Month: October 2019

Нийслэлийн Мэргэжлийн хяналтын газрын дарга Л.Эрдэнэчулууны танилцуулснаар өнгөрсөн 14 хоногийн хугацаанд мэргэжлийн хяналтын байгууллагад нийт 1661 өргөдөл гомдол ирсэн байна. Үүний хүрээнд хяналт шалгалт хийхэд 641 зөрчил илэрч, 216 эрх зүйн баримт бичиг үйлдэн, 120 гаруй сая төгрөгийн торгууль ноогдуулав.

“Үдийн цай” хөтөлбөрийн хүрээнд төрийн өмчийн 115, төрийн бус өмчийн 90 сургуулийн цайны газарт хяналт шалгалт хийхэд 60 гаруй хувь нь ариун цэврийн шаардлага хангаагүй, 58 хувь нь зориулалтын бус байранд үйл ажиллагаа явуулсан зөрчил илэрчээ.

Нийт 95 албан шаардлага, 65 албан даалгавар өгч, 31 цайны газарт 21.5 сая төгрөгийн торгууль ноогдуулсан байна. Мөн зарим сургуулийн цайны газрыг цуцлах санал хүргүүлжээ.

ОБЕГ-ын Захиргааны удирдлагын газар, Давтан сургалт сэргээн заслын төвийн хамтран зохион байгуулж байгаа “Ажлын байран дахь хөдөлмөрийн аюулгүй байдал” сэдэвт сургалт өнөөдөр эхэллээ.

Сургалтад төв орон нутгийн Онцгой байдлын байгууллагын Гал түймэр унтраах, аврах ангийн салааны захирагч, Эрэн хайх, аврах ангийн салбарын бүлгийн дарга нарын 20 гаруй алба хаагч хамрагдаж байна.

Хөдөлмөрийн аюулгүй байдал, эрүүл ахуйн тухай хууль эрхзүйн орчин, хөдөлмөрийн аюулгүй байдал, эрүүл ахуйн менежментийн систем, удирдлагын тогтолцоо, шаардлага, баримт бичиг боловсруулах сэдвийн хүрээнд явагдах тус сургалт энэ сарын 09-нийг хүртэл үргэлжилнэ.

АН-ын зөвлөл хуралдаж, дөрвөн асуудал хэлэлцжээ. Цаг үеийн нөхцөл байдалтай холбогдуулан шахмал түлшний асуудлаар, түүхийн дурсгалт соёлын өвийн барилга байгууламжид халдаж байгаа, Ард нийтийн санал асуулгын тогтоолд тавьсан Ерөнхийлөгчийн хоригийг хүлээж авсантай холбогдуулан цаашид АН-ын зөвлөл ямар байр суурь баримтлах уу гэдгээ тус зөвлөлтийн хурлаараа хэлэлцжээ. Шахмал түлшний хэрэглээтэй холбоотой үүсээд буй нөхцөл байдлын талаар Ардчилсан намын зөвлөл Засгийн газарт шаардлага хүргүүлж байгаагаа мэдэгдлээ. Энэ тухай Ардчилсан намын зөвлөлийн дарга Д.Эрдэнэбат “Сүүлийн хэдэн хоногт шахмал түлшний хэрэглээнээс үүдэж нийтээрээ угаартах, хордох цаашлаад хүний амь нас хохирсон үйлдэл гарч байгаа тул шахмал түлшний хэрэглээ зохистой байгаа эсэхийг дахин шалгах, иргэд олноороо хордох аюул, бодит нөхцөл байдал үүссэнийг анхаарах шаардлагатай байна. Шахмал түлшний хэрэглээний асуудлаар шинжилгээний байгууллагууд дүгнэлтүүдээ гаргасан хэдий ч тэдгээр дүгнэлт нь бүрэн хангалттай эсэх нь мөн эргэлзээ дагуулж байна. Шахмал түлшний стандарт, найрлагын талаар олон нийтэд мэдээлэл хангалтгүй байгаа. Шахмал түлш хэрхэн хэрэглэх талаар иргэдэд зөвлөмж, сургалт хийгээгүй атлаа иргэдийн хэрэглээнээс болсон гэж хэлэх увайгүй оролдлогоо болих хэрэгтэй. Шахмал түлшнээс үнэргүй, өнгөгүй, маш хортой бодис ялгарч байгаа нь зөвхөн айл өрхүүдэд биш агаарын дэгдэлтээр нийт массад нөлөөлөх эрсдэлтэй” гэв.

