Month: March 2020

Нийслэлийн Хэвлэл мэдээллийн төвд долоо хоног бүрийн даваа, пүрэв гарагт сайжруулсан шахмал түлштэй холбоотой цаг үеийн асуудлаар албаныхан мэдээлэл өгдөг. Өнөөдөр НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй, НМХГ-ын Агаарын чанарын хяналтын хэлтсийн дарга Н.Шинэ-Оргил, НЗДТГ-ын Хэвлэл мэдээлэлтэй харилцах хэлтсийн дарга Ц.Мөнхбаатар, НЭМГ-ын Нийгмийн эрүүл мэндийн хэлтсийн дарга О.Энхзаяа, Агаарын бохирдолтой тэмцэх газрын хэлтсийн дарга Г.Даваажаргал нар цахимаар мэдээлэл хийлээ.

НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй “Өнгөрсөн гурав хоногийн хугацаанд Яаралтай түргэн тусламжийн төвд угаарын хийнд хордсон нийт долоон өрхийн 22 иргэн хандаж, эмнэлгийн тусламж үйлчилгээг авч, нэг иргэн Улсын төв нэгдүгээр эмнэлэгт хэвтэн эмчлүүлж байна. Нийслэлийн иргэдийг угаарын хийн хордлогоос урьдчилан сэргийлэх ажлын хүрээнд гуравдугаар сарын 27-29-ний өдрүүдэд төвийн зургаан дүүрэгт нийт 64999 угаарын хий мэдрэгч тараахаас 57105 ширхэгийг айл өрхүүдэд суурилуулан 87.9 хувийн гүйцэтгэлтэй ажиллаж байна. Коронавирусийн халдвараас урьдчилан сэргийлэх хүрээнд угаарын хий мэдрэгчийг тараахдаа олон хүн бөөгнөрүүлэхгүй байх үүднээс айл өрхүүдэд нэгбүрчилэн очиж тарааж байна. Мөн зуслангийн бүсэд очиж суурилуулсан. Дөрөвдүгээр сарын 20 гэхэд гэр хорооллын 200 мянган өрхөд угаарын хий мэдрэгчийг 100 хувь тараана гэсэн төлөвлөгөөтэй ажиллаж байна” гэлээ.

Мөн Нийслэлийн Засаг даргын 2020 оны А/168 дугаар захирамж гарч томуу, томуу төст өвчний тархалт, коронавирусийн халдвараас сэргийлэх, хотын соёлыг төлөвшүүлэх, иргэдийн үүрэг хариуцлага, ухамсарыг нэмэгдүүлэх зорилгоор гуравдугаар сарын 27-29-ний өдрүүдэд 1802 ажилтан, албан хаагчид нийтийн эзэмшлийн гудамж, зам талбайн 243 маршрутаар хяналт тавьж, 16994 иргэнд зөвлөмж танилцуулан, 14976 иргэнд зөвлөмж тарааж, нус шүлсээ хаях, ил задгай газар бие засах, хог хаяж орчныг бохирдуулсан 7359 иргэнд анхааруулга, санамж зөвлөмж өгч, 764 аж ахуйн нэгж байгууллагад ариутгал халдваргүйжүүлэлт хийж ажилласан байна.

Агаар дуслын замаар дамжин халдварладаг COVID-19 вирус цаасан мөнгөөр дамжин халдварлах боломжтой юу?

Энэ нь онолын хувьд боломжтой ба бэлэн мөнгөний дэвсгэртэд олон төрлийн нян, микроб амьдарч байдаг. Эрүүл мэндийн дэлхийд нэр хүнд бүхий “The New England Journal of Medicine” сэтгүүлд 2020 оны 03 дугаар сарын 17-ны өдөр нийтлэгдсэн судалгаагаар халдварт вирус нь агаарт 3 цаг, хуванцар болон металл гадаргуу дээр хамгийн урт буюу 72 цаг харин картон цаасан гадаргуу дээр 24 цаг тэсвэртэй байдаг байна.

