Month: September 2019

Төрийн байгуулалтын байнгын хорооны дарга С.Бямбацогт өнөөдөр Европын аюулгүй байдал хамтын ажиллагааны байгууллага Ардчилсан институт, хүний эрхийн газрын Улс төрийн намын шинжээчдийн мэргэшсэн багийн гишүүн, Ноттингамийн Их сургуулийн Улс төр, олон улсын харилцааны дэд профессор Фернандо Касал Бэртуаг хүлээн авч уулзлаа.

Төрийн байгуулалтын байнгын хорооны дарга С.Бямбацогт Улс төрийн намын тухай хуулийн шинэчилсэн найруулгын төслийг УИХ-ын намрын ээлжит чуулганд өргөн барихаар хэлэлцэж буй энэ цаг үед уулзалт болж байгааг онцлон тэмдэглэлээ. Улс төрийн намын тухай хуульд нэмэлт, өөрчлөлт оруулах хуулийн төслийн ажлын хэсгийн ахлагчийн хувьд Улс төрийн намуудыг ардчилсан, нээлттэй, хариуцлагатай болгоход олон улсын чиг хандлага, манай улсын улс төрийн орчин, соёл, нөхцөл байдалд тохируулан эрх зүйн зохицуулалтыг хэрхэн боловсронгуй болгох талаар санал солилцлоо. Түүнчлэн хуулийн төсөл боловсруулахтай холбоотой судалгаа, намын гишүүнчлэлийн босгыг хэрхэн тогтоох талаар бусад улс орны туршлага зэрэг асуудлаар ярилцлаа.

Ингээд Европын аюулгүй байдал, хамтын ажиллагааны байгууллагатай улс төрийн намын тухай хуулийн төслөөр хамтран ажиллахаар талууд тохиролцлоо хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Монгол Улсын Ерөнхийлөгч, Зэвсэгт хүчний Ерөнхий командлагч Х.Баттулга өнөөдөр Зэвсэгт хүчний 017 дугаар ангийн үйл ажиллагаатай танилцах үеэрээ ахмадын баярыг угтан цугласан Монголын Улсын зэвсэгт хүчинд ажиллаж байсан үе, үеийн ахмад дайчиддаа мэндчилгээ дэвшүүлж, баяр хүргэлээ.

Энэ үеэр ЗХЖШ-ын ахмадын хорооны дарга, чөлөөнд байгаа хошууч генерал Д.Бадам Зэвсэгт хүчний Ерөнхий командлагчийг хүрэлцэн ирсэнд талархал илэрхийлж, ахмадуудын нийгмийн оролцоо, аж амьдралын өнөөгийн байдлыг танилцуулсан юм.

Монгол Улсын Ерөнхийлөгч, Зэвсэгт хүчний Ерөнхий командлагч Х.Баттулга ахмадуудын амьдралын түвшин харилцан адилгүй, нийгмийн халамж үйлчилгээний чанар, хүртээмж төдийлөн хангалттай бус байгаа ч улс орны нийгэм, эдийн засгийн байдал сайжрахын хэрээр ахмад настнуудад тэр дундаа цэргийн тэтгэвэр тогтоолгосон ахмадуудад тавих төр, засгийн халамж анхаарал улам бүр өсөн нэмэгдэнэ гэсэн бодолтой буйгаа илэрхийллээ.

МОНГОЛ УЛСЫН ЕРӨНХИЙЛӨГЧ Х.БАТТУЛГА:

Эрхэм хүндэт генерал, офицер, ахлагч нар аа!

Эрхэм хүндэт бэлтгэл болон чөлөөнд байгаа ахмад дайчид аа!

Та бүхэнд Олон цлсын болон Монголын ахмадын өдрийн баярын мэндийг хүргэж, чин сэтгэлийн талархал дэвшүүлье!

Олон зуун жилийн баатарлаг түүхтэй Монгол Улсын тусгаар тогтнол, эрх чөлөө, нутаг дэвсгэрийн бүрэн бүтэн байдлыг хамгаалах, улс орныхоо бүтээн байгуулалтад оролцох, Зэвсэгт хүчнийг хөгжүүлэх их үйл хэрэгт үе үеийн ахмад дайчдын оруулсан хувь нэмэр үлэмж их билээ.

Өчигдөргүй өнөөдөр гэж байдаггүйтэй адил өнөөдрийн Монгол Улсын Зэвсэгт хүчний хөгжлийн нүүр царай, өнгө төрх нь цэл залуу нас, ухамсарт амьдралаа эх орноо батлан хамгаалах үйл хэрэгт зориулсан эрхэм ахмадууд та бүхний нөр их хөдөлмөр, хичээл зүтгэлийн үр дүн юм. Баяр хүргэе.

