Month: October 2019

Японы Олон улсын хамтын ажиллагааны ЖАЙКА байгууллагын техникийн туслалцааны хүрээнд 2017 онд Барилга, хот байгуулалтын яамнаас хэрэгжүүлэх төсөл, хөтөлбөрийн саналд хот байгуулалтын тулгуур баримт бичиг болох “Монгол Улсын хүн амын нутагшилт, суурьшлын хөгжлийн ерөнхий төслийг боловсруулах ажлыг гүйцэтгэх, тус төслийг боловсруулах хүний нөөцийн чадавхийг бэхжүүлэх талаар тавьсан тус яамны хүсэлтийг хүлээн авч, Үндэсний хөгжлийн газар, Барилга, хот байгуулалтын яам, Японы Олон улсын хамтын ажиллагааны ЖАЙКА байгууллага Монгол Улсад хэрэгжүүлэх “Үндэсний хөгжлийн цогц төлөвлөгөө боловсруулах төсөл”-ийг 2019 оны 01 дүгээр сараас амжилттай эхлүүлээд байна.

Тэгвэл өнөөдөр тус төслийн хүрээнд “Монгол Улсын хүн амын нутагшилт, суурьшлын хөгжлийн ерөнхий төсөл”, “Бүсчилсэн хөгжлийн үзэл баримтлал, бүсчилсэн хөгжлийн бодлого” боловсруулахад шаардлагатай компьютер, техник, тоног төхөөрөмжийг ЖАЙКА байгууллагаас Барилга хот байгуулалтын яаманд хүлээлгэж өглөө.

Барилга хот байгуулалтын сайд Х.Баделхан тоног төхөөрөмжийг хүлээж авах үйл ажиллгааны үеэр, “Төсөл хэрэгжүүлэхэд шаардлагатай хүний нөөц, тоног төхөөрөмжийг сайжруулах чиглэлээр хамтран ажиллах санамж бичгийг 2018 оны 8 сард байгуулсан. Энэ дагуу Японы Олон улсын хамтын ажиллагааны байгууллагаас Барилга, хот байгуулалтын яам, түүний харъяа байгууллага болон Үндэсний хөгжлийн газарт тус төслийг хэрэгжүүлэхэд шаардлагатай техник, тоног төхөөрөмжийг техник туслалцааны хүрээнд хүлээлгэн өгч байгаад талархаж байна. Цаашид Монгол Улсад хэрэгжүүлэх “Үндэсний хөгжлийн цогц бодлого боловсруулах төсөл”-ийн хүрээнд “Монгол Улсын хүн амын нутагшилт, суурьшлын хөгжлийн ерөнхий төсөл”, “Бүсчилсэн хөгжлийн үзэл баримтлал, бүсчилсэн хөгжлийн бодлого” боловсруулахад Барилга, хот байгуулалтын яам, Үндэсний хөгжлийн газар, Японы Олон улсын хамтын ажиллагааны ЖАЙКА байгууллага, төслийн зөвлөх багийн хамтын ажиллагаанд амжилт хүсье” хэмээн талархал илэрхийллээ.

Мэргэжлийн хяналтын ерөнхий газраас “Хүүхдийн эрх – Аюулгүй байдал” аяны хүрээнд хийсэн шалгалтын дүнг өнөөдөр танилцууллаа.

Хичээлийн шинэ жилийн бэлтгэл ажлыг шалгах урьдчилан сэргийлэх шалгалтад 252 сургууль, 90 дотуур байр, 385 цэцэрлэг, долоон их, дээд сургууль, найман Мэргэжил сургалт үйлдвэрийн төв, 30 хүнсний бүтээгдэхүүн ханган нийлүүлдэг аж ахуйн нэгж зэрэг 772 газрыг хамруулсан байна.

Эрүүл мэндийн сайдын баталсан А/145 дугаар тушаалаар сургууль, цэцэрлэгийн эрүүл мэндийн урьдчилан сэргийлэх үзлэгт хамрагдах ёстой албан хаагчид хичээл, сургууль эхлэхээс 30 хоногийн өмнө үзлэг шинжилгээнд орох ёстой. Гэтэл хичээл эхлэх үе, цэцэрлэг, сургуулийн хүүхдүүдтэй зэрэгцэн шинжилгээ өгч байгаа нь Эрүүл мэндийн байгууллагын ачааллыг нэмэгдүүлэх, цаашлаад шинжилгээнд хамрагдахгүй хичээлийн эхлүүлж, эрүүл эсэх нь тодорхойгүй багш ажилтнууд хүүхдүүдэд үйлчилснээс хоолны хордлого, гэдэсний халдвар, сүрьеэ зэрэг халдварт өвчин тархаах эрсдэлийг үүсгэж байна гэж үзжээ.