Шинэ коронавирусний хувьд ханиах, найтаах, эсвэл халдвар тээгчийн хүрсэн газар ойртож, вирусний тоосонцорыг нүд, хамар, амандаа хүргэж халдвар авч байна. Одоохондоо бэлэн мөнгөөр дамжин халдварласан тохиолдлыг тогтоох боломжгүй байгаа юм. Улс орнууд коронавирусний тархалтаас урьдчилан сэргийлэх зорилгоор карт болон төлбөрийн системийг ашиглахыг уриалж байгаа ба АНУ бусад халдвартай улс орноос ялангуяа Ази, Европоос ирж буй цаасан мөнгөн дэвсгэртийг арав хоног тусгаарлах шийдвэр гаргасан бол Өмнөд Солонгос болон БНХАУ-д банкуудад бэлэн мөнгө тараахаас өмнө халдваргүйжүүлж, зөвхөн ариутгасан болон шинэ мөнгөн дэвсгэрт гаргахыг зөвшөөрнө гэж зарлав. Харин судлаачид Австралийн полимер мөнгөн дэвсгэртүүд дээр вирус амьдрах чадвартай эсэхийг хараахан тогтоогоогүй бөгөөд бэлэн мөнгөний гүйлгээнд хориг тавих талаар хэлэлцэж байна.

ДЭМБ-аас бэлэн мөнгөний талаар албан ёсны байр суурь илэрхийлээгүй байгаа ч тус байгууллагын төлөөлөгч Их Британийн Daily Telegraph сонинд “COVID-19 вирус нь хэд хоногийн турш цаасан мөнгөн дэвсгэрт дээр амьдрах чавартай, халдвар авах магадлалыг нэмэгдүүлэх эрсдэлтэй тул цахим төлбөрийн системийг ашиглах нь зүйтэй” хэмээсэн. Түүнчлэн бусад эрүүл мэндийн мэргэжилтнүүд ч мөн адил бизнес болон худалдаа эрхлэгчдэд бэлэн мөнгөний хэрэглээг багасгаж, дижитал банк ашиглахыг уриалж байна. Монголын банк санхүүгийн байгууллагуудын зүгээс ч гэсэн энэ төрлийн уриалга гаргаад байгаа бөгөөд иргэдэд банкны үйлчилгээг онлайнаар, зардал багатай, шуурхай хүргэж, цахим хэтэвч буюу төлбөрийн карт, гар утаснаас гадна цахим мөнгө ашиглан төлбөр тооцоо хийх боломжуудаа сурталчилж байна. Үүний зэрэгцээ цахим гүйлгээний шимтгэлийг тодорхой хугацаанд бууруулах зэрэг арга хэмжээг авч хэрэгжүүлбэл иргэд цахим төлбөрийн системийг түлхүү ашиглах боломж бүрдэж, халдвар бэлэн мөнгөөр дамжих эрсдэл буурах боломжтой.

НМХГ-аас импортоор орж ирж буй хүнсний улаан буудайн чанар, аюулгүй байдалд урьдчилан сэргийлэх хяналт шалгалтыг хийж ажиллаж байна.

Хяналт шалгалтад Алтан тариа ХХК, Милл хаус ХХК, Эрдэнэт фүүд ХХК-ийн эхний ээлжийн ОХУ-аас зохих зөвшөөрлийн дагуу импортлож буй 28 вагон 1700 тн орчим хүнсний улаан буудайнаас дүүрэг дэх мэргэжлийн хяналтын хэлтсийн ургамал хамгаалал, хорио цээрийн хяналтын улсын байцаагч дээж авч Мэргэжлийн хяналтын ерөнхий газрын дэргэдэх Хүнсний аюулгүй байдлын үндэсний лавлагаа лабораторид хүнсний улаан буудайн чанар, аюулгүй байдлын шаардлага хангаж буй эсэхийг тодорхойлуулахаар хүргүүллээ. Шинжилгээний хариу хүлээгдэж байна.

Нийслэлийн Онцгой комиссын шийдвэрээр коронавируст халдвараас урьдчилан сэргийлэх ажлын хүрээнд гал унтраах зориулалтын автомашинаар нийтийн эзэмшлийн зам талбайд ариутгал халдваргүйтгэлийг өнгөрсөн амралтын өдрүүдэд хийжээ.