1990-ээд оноос эхэлсэн цэргийн шинэчлэлийн бодлогын агуулга нь нийгмийн шинэ тогтолцоонд нийцсэн Үндэсний аюулгүй байдлын үзэл, баримтлалыг төлөвшүүлж, Төрийн батлан хамгаалах бодлогыг цоо шинээр тодорхойлох, батлан хамгаалах нэгдмэл тогтолцоог бүрдүүлж, цэргийн номлол, Зэвсэгт хүчний байгуулалтын зарчмыг шинэ нөхцөл байдалд зохицуулан боловсруулах, Зэвсэгт хүчний бүтэц, зохион байгуулалтад зарчмын өөрчлөлт, шинэчлэл хийх зэрэг олон талт, өргөн цар хүрээтэй үйл явц байсан бөгөөд одоо ч гэсэн үргэлжилж байна.

Та бүхэн дүрэмт хувцсаа тайлж, иргэний амьдралд шилжсэн ч эх оронч үзэл хүмүүжил, үндэсний ухамсрыг иргэд, цэргийн алба хаагчдад төлөвшүүлэхэд үнэтэй хувь нэмрээ байнга оруулж ирсэн, одоо ч идэвхтэй үүрэг гүйцэтгэсээр байгааг бид зүй ёсоор үнэлдэг.

“Монгол Улсын батлан хамгаалах бодлогын үндэс” баримт бичигт нийцүүлэн, Зэвсэгт хүчний Ерөнхий командлагчийн хувиар “Батлан хамгаалах тухай”, “Зэвсэгт хүчний тухай”, “Цэргийн албаны тухай”, “Цэргийн алба хаагчийн эрх зүйн байдлын тухай” хуулиудыг санаачлан Монгол Улсын Их хурлаар батлуулж, өнөөдөр эдгээр батлан хамгаалах салбарын багц хуулиудыг амьдрал, үйл ажиллагаанд хэрэгжүүлэх явц эрчтэй өрнөж байна.

Батлан хамгаалахын багц хуулиар Зэвсэгт хүчин нь “Хуурай замын цэрэг” болон “Агаарын цэрэг”-ээс бүрдэн, цэргийн захиргааны удирдлагаа хэрэгжүүлдэг бие даасан байгууллага байхаар хуульчилж, мэргэжлийн цэрэгт суурилсан байх зарчмыг тунхагласан нь Монгол Улсын төрөөс Зэвсэгт хүчний хөгжлийн шинэ үеийг эхлүүлж байгаа хэрэг юм.

Монгол Улсын Зэвсэгт хүчин эх орныхоо бүтээн байгуулалтад амжилттай оролцож ирсэн туршлагадаа тулгуурлан нэгдмэл удирдлагатай, хариуцлага, зохион байгуулалттай энэ хүчийг ашиглан бүтээн байгуулалтыг түргэсгэх, бизнесийн орчныг тэлэх ажил хэрэгч санал, санаачилгыг ажил хэрэг болгох хэрэгцээ шаардлага өнөөдөр бидний өмнө тулгарч байна. Иймд “Зэвсэгт хүчний бие бүрэлдэхүүн, техник хэрэгслийг улс орны бүтээн байгуулалтын ажилд оролцуулах” журмыг шинэчлэн 2018 онд зарлигаар батламжилсан. Энэ журам хэрэгжиж үр дүнгээ өгч эхлээд байна.

Монгол Улс түүхэндээ анх удаа газрын тосны боловсруулах үйлдвэртэй болох бүтээн байгуулалтын ажлыг Дорноговь аймгийн Алтанширээ суманд, ойг цэвэрлэн ойн санг хамгаалах, эрүүлжүүлэх, төлөв байдлыг сайжруулах ажлыг Төв аймгийн Мөнгөнморьт сумын нутгаас эхлүүлж, Дорнод аймгийн Халх гол суманд “Шинэ сум” төслийн бүтээн байгуулалтын ажилд Зэвсэгт хүчний алба хаагчид амжилттай оролцсон.

Түүнчлэн Монгол Улсын стратегийн ач холбогдол бүхий Тавантолгой-Зүүнбаян чиглэлийн төмөр зам барих ажлыг шинээр байгуулагдсан хээрийн 7781, 7782 дугаар ангиуд амжилттай гүйцэтгэж байна. Цаашид ч бид улс орны бүтээн байгуулалтын ажилд Зэвсэгт хүчний үүрэг, оролцоо өсөн нэмэгдэх нь гарцаагүй гэж дүгнэж байна.

Төр, засгаас ахмад настны нийгмийн хамгааллыг сайжруулах талаар дэс дараатай олон чухал арга хэмжээ авч байгаагийн дотор тэтгэврийн зөрүүг ойртуулах, хэмжээг нь нэмэгдүүлэх, халамж үйлчилгээний хүрээг өргөтгөх талаар ихээхэн анхаарч, тодорхой шийдвэр гарган хэрэгжүүлж байна.