Түүнчлэн шалгалтад хамрагдсан байгууллагуудаас 19 цэцэрлэг, 13 сургууль зориулалтын бус байртай, 28 цэцэрлэг орон сууцны нэг дүгээр давхарт үйл ажиллагаа явуулдаг, 15 цэцэрлэг, гурван сургууль есдүгээр сарын 1-нд хичээлээ эхэлж чадаагүй байна. Мөн цэцэрлэг, сургуулийн 63 багш мэргэжлийн бус, 19 номын санч, нийгмийн ажилтан, туслах багш мэргэжлийн сургалтад хамрагдаагүй зөрчил илэрчээ.

Шалгалтын хүрээнд эрүүл ахуй, халдвар хамгааллын хяналтын чиглэлээр 1762 зөрчил илрүүлж, таван аж ахуйн нэгж, байгууллага, есөн иргэнд нийт 6.1 сая төгрөгийн шийтгэвэр ногдуулжээ.

Дорнод аймгийн Баян-Уул сумд энэ сарын 6-ны 22.00 цагийн орчимд айлын хот руу баавгай дайрч хоёр үхэр барьжээ. энэ тохиолдлыг оролцуулаад суурин газарт орж ирсэн баавгайн тоо 24-т хүрээд байна.

“Энэ жил самар жимс бага ургасан учир баавгай ичихээсээ өмнө тарга авахын тулд хөвчөөс гарч ирж байна” хэмээн БОАЖЯ-ны мэргэжилтэн хэлсэн юм. Гадуур энэ зун Сибирьт гарсан ойн түймрээс дайжсан баавгайнууд манай улсад орж ирээд хүн, малыг түйвээж байгаа гэх яриа гараад байгаа. Харин хүн рүү халдаад байгаа эдгээр баавгайнууд нь бүгд манай улсын хүрэн баавгайнууд юм. Өмнө нь 1966, 1971, 1988 онуудад баавгай хорхойтож суурин газар луу бууж ирэн, хүн барьсан тохиолдол гарч байжээ.

Дорноговь аймгийн Сайншанд хотоос үйлдвэр хүртэлх 27 км төмөр зам, 18.8 км автозам болон цахилгаан дамжуулах агаарын шугам, дэд станцыг Улсын комисс хүлээн авлаа. Уг арга хэмжээнд Ерөнхий сайд болон Засгийн газрын зарим гишүүд оролцлоо.

Газрын тос боловсруулах үйлдвэр нь Энэтхэгийн Засгийн газраас Монгол Улсад олгож буй нэг тэрбум ам.долларын хөнгөлөлттэй зээлийн санхүүжилтээр баригдаж байгаа бөгөөд өнгөрсөн сард Ерөнхийлөгч Х.Баттулгыг Энэтхэг улсад айлчлах үеэр 236 сая ам.доллар нэмж олгох шийдвэр гаргасан билээ.

Нийтийн хэв журам хамгаалах, олон нийтийн аюулгүй байдлыг хангах албанаас нутаг дэвсгэр хариуцсан цагдаагийн байгууллагад ажиллаж байгаа хэсгийн байцаагчийн албандаа хандах хандлага, албаны үнэлэмжийг нэмэгдүүлэх, мэргэжлийн ур чадвар, бие бялдар, мэдлэг чадварыг дээшлүүлэх, үйл ажиллагаагаа олон нийтэд сурталчлах зорилгоор Цагдаагийн ерөнхий газрын даргын 2019 оны 09 дүгээр сарын 26-ны өдрийн А/213 дугаар тушаалаар баталсан удирдамжийн дагуу “Хэсгийн байцаагч-2019” тэмцээнийг 2019 оны 10 дугаар сарын 03, 04-ний өдрүүдэд Цагдаа, дотоодын цэргийн сургалтын нэгдсэн төв, “Нарстай” дахь хээрийн сургалтын хэсэгт тус тус зохион байгууллаа.

Тэмцээнийг хууль эрх зүйн мэдлэг, гадаад хэлний мэдлэг, зөрчлийн хэрэг бүртгэлт явуулах ур чадвар, компьютерийн мэдлэг, бие бялдрын бэлтгэлжилт гэсэн 5 төрлөөр явуулж, нутаг дэвсгэр хариуцсан цагдаагийн байгууллагын газар, хэлтсийн 37 нэгжийн 37 хэсгийн байцаагч хурд хүч, авхаалж самбаагаа сорин оролцлоо.

