Month: March 2020

Нийслэлийн 9 дүүргийн орон сууц, гэр хорооллын дундах нарийн зам, гудамж талбай, тоглоомын талбай, сүүдрэвч, ногоон байгууламж бүхий амралтын талбай, бохирдол ихтэй булан тохой, үерийн хамгаалалтын далан сувгийн халдваргүйтгэлийн ажлыг эхлүүллээ.

Хотын Ерөнхий менежерийн баталсан хуваарийн дагуу өчигдрөөс эхлэн дүүрэг бүрт өдөр бүр нэгэн зэрэг явганаар халдваргүйтгэлийн ажлыг хороо, хэсгийн ахлагчийн хяналтан дор явуулж байна. Халдваргүйтгэл дөрөвдүгээр сарыг дуустал үргэлжилнэ.

Дэлхийн эмч нарын өдрийг тохиолдуулан Улсын Их хурлын гишүүн, Засгийн газрын гишүүн, Эрүүл мэндийн сайд Д.Сарангэрэл эрүүл мэндийн салбарын нийт эмч, ажилтан ажилагсдад хандан мэндчилгээ дэвшүүллээ.

Мэндчилгээнд, “Энэ удаагийн эмч нарын баяр дэлхий тэр чигтээ нэгэн аюулт өвчний эсрэг тэмцэж буй үед тохиож байна. Гэхдээ энэ нь бие биедээ баяр хүргэхгүй, хүндэтгэл илэрхийлэхгүй гэсэн үг биш ээ. Харин хамгийн сайн үг, сайхан ерөөлийг харамгүй сонсох өдөр билээ. Өнөөдөр эмч нар маань тангараг өргөсөн эр цэргүүдийнхээ нэгэн адил улс орон, ард түмнийхээ аюулгүй байдлын төлөө цаг наргүй эрүүл энхийн манаанд зогсох тэр цаг үе ирлээ. Энэхүү үүрэг хариуцлагаа нэр төртэй үүрч чадна гэдгээ алхам тутамдаа харуулан буй эрэлхэг дайчин эмч нар, эрүүл мэндийн нийт ажилтан та бүхнээрээ бахдаж байна. Дэлхийн эмч нарын өдрийг эрүүл мэндийн салбар хэлэх үгтэй, хийсэн ажилтай тодруулбал, үйл ажиллагааны хөтөлбөрөө 95 хувь биелүүлсэн амжилтаар угтаж байна. Засгийн газрын 2016-2020 оны мөрийн хөтөлбөрт эрүүл мэндийн салбар 5 зорилт бүхий 21 ажлыг хийж хэрэгжүүлэх үүрэг хүлээсэн юм.

Эх, хүүхдийн эндэгдэл эрс буурлаа. Хүүхдүүдийхээ шүдийг эрүүлжүүлэх, ард иргэдээ урьдчилан сэргийлэх үзлэгт оруулж өвдөхөөс нь өмнө арга хэмжээ авах , цалин мөнгө нэмэгдүүлэх, эмч мэргэжилтнүүдээ өндөр хөгжилтэй оронд сургалтанд хамруулах зэрэг цогц ажлыг бид хамтдаа хийж хэрэгжүүлсэн. Хэдийгээр манайд коронавирусийн тохиолдол зөөвөрлөгдөн орж ирсэн ч эрүүл мэндийн салбар төр засаг, түмэн олонтойгоо хамтарч эх орондоо амьдарч буй иргэдийнхээ дунд коронавирусын халдвар гаргаагүй хуруу дарам цөөн орны нэг болсон юм. Дэлхий нийтийг хамарсан олон олон халдварт өвчнийг мэргэжлийн ур чадвар, зүрх сэтгэл, хамтын хүчээр даван туулсан эрүүл мэндийн салбар энэ удаад ч “COVID-19″-г ялна гэдэгт итгэл төгс байна. Эмчилгээний эхний дүн ч гарч ард иргэд маань цаг мөч тутамд энэ тухай сонсож, мэдэрч, баярлаж, талархаж байна. Та бүхнийхээ мэргэжлийн баярын энэ өдөр чин сэтгэлийн халуун мэнд хүргэж аз жаргал, амжилт бүтээлийн дээдийг хүсэн ерөөе.” гэжээ.