Түүнчлэн түүхт ой, тэмдэглэлт өдрүүдийг улс орон даяар тэмдэглэн өнгөрүүлэх ажлын хүрээнд энэ жил Халхын голын байлдааны ялалтын түүхт 80 жилийн ойг тэмдэглэн өнгөрүүлэх арга хэмжээний хүрээнд дайн, байлдаанд оролцсон ахмад дайчдын гавьяаг сурталчлан алдаршуулах, нийгмийн дэмжлэг, туслалцаа үзүүлэх ажлыг улс орны хэмжээнд зохион байгуулж явуулсан билээ.

Өнөөдөр манай ахмадуудын амьдралын түвшин харилцан адилгүй, нийгмийн халамж үйлчилгээний чанар, хүртээмж төдийлөн хангалттай бус байгаа ч улс орны нийгэм, эдийн засгийн байдал сайжрахын хэрээр ахмад настнуудад тэр дундаа цэргийн тэтгэвэр тогтоолгосон ахмадуудад тавих төр, засгийн халамж анхаарал улам бүр өсөн нэмэгдэх нь дамжиггүй.

Та бүхэн гавьяаныхаа амралтад гарсан ч гэсэн нийгмийн идэвхтэй гишүүн байж, өсвөр үе, залуучуудад эх оронч үзэл хүмүүжил төлөвшүүлэх, арвин баялаг туршлагаа өвлүүлэх үйл хэрэгт үнэтэй хувь нэмэр оруулсаар байгааг онцлон тэмдэглэхэд таатай байна.

Эх орноо батлан хамгаалах эрхэм хүндтэй үүргээ нэр төртэй биелүүлж, өнөөдөр ахмадын баяраа тэмдэглэж байгаа та бүхэндээ эрүүл энх, амжилт бүтээл, урт удаан наслахын өлзийтэй ерөөлийг өргөн дэвшүүлье!

Баярлалаа та бүхэнд” гэлээ.

Шинжлэх ухааны ажилтнууд анх удаагаа салбарын хэмжээнд цуглаж, төр засгийн оролцоотойгоор тодорхой бодлого шийдвэр гаргахаар хоёр өдрийн турш хуралдсан юм. Энэ чухал хуралд Монгол Улсын Ерөнхийлөгч Х.Баттулга оролцохдоо шинжлэх ухааны ажилтнуудыг төр засагт үг, үйлдлээ хүргэдэг, салбартаа ногдох төсвийн хэмжээг нэмэгдүүлэхэд анхаардаг тодорхой механизм бий болгож ажиллахыг уриалсан юм.

ТУХАЙЛБАЛ, МОНГОЛ УЛСЫН ЕРӨНХИЙЛӨГЧ Х.БАТТУЛГА:

“Эрхэм хүндэт эрдэмтэн судлаачид аа,

Монголын оюун ухааны охь, эрдэм мэдлэгийн ундарга болсон эрдэмтэн судлаачид Та бүхний энэ өдрийн түмэн амгаланг айлтгая.

Эрдэмтэн судлаачдынхаа санал санаачилга, судалгаа шинжилгээний үр дүн, тулгарч буй саад бэрхшээл, ирээдүйн төсөөлөл, төлөвлөгөөг сонсохоор энэхүү анхдугаар Их хурлыг зохион байгуулж байгаад баяртай байна.

Мөн энэ Их хурал Монгол Улсын Ерөнхий сайдын ивээл дор зохион байгуулагдаж байгаа юм байна. Тэрбээр сая хэлсэн үгэндээ төр засгаас эрдэмтэн судлаачдынхаа үйл ажиллагаанд анхаарал хандуулж ажиллах талаар ярилаа. Энэ механизмыг өнөөдрийн хурлын үр дүнд бий болоосой гэж хүсэж байна.

Монгол Улс сүүлийн 30 орчим жилийн туршид эрдэмтэн судлаачдаа сонсолгүй өдийг хүрсэн байна. Эрдэмтдийнхээ судалгаа, үйл ажиллагааг дэмжилгүй өнөөг хүрлээ. Эрдэмтдийн бүтээл, санал онолыг анхаараагүй, эрдэм шинжилгээ, шинжлэх ухааны салбарт асар бага төсөв хуваарилдаг учраас бидний хөгжлийн өнөөгийн өнгө төрх энэ байгаа юм. Аливаа улс орны хөгжил, алдаа багатай шийдэл, алсыг харсан зөв бодлого бүр эрдэмтэн судлаачидгүйгээр алхам ч явахгүйг хүн төрөлхтний хөгжлийн түүх гэрчилнэ.

