Month: December 2019

Засгийн газрын өнөөдрийн хуралдаанаар 2020 оны нэгдүгээр сарын 1-ний өдрөөс бүх төрийн албан хаагчдын цалинг найман хувиар нэмэхээр шийдвэрлэлээ.

Цалин, тэтгэврийн нэмэгдлийг 2020 оны Улсын төсөвт батлуулсан учир албан хаагчид ирэх сараас нэмэгдсэн цалингаа авна.

Төрийн албан хаагчдын цалинг 2014 оноос хойш нэмээгүй бөгөөд одоогоор дундаж цалин 900 мянган төгрөг байгаа юм. Ийнхүү нэмснээр он гараад төрийн албан хаагчдын дундаж цалин нэг сая 70 мянган төгрөг болох юм.

МИАТ-ийн хоёрдугаар нисгэгч Д.Булганхангай хар тамхи хэрэглэж Берлинд баригдсан талаар мэдээлэл цацагдаа буй. Тэгвэл энэ асуудлаар МИАТ компани хоёр нисгэгчийнхээ хөдөлмөрийн гэрээг цуцалсан талаар МИАТ ТӨХК-ийн Нислэгийн үйл ажиллагааны ерөнхий менежер, ерөнхий нисгэгч Ч.Нямсайхан “Нисгэгч согтууруулах ундаа болон мансууруулах бодис хэрэглээд нислэгт гарах ямар ч боломж байхгүй. Нисгэгч нар тогтмол эмчийн үзлэгт хамрагддаг. Энэ хариуцлагатай ажлыг согтууруулах ундаа болон мансууруулах бодис хэрэглэсэн үед гүйцэтгэх боломжгүй гэдгийг хариуцлагатайгаар хэлмээр байна. Мөн олон улсын нисэх буудлууд аюулгүйн үзлэгийг хийж, согтууруулах ундаа, мансууруулах бодисын тест аваад явдаг.

Берлинд болсон үйл явдалтай холбогдуулан хоёр нисгэгчид хариуцлага тооцож, хөдөлмөрийн гэрээгээ цуцалсан. Нэг нисгэгч нь согтоод буудлын өрөөндөө унтсаны улмаас ус алдсан талаар мэдээллийг манай Берлин дэх төлөөлөгчийн газраас өгсөн. Тиймээс Европт дадлага хийгээд буцаж явсан нисгэгч нарт томилолт үүрэг өгч, нислэг хуваарийнхаа дагуу хийгдсэн. О.Баасанхүү гишүүний яриад байгаа шиг нислэг хойшилсон зүйл огт байхгүй” гэжээ.

Монгол Улсад авто замын салбар үүсч хөгжсөний 90 жилийн ой энэ онд тохиож байна.

Ойн баярыг тохиолдуулан авто замын салбарын ахмад, дунд үеийнхнийг Монгол Улсын Ерөнхийлөгчийн зарлигаар төрийн дээд одон медалиар шагнасныг ЗТХ-ийн сайд Б.Энх-Амгалан, дэд сайд Л.Халтар, төрийн нарийн бичгийн дарга С.Батболд нар өчигдөр гардуулав. Мөн салбартаа манлайлан ажиллаж буй мэргэжилтнүүдийг салбарын шагнал, ойн хүндэт медалиар шагнаж урамшуулав.

ЗТХ-ийн сайд Б.Энх-Амгалан шагнал гардуулах үеэр хэлсэн үгэндээ, Монгол Улсын авто замын салбарт залуу нас, хүч хөдөлмөр, авьяас билгээ зориулсан ахмадууд, ид хийж бүтээж яваа дунд үеийнхэн, халааг нь авах залуустаа 90 жилийн ойн баярын мэнд хүргээд улиран өнгөрч буй 2019 онд Монгол Улсын зам, тээврийн салбарт олон томоохон төсөл хөтөлбөр амжилттай хэрэгжиж, ололт амжилтаар дүүрэн жил болсныг онцлон тэмдэглэлээ.

