгүй байдлыг хангаж ажиллав.

Нийслэлийн Засаг дарга бөгөөд Улаанбаатар хотын Захирагч С.Амарсайхан тэргүүтэй албаныхан Их Тэнгэрийн амнаас зүүн зүгт байрлах Туул голын хойд хэсэг дагуух нурж орхигдсон хашаатай газруудаар явж ажиллалаа.

Хан-Уул дүүргийн 11 дүгээр хорооны нутаг дэвсгэр буюу Зайсан толгойн зүүн хэсэгт туслах зам дагуух явган хүний замыг сүйтгэж, хашаа татсан барилгын хашааг буулгаж цэгцлэх үүргийг хотын Захирагч С.Амарсайхан Газар зохион байгуулалтын алба болон Улаанбаатар хотын Захирагчийн ажлын албанд үүрэг өглөө.

Хотын Захирагч С.Амарсайхан хэлэхдээ “Нийтийн эзэмшлийн гудамж талбайг сүйтгэж барилгын хашаа татсан асуудлыг яаралтай цэгцлэх хэрэгтэй. Салхи шуурганд хийсч улмаар хүний амь нас, эрүүл мэнд, эд хөрөнгөд хохирол учруулах эрсдэлтэй хашаануудыг буулгаж, холбогдох эзэдтэй нь холбогдож стандартын дагуу аюулгүй байдлыг хангасан хашаа татах ажлыг Хотын стандарт, орчны аюулгүй байдлын хяналт зохицуулалтын газар хариуцаж ажилла. Цаг агаарын аюултай үзэгдэл болохыг сануулж байхад иргэдийн аюулгүй байдлыг сайтар хангах хэрэгтэй. Зайсангийн туслах зам дагуух нурсан, далийсан, өнгө үзэмжгүй хотын стандарт хангаагүй эдгээр олон хашаануудыг аж ахуйн нэгжүүдтэй нь холбогдож яаралтай буулгаж стандартын шаардлагад нийцсэн хашаа хороо татах ажлыг яаралтай эхлүүл. Нийтийн эзэмшлийн талбайг сүйтгэж хашаа татсан аж ахуйн нэгжүүдийг явган хүний зам талбайг нөхөн сэргээх, тохижилтын ажлыг яаралтай хийлгэхийг үүрэг болго. Барилга барих нэрийдлээр явган хүний зам талбайг эвдэлж болохгүй” гэдгийг санууллаа.

Мөн барилгын ажлыг эхлүүлэхдээ норм стандартыг дагаж мөрдөөгүй аж ахуйн нэгжүүдэд стандартын дагуу хамгаалалтын хашааг татаж, нийтийн эзэмшлийн гудамж талбайг нөхөн сэргээж тохижуулах хугацаат үүрэг өгч ажиллахыг Захирагчийн Ажлын алба, Хотын стандарт, орчны аюулгүй байдлын хяналт зохицуулалтын газрын дарга нарт даалгаж, хяналт тавьж ажиллахыг үүрэг болголоо.

1993 онд Нэгдсэн Үндэсний байгууллагын Ерөнхий Ассамблейгаас Олон улсын гэр бүлийн өдрийг тэмдэглэн өнгөрүүлэх шийдвэр гаргаснаар энэхүү өдрийг анх 1994 оны тавдугаар сарын 15-нд тэмдэглэж эхэлсэн.

Олон улсын гэр бүлийн өдөр нь дэлхийн хүн ам зүйн хөгжил, гэр бүлийн аз жаргал, бат бэх байдал, нийгэм эдийн засаг дахь гэр бүлийн оролцоог олон нийтэд сурталчилдаг ач холбогдолтой өдөр юм.

Монгол Улс 17 дахь жилдээ энэхүү өдрийг тэмдэглэж байна. Олон Улсын гэр бүлийн өдрийг тохиолдуулан Нийслэлийн гэр бүл, хүүхэд залуучуудын хөгжлийн газраас “Удам судраа мэдэж, угийн бичгээ хөтөлцгөөе” уриа дор дараах үйл ажиллагаануудыг зохион байгуулж байна. Үүнд:

• Монголчуудын үндэсний өв соёл болсон угийн бичгийг түгээн дэлгэрүүлэх, хүүхэд залуус хойч үедээ өвлүүлэх, хөтлүүлэх замаар хүн амын удмын санд учирч болзошгүй сөрөг нөлөөллийг арилгах, цус ойртолтоос урьдчилан сэргийлэх, үндэсний аюулгүй байдлыг хамгаалах зорилгоор угийн бичгийн тухай, түүнийг хэрхэн хөтлөх, угийн бичгийн талаарх өөрийн мэдлэгийг сорих асуулга, зөвлөмжийг боловсруулан олон нийтэд түгээн ажиллаж байна.
• 9 дүүргийн хэмжээд Угийн бичиг хөтөлдөг, хүүхэд залуус, хойч үедээ өвлүүлэх, хөтлүүлэхэд зааж сургахад үнэтэй хувь нэмрээ оруулж байгаа шилдэг 27 гэр бүлийг шалгаруулан урамшуулж байна.
• Удам судраа мэдэж Угийн бичгээ хөтөлцгөөе уриалгыг өрнүүлж 9 дүүргийн ГБХЗХХ-ээр дамжуулан цахим давлагааг үүсгээд байна.
• Ковид 19 цар тахлын үед гэр бүлд зориулсан мэдээ мэдээллийг хүргэх зорилгоор Нийслэлийн Гэр бүл, хүүхэд, залуучуудын хөгжлийн газрын дэргэдэх Гэр бүлийн зөвлөгөө боловсрол онол аргазүйн төвөөс Олон улсын Улаанбаатар их сургуулийн Гэр бүл судлалын тэнхимийн багш нартай хамтран Олон нийтийн гэр бүлийн боловсролд зориулсан 24 удаагийн цахим хичээлийг хүргэхээр бэлтгээд байна. Гэр бүлд тулгардаг асуудал бүрийг энгийнээр шийдвэрлэх талаар болон гэр бүлийн боловсролд тань мэдлэг нэмэхээр мэргэжлийн багш нар та бүхэнд зөвлөх юм.
• Жил бүр уламжлал болгон зохион байгуулдаг ХХI-р зууны Монгол гэр бүл” эрдэм шинжилгээний бага хурлыг цахим байдлаар зохион байгуулахаар бэлтгэл ажлыг хангаж байна. 05 дугаар сарын 15-ны 13:00 цагаас энэхүү эрдэм шинжилгээний хурлын мэдээллийг Гэр бүлийн зөвлөгөө боловсрол, онол арга зүйн төвөөс шууд хүргэх юм.

Нийслэл хотынхоо 380,000 өрх гэр бүлд Олон улсын гэр бүлийн өдрийн мэнд хүргэе.