Month: March 2020

Хаврын улирал эхэлж байгаатай холбогдуулан шар усны үерээс урьдчилан сэргийлэх ажлын хүрээнд авч хэрэгжүүлэх ажлын талаар өнөөдөр Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр, нийслэлийн Онцгой байдлын газрын дэд дарга Э.Эрдэнэбаатар, ЗАА-ны хотын Инженерийн байгууламжийн хэлтсийн дарга Т.Хэрлэн, Геодизи усны барилга байгууламжийн газрын дарга Т.Цэрэнноров мэдээлэл хийлээ.

Нийслэлийн Онцгой комиссын 01 дүгээр албан даалгаварыг хэрэгжүүлэх ажлын хүрээнд Улаанбаатар хотын Ерөнхий менежерийн тушаалаар байгуулагдсан ажлын хэсэг шар усны үерээс урьдчилан сэргийлэх төлөвлөгөөт ажлыг хэрэгжүүлж байна.

Одоогийн байдлаар Чингэлтэй дүүргийн 10,11,12,14 дүгээр хороод, Дэнжийн мянгын 1,2,3,4 дүгээр үерийн далангийн сувгууд, Сонгинохайрхан дүүргийн 40 дүгээр хороо болон 27 хорооны Толгойт хэсэг, Баянзүрх дүүргийн 9,13,14,22 дугаар хороодын далан сувгууд, Сүхбаатар дүүргийн 14 дүгээр хороо гэх мэт нийслэлийн хэмжээнд нийт 15 хороодод халиа дошин үүссэн нөхцөл байдалтай байна. Дээрх хороодод хөрсний уснаас үүссэн халиа дошинг холбогдох мэргэжлийн албад хэвийн болгож ажиллаж байгаа аж.

Ийнхүү жил бүр хөрсний уснаас халиа дошин үүсч байгаа учир шалтгааныг нарийвчлан тогтоохоор холбогдох эрдэм шинжилгээний байгууллагууд, их дээд сургуулийн эрдэмтэдтэй хамтран ажиллаж байгаа талаар Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр дуулгалаа.

Шар үерийн уснаас урьдчилан сэргийлэх хүрээнд Захирагчийн ажлын албаны хотын Инженерийн байгууламжийн хэлтээс далан сувгуудын нэвтрэх чадварыг сайжруулах, ариутгал халдваргүйжүүлэлтийн ажлуудыг хийж эхэлсэн байна. Мөн нийслэлийн хэмжээнд 53 байршилд 148 км үерийн хамгаалалтын барилга байгууламжид хяналт тавьж байгаа аж.

НҮБ-ын санхүүжилтээр хэрэгжиж буй “Улаанбаатар хотын гэр хорооллын үерийг даван туулах чадавхыг бэхжүүлэх” төслөөр халиа дошин ихээр үүсээд буй Сонгинохайрхан, Баянзүрх, Сүхбаатар дүүргийн 10 хороодод үерийн усны далан суваг барихаар болжээ. Одоогийн байдлаар далан суваг барих,хөрсний болон булгийн усыг зайлуулах талаарх шугам зургийг баталгаажуулж, Автозамын газартай трассны асуудлаар зөвшилцөж байгаа талаар ЗАА-ны хотын Инженерийн байгууламжийн хэлтсийн дарга Т.Хэрлэн мэдээллээ.

Нийслэлийн Онцгой байдлын газраас болзошгүй эрсдлээс урьдчилан сэргийлэх чиглэлээр иргэдд сэрэмжлүүлэг мэдээ мэдээллийг хүргэж, халиа дошин ихээр үүссэн газруудад ажиллаж байна. Урин дулааны улирал эхэлж байгаатай холбогдуулан болзошгүй эрсдлээс урьдчилан сэргийлэх гамшгаас хамгаалах мэргэжлийн албад томилгоот бүрэлдэхүүний бэлэн байдлыг хангаж, үерийн аюулд өртөж болзошгүй айл өрхүүдийн судалгааг гаргаж урьдчилан сэргийлэх арга хэмжээг авч ажиллаж байгаа талаар нийслэлийн Онцгой байдлын газрын дэд дарга Э.Эрдэнэбаатар хэллээ.

Урин дулааны улирал эхэлж байгаатай холбогдуулан иргэдийг сонор сэрэмжтэй байж, болзошгүй эрсдлээс урьдчилан сэргийлэхийг албаныхан сэрэмжлүүллээ.

Он гарсаар Онцгой байдлын байгууллагын алба хаагчид гол, нуурын мөс цөмөрч автомашинтай живсэн гэсэн 12 удаагийн дуудлагаар ажиллаж, 23 иргэний аюулгүй байдлыг ханган ажиллалаа.

Харин Цаг уурын байгууллагын ирүүлсэн мэдээллээр гуравдугаар сарын нэгдүгээр арав хоногийн байдлаар манай орны ихэнх гол, мөрөн, нуурын мөсний зузаан төдийлөн өөрчлөгдөөгүй хэдий ч зарим голуудад мөс харлах, мөс байрандаа хайлах, усан зах үүсэх, харз гүйх зэрэг үзэгдэл ажиглагдаж мөсний зузаан өмнөх арав хоногийнхоос 5-20 см нимгэрсэн байна.

Цаашид цаг агаарын дулааралтай уялдан гол мөрний мөс хайлж, мөсний нягт багасан хэврэгших тул цаг хожих, зам товчлох зэргээр мөсөн дээгүүр явах болон авто тээвэр хийхгүй байх, бага насны хүүхдийг гол, мөрөн, нуурын мөсөн дээр тоглуулахгүй байж болзошгүй эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.

Hийслэлийн гэмт хэргээс урьдчилан сэргийлэх зохицуулах зөвлөлийн дарга, НИТХ-ын дарга Р.Дагва нийслэлийн Онцгой байдлын газарт явуулын хоёр ажлын байрыг өгөх шийдвэр гаргажээ.

Ингэснээр халдварт өвчний хөл хориотой үед өдөр, шөнөгүй ажиллаж буй цагдаа, онцгой байдал, мэргэжлийн хяналтын албан хаагчдын ажиллах нөхцөл эрс сайжирч байгаа юм. Энэхүү явуулын ажлын байр нь давхар дулаалгатай хаалгатай, паркетан шалтай, хоёр давхар шилэн цонхтой, ачиж тээвэрлэх зориулалтай эвхэгддэг шат, чиргүүл бүхий эд ангиудтай.

Мөн компьютерийн иж бүрэн хэрэгсэл болон зургийн аппарат, гадна камер, сүлжээ цацах төхөөрөмж зэрэг ажлын байрны бүхий л шаардлагыг хангасан учраас албан хаагчид Шуурхай удирдлагын төвтэй интернэтээр шууд холбогдож, зөрчлийг цаг алдалгүй шийдвэрлэх боломжтой болжээ. Түүнээс гадна албан хаагчдын ээлжээр амрах боломжийг хангаж, эвхэгддэг ор, телевиз, халаагуур, ус буцалгагч, ханын шүүгээ, сандал, агааржуулагч, цахилгаан зуух болон гал тогооны хэрэгслийг байрлуулсан байна.

Өнөөдөр МУ-ын Шадар сайдын зөвлөх С.Янжинсүрэн, ШӨХТГ-ын дарга Б.Лхагва болон бусад холбогдох албаны хүмүүс, удирдлагууд “Хэрэглэгчийн утас -115” -ны албан ёсны нээлтийг хийлээ.

Шударга өрсөлдөөн, хэрэглэгчийн төлөө газар нь 2016 оны 12 дугаар сард иргэд, хэрэглэгчдэд мэдээ, мэдээлэл өгөх, сургалт зохион байгуулах, бусад аж ахуй эрхлэгчдийн хэрэглэгчийн үйлчилгээний төвүүдтэй нэгдсэн системд холбогдох, мөн хэрэглэгчдээс ирүүлсэн өргөдөл, гомдол, санал, хүсэлтийг түргэн шуурхай шийдвэрлэх оновчтой механизмыг бүрдүүлэх зорилгоор “Хэрэглэгчийн мэдээллийн 1284” төвийг байгуулж байсан.

Тус төв нь үүсэн байгуулагдсанаас хойш буюу 2017-2020 оны 2 дугаар сар хүртэлх хугацаанд нийт 8469 иргэд, хэрэглэгчийн өргөдөл, гомдол, санал хүсэлтийг 1800-1284 утсаар болон биечлэн хүлээн авч шуурхай шийдвэрлэн 96 090 500 төгрөгний мөнгөн хохирлыг барагдуулан ажиллаж байна.
Олон улсын хэрэглэгчийн өдрийг угтан бид бүхэн “Хэрэглэгчийн мэдээллийг төв”-ийн үйл ажиллагааг өргөжүүлж иргэд, хэрэглэгчиддээ улам илүү хүрч ажиллах үүднээс “Хэрэглэгчийн утас -115” төлбөргүй ярианы дугаарыг албан ёсоор ажиллуулж байна.

Иргэд, хэрэглэгчид, аж ахуйн нэгж, байгууллагууд “Хэрэглэгчийн утас-115” дугаарлуу ямар ч харилцаа холбооны операторын дугаараас үнэ төлбөргүйгээр ШӨХТГ-ын хууль тогтоомжоор хүлээсэн чиг үүргийн хүрээнд буюу худалдаа, үйлдвэрлэл, үйлчилгээ эрхлэгчдийн буруутай үйл ажиллагаа, зах зээлийн шударга бус өрсөлдөөн, хэвлэл мэдээллийн хэрэгслээр улс төрийн чансаа тогтоох, бусдыг гүтгэн доромжлох, хуурамч мэдээлэл тарааснаас, өрсөлдөөнд харш үр дагавар үзүүлэх зар сурталчилгаа явуулах, тендерийн баримт бичигт өрсөлдөөнийг хязгаарласан зөрчил гаргасан зэрэг асуудлаар гомдол, санал гаргах боломжтой юм.

Франц иргэнтэй нэг чиглэлээс ирж, тусгаарлагдсан Баян-Өлгий аймгийн Өлгий сумын иргэн “Н” -ийн шинжилгээний хариу сөрөг гарсан тухай аймгийн Эрүүл мэндийн газрын дарга С.Айгүл мэдэгдлээ.

Мөн Увс аймгийн Бөхмөрөн суманд тусгаарлагдаад байгаа Англи иргэн Davison Anthony Derek-ы болон Улаанбаатар-Өлгий-Увс чиглэлийн онгоцоор хамт зорчиж ирсэн иргэдийн шинжилгээний хариу сөрөг гарч, коронавирусний халдвар илрээгүй байна.

Монгол Улсын 2020 оны хоёрдугаар сарын Нийгэм, эдийн засгийн салбарын статистик үзүүлэлтийг өнөөдөр Үндэсний статистикийн хорооноос танилцууллаа.

Нийгмийн салбарын статистик үзүүлэлтүүдээс харвал энэ оны эхний хоёр сард 6,745 гэмт хэрэг бүртгэгдсэн. Энэ нь өмнөх оны мөн үеэс 691 (9.3%)-ээр буурсан үзүүлэлт байна. Харин хоёрдугаар сард бүртгэгдсэн гэмт хэрэг 3,373 болж, өмнөх сараас 101 (2.9%)-ээр буурсан гэдгийг ҮСХ-ны Үндэсний тооцооны шинжилгээ судалгааны газрын ахлах статистикч Н.Өлзийханд онцоллоо.

Тодруулбал, Нийт гэмт хэрэг өмнөх оны мөн үеэс буурахад:

• Хүний бэлгийн эрх чөлөө, халдашгүй байдлын эсрэг гэмт хэрэг 449 (79.8%)
• Хүний эрүүл мэндийн халдашгүй байдлын эсрэг гэмт хэрэг 160 (9.9%)
• Хүний амьд явах эрхийн эсрэг гэмт хэрэг 86 (24.0%), хулгайлах гэмт хэрэг 135 (6.8%)
• Гэр бүлийн хүчирхийлэл үйлдэх гэмт хэрэг 114 (83.2%), хүчиндэх гэмт хэрэг 49 (36.3%)
• Өмчлх эрхийн эсрэг гэмт хэрэг 41 (1.0%) -ээр буурсан нь голлон нөлөөлжээ.

Харин хүрээлэн байгаа орчны эсрэг гэмт хэрэг 101 (2.4 дахин), мал хулгайлах гэмт хэрэг 83 (22.4%), хөрөнгө завших гэмт хэрэг 39 (29.5%)-өөр тус тус өсжээ.

ҮСХ-ны Үндэсний тооцооны шинжилгээ судалгааны газрын ахлах статистикч Н.Өлзийханд үргэлжлүүлэн хэлэхдээ “Гэр бүлийн хүчирхийллийн улмаас үйлдэгдсэн 170 хэргийн 23 (13.5%) нь Монгол Улсын Эрүүгийн хуулийн 11.7 дугаар зүйл (Гэр бүлийн хүчирхийлэл үйлдэх гэмт хэрэг)–ээр зүйлчлэгдсэн. Өөрөөр хэлбэл, гэр бүлийн хүчирхийлэл үйлдэх гэмт хэрэг 2020 оны эхний хоёр сард 23 бүртгэгдсэн нь өмнөх оны мөн үеэс 114 (83.2%)-өөр буурсан үзүүлэлт болсон. Түүнчлэн,

• Согтуугаар үйлдсэн гэмт хэрэг 2020 оны эхний хоёр сард 426 болж, өмнөх оны мөн үеэс 22 (4.9%)-оор
• Мансуурсан үедээ үйлдсэн хэрэг 38 болж, 4 (9.5%)-өөр
• Гэр бүлийн хүчирхийллийн улмаас үйлдэгдсэн хэрэг 170 болж, 155 (47.7%)-аар
• Бүлэглэн үйлдсэн хэрэг 294 болж, 5 (1.7%)-аар
• Хүүхэд оролцсон хэрэг 64 болж, 19 (22.9%)-өөр тус тус буурсан.

Харин эмэгтэй хүн оролцсон хэрэг 540 болж, 128-аар буюу 31.1%-аар өссөн байна” гэлээ.

Ийнхүү гэмт хэргийн улмаас учирсан хохирол 2020 оны эхний хоёр сард 34.1 тэрбум төгрөг болж, нөхөн төлүүлсэн хохирлын хэмжээ 2.6 тэрбум төгрөг болжээ. Энэ нь өмнөх оны мөн үеэс учирсан хохирол 1.2 (3.5%) тэрбум төгрөгөөр, нөхөн төлүүлсэн хохирол 5.0 (65.4%) тэрбум төгрөгөөр буурсан үзүүлэлт болсон аж.

Нэмж дуулагахад гэмт хэргийн улмаас 2020 оны эхний хоёр сард хохирсон 6,517 хүн байгаагаас

• 36 (0.6%) нь 7 хүртэлх насных
• 228 (3.5%) нь 8-17 насных
• 1,619 (24.8%) 18-29 насных
• 2,052 (31.5%) нь 30-39 насных
• 1,405 (21.6%) нь 40-49 насных
• 1,177 (18.0%) нь 50, түүнээс дээш насных байгаа юм.

Мөн улсын хэмжээнд 2020 оны эхний хоёр сард 17.4 мянган хүн эрүүлжүүлэгдэж, 2.2 мянган хүн баривчлагдсан нь өмнөх оны мөн үеэс эрүүлжүүлэгдсэн хүн 2.3 (11.9%) мянгаар буурч, харин баривчлагдсан хүн 659 (43.5%) -өөр өссөн байна.

Нийслэлийн Засаг даргын 2020 оны 03 дугаар сарын 10-ны өдрийн “Иргэдийн эрүүл мэндийг хамгаалах талаар авч хэрэгжүүлэх арга хэмжээг эрчимжүүлэх тухай” А/333 дугаар захирамжийн хүрээнд НМХГ-аас 350 улсын /ахлах/ байцаагч албан хаагчид 2020 оны 03 дугаар сарын 11,12-ны өдрүүдэд хяналт тавин ажиллаж байна.

Нийслэлийн 9 дүүргийн худалдаа, үйлчилгээний 3877 аж ахуйн нэгж байгууллага, иргэний үйл ажиллагаанд хяналт шалгалт хийж “Сovid-19 халдвараас гэр бүл, албан ажлын хүрээнд хэрхэн сэргийлэх, ариутгал, халдваргүйжилт яаж хийх зэрэг зөвлөмж мэдээлэл өглөө.

Гүйцэтгэлийн хяналт шалгалтаар СХД-ийн 32-р хороонд байрлах “Эвэрдигм Монголиа” ХХК–ийн авто засварын газар хаалгаа цоожлон дотроо 16 ажилтан ажиллуулаж байсан зөрчилд Гамшгийн тухай хуулийн холбогдох заалтыг үндэслэн 1 сая 500 мянган төгрөгийн шийтгэл ногдуулсан гэж НМХГ-аас мэдээллээ.

“COVID19” халдвартай франц иргэний хамт онгоцоор ниссэн, галт тэргээр зорчсон, гар барьсан зэрэг нэг, хоёрдугаар хавьтлын 207 хүний шинжилгээний хариу “сөрөг” буюу халдваргүй гарсныг Засгийн газрын Хэвлэл мэдээлэл, олон нийттэй харилцах хэлтсээс өнөөдөр мэдээлэв.

Тодруулбал, өчигдөр буюу энэ сарын 12-ны 15.00 цагийн байдлаар 149 хүний шинжилгээний хариу “сөрөг” гараад байсан бол өнгөрсөн шөнө 58 хүний шинжилгээний хариу “сөрөг” гарсан байна. Үүнд Увс аймгийн Бөхмөрөн сумын Ямаатын аманд тусгаарласан, Английн иргэнээс авсан сорьцын хариу мөг багтаж байгаа аж.

БНСУ-аас яаралтай нутаг буцах хүсэлтэй иргэдийг тусгай нислэгээр эх орондоо авч ирэхээр болсонтой холбогдуулан Улсын онцгой комиссын Шуурхай штабаас гаргасан шийдвэрийн дагуу, бэлтгэл ажлын хүрээнд иргэдэд дараах мэдээллийг хүргүүлж байна.

1. Тусгай нислэгээр эх орондоо ирэх хүсэлт гаргасан иргэд БНСУ-даа коронавируст халдварын шинжилгээнд заавал орсон байх шаардлагатай.
2. Иргэдийг 14 хоног тусгаарлах байр, хоолны зардал хоногийн 50000 төгрөг буюу нийт 700000 төгрөг,

Дотоод хэргийн их сургуулийн оюутны байранд /цэргийн хуарангийн зохион байгуулалттай байр/ тусгаарлагдах бол 40000 төгрөг буюу нийт 560000 төгрөг

0-5 настай хүүхэд төлбөргүй, 6-18 настай хүүхэд хоногийн 30000 төгрөг буюу нийт 420000 төгрөгийн төлбөр төлнө.

Дээрх төлбөрийг БНСУ-аас ирэх иргэний ар гэрийнхэн нь Монголд, Онцгой байдлын ерөнхий газрын /ХААН БАНК 5084538375/ дансанд урьдчилан шилжүүлж, төлбөрийг бүрэн барагдуулсны дараа онгоцны суудлыг баталгаажуулна.

Төлбөр хийхдээ тухайн иргэний ОВОГ, НЭР, РЕГИСТРИЙН ДУГААР болон БАЙРНЫ ТӨЛБӨР гэдгийг заавал тодорхой бичихийг анхаарна уу.

Төлбөр хийгээгүй тохиолдолд бүртгэлээс хасч, төлбөрөө төлсөн дараагийн иргэнийг онгоцонд суулгана.

1. Сөүлээс эхний нислэгээр ирэх бүх зорчигчийг Дотоод хэргийн их сургуулийн оюутны байранд /цэргийн хуарангийн зохион байгуулалттай байр/ тусгаарлана. Цагаан хэрэглэл, ариун цэврийн хэрэгсэл болон ойр зуурын хэрэглээний эд зүйлсийг Улаанбаатарт байгаа ар гэр нь урьдчилан бэлтгэж, нислэгээс өмнө дээрх байранд хүргэж өгсөн байна.
2. Нийт зорчигчийн ачааг нисэх буудлаас ар гэрийнхэн нь ирж авна. Тухайн зорчигч зөвхөн гар тээштэйгээ тусгаарлах байранд шууд очно.
3. Эрүүл мэндийн хүндэтгэн үзэх шалтгаантай иргэдийн өвчний талаарх мэдээлэл, тухайн иргэний Монголд байгаа ар гэртэй холбоо барих мэдээллийг ЭСЯ–наас 2020 оны 3 дугаар сарын 13-ны өдрийн дотор Улсын онцгой комиссын шуурхай штабт ирүүлнэ.
4. Тусгай нислэгээр нутаг буцах иргэд эрүүл мэндийн асуумжийг санаатайгаар худал бөглөх, халдварт өвчтэйгөө нуух, улмаар бусдад халдаасан тохиолдолд Монгол Улсын Эрүүгийн хуулийн 15.6 дугаар зүйлд заасан “Бусдын амь насанд аюул учруулж болзошгүй халдварт өвчин, дархлал хомсдолын вирус халдаах” гэсэн үндэслэлээр 1-5 жил хүртэл хугацаагаар хорих ял шийтгэх заалттайг анхаарна уу.
5. Коронавирусын халдвар дэлхийн 100 гаруй улсад тархсантай холбоотойгоор Дэлхийн эрүүл мэндийн байгууллагаас цар тахал хэмээн зарласан. Монгол Улс өндөржүүлсэн бэлэн байдалд шилжин ажиллаж байгаа тул Улсын онцгой комиссын шуурхай штабаас гаргасан шийдвэр, шаардлагуудыг Монгол Улсын иргэд хатуу мөрдөж биелүүлэх шаардлагатай.

Жич: Холбогдох мэдээллийг 18001105, 51-262022 тоот утаснаас лавлах боломжтой.

УЛСЫН ОНЦГОЙ КОМИССЫН
ШУУРХАЙ ШТАБ