Тухайлбал, Монгол Улс анх удаа хурдны авто зам, хүнд даацын зориулалтын авто замыг ашиглалтад оруулж, жарны түүхтэй Налайхын замыг 4 эгнээ болгон өргөтгөн шинэчиллээ. Мөн Баянхонгор-Байдрагийн гүүр, Байдрагийн гүүр-Алтай, Хашаат-Толбо, Тосонцэнгэл-Улиастай чиглэлийн гээд зөвхөн авто замын салбарт олон бүтээн байгуулалтыг ашиглалтад оруулсныг онцлов.

Тэрээр ирэх 2020 онд бүх аймгийн төвийг нийслэл хоттой хатуу хучилттай замаар холбож, босоо тэнхлэгийн авто замаа дуусгах мөн олон төсөл хөтөлбөрийг шат дараатай хэрэгжүүлэх төлөвлөгөөтэй ажиллаж байгаагаа дуулгаад, Монголын нийт авто замчдадаа ажил хөдөлмөрийн өндөр амжилт хүслээ.

Нийслэлийн Засаг даргын Тамгын газраас санаачлан хэрэгжүүлж буй “Цэвэр Агаартай хот” аяны хүрээнд зохион байгуулж буй мөсөн хотхоны нээлтийн ёслол Сүхбаатарын талбайд өнөөдөр 18 цагт болно.

Нээлтийн ёслолд Нийслэлийн удирдлагууд болон холбогдох албаны хүмүүс, урлаг соёлын төлөөллүүд оролцоно. Энэ үеэр Д.Сүхбаатарын талбайн мөсөн каток нээлтээ хийж, сүлд модны гэрэл асаах ёслолын үйл ажиллагаа, урлагын тоглолт, 3D лазер гэрлийн үзүүлбэрийг толилуулах юм. Мөсөн хотхон нь насанд хүрэгсэд болон хүүхэд гулгах зориулалттай мөсөн гулгуурын талбай, гэрэлтүүлэг, гэрлэн чимэглэл бүхий өвлийн олимпын болон чөлөөт сэдэвт мөсөн баримлуудаас бүрдэж байгаа аж.

Өвлийн спортыг хөгжүүлэх, сурталчлах, нийслэлчүүдийг гэр бүлээрээ ая тухтай амарч, чөлөөт цагаа зөв зохистой өнгөрөөх боломжийг бүрдүүлэх зорилгоор бүтээсэн энэхүү мөсөн хотхонд зочилсон иргэд дэлхийд танигдсан уран бүтээлчдийн хийж бүтээсэн урлалыг мөсөн хотхонд үзэж сонирхох, мөсөн гулгуурын талбайд үнэ төлбөргүй тэшүүрээр гулгах боломжтой.

Өвөрмөц шинэлэг шийдэл бүхий мөсөн хотхоныг зураач, мөсөн гоёл урлаач Д.Цэрэнбат нарын уран бүтээлчид бүтээж байгаа юм. Энэ бүтээлүүдийг сар шинийн баяр хүртэл Улаанбаатар хотын төв талбайг чимэглэж байх юм байна.

Тээврийн хэрэгслийг согтуугаар жолоодож Яаралтай түргэн тусламжийн машиныг мөргөсөн осол гарчээ. Тодруулбал, 2019 оны 12 дугаар сарын 25-ны 01.00 цагийн орчим Баянгол дүүргийн 22 дугаар хороо, Хасбаатарын гудамж “Анар” дэлгүүрийн урд замд “Honda Fit” маркийн автомашины жолооч, 20 настай эрэгтэй согтууруулах ундаа хэрэглэсэн үедээ жолоо барьж, дуудлагад явж байсан Нийслэлийн түргэн тусламжийн төвийн “Hyundai Starex” автомашиныг мөргөж, осол гаргажээ.

Архи, согтууруулах ундаа хэрэглэсэн үедээ тээврийн хэрэгсэл жолоодохгүй байхыг Цагдаагийн байгууллагаас анхааруулж байна.