Month: March 2020

Баян-Өлгий аймгийн Бугат сумын тавдугаар багийн нутаг дэвсгэр болох “Ангаалах” хэмээх газар 22 настай, эрэгтэй иргэн Ж, 14 настай, эрэгтэй иргэн С нар энэ сарын 23-ны 21:30 цагийн үед малдаа яваад сураггүй болжээ. Тус газар нь аймгийн төвөөс зүүн хойд зүгт 40 км, сумын төвөөс урд зүгт 40 км-д оршдог. Мөн тухайн үед цасан шуурга шуурга шуурч, харагдах орчин 3 метрээс цаашаа хязгаарлагдаж байжээ.

Иргэд сураггүй болсон тухай мэдээллийг гэр бүлийн хүмүүс аймгийн Онцгой байдлын газарт тухайн өдрийн 23:12 цагт өгсөн байна. Дуудлагын дагуу тус газрын Гал түймэр унтраах, аврах 31 дүгээр ангийн таван алба хаагч, Бугат сумын мэргэжлийн ангийн тав, ар гэрийн хоёр иргэн шөнийн 02:10 цагаас эрэн хайх ажиллагаа явуулж цасан шуурганаар малтайгаа уруудсан иргэдийг уулын цаанаас өнөөдөр өглөө 06:30 цагийн орчимд эсэн мэнд олсон байна.

ОХУ-ын Шинжлэх ухаан, дээд боловсролын яам коронавирусийн халдварын дэгдэлтийн үед ОХУ-д үлдэж, хичээл сургуулиа үргэлжлүүлэх шийдвэр гаргасан гадаадын оюутнуудыг дотуур байрнаас нь албадан гаргах үйлдлийг хийхгүй байхыг их дээд сургуулиудад чиглэл болгожээ. Энэ тухай шийдвэрийг ОХУ-ын Шинжлэх ухаан, дээд боловсролын яам 2020 оны 03 дугаар сарын 20-ны өдөр гаргасныг тус улсад суугаа Дипломат төлөөлөгчдийн газруудад өнөөдөр ноот бичгээр мэдэгдсэн болно гэж Гадаад харилцааны яамнаас мэдээллээ.

Он гарсаар Булган, Дорнод, Сэлэнгэ аймгийн зургаан суманд зургаан удаагийн ой, хээрийн гал түймэр гарсан байна. Түймэрт 22 га ой, 14810 га хээрийн талбай шатжээ.

Тухайлбал,

Энэ сарын 16-ний өдөр Сэлэнгэ аймгийн Сайхан сумын Номгон багийн “Ширээ нуруу” гэдэг газар /аймгийн төвөөс баруун урд зүгт 210 км, сумын төвөөс баруун хойд зүгт 50 км-т/ хээрийн түймэр гарсан дуудлагаар аймгийн Онцгой байдлын газрын Сайхан сум дахь Гал түймэр унтраах, аврах 61 дүгээр анги, Номгон багийн Засаг даргын Тамгын газрын алба хаагчид ажиллаж, унтраасан.

Энэ сарын 22-ны өдөр Дорнод аймгийн Булган сумын Хулсан шанд багийн “Бууралын-Айраг” гэдэг газар /сумын төвөөс урд зүгт 30 км-т/ хээрийн түймэр гарсан тухай дуудлагаар аймгийн Онцгой байдлын газрын алба хаагчид болон орон нутгийн иргэд бүрэн унтраасан.

Энэ сарын 22-ны өдөр Булганаймгийн Сэлэнгэ сумын Ингэт багийн “Даамайн гүүр” гэдэг газар /сумын төвөөс зүүн урд зүгт 21 км-т/ ой, хээрийн түймэр гарсан тухай дуудлагаар аймгийн Онцгой байдлын газрын алба хаагчид болон орон нутгийн иргэд бүрэн унтраасан.

