Month: September 2019

Шинэ хичээлийн жил эхэлж, нийслэлд хөл хөдөлгөөн нэмэгдсэн байгаа эл өдрүүдэд халаасны хулгайн гэмт хэрэг ихэссэн байгаа талаар цагдаагийн байгууллагаас мэдээлж байна.
Тухайлбал, иргэд автобусанд сууж, буухдаа халаасны хулгайд их өртөж, гар утсаа, түрүүвчээ алдлаа гэсэн дуудлага цагдаагийн байгууллагад их ирж байна. Хулгайн хэрэг тэр дундаа халаасны хулгайн хэрэг өсдөг аж. Ялангуяа хөдөө гадаанаас оюутан болж ирсэн хүүхдүүд, мөн хүүхдүүдээ авч ирсэн ар гэрийнхэн нь хайхрамжгүй хэнэггүй байдлаасаа болж хулгайчид эд зүйлсээ алдаж, энэ төрлийн гэмт хэргийн хохирогч болдог. Тиймээс олон нийтийн газраар явахдаа өөрийн эд зүйлсдээ сонор сэрэмжтэй, анхаарал болгоомжтой явахыг, хулгайч нарт боломж олгохгүй байхыг цагдаагийн байгууллагаас анхааруулж байна.

2019 оны есдүгээр сарын 12-ны өдрөөс эхлэн Хөх хот-Улаанбаатар чиглэлийн шууд нислэг үйлдэж эхэлнэ гэж БНХАУ-ын Air China компани мэдэгдлээ.

Өвөр Монголын захиргааны төв болох Хөх хотоос Монголын нийслэл хүртэлх болон буцах нислэгийг Боинг 737-800 онгоцоор пүрэв болон ням гаригуудад үйлдэх юм байна.

“Монгол улс Хятадын “Бүс ба зам” санаачилгын чухал оролцогч орон бөгөөд нислэгийн энэхүү чиглэл нь Хөх хот Улаанбаатарын хооронд зорчих шинэ хувилбарыг санал болгож байгаа юм” хэмээн Air China компанийн төлөөлөгч мэдэгджээ.

Амралтын өдрүүдэд /2019.08-31-ээс 2019.09.01/ Тээврийн цагдаагийн албаны Жижүүрийн шуурхай удирдлагын хэлтэс нийт 464 дуудлагыг хүлээн авснаас зам тээврийн ослын шинжтэй 312 дуудлага, мэдээллийг хүлээн авч, шалгалтын ажиллагаа явууллаа. Бүртгэгдсэн осол, хэргийн улмаас нийслэлд 4 хүн гэмтэж, ноцтой зам тээврийн ослын улмаас нийслэлд 2, орон нутагт 1 хүний амь нас хохирсон байна.

Ноцтой зам тээврийн ослоос дурдвал:

2019.08.31-ний өдөр 23 цаг 30 минутын орчимд СХД-н 32 дугаар хороо Эмээлтийн зам, “Их хурд” түүхий эд авах цэгийн урд замд Toyota Estima автомашины жолооч Хятад улсын иргэн Хаши нь явган зорчигч 44 настай эрэгтэй, 30 настай эрэгтэй Б нарын 2 хүнийг мөргөж амь насыг нь хохироосон байна.

Мөн 2019.09.01-ний өдрийн 09.56 цагийн орчимд Сүхбаатар аймгийн Баруун-Урт сумын 6-р баг Дөрвөлжийн 10-7 тоот хашаанд амины Mitsubishi L200 автомашины жолооч Б нь явган зорчигч 1 настай, эмэгтэй Ц-г ухарч байхдаа мөргөж амь насыг хохироосон.

Явган хүний гарцаар зам хөндлөн гарч байгаа иргэдийг мөргөж гэмтээх тохиолдол ихсэж байгаа тул жолооч та бүхэн замын хөдөлгөөний дүрмээ биелүүлж, бусдад аюул осолтой байдал үүсгэхгүйгээр зорчихыг Тээврийн цагдаагийн албанаас сэрэмжлүүлж байна.

Халх голын байлдааны ялалтын 80 жилийн ойд зориулсан “Үдшийн цэнгүүн, урлагийн тоглолт”-ыг маргааш буюу 2019 оны 9 дүгээр сарын 3-ны өдрийн 21:00 цагт жанжин Д.Сүхбаатарын талбайд зохион байгуулах аж.