Нийслэлийн прокурорын газраас А.Ганбаатар, Ц.Сандуй нарт холбогдуулан 2002 оны Эрүүгийн хуулийн тусгай ангийн 82 дугаар зүйлийн 82.1 дэх хэсэгт зааснаар “Төрийн эрх мэдлийг хууль бусаар авах хуйвалдаан зохион байгуулах” гэмт хэрэгт яллах дүгнэлт үйлдэж ирүүлсэн эрүүгийн хэргийн урьдчилсан хэлэлцүүлгийн шүүх хуралдаан 2019 оны 10 дугаар сарын 07-ны өдрийн 10:00 цагт эхэллээ.

Шүүх хуралдаанаар Яллагдагч А.Ганбаатар, Ц.Сандуй нарыг шүүхэд шилжүүлж гэм буруугийн шүүх хуралдаан Баянгол дүүргийн эрүүгийн хэргийн анхан шатны шүүхэд 2019 оны 10 дугаар сарын 22 өдрийн 09:30 минутад товлогдсон байна.

Замын хөдөлгөөний түгжрэл саатлыг бууруулах зорилгоор дараах автозамыг нэг чигийн хөдөлгөөнд оруулжээ.

Өнөөдөр /2019.10.07/-өөс эхлэн Баянгол дүүргийн 4 дүгээр хороо Гурвалжингийн гүүрний хойноос урагш чиглэлтэй зорчих хэсгээс ТЭЦ-3 станц руу салдаг 4 замын уулзварын чигээрээ болон зүүн гар тийш эргэдгийг болиулж нэг чигийн хөдөлгөөнд оруулсан байна.

Иймд иргэд жолооч та бүхэн тэмдгийн дагуу хөдөлгөөнд оролцохыг Тээврийн цагдаагийн албанаас анхаарууллаа.

Нарны гүүрний зорчих хэсгийн хөдөлгөөнийг засах ажил өнөөдөр буюу аравдугаар сарын 7-нд дуусч 16:00 цагийн үед замын хөдөлгөөн хэвийн үргэлжлэнэ гэж Улаанбаатар зам засварын газраас мэдээллээ.

Баян-Өлгий аймгийн Засаг даргын тамгын газар, БОАЖЯ, Бүргэдийн холбоо хамтран “Бүргэдийн баяр-2019” арга хэмжээг өнгөрсөн амралтын өдрүүдэд зохион байгууллаа. 20 дахь жилдээ зохион байгуулагдаж буй тус арга хэмжээнд Баян-Өлгий аймгийн 14 сумын 90 гаруй бүргэдчин оролцож, хурд хүч авхаалж самбаа, бүргэдээ биедээ дасгасан байдал, ан агнахад сургасан байдлаараа өрсөлдлөө.

Өнгөрсөн онд гадаадын 1000 орчим жуулчин энэхүү арга хэмжээг ирж сонирхсон бол энэ жил 2200 гаруй жуулчин ирж, казах түмний шувуучлах ан агнуур, соёл уламжлалтай танилцжээ.

Бүргэдээр ан хийх нь амьдрал ахуйн хэрэгцээг хангах төдийгүй, бас уламжлалт зан үйл, баяр наадам, уралдаан тэмцээнийг илүү сонирхолтой болгодог. Бүргэдийг барьж гэршүүлэхийн тулд, дэгдээхэй байхад нь барьж авах, зэрлэг бүргэдийг барьж гаршуулах гэх хоёр аргыг хэрэглэдэг ба бүргэдээр ан хийж гаршуулан сургахад нарийн арчилгаа, маш их хичээл зүтгэл шаарддагаас гадна, бүргэдийн хөлийн уяа, нүдний даруулга, суурин суудал, ац тулгуур, арьсан бээлий, тэжээлийн уут, аяга таваг зэрэг тусгай зориулалтын хэрэглэлүүд заавал байх шаардлагатай байдаг байна.

Орхон аймгийн Онцгой байдлын газраас байгууллагын үйл ажиллагааг сурталчлах, ард, иргэдийн гамшгаас хамгаалах мэдлэгийг дээшлүүлэх зорилгоор 21 дэх жилдээ “Аврагч” нөхөрсөг тэмцээнийг аймгийн багийн иргэдийн дунд зохион байгууллаа.