Энэ сарын 23-ны өдөр Дорнод аймгийн Хөлөнбуйр сумын Баян-Өлзийт багийн “Тэмээн хад” гэдэг газар /аймгийн төвөөс баруун урд зүгт 157 км, сумын төвөөс урд зүгт 35 км/ хээрийн түймэр гарсан дуудлагаар аймгийн Онцгой байдлын газрын алба хаагчид болон Хөлөнбуйр, Булган сумын Засаг даргын Тамгын газрын ажилтан, алба хаагчид бүрэн унтраасан.

Иймд, ногоон бүсэд зорчихдоо ил задгай гал түлэхгүй байх, асаасан гал, шүдэнз, тамхины галыг бүрэн унтраах, халуун үнс нурамыг ил задгай асгахгүй байж ой, хээрийн түймрээс урьдчилан сэргийлэхийг анхааруулж байна.

“Түймрийн аюултай үе” гэж тухайн нутаг дэвгэрт ой, хээрийн түймэр гарах байгалийн нөхцөл бүрдсэн хуурайшилт бүхий цаг хугацаа буюу жил бүрийн 3 дугаар сарын 20-ны өдрөөс 6 дугаар сарын 10-ны өдөр, 9 дүгээр сарын 20-ны өдрөөс 11 дүгээр сарын 10-ны өдөр хүртэлх хугацааг хэлнэ гэж Онцгой байдлын ерөнхий газраас мэдээллээ.

Өнөөдөр буюу гуравдугаар сарын 24-ний өдрийн 13:00 цагийн байдлаар Өвөрхангай аймагт хүчтэй шороон шуургатай замын хөдөлгөөнд оролцоход үзэгдэлт хангалтгүй хүндрэлтэй байгаа бол Баян-Өлгий аймагт цас ихээр орж зорчих хэсэг гулгаатай байна гэж Тээврийн цагдаагийн албанаас мэдээллээ.

Иймд хөдөлгөөнд оролцогчдыг өөрийн болон бусдын аюулгүй байдлыг хангаж, анхаарал болгоомжтой зорчихыг анхааруулав.

“Алтанбулаг” боомтын орох чиглэлээр 2020 оны гуравдугаар сарын 23-ны өдрийн 08.00 цагаас гуравдугаар сарын 24-ний 08:00 цаг хүртэлх хугацаанд:

– ачааны 25 авто машинаар 28 зорчигч /Монгол-10, гадаад-18 /
– албаны 4 машинаар 15 зорчигч /үүнээс Монгол-6, гадаад-9/
-бусад суудлын 5 авто машинаар 8 /Монгол-8/ зорчигч
-явганаар 38 зорчигч /Монгол-38/,

-нийт 34 тээврийн хэрэгсэл болон явганаар 89 зорчигч хил нэвтэрсэн бөгөөд тус алба нь зорчигчдоос эрүүл мэндийн асуумж авч үзлэг, тандалт хийж /албаны болон ачааны автомашины жолоочоос бусад нийт 46 зорчигчоос/ сэжигтэй тохиолдлоор эмчлэн тусгаарлахаар 4 зорчигчийг Дархан-Уул аймаг руу, хоёр зорчигчийг Орхон аймаг руу тус тус шилжүүлсэн. Үлдсэн 40 зорчигч болон өмнөх шөнө орж ирж хилийн нэвтрэх цэгийн тусгаарлах өрөөнд байрлаж байсан 2 зорчигч, нийт 42 зорчигчийг Орхон аймаг руу ажиглалтад авахаар шилжүүлсэн.

Албаны зорилгоор хил нэвтэрсэн 15 зорчигчоос эрүүл мэндийн асуумж судалгаа авч, эмнэлзүйн шинж тэмдэг илрээгүй тул зөвлөмж өгч хилээр нэвтрүүлсэн. Мөн Улаанбаатар хотын гүний хяналтын талбайд ачаа буулгах 3 тээврийн хэрэгслийн 5 жолооч, Сэлэнгэ аймгийн Сүхбаатар сумын гаалийн хяналтын талбайд ачаа буулгах 4 тээврийн хэрэгслийн 4 жолооч /гадаад/-ыг эрүүл мэндийн үзлэг, тандалтад хамруулан эмнэлзүйн шинж тэмдэг илрээгүй тул хил нэвтрүүлж хүчний байгууллагын хяналтад шилжүүллээ.

Дээрх хугацаанд “Алтанбулаг” боомтын гарах чиглэлээр:

– ачааны 12 авто машинаар 12 зорчигч /Монгол-2, гадаад-10/
– албаны 4 машинаар 14 /үүнээс Монгол-6, гадаад-8/
– Бусад суудлын 6 авто машинаар 9 /Монгол-5, гадаад-4/
– явганаар 1 гадаад зорчигч
– нийт 22 тээврийн хэрэгсэл болон явганаар-36 зорчигч нэвтэрсэн бөгөөд эдгээрээс Монгол Улсын таван иргэнийг хилийн нэвтрэх цэгээс буцааж бусад жолооч, зорчигчдод зөвлөмж сэрэмжлүүлэг өгч хилээр нэвтрүүлсэн байна.

Нийслэлийн Баянзүрх дүүргийн Онцгой комиссын даргын 2020 оны 03 сарын 12-ны өдрийн 02 дугаар албан даалгаврын хүрээнд дүүргийн хэмжээнд ариутгал, халдваргүйжүүлэлт хийж эхэлсэн билээ.

Тухайлбал шинэ коронавирус ‘’COVID-19’’-ийн халдварын тархалтболон мал амьтны гаралтай халдварт өвчнөөс урьдчилан сэргийлж, иргэдийн эрүүл аюулгүй орчинд амьдрах нөхцөлийг бүрдүүлэхийн тулд 2020 оны 03 дугаар сарын 12-ны өдрөөс 03 дугаар сарын 23-ны өдрийг хүртэлх хугацаанд дүүргийн төрийн захиргааны байгууллагуудын 17.104 м.кв талбайд, 28 хорооны 14.911 м.кв талбайд ариутгал, халдваргүйжүүлэлт хийгээд байна.

Ариутгал, халдваргүйжүүлэлтийг “Баяндэмбэрэл” ХХК хийж байгаа бөгөөд “Монгол улсад 2019 онд ашиглаж болох ахуйн хортон шавьж, мэрэгч устгалын болон ариутгал, халдваргүйтгэлийн бодисын жагсаалт, тоо хэмжээ”-нд орсон ДП-2Т 0,04 хувийн уусмалаар тусгай зориулалтын уураар мананцар үүсгэн, шүршиж хийсэн аж.

Дашрамд, хоёр дахь удаагийн давтан ариутгалыг өнөөдрөөс эхлэн хийж байгаа бөгөөд, халдваргүйжүүлэлтийг хийхдээ Монгол Улсын стандарт “MNS 5161-3:2002, MNS 5161-1:2002”-ыг баримтлан ажиллаж байна хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

(СOVID-19)-өөс урьдчилан сэргийлэх зөвлөгөө, зөвлөмж, мэдээллийг ЭМЯ-ны фэйсбүүк хуудас, вэб сайтаас авах боломжтой. Мөн 119, 88086829, 1800-200, 11-323002 дугаарын шуурхай утас 24 цагаар ажиллаж байна.

Говь-Алтай аймагт өнөөдөр дахин 4.5 магнитудын хүчтэй газар хөдлөлт болжээ. Тонхил сумаас зүүн урд зүгт 30 км зайд 20-ны өдрийн 11.03 цагт 5.8 магнитудын хүчтэй газар хөдлөлт болсон юм. Уг газар хөдлөлтөөс хойш өнөөдрийн байдлаар нийт 400 гаруй удаагийн давтан газар хөдлөлт ажиглагдаад байгаа талаар Одон орон геофизикийн хүрээлэнгээс мэдээллээ.