Month: March 2020

Нийслэлийн Засаг даргын 2020 оны гуравдугаар сарын 10-ны өдрийн А/333 тоот захирамжийн дагуу гуравдугаар сарын 16-ны өдрийг хүртэл ариутгал халдваргүйтгэлийг хийлгэхээр түр зогсоосон худалдаа үйлчилгээний газруудын үйл ажиллагаа өнөөдрөөс нээгдэж, хэвийн явагдаж эхэллээ.

Эдгээр газруудад ариутгал халдваргүйжилтийг тогтмол хийх шаардлагыг мэргэжлийн байгууллагуудаас тавина. Харин Нийслэлийн Засаг даргын 2020 оны гуравдугаар сарын 26-ны өдрийн А/223 тоот захирамжийн дагуу 03 дугаар сарын 30-ны өдрийг хүртэл түр хугацаагаар зогсоосон сүм хийд, бүх тѳрлийн баар, фитнесс, иог, бүжгийн клуб, саун, дэн буудал, биллиард, спорт заал, амралт, аялал жуулчлал зэрэг спорт, соёл урлагийн газрууд хугацаа дуустал үйл ажиллагаа явуулахгүй. Мөн ресторан нийтийн хоолны газрууд 22.00 цаг хүртэл ажиллана.

Монгол орны нийт газар нутгийн 49% нь цасан бүрхүүлтэй дундаж зузаан нь 18 см, цасан дахь усны нөөц 12.8 км3 байна. Жишээлбэл Увс нуур, Тэс голын сав, Завхан голын сав, Хэрлэн голын сав нутгаар 80-90 хувьд нь цасан бүрхүүлтэй, цасан дахь усны нөөц дунджаар 2.55 км3 бол Булган гол, Идэр гол, Дэлгэрмөрөн, Шишхэд, Чулуут, Хануй, Орхон, Туул, Хараа зэрэг голуудын сав нутгаар 50-70 хувь нь цасан бүрхүүлтэй, цасан дахь усны нөөц дунджаар 0.52 км3 байна.

Ойрын өдрүүдэд өдөртөө дулаарч байгаатай холбоотойгоор дээр дурдсан голуудын сав газраар болон цас ихтэй нутгуудаар шар усны үер бууж болзошгүй байна.

Иймд шар усны үерээс урьдчилан сэргийлэх, өвөлжилт хүндэрсэн нутгуудаар гуу жалганд хаягдсан мал амьтны сэг зэмийг устгах, гэр хороолол, нүхэн жорлонгуудын халдваргүйүүлэлтийг зохих журмын дагуу хийхийг зөвлөж байна гэж Онцгой байдлын ерөнхий газраас мэдээллээ.

Монгол Улсад коронавируст халдвар /COVID-19/ бүртгэгдэж, улсын хэмжээнд өндөржүүлсэн бэлэн байдлын зэрэгт хэсэгчилсэн байдлаар шилжүүлсэнтэй холбогдуулан Улсын бүртгэлийн ерөнхий газрын дарга Б.Баасандорж /2020.03.13/ Улсын бүртгэлийн байгууллагын үйл ажиллагааг ажлын тусгай горимд шилжүүлэх тухай шийдвэр гаргалаа.

Улсын бүртгэлийн ерөнхий газрын даргын “Ажлын тусгай горимд шилжүүлэх тухай” 2020 оны 03 дугаар сарын 13-ны өдрийн А/259 дүгээр тушаалыг Засгийн газрын агентлагийн эрх зүйн байдлын тухай хуулийн 8 дугаар зүйлийн 8.2, 8.4 дэх хэсэг, Гамшгаас хамгаалах тухай хуулийн 10 дугаар зүйлийн 10.4.2 дахь заалт, Улсын онцгой комиссын даргын 2020 оны 04 дүгээр тушаалаар батлагдсан “Өндөржүүлсэн бэлэн байдлын зэрэгт хэсэгчилсэн байдлаар шилжүүлсэн хугацаанд авч хэрэгжүүлэх арга хэмжээний удирдамж”-ийн 10 дахь заалт, Онцгой байдлын ерөнхий газрын даргын 2018 оны А/274 дүгээр тушаалын хавсралтаар батлагдсан “Засаг захиргаа, нутаг дэвсгэрийн нэгж, төрийн болон нутгийн захиргааны байгууллага, хуулийн этгээдийг ажлын тусгай горимд шилжүүлэх, ажиллах журам”-ын 2.4, 3.2 дахь заалтыг тус тус үндэслэсэн байна.

