Month: November 2019

Аргын тооллын арваннэгдүгээр сарын 5, Ангараг гариг. Билгийн тооллын 9, улаан морь өдөр. Өдрийн наран 07:41 цагт мандан 17:29 цагт жаргана. Энэ өдөр нууц зөвлөгөөн хийх, бурханд залбирах, нөхрийг эрэх, (нөхөр сэлт), хаад ноёд, ихэс дээдэст тангараг, амлалт гаргах зэрэгт сайн. Байшин сууц тохижуулах, морь худалдах зэрэгт муу.

Өдрийн сайн цаг нь хулгана, үхэр, туулай, морь, бич, тахиа болой.

Үс шинээр үргээлгэх буюу засуулахад мал арвижина.

Ардын хувьсгалын 98 жилийн ой, Үндэсний их баяр наадамд барилдахдаа сэргээш хэрэглэсэн хоёр бөхийн даваа бүрийг хүчингүйд тооцож, барилдах эрхийг нь хоёр жилээр хасах шийдвэр гаргасныг Үндэсний их баяр наадмыг зохион байгуулах хорооны дарга, Шадар сайд Ө.Энхтүвшин олон нийтэд мэдээлсэн билээ. Баяр наадмыг зохион байгуулах хорооноос уг тогтоолоо Ерөнхийлөгчид хүргүүлсэн байна.

Тогтоолд, Э.Оюунболд, Д.Цэрэнтогтох нараас сэргээшийн төрлийн хортой бодис илэрсэн тул уг барилдаанд барилдаж давсан даваа тус бүрийг хүчингүйд тооцох, барилдах эрхийг хоёр жилээр хасах шийдвэр гаргасныг уламжилсан байна.

Эрчим хүчний зохицуулах хорооноос аймаг, нийслэлийн Засаг даргын тамгын газрын Хөрөнгө оруулалт хөгжлийн бодлого төлөвлөлтийн хэлтсийн мэргэжилтнүүдэд зориулсан сургалтыг амжилттай зохион байгууллаа.

Эрчим хүч хэмнэлтийн чиглэлээр зохион байгуулсан энэхүү сургалтад Улаанбаатар хот болон нийт 19 аймгийн Засаг даргын тамгын газрын Хөрөнгө оруулалт хөгжлийн бодлого төлөвлөлтийн хэлтсийн мэргэжилтэн оролцсон юм.

Сургалтын үеэр “Эрчим хүчний талаар баримталж буй бодлого, өнөөгийн байдал”, “Эрчим хүч хэмнэлтийн тухай хууль”,” Уур амьсгалын өөрчлөлтийн талаар төрөөс баримталж буй бодлого”, “Эрчим хүч хэмнэх үндэсний хөтөлбөрийг орон нутагт хэрэгжүүлэх, дэд хөтөлбөр боловсруулах, төлөвлөгөө, тайлан гаргах”, “Эрчим хүчний хэмнэлт, зохистой хэрэглээ” зэрэг багц сэдвийн хүрээнд Эрчим хүчний яам, Эрчим хүчний зохицуулах хороо, Байгаль орчин, аялал жуулчлалын яамны холбогдох албан тушаалтнууд болон мэргэжилтнүүд мэдээлэл өгч, санал солилцсон юм. Мөн орон нутгийн мэргэжилтнүүдээс гарсан зарим санал хүсэлтийг хүлээн авч холбогдох яам тамгын газарт хүргүүлж, шийдвэрлүүлэхээр болжээ.

Шударга өрсөлдөөн, хэрэглэгчийн төлөө газраас хэвлэл мэдээллийн хэрэгслээр гарсан мэдээлэлд үндэслэн сайжруулсан түлштэй холбоотой асуудлаар хяналт шалгалтын ажлыг зохион байгуулсан билээ. Хяналт шалгалтаар “Таван толгой түлш” ХХК-ийн худалдан борлуулж буй сайжруулсан шахмал түлшний хаяг шошгожилт нь Хэрэглэгчийн эрхийг хамгаалах тухай хуульд зааснаар үйлдвэрлэгч нь бараа, бүтээгдэхүүнээ зах зээлд нийлүүлэхдээ түүнийг хэрэглэх заавар, хадгалах, тээвэрлэх, ашиглахад дагаж мөрдөх аюулгүйн зааварчилгаа, анхааруулга, үйлдвэрлэсэн он, сарыг худалдааны баримт бичиг, хаяг, шошго дээр хэрэглэгчид ойлгомжтой, хэрэглэхэд хялбар байхаар тусгана гэж заасныг мөрдөөгүй нөхцөл байдал тогтоогдсон.