Монголчууд бид энэхүү үзэл санааг аль эртнээс мэдэж ойлгож, эрдэмтэн судлаачдаа дэмжин тэтгэж, хүндэтгэн дээдэлж, оюун ухааныг нь төрийн бодлого үйл ажиллагаандаа ашиглаж ирсэн түүхтэй ард түмэн. Эзэн Чингис хаан, түүний угсааны их хаад ч дэргэдээ өөрийн орны болон дэлхийн улс түмэнд буй эрдэмтэн мэргэдийг хүндэтгэн залж, анхааран сонсож, төр улсыг жолоодохдоо мэргэн ухааныг нь түшиглэж, шинжлэх ухааныг хөгжүүлж байсныг Та бүхэн сайн мэднэ.

Өнөөдөр Монголын эрдэм судлалын ууган байгууллага үүсэн байгуулагдсанаас хойш нэгэн зууныг туулж ирэхдээ саад бэрхшээл, дэмжлэг тусламж аль алиныг хүртэж байсан ч шинжлэх ухааны баялаг өвийг манай ахмад үеийн эрдэмтэд, өнөө цагийн та бүхний цуцалтгүй их хөдөлмөрийн үр шимээр нэгэнтээ буй болгож чаджээ. Баяр хүргэе.

Бидэнд шинжлэх ухаан, технологийн дэвшил, ололт амжилт, эрдэмтэн судлаачдын нөөц боломж бүрэн бий болж чадсан. Гэвч судалгааны үр дүнг ашиглах, дэмжиж туслах талаар төр засгийн бодлого өнөөг хүртэл урагшлахгүй байгаа нь бодит үнэн. Шинжлэх ухаанд зарцуулж буй дотоодын нийт бүтээгдэхүүний хувь хэмжээ дөнгөж 0.12 хувьд байгаа нь цалингаас өөр дэмжлэг үзүүлэхгүй байна гэсэн үг. Ядаж, улсын дотоодын нийт бүтээгдэхүүний 1 хувийг эрдэм судлалын үйл ажиллагаанд зарцуулж, түүнийгээ тогтмол хэрэгжүүлж байх ёстой гэж үзэж байна. Дотоодын нийт бүтээгдэхүүний 1 хувийг зарцуулдаг, тодорхой механизмтай болох хэрэгтэй бөгөөд энэ асуудлыг анхдугаар Их хурлаараа бий болгоё гэдэг саналыг хэлж байгаа юм.

Шинжлэх ухаан, технологийн өндөр хөгжилтэй улс орнуудын хэмжээнд биш боловч цаашид бүс нутгийн хөгжиж буй улс орнуудын жишгээс доогуур байгаа байдлаа засаж залруулах цаг нь болжээ, шаардлага тулгарчээ.

Эрдэмтэн судлаачид маань өөрсдийн хүсэл сонирхол, шинжлэх ухаанд дурласан уйгагүй их хөдөлмөрөөр цаг наргүй ажиллаж, ар гэр, хувийн асуудлаа огоорон зүтгэсэн зүтгэлээрээ Монгол Улсад өнөөдрийн энэ хэмжээнд шинжлэх ухааны салбарыг тогтоон барьж байгааг бид ойлгох хэрэгтэй. Эрдэм судлалын ажилд өнөөдөр дэмжлэг үзүүлээд, маргааш үр дүнг нь нэхдэг биш алс хэтийг харсан, төлөвлөлт сайтай, тооцоо судалгаатай, хүрэх, бүтээх чиглэл нь тодорхой төлөвлөгөөтэй явуулах нь улс орны хөгжилд нэн чухал асуудал болоод байна.

Өндөр технологи хөгжсөн, шинжлэх ухааны олон зуун жилийн түүхтэй улс орнуудын шинжлэх ухаандаа хандаж, эрдэмтдэдээ анхаарч бодит дэмжлэг үзүүлж ажиллаж байгааг миний бие сүүлийн үед гадаад улсад хийсэн айлчлалын хүрээнд байнга анхаарч, хамтран ажиллах боломжийг бий болгохыг зорьж байна. Хүн төрөлхтөнд тулгараад байгаа байгаль экологи, хог, эрчим хүчний асуудлуудаас гадна сансар судлал зэрэг томоохон чиглэлүүдээр манай эрдэмтэн судлаачид зөвхөн Монголын хэмжээнд биш бүс нутаг, олон улсын хэмжээнд идэвх зүтгэл гаргаж хамтран ажиллах боломжийг бүрдүүлэхийг хичээж байна.

Түүнээс гадна нүүдэлчдийн агуу их өв соёлын харилцаа, түүний хөгжлийн зүй тогтол, тархац, хадгалалт хамгаалалтыг бүс нутгийн хэмжээнд хамтран хөгжүүлэх, судлан шинжлэх ажлууд айлчлалуудын нэгэн гол чиглэл болж байна. Сүүлийн 2 