Шинэ коронавирусээс урьдчилан сэргийлэхийн тулд та дараах амны хаалтыг зөв хэрэглэх зөвлөмжийг дагаарай.

Амны хаалтыг зүүхийн өмнө гараа спиртэн суурьтай халдваргүйжүүлэгч, эсвэл савангаар угаана.
Амны хаалтыг хамар, амыг бүрэн хааж, завсар гаргахгүйгээр зүүнэ. Амны хаалтыг зүүсэн үедээ гараа хүргэхгүй. Хүрсэн тохиолдолд гараа спиртэн суурьтай халдваргүйжүүлэгч эсвэл савангаар угаана.
Амны хаалт чийгтэй болсон тохиолдолд шинээр солино. Нэг удаагийн амны хаалтыг дахин хэрэглэж болохгүй.
Амны хаалтыг тайлахдаа (урд хэсэгт хүрэлгүйгээр) чихний арын хэсгээс татан авч шууд хогийн саванд хаяна. Дараа нь гараа спиртэн суурьтай халдваргүйжүүлэгч, эсвэл савангаар угаагаарай.

Нийслэлийн Засаг дарга бөгөөд Улаанбаатар хотын Захирагчийн захирамжийн дагуу нийслэлийн Газар зохион байгуулалтын алба (НГЗБА)-наас энэ онд 47 газрыг Газар эзэмшүүлэх, ашиглуулах эрхийн дуудлага худалдаанд оруулж, 2.4 тэрбум төгрөг төсөвт төвлөрүүлэхээр төлөвлөсөн байна. Төрийн үйлчилгээ цахимжиж, илүү ил тод нээлттэй, шударга явагдах боломж бүрдэж байгаа нь энэ удаагийн цахим дуудлага худалдааны давуу тал болж байна.

Энэ оны эхний 11 байршлын нийт 9.26 га газрын дуудлага худалдаа ирэх сарын 8-нд 9 цагт Газрын биржийн цахим систем буюу www.mle.mn цахим хуудсаар явагдана. Уг дуудлага худалдаанд оролцох хүсэлтэй иргэн, аж ахуйн нэгжүүдийг дээрх цахим хуудсаар бүртгэж эхэлжээ. Дуудлага худалдааны зарчим болон оролцогчдын анхаарах зүйлсийн талаар НГЗБА-ны Хот байгуулалтын мэргэжилтэн Ц.Ундрахаас тодрууллаа.

-Газрын анхны үнийг хэрхэн тогтоодог вэ?

-Засгийн газар, БХБ-ын сайдын тушаалын дагуу нийслэлийг 16 бүсэд хувааж, дуудлагаар худалдах газрын хэмжээ, зориулалт, итгэлцүүр зэрэг олон зүйлээс хамаардаг. Итгэлцүүр гэдэг нь тухайн газар дэд бүтэц, зам харилцаа нийгмийн анхан шатны үйлчилгээ, хүн амын төвлөрөл, ирээдүйд өсөх бизнесийн үнэ цэн олон хүчин зүйлээс шалтгаална. Жишээ нь, нэг газрын БХБ-ын сайдын тушаалын дагуу тогтоосон анхны үнэ 1 сая төгрөг байвал 0.1-1 үнэлгээний итгэлцүүрээр дахин тооцно. 1 гэсэн үнэлгээнд хүргэхгүй бол анхны үнийг 1 сая төгрөгөөс бууруулна. Түүнээс илүү бол өснө гэсэн үг.

–Газар эзэмшүүлэх, ашиглуулах эрхийн дуудлага худалдаа цахимаар зохион явуулахад үүсэх давуу тал бий болох вэ?

-Орон зай цаг хугацааны хувьд хамаарахгүйгээр худалдан авагч шууд оролцох боломжтой. Хувь хүн бол оролцох хүсэлт, дэнчингийн мөнгө тушаасан баримт, иргэний үнэмлэх, байгууллага бол гэрчилгээгээ цахимаар илгээхэд л болно. Мөн иргэд өмчилсөн газраа www.unegui.mn болон бусад зарын цахим хуудсаар зардагтай ижилхэн www.mle.mn цахим хуудсаар дамжуулан борлуулах боломжтой. Энэ хуудсанд бүх бичиг баримтын зөрчилгүй газрын зарыг хүлээн авах тул илүү баталгаатай гэсэн үг. Газраа борлуулж буй иргэн өөрийн газрын байршлаа дээр дурдсан 16 бүсийн аль хэсэгт байгааг харж, дуудлага худалдааны анхны үнэтэй харьцуулах, зах зээлийн үнэлгээгээ тогтоох боломжтой.

