Month: December 2019

ОБЕГ-ын харьяа “Аврагч” биеийн тамир техник-спорт хорооны тамирчин, Монгол улсын харцага Д.Анар “Казак кураш бөх”-ийн дэлхийн аварга шалгаруулах тэмцээний +100 кг-д түрүүлж, дэлхийн аварга боллоо.

Тус тэмцээн Казахстан улсын нийслэл Нур-Султан хотноо энэ сарын 20-21-ний өдрүүдэд зохион байгуулагдсан бөгөөд тэмцээнд 33 орны 300 гаруй бөх оролцсон байна.

Д.Анар нь Монголд Улсад анх удаа зохион байгуулагдсан “Казах курес бөх”-ийн Ази тивийн АШТ болон “Киргизийн курош бөх”-ийн Ази тивийн нээлттэй тэмцээнд тус тус аварга болсон юм гэж Онцгой байдлын ерөнхий газраас мэдээллээ.

Онцгой байдлын ерөнхий газраас НОБГ-ын харьяа нийслэлийн Аврах 105-д шуурхай албаны автомашиныг хүлээлгэн өглөө. Тус шуурхай албаны автомашиныг ОБЕГ-ын дарга, хошууч генерал Т.Бадрал, нийслэлийн Аврах анги 105-ын захирагч, дэд хурандаа Ш.Мэндсайханд гардуулсан юм.

Ингэснээр гамшгийн голомтод шуурхай хүрэлцэн очих, удирдлага зохион байгуулалтаар хангах, хойшлуулшгүй сэргээн босгох үйл ажиллагааг зохион байгуулах боломж бүрдлээ.

Нийслэл хотод энэ оны арваннэгдүгээр сарын 15-наас эхлэн “Хүүхдийн автобус” үйлчилгээнд гарч эхэлснийг Баянгол дүүргийн иргэн С.Гэрэлмаа миний бие талархан хүлээж авсан билээ. Миний зээ 24 дүгээр сургуульд сурдаг. Ээж, эмээ хоёр нь ээлжлээд л зөөнө. Ээжийнх нь ажил их, охиноо хүргэж өгчихөөд л ажилдаа очихоор байнга хоцорно, ээжийг нь ажлаас нь хоцроохгүйн тулд эмээгийн үүргээ гүйцэтгэж би зөөнө. Азаар их сайхан шийдвэр гарч “Хүүхдийн автобус”-ыг явуулдаг болгосноор түмний олон мянган үрс, тэр дундаа алслагдсан хороонд амьдардаг бага ангийн сурагчид сургуульдаа очихдоо, сургуулиас гэртээ хүрэхдээ аюулгүй зорчдог болжээ. Энэхүү буянтай сайхан ажлыг санаачилж, хэрэгжүүлсэн Нийслэлийн удирдлагуудад талархаж байгаагаа уламжилж байна.

Энэ удаад та бүхэн 33 чиглэлд 40 автобус гаргаж 3000 орчим хүүхэд тээвэрлэж байгаа юм байна. Тэгвэл ирэх хичээлийн жилд чиглэлийн болон автобусны тоогоо нэмж, улам олон хүүхдэд ээлтэй зорчих боломжийг олгоорой гэж хүсье. Учир нь “Хүүхдийн автобус”-ны ачаар олон арван аав, ээжүүд сэтгэл тайван ажлаа хийж, хүйтэнд унаа тэрэг олдохгүй гэхгүй, хүүхэд өртдөг зам тээврийн ослын хэрэг буурч байгаа гэж иргэн миний бие итгэж байгаа юм. Нийслэлийн зам тээврийн асуудал хариуцсан төслүүдийн удирдагч Б.Отгонсүх саяхан хэвлэлд өгсөн ярилцлагадаа “2020 он гаргаад нийтийн тээврийн салбарт 200 автобус шинээр авна” гэж ярьж байсан. Үүнийг ажил хэрэг болговол нийслэлийн хамгийн том асуудлын нэг болох нийтийн тээврийн хүртээмжийн асуудал шийдэгдэх юм. Ажил хэрэг болгоорой гэж Б.Отгонсүх дарга болон нийслэлийн удирдлагууддаа захимаар байна. Энэ мэт олон гэр бүл, үр хүүхдэд ач тустай ажил хийсэн хотын удирдлагууддаа ажлын амжилтыг хүсье.

Баянгол дүүргийн 20 дугаар хорооны иргэн С.Гэрэлмаа

Засгийн газрын 2018 оны 10 дугаар сарын 17-ны өдрийн хуралдаанаар Монгол Улсын Засгийн газар, Бүгд Найрамдах Беларусь Улсын Засгийн газар хоорондын хөнгөлөлттэй зээлийн хүрээнд хэрэгжих “Онцгой байдлын албаны гамшигтай тэмцэх техник, тоног төхөөрөмжийн хүчин чадлыг сайжруулах” төслийг хэрэгжүүлэхээр шийдвэрлэсэн.

Тус төслийн хүрээнд нийлүүлэгдэх тоног төхөөрөмжийн тусгайлсан зээлийн хэлэлцээрт Сангийн сайд Ч.Хүрэлбаатар, Бүгд найрамдах Беларусь улсын Хөгжлийн банкны удирдах зөвлөлийн дэд дарга Иван Анатольевич Вареница нар гарын үсэг зурлаа.