“Хэсгийн байцаагч 2019” тэмцээний тэргүүн байранд Дархан-Уул аймаг дахь цагдаагийн газрын хэсгийн байцаагч, цагдаагийн ахлах дэслэгч Г.Анхбаяр шалгарч цом, өргөмжлөл, алтан медаль, мөнгөн шагнал, Dayun маркийн мотоциклиор, дэд байранд Баянгол дүүрэг дэх цагдаагийн газрын нэгдүгээр хэлтсийн хэсгийн байцаагч, цагдаагийн дэслэгч, С.Одгэрэл шалгарч өргөмжлөл, мөнгөн медаль, мөнгөн шагнал бүхий зүйлээр, гуравдугаар байранд Говьсүмбэр аймаг дахь цагдаагийн газрын хэсгийн байцаагч, цагдаагийн дэслэгч Б.Пүрэвжаргал шалгарч өргөмжлөл, хүрэл медаль, мөнгөн шагнал бүхий зүйлээр шагнагдлаа.

Канад улсын Засгийн газрын санхүүжилтээр Олон улсын хөгжлийн эрх зүйн байгууллага (ОУХЭЗБ)-аас хэрэгжүүлж буй “Монгол Улсад Жендэрт суурилсан хүчирхийлэлтэй тэмцэх үйл ажиллагааг бэхжүүлэх төсөл”-д Монгол Улсын Шүүхийн ерөнхий зөвлөл хамтрагч байгууллагаар ажиллахаар харилцан ойлголцлын Санамж бичиг байгууллаа.

Шүүхийн ерөнхий зөвлөлийн дарга Н.Лүндэндорж гэр бүлийн хүчирхийлэл, гэр бүлийн холбогдолтой маргаан нь Монгол Улсад тулгамдаад буй асуудлын нэг хэмээн онцлоод төслийн үр дүнд Монгол Улсад гэр бүл, насанд хүрээгүй хүний дагнасан шүүх байгуулах хууль, эрх зүйн орчин бүрдэнэ хэмээн найдаж буйгаа илэрхийлээд бүхий л талаар дэмжиж, хамтран ажиллахаа бататгав.

Уулзалтад Шүүхийн хамтын ажиллагаа, олон нийттэй харилцах газрын дарга Б.Биндэръяа, тус газрын Олон талт хамтын ажиллагаа, төсөл хөтөлбөр хариуцсан референт С.Гандолгор, ОУХЭЗБ-ын Төслийн менежер А.Жаргалан, төслийн зохицуулагч С.Одончимэг, мэргэжилтэн С.Агьзул нар байлцав.

Чингэлтэй дүүрэг, 5-р хороо, Лааганы гудамжны авто замыг 2019 оны 10 дугаар сарын 7-ны өдрөөс 10 дугаар сарын 30-ны хооронд хааж авто замын засвар шинэчлэлтийн ажил хийж байна. Тйимээс жолооч та бүхэн бусад авто замыг сонгон замын хөдөлгөөнд оролцоно уу.

Баянзүрх дүүргийн 16 дугаар хороо, Хот дахин төлөвлөлтөөр баригдаж буй үйлчилгээтэй 54 айлын орон сууцны барилгын захиалагч нь “Металл энд вүүд” ХХК-д Мэргэжлийн хяналтын ерөнхий газрын даргын баталсан “Урьдчилан сэргийлэх хяналт шалгалт хийх тухай” 01/36 дугаар удирдамжийн дагуу барилгын хөдөлмөрийн аюулгүй байдлыг 2019 оны 10 дугаар сарын 04-ний өдөр шалгалт явуулжээ. Шалгаалтаар дараахь зөрчлүүд илэрсэн байна.

1. Барилгын гадна орчин, нийтийн эзэмшлийн зам талбай болон барилгын үйлдвэрлэлийн орчинд тэмдэг тэмдэглэгээ бүхий хамгаалалтын байгууламж хийгдээгүй.
2. Ажилчдыг хөдөлмөр хамгаалал, аюулгүй ажиллагааны мэдлэг олгох сургалтанд хамруулаагүй, зааварчилгаа өгөөгүй ажил үүрэг гүйцэтгүүлдэг.
3. Барилгын дотор лифтний хонгил, агааржуулалтын хоолойн нүх сувагт хамгаалалт хийгдээгүй.
4. Барилгын объект руу орох гарах хэсэгт шат, хашлага хамгаалалт хийгдээгүй
5. Барилгын гүйцэтгэтгэгч тодорхойгүй зөрчлүүд илэрчээ.