-Ирэх сарын 8-нд болох цахим дуудлага худалдааны талаар?

-Ирэх сарын 8-нд болох дуудлага худалдаа 09.00 цагт үнийн саналыг хүлээн авч эхэлнэ. Санал авах сүүлийн хугацаа 15.00 цагт дуусмагц систем 1 минут хүлээх бөгөөд тухайн мөчид аль нэгэн оролцогч үнийн санал өгөхгүй бол дуудлага худалдааг автоматаар хааж, хамгийн сүүлд өндөр үнийн санал ирүүлсэн оролцогч газраа авна. Хэрэв нэг минутад оролцогч үнийн санал илгээвэл дахин нэг минут хүлээх зарчим баримтална. Дээрх зарчмаар 17.00 цаг хүртэл үргэлжилсэн тохиолдолд хамгийн сүүлийн үнэ өгсөн оролцогч ялагч болно. Зарим оролцогч би 15.00 цагт үнийн саналаа илгээсэн байхад яагаад ялагч болсонгүй вэ гэсэн асуудал тавьдаг. Гэтэл хүлээлтийн нэг минутад өөр оролцогч санал ирүүлж, газрыг авсан тохиолдол бий. Тэгэхээр иргэд дээрх зарчмыг сайтар ойлгох хэрэгтэй.

-Үнийн саналаа өгсний дараа өөр хүн илүү үнэ ирүүлснийг яаж мэдэх вэ?

–www.mle.mn цахим хуудсанд тухайн байршилд ирсэн үнийн саналууд тухай бүрт нь гарна. Гэхдээ оролцогчийн нэр биш сайтад бүртгүүлсэн дугаар нь үнийн саналын хамт харагдана.

-Оролцогчид өөр юунд анхаарах шаардлагатай вэ?

–Иргэн, аж ахуйн нэгж www.mle.mn цахим хуудсанд хандаж иргэний үнэмлэх, байгууллага бол гэрчилгээ, улсын тэмдэгтийн хураамж болох 12 мянга 500 төгрөг, дэнчингийн мөнгөө тушаасан баримтаа скайнердаж оруулна. Цагийг нь тулгаж хүсэлт илгээсэн тохиолдолд Төрийн санд дэнчингийн мөнгө болон улсын тэмдэгтийн хураамж төлсөн тухай мэдээлэл нь орохгүй удах тохиолдол бий. Ингэснээр тухайн хүний мэдээллийг баталгаажуулахад хүндрэл үүснэ. Тиймээс хэрвээ та дуудлага худалдаанд оролцох гэж байгаа бол ирэх сарын 8-ны 08.30 цагийг хүлээхгүйгээр хүсэлтээ илгээх хэрэгтэй. Дуудлага худалдаанд ялагч болсон иргэн долоо хоногийн дотор манай байгууллагад ирж, гэрээ байгуулах, ялагч болсноосоо хойш 14 хоногийн дотор газрынхаа үнийг бүрэн төлөх ёстой. Төлөхгүй бол гэрээ хүчингүй болохоос гадна дэнчингийн мөнгийг буцаан олгохгүй.

-Дэнчингийн мөнгийг хэрхэн тооцох вэ?

-Дэнчинд тухайн газрын анхны үнийн 10 хувьтай тэнцэх хэмжээний мөнгө төлөх ёстой. www.mle.mn цахим хуудсанд дуудлагаар худалдах газруудын байршил, зориулалт, анхны үнэ зэрэг бүх мэдээлэл бий. Дуудлага худалдаанд оролцоод ялагч болж чадаагүй бол дэнчингийн мөнгийг буцаан өгнө.

– Газар эзэмшүүлэх, ашиглуулах эрхийн дуудлага худалдаанд оруулж буй 11 байршил газрын зориулалтын тухайд?