Боловсрол, соёл, шинжлэх ухаан, спортын сайд Ё.Баатарбилэг өнөөдөр Дэлхийн эрүүл мэндийн байгууллагын Суурин төлөөлөгч Сергей Диордицатай уулзлаа.

Сайд Ё.Баатарбилэг хэлсэн үгэндээ өнөө цагийн хүүхдүүд хичээл сургалтаас гадна элдэв төрлийн мэдээлэл, нийгэм, гэр бүлийн орчны нөлөөллөөс шалтгаалж стресс үүсэх, цаашлаад сэтгэл зүйн хямралд орох, гэмт хэрэг, зөрчилд холбогдох асуудал анхаарал татаж эхэлснийг онцлов. Тиймээс ерөнхий боловсролын сургуулиудыг орон тооны сэтгэл зүйчтэй болгох шаардлагатай гээд хүүхэдтэй ажилладаг сэтгэл зүйчдийг сурган бэлтгэх, тэдний ажиллах орчныг бүрдүүлэх чиглэлд анхаарч, дэмжихийг хүслээ.

Мөн манай улс өсвөр үеийн эрүүл мэндийн боловсролд анхаарал хандуулж, эрүүл мэндийн хичээлийн хөтөлбөр баталж, албаны ёсны сурах бичигтэй бие даасан хичээл болгон үзэж байгааг дурдаад цаашид эцэг, эх, асран хамгаалагчдын эрүүл мэндийг боловсрол, зөв үлгэр дуурайлал, дадал хэвшлийг нэмэгдүүлэхэд анхаарч ажиллах шаардлагатай байна гэлээ.

Ноён суурин төлөөлөгч эдгээр асуудалд нухацтай хандаж, Эрүүл мэндийн яам болон холбогдох төслүүдийн хүрээнд хамтран ажиллах боломжийг судалж үзэхээ илэрхийллээ.

Мэргэжлийн хяналтын ерөнхий газрын даргын баталсан “Олон улсын болон улсын шинж чанартай цаг үеийн ба нийтийг хамарсан баяр ёслолыг зохион байгуулах нэгдсэн арга хэмжээнд урьдчилан сэргийлэх хяналт шалгалт хийх” удирдамжийн дагуу дүүргийн 29 дүгээр хороо, Драгон худалдааны төвд хоол үйлдвэрлэлийн чиглэлээр үйл ажиллагаа явуулж буй иргэдийн үйл ажиллагаанд хяналт шалгалт хийлээ.

Шалгалтаар Монгол Улсын засгийн газрын 2018 оны 189 дүгээр “Нэг удаагийн нийлэг хальсан уутыг хориглох тухай” тогтоолыг зөрчиж хүнсний зориулалтын бус сав, баглаа боодол болох 0.035 мм-ээс доош хэмжээтэй буюу 0.006-0.031 мм хэмжээтэй нэг удаагийн нийлэг хальсан уутыг сав баглаа боодолд ашиглаж байсан нь Монгол Улсын Хүнсний бүтээгдэхүүний аюулгүй байдлыг хангах тухай хуулийн 11 дүгээр зүйлийн 11.1.2 дахь заалтыг зөрчсөн байна.

Иймд 4 төрлийн 41500 төгрөгийн үнэ бүхий нийлэг хальсан уутыг зохих журмын дагуу шийдвэрлүүлэхээр нийслэлийн орон тооны бус зөвлөлд шилжүүлж, цаашид энэ төрлийн уутыг хэрэглэхгүй байхыг анхааруулж ажиллалаа.