Тус тушаалд улсын бүртгэлийн байгууллагын албан хаагчид болон үйлчлүүлж буй иргэдийг коронавируст халдвараас урьдчилан сэргийлэх зорилгоор ажиллах цагийн хуваарьт өөрчлөлт оруулж, 2020 оны 03 дугаар сарын 16-ны өдрөөс 2020 оны 04 дүгээр сарын 01-ний өдөр хүртэлх хугацаанд мөрдөхөөр болсон байна.

Ингэхдээ байгууллагын өдөр тутмын хэвийн ажиллагааг хангах үүднээс УБЕГ-ын Хяналт шалгалтын газар, Бодлого төлөвлөлт, дүн шинжилгээний газар, Тамгын газар болон Санхүү төлөвлөлтийн газрын албан хаагчдыг гэрээсээ ажиллах боломжоор хангаж, ээлжээр ажиллуулах зохицуулалт хийгдсэн байна.

Иймд иргэд та бүхэн улсын бүртгэлийн байгууллагаас үзүүлж буй иргэний, хуулийн этгээдийн, эд хөрөнгийн эрхийн болон архивын лавлагаа, үйлчилгээг нийслэл болон орон нутгийн аль ч нэгжээс 2020 оны 04 дүгээр сарын 01-ний өдөр хүртэлх хугацаанд дараах цагийн хуваарийн дагуу авах боломжтойг анхаарна уу.

Тайлбар: Орон нутаг дахь газар, хэлтсийн албан хаагч гэдэгт Нийслэл болон дүүрэг дэх Улсын бүртгэлийн газар, хэлтэс болон 21 аймаг дахь Улсын бүртгэлийн хэлтсийн албан хаагч багтана.

“Хурд” хамтлагийн санаачлагаар зохион байгуулагдсан “Буцааж нэхэхгүй хайр” цахим тоглолтын үеэр иргэдээс ирүүлсэн мөнгөн хандив болох 284 сая төгрөгийг өнөөдөр Улсын онцгой комисст албан ёсоор хүлээлгэн өглөө.

Шинэ коронавируст халдвараас урьдчилан сэргийлэх үйл ажиллагаа болон мэргэжлийн байгууллагуудын алба хаагчдад сэтгэлийн дэм үзүүлэх зорилготой тус тоглолтын үеэр 27900 гаруй иргэн 284 сая төгрөгийн хандивыг илгээсэн юм.

Энэ үеэр “Монголын ард түмэндээ болон хамтран ажилласан “Монгол” телевизийн хамт олонд баярлалаа” гэлээ гэж Онцгой байдлын ерөнхий газраас мэдээллээ.

Улсын онцгой комиссын Шуурхай штабаас өнөөдөр ээлжит мэдээлийн хурлаа хийлээ. Хуралд цагдаагийн байгууллага, Консулын газар, Мэргэжлийн хяналтын байгууллага болон Шударга өрсөлдөөн хэрэглэгчийн төлөө газрын төлөөлөл оролцож, мэдээлэл өгсөн юм.

ЦЕГ-ын Нийтийн хэв журам сахиулах хэлтсийн дарга П.Эрдэнэбат “Цахим сүлжээнд тараасан 17 илт худал мэдээлэл байгаагаас нь 13-ыг нь Шударга өрсөлдөөн, хэрэглэгчийн төлөө газарт шилжүүлсэн. Дөрвөн зөрчилд цагдаагийн байгууллагаас холбогдох шалгалтын ажиллагааг хийж байна.

Зөрчил үйлдсэн нийт 34 хүнд 6,950,000 төгрөгөөр торгож, шийтгэл оногдууллаа. Түүнчлэн Эрүүгийн хуулийн тусгай ангийн 13.14. Худал мэдээлэл тараах гэсэн зүйл заалтын дагуу гэмт хэргийн шинжтэй 14 гомдол мэдээллийг шалгаж байна.