– Дуудлагаар худалдах газруудын зориулалт, архитектурын төлөвлөгөөг бүгдийг баталсан. Ирэх сарын 8-нд үүрэн холбооны станц, аялал жуулчлал, хөдөө аж ахуйн үйлдвэрлэл, худалдаа үйлчилгээ, ШТС, орон сууц, өвлийн аж ахуй, үйлдвэрлэлийн зориулалтын газрыг худалдах юм.

-Дараагийн дуудлага худалдаа хэзээ болох вэ?

-Дараагийн дуудлага худалдаа ирэх сарын 23-нд болно. Дуудлага худалдааны мэдээллийг цахим хуудсандаа байршуулсан байгаа. Ерөнхийдөө 47 байршлийн дуудлага худалдааг энэ оны эхний хагаст цахимаар зохион байгуулна. Цахимаар борлуулагдаагүй газруудыг дараагийн хагаст танхимын дуудлага худалдаанд оруулах юм.

“COVID-19” халдвартай тэмцэхэд зориулж Монгол Улсад БНХАУ-аас 830 мянган юаны үнэ бүхий эд материалын тусламжийг хүлээлгэн өглөө. Үүнд 500 мянган амны хаалт, 5000 түргэн оношлуур болон хамгаалалтын хувцас багтаж байгаа аж. Монгол Улсад тусламж илгээж буй нь дэлхий нийтэд халдвар тархаж эхэлснээс хойш хоёр улс хамт байж, харилцан нэг нэгнээ дэмжиж ирсний илрэл гэдгийг Шадар сайд Ө.Энхтүвшин хэллээ. Тусламжийг халдварын эсрэг тэмцэж буй төрийн байгууллагын албан хаагчдад олгох аж. Улсын онцгой комиссын дарга “БНХАУ-д “COVID-19” анхлан дэгдэхэд монгол хүн бүрийн сэтгэл түгшиж байсан. Гэхдээ БНХАУ-ын төр засаг, ард түмэн тархалтыг хяналтадаа авч, олон мянган хүнийг эдгээж чадсан. Энэ нь Монголын төр засаг, ард түмэнд халдварыг зогсоож чадна гэсэн итгэл өгч байна” гэлээ.

Түүнчлэн Монгол, БНХАУ-ын худалдаа, эдийн засгийн хамтын ажиллагааг сэргээн хөгжүүлэх, Засгийн газрын хамтран хэрэгжүүлж байгаа төслүүдийг тасралтгүй үргэлжлүүлэх зэрэг ажлыг чухалчлан ажиллах цаг болсныг дурдлаа. Коронавирусын халдвар нь дэлхий нийтийн өмнө тулгамдаж буй хүнд сорилт. Хятадын ард түмэн нэгдсэн удирдлага дор эв санаа нэгдэн тэмцсэний хүчинд халдварын тархалтыг тогтоон барьсан гэдгийг БНХАУ-аас Монгол Улсад суугаа Онц бөгөөд Бүрэн эрхт Элчин сайд Цай Вэньруй хандив гардуулах үеэрээ онцлов. Тэрбээр “Монгол Улсын төр засаг, ард түмэн бидэнтэй эв санаа нэгдэж, асар их сэтгэлийн болон эд материалын дэмжлэг олгосон. Бидний өнөөдрийн амжилт монголчуудын дэмжлэгтэй салшгүй холбоотой. Монгол Улсын Засгийн газар “COVID-19” халдвартай тэмцэж, дотооддоо тархаахгүй барьж чадаж байгаа. Хятадын төр засаг, ард түмэн монголчуудтай хамт байх болно гэдгээ илэрхийлж байна” хэмээв.

Тусламжийн багаж хэрэгсэл хүлээлгэн өгөх баримт бичигт ОБЕГ-ын тэргүүн дэд дарга, бригадын генерал Г.Ариунбуян, БНХАУ-аас Монгол Улсад суугаа Элчин сайдын яамны Худалдаа эдийн засгийн зөвлөх Сун Шюэжунь нар гарын үсэг зурлаа.

Нийслэлийн статистикийн хороо өргөн хэрэглээний бараа бүтээгдэхүүний долоо хоног тутмын үнийн судалгааг танилцуулдаг билээ. 2020 оны гуравдугаар сарын IV долоо хоногт:

Махны үнэ:

• Хонины ястай мах нэг килограмм нь дунджаар 9694 төгрөг байна.