Төслийн хүрээнд нийт 15,4 сая евро буюу 46,2 тэрбум төгрөгийн өртөг бүхий аврах, гал түймэр унтраах тусгай зориулалтын 71 нэгж, техник нийлүүлэгдэх юм.

Ингэснээр улсын хэмжээнд үйл ажиллагаа явуулж байгаа Гал түймэр унтраах, аврах ангиудад MNS 6412:2013 стандартын дагуу гал түймэр унтраах зориулалтын автомашины хангалт 14.4% хувиар нэмэгдэнэ гэж Онцгой байдлын ерөнхий газраас мэдээллээ.

Монгол Улсын Их Хурал, Засгийн газрын гишүүн, Зам, тээврийн хөгжлийн сайд Б.Энх-Амгалан Монгол Улсаас гадаад улс орнуудад суух Элчин сайд нар болох Монгол Улсаас ОХУ-д суух Онц бөгөөд Бүрэн эрхт Элчин сайд Д.Даваа, БНПУ-д суух Онц бөгөөд Бүрэн эрхт Элчин сайд Б.Дорж, Шведийн Хаант Улсад суух Онц бөгөөд Бүрэн эрхт Элчин сайд Т.Жанабазар, Тайландын Хаант Улсад суух Онц бөгөөд Бүрэн эрхт Элчин сайд А.Төмөр, Монгол Улсаас НҮБ-ын дэргэд суух Байнгын төлөөлөгч, Онц бөгөөд Бүрэн эрхт Элчин сайд В.Энхболд нарыг хүлээн авч уулзав.

Уулзалтын эхэнд Зам, тээврийн хөгжлийн сайд Б.Энх-Амгалан Монгол Улсаас гадаад орнуудад суух Онц бөгөөд Бүрэн эрхт Элчин сайдаар томилогдсонд баяр хүргээд, томилогдсон улс орнуудынхаа Монгол Улстай харилцах гадаад харилцааг шинэ шатаар ахиулж, Монгол Улсынхаа нэр хүндийг өндөрт өргөж, улсынхаа хөгжилд өөрийн гэсэн хувь нэмрээ оруулж ажиллахыг хүслээ. Мөн тэрбээр Монгол Улсын Зам, тээврийн салбарт хэрэгжиж буй төсөл хөтөлбөрүүдийн талаар мэдээлэл өгч, Онц бөгөөд Бүрэн эрхт Элчин сайд нарын томилогдон суугаа улс орнуудтай зам, тээврийн салбарын хүрээнд хэрэгжүүлэх, хамтрах, анхаарах шаардлагатай ажлуудын талаар ярилцаж, санал солилцов.

Б.Энх-Амгалан сайд Монгол Улсын Засгийн газар болон дээрх улс орнуудын Засгийн газар хооронд хийсэн Автотээвэр, Агаарын тээврийн хэлэлцээрүүдийг шинэчлэн байгуулах, зорчигч эргэлтийг нэмэгдүүлэх, нислэгийн код хуваах, эдгээр улсуудад зам, тээврийн салбарын, тэр дундаа далайн тээврийн боловсон хүчнийг сургах, дадлагажуулах, богино хугацааны сургалтад хамруулах, шинэ дэвшилтэт техник технологийг эх орондоо нэвтрүүлэх, хоёр талт болон олон талт хамтын ажиллагааг хөгжүүлэх тал дээр онцгой анхаарал хандуулж ажиллахын чухлыг онцлоод, хилийн чанадад эх орноо төлөөлөн суух их үйлсэд нь амжилт хүслээ.

Шинэ жилийн баярын арга хэмжээ зохион байгуулагдаж байгаатай холбогдуулан иргэд, аж ахуйн нэгж, байгууллагууд салют, бенгалын гал болон чанарын шаардлага хангаагүй пиротехникийн хэрэгслийг зөвшөөрөлгүй газраас худалдан авч, улмаар салют буудуулах, сүлд модыг чимэглэхдээ мэргэжлийн бус хүнээр хийлгэдгээс болж бэртэж гэмтэх тохиолдол гардаг.

Тиймээс зөвшөөрөлгүйгээр салют, бенгалын гал зэрэг пиротехникийн хэрэгслийг иргэдийн гар дээрээс худалдаж авахгүй байх, эрх бүхий байгууллагаас худалдан авсан бол заавар санамжийг мөрдөх,

Сүлд модоо 12 волтын хүчдэлтэй гэрлэн чимэглэлээр чимж, цахилгааны утасны холболтыг дүрмийн дагуу хийх, цагаан бенгалын галыг хялбар шатах материалын ойролцоо цацруулахгүй байх,

Цацарч дууссаны дараа цаас, саа, хөвөн зэрэг шатамхай зүйл дээр хаяхгүй байх,

Оргилуурт гэрэл, тэсрэх бодис, динамидийг орон байр, сүлд модны ойролцоо хэрэглэхгүй байх, аж ахуйн нэгж, байгууллагууд сүлд модыг дүрмийн дагуу угсарч ашиглах, тухайн обьектын харуул хамгаалалтын сонор сэрэмжийг сайжруулж болзошгүй эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.