Зөрчлийн зарим хэргээс дурдвал, Завхан аймгийн Их-Уул сумын Хужирт гэх газарт хоёрдугаар сарын 25-н буюу шинийн 2-ны өдөр нэр бүхий есөн хүн хурдан морины уралдаан зохион байгуулсан хэрэг гарсан. Үүнд Зөрчлийн тухай хуулийн дагуу нэр бүхий есөн хүнийг тус бүр 150 мянган төгрөгөөр торгосон” гэв.

ДЭМБ-аас вирусийн халдвараар өвчилж, амьсгалын хурц дутагдалд орсон өвчтөнүүдэд уушиг орлуулах буюу цусны эргэлтэд дэмжлэг үзүүлэх EXTRACORPOREAL MEMBRANE OXYGENATION/ECMO/ төхөөрөмжийг хэрэглэхийг зөвлөж байна.

Улсын онцгой комиссын Шуурхай штабаас мэдээлэл хийлээ.

ОБЕГ-ын дарга Т.Бадрал “Энэ цаг үеэс эхлэн гадны аль ч улс орны иргэдийг Монгол Улсад хүлээж авахгүй. Зөвхөн хүнс тээврийн жолооч нарыг нэвтрүүлнэ. Бусад улс оронд байгаа иргэдээ тусгай үүргийн онгоцоор татан авах ажлыг үргэлжлүүлж байна. Өнөөдөр гуравдахь онгоцыг хүлээн авна. Нийтдээ 800 орчим иргэн ирнэ.

Цаашдаа олон дахин иргэдээ хүлээн авах нислэг үйлдэх нь эрсдэлийг дагуулж байгаа учраас тодорхой хугацааны дараа энэ хөдөлгөөнийг хязгаарлахаас өөр аргагүй байдалд хүрнэ. Нутаг нэгтнээ хамгаалах үүднээс болж өгвөл амьдран суугаа орчиндоо дасан зохицож өөрийн аюулгүй байдлыг хангах нь зүйтэй гэж үзэж байна” гэлээ.

ОБЕГ-ны дэд дарга, хурандаа Б.Ууганбаяр “Бага баян” амралтад тусгаарлагдсан 60 гаруй иргэн төлбөрөө төлөөгүй байгаа. Эдгээр иргэнийг яаралтай төлбөрөө төл гэдэг үүргийг өгч байна” гэлээ.

Тусгай үүргийн нислэгээр ирэх монгол иргэдийг 14 хоног тусгаарлах бөгөөд энэ хугацаанд гарах зардлыг тухайн иргэн өөрөө хариуцах юм.

Тусгаарлах байр, хоолны зардлыг ATM-ээр төлсөн иргэд гүйлгээний утга дээр овог, нэр, регистрийн дугаар зэрэг холбогдох мэдээллийг бичээгүйн улмаас хэн, хаанаас, ямар зориулалтаар мөнгө хийснийг мэдэх боломжгүй байгаа аж. Иймд тусгаарлах байр, хоолны зардлыг ATM-ээр төлсөн иргэд 51-263583, 99042699, 89045225, 99159079 дугаарын утаснуудад яаралтай холбогдохыг анхаарууллаа.

Чикаго хотын “Монгол төв”-ийн хамт олон Улсын онцгой комисст 30 хонь хандивлалаа. Тус төвийн захирал Н.Батцэнгэл уг хандиваа Поп дива дуучин Ж.Алтанцэцэгээр хүргүүлсэн бөгөөд хандивыг өнөөдөр Эрүүл мэндийн яаманд хүлээлгэн өглөө.

Мөн энэ үеэр дуучин Ж.Алтанцэцэг эмнэлгийн эмч, ажилтнуудад зориулсан, вирусээс 100 хувь хамгаалдаг Египет улсын сайн чанарын маск 10 хайрцаг буюу 500 ширхгийг гэр бүлийнхээ зүгээс хандивласан юм. Тэрээр “Монгол төвийн хамт олонд маш их талархлаа. Эх орноосоо, эх нутгаасаа хол, сурч боловсорч ажиллаж, амьдарч байгаа олон мянган монголчуудынхаа төлөө ажиллаж, тусалж, дэмжихийн зэрэгцээ маш их сэтгэлийн хандив улсдаа зориулдагт талархал илэрхийлье” гэсэн юм.