Өмнөх долоо хоногтой харьцуулахад хонины ястай махны үнэ 386 төгрөгөөр (3.8%), хонины цул махны үнэ 387 төгрөгөөр (4.1%) тус тус буурсан байна. Энэ долоо хоногийн ажиглалтаар хонины ястай мах “Хархорин” хүнсний захад хамгийн хямд буюу 7800 төгрөгөөр, харин “Меркури” хүнсний захад хамгийн өндөр үнэтэй буюу 13 мянга 500 төгрөгөөр худалдаалж байна.

• Үхрийн ястай мах нэг килограмм нь дунджаар 11 мянга 616 төгрөгийн үнэтэй байна. Үхрийн ястай махны үнэ өмнөх долоо хоногтой харьцуулахад 490 төгрөгөөр (4.1%)
• Үхрийн цул махны үнэ 671 төгрөгөөр (4.7%) тус тус буурсан байна.

Энэ долоо хоногийн ажиглалтаар үхрийн ястай мах “Хархорин” хүнсний захад хамгийн хямд буюу 9800 төгрөг, Харин “Меркури” хүнсний захад хамгийн өндөр үнэтэй буюу 14 мянган төгрөг байна.

Харин гурилын үнийн хувьд:

2020 оны гуравдугаар сарын IV долоо хоногт нийслэлийн хүнсний томоохон зах, дэлгүүрт

• “Алтан тариа” савласан нэг кг гурилын үнэ дээд зэрэг нь 1400-2000 төгрөг
• 1-р зэргийнх 1179-1500 төгрөг
• 2-р зэргийнх 800-1100 төгрөг байна.

Худалдан авагч олон байдаг “Хүчит шонхор”, “Таван эрдэнэ”, “Бөмбөгөр”, “Баянзүрх”, “Хархорин” хүнсний захуудад задгайгаар буюу шуудайгаар худалдаж буй нэг кг дээд зэргийн “Алтан тариа” гурилын үнэ 1390-1500 төгрөгийн үнэ ханштай байна.

Харин “Хүчит шонхор”, “Баянзүрх”, “Барс” хүнсний захуудад дээд зэргийн “Алтан тариа” гурил 1400 төгрөг, 1-р зэргийн гурил 1200 төгрөгөөр тус тус зарагдаж байна.

“Атар” талх хүнсний зах, дэлгүүрт 1200-1400 төгрөгийн үнэтэй байна. “Хархорин” хүнсний захад “Атар” талхыг хамгийн хямд буюу 1200 төгрөгөөр, харин “Меркури” хүнсний захад хамгийн өндөр үнээр буюу 1400 төгрөгөөр худалдаалж байна.

Хүнсний ногооны үнэ:

2020 оны гуравдугаар сарын IV долоо хоногт өмнөх долоо хоногтой харьцуулахад монгол төмс 1.7 хувиар буурч 947 төгрөг, монгол лууван 3.2 хувиар өсч 1847 төгрөг, байцаа 0.5 хувиар өсч 1920 төгрөгөөр тус тус худалдаалагдаж байна.

Баян-Өлгий аймгийн харьяат эмэгтэй тусгаарлалтаас гараад өөрийгөө 14 хоног гэртээ тусгаарлах ёстой байтал хугацаа дуусахаас өмнө өөр хүний бичиг баримтаар онлайнаар тасалбар бичүүлж, Улаанбаатар руу ирж явсныг онцгой байдал болон цагдаагийн байгууллага илрүүлжээ. Тус эмэгтэйг 22-ын товчоогоор өчигдөр /2020.3.27/ орой орж ирэхэд нь саатуулсан бөгөөд автобусыг ариутгасан байна. Мөн зорчигдоос халуурсан, сэжигтэй тохиолдол илрээгүй тул гэрт нь тусгаарласан байна. Харин тус эмэгтэйг Багабаян амралтын газарт тусгаарласан бөгөөд ямар нэгэн сэжигтэй шинж тэмдэг одоогоор илрээгүй байгаа ажээ.

Мөн уг иргэнд Зөрчлийн тухай хууль, Гамшгийн тухай хуулиар хариуцлага тооцох юм байна.