Уг үйл ажиллагаанд Цэргийн дуу бүжгийн Эрдмийн чуулга, Хилийн цэргийн дуу бүжгийн чуулга, Зэвсэгт хүчний Жанжин штабын Үлгэр жишээ үлээвэр найрал хөгжмийн уран бүтээлчид оролцоно. Тоглолтын төгсгөлд нь ёслолын буудлага хийх юм байна.

Онцгой байдлын ерөнхий газраас Бүгд Найрамдах Франц Улсын Элчин сайдын яамтай хамтран зохион байгуулж байгаа “Ажиллагааны үеийн удирдлага” сэдэвт онол, дадлагын сургалт өнөөдөр НОБГ-ын Нийслэлийн иргэдийг гамшгаас хамгаалах сургалт аргазүйн төвд эхэллээ.

Сургалтад нийслэлийн хүрээний анги, байгууллагуудын Гал түймэр унтраах, аврах ангийн захирагч нар хамрагдаж байгаа бөгөөд сургалтыг Франц Улсын сургагч багш нар удирдан явуулж байна.

Энэ хүрээнд Монгол болон Франц улсын аврах ажиллгааны талаар танилцуулж, харилцан туршлага мэдээлэл солилцох юм. Сургалт энэ сарын 13-ныг хүртэл үргэлжилнэ гэж Онцгой байдлын ерөнхий газраас мэдээллээ.

Халхын голын байлдааны ялалтын 80 жилийн ойг тохиолдуулан Монгол Улсын Ерөнхийлөгч Х.Баттулга зарлиг гаргаж, Дорнод аймаг дахь Бүсийн оношилгоо эмчилгээний төвийг Цэргийн гавьяаны одонгоор шагналаа. Шагналыг Монгол Улсын Ерөнхийлөгчийн Тамгын газрын дэд дарга Г.Байгалмаа гардуулж, баяр хүргэв.

Бүсийн оношилгоо эмчилгээний төв нь 1939 оны Халхын голын байлдаан, 1945 оны чөлөөлөх дайн, дайны дараах хор уршгийг арилгахад үнэтэй хувь нэмэр оруулсан бөгөөд аймгийн төв больницдоо цэргийн 7-р тасгийг тусгайлан нээж шархадсан цэрэг дайчдыг эмчлэх, сувилах, асрах зэргээр мэргэжлийн тусламж үйлчилгээг чадварлагаар үзүүлж байжээ.

Шагнал гардуулах ёслолд аймгийн Дорнод аймгийн Засаг дарга М.Бадамсүрэн, Монгол Улсын Ерөнхийлөгчийн Тамгын газрын дэд дарга Г.Байгалмаа, УИХ-ын гишүүн, Байгаль орчин, хүнс хөдөө аж ахуйн байнгын хорооны дарга Х.Болорчулуун нар оролцлоо.

“Цэвэр агаартай-Авто машингүй өдөр”-ийг энэ сарын 15-нд зохион байгуулахтай холбогдуулан нийслэлийн Агаар, орчны бохирдлын асуудал хариуцсан төслүүдийн удирдагч Д.Мөнхжаргалаар ахлуулсан Ажлын хэсэг хуралдлаа.

Тус ажлын хэсгийн хуралдаанд Засаг даргын хэрэгжүүлэгч агентлаг, харьяа газруудын албан тушаалтнууд оролцсон бөгөөд “Цэвэр агаартай-Авто машингүй өдөр”-өөр зохион байгуулах үйл ажиллагаануудыг хэлэлцлээ.

Энэхүү “Цэвэр агаартай-Авто машингүй өдөр” арга хэмжээг “Цэвэр агаартай хот”, “Авто машингүй өдөр”, “Их цэвэрлэгээний 90 минут” гэсэн 3 ажлын хүрээнд зохион байгуулахаар төлөвлөн ажиллаж байна.

“Цэвэр агаартай-автомашингүй өдөр”-өөр автомашины хэрэглээг багасгах, өөр төрлийн зорчих хэрэгслийг сонгох, агаарын бохирдлыг бууруулахад хувь нэмрээ оруулах, орон байраа дулаалах, эрчим хүч хэмнэх зөв дадал, сайжруулсан хатуу түлшийг иргэд, олон нийтэд хэрэглэхийг уриалж, сурталчлан таниулах чиглэл бүрээр ажиллахыг нийслэлийн Засаг даргын хэрэгжүүлэгч агентлаг, дүүргүүдийн Засаг даргын Тамгын газрын дарга нарт Ажлын хэсгийн ахлагч Д.Мөнхжаргал үүрэг болголоо.