НОБГ-ын харьяа анги, байгууллагуудын Гал унтраах зориулалтын автомашинуудаар нийт 158.8 км гудамж талбайд халдваргүйтгэл хийсэн байна. Ариутгал халдваргүйтгэлийг автомашин хүрэх боломжгүй гэр хороолол, орон сууцны хорооллын нарийн гудамж, зам, хүүхдийн тоглоомын талбай, амралт зугаалгын тохижилттой талбай, сүүдрэвч, бохирдол ихтэй булан тохой, үерийн хамгаалалтын далан суваг зэрэг газруудад хийжээ.

Дорнод аймгийн хэмжээнд ой хээрийн түймрээс урьдчилан сэргийлэх таван пост ажиллаж байна. Тухайлбал, Хэрлэн, Ялалт, Баянтүмэнгийн гүүр, Баян-Уул, Цагаан-Овоо, Баян-Уул чиглэлийн зам, Гурванзагал, Дашбалбар, Чойбалсан чиглэлийн замууд дээр энэ сарын 26-наас эхлэн постууд гараад байгаа. Постод Онцгой байдал, Байгаль орчны газар, Хэрлэн сумын ЗДТГ, Цагдаагийн газар, Гадаадын иргэн харьяатын газрын төлөөлөл томилогдон ажиллаж байгаа аж.

Дээрх хяналтын цэгүүд тээврийн хэрэгслийн галын аюулгүй байдлыг шалгаж, хөдөө орон нутагт зорчиход машины дээд эд ангид хуримтлагдсан өвсийг авах зориулалттай сэтгүүр төмрийг жолооч нарт олгож, анхааруулга санамж хүргэж байна. Энэ сар гарсаар Дорнод аймгийн хэмжээнд зургаан удаагийн ой хээрийн түймэр бүртгэгдээд байгаа юм.

Нийслэлийн онцгой комиссоос гаргасан шийдвэрийг Улаанбаатар хотын захирагч бөгөөд Нийслэлийн Засаг дарга С.Амарсайхан танилцуулж байна. Тэрбээр, “Covid-19 эрчимтэй тархаж байгаа тул өмнө гаргасан хөл хорионы шийдвэрүүдийг IV сарын 30 хүртэл үргэлжлүүлнэ. Тухайлбал, олон нийт цуглаж болох газар, фитнес, спорт зал, сургалтын төв, саун, амралт, баар, цэнгээний газар, сүм хийд, соёл урлагийн газрын үйл ажиллагаанд тавьсан хөл хориог IV сарын 30 хүртэл сунгаж байна. Цаг агаар дулаарч байгаа нь коронавирусийн халдвар тархах магадлалыг өндөрсгөж байгаа тул хөл хориог сунгаж байгаа аж.

Хотын дарга С.Амарсайхан мэдээлэл хийж байна

Өнөөдөр Сүхбаатар дүүргийн удирдлага цаг үеийн ажлуудад хяналт тавин хороодод ажиллав. Ингэхдээ Монгол Улсын Засгийн газрын 62 дугаар тогтоолын хүрээнд гэр хорооллын айл өрхүүдэд угаарын хий мэдрэгчийг тарааж, суурилуулах ажлын явц, хороодын Шуурхай штабын үйл ажиллагаа, коронавирусийн халдвараас урьдчилан сэргийлэх “Эргүүл” арга хэмжээ, ариутгал, халдваргүйтгэлийн ажлуудад хяналт тавьж, холбогдох үүрэг даалгаврыг өгч ажиллалаа.

Дүүргийн Онцгой комиссын шийдвэрийн дагуу нийслэлийн 40, дүүргийн Засаг даргын Тамгын газар, хороодын 476, дэргэдэх хэлтэс, нэгжийн 42 нийтдээ 558 албан хаагч өчигдрөөс эхлэн угаарын хий мэдрэгчийг ашиглах заавар, зөвлөмжийн хамт айл өрхүүдэд тарааж, суурилуулах ажлыг эхлүүлэн 72 цагийн хугацаанд 9633 айл өрхөд бүрэн суурилуулж дуусгахаар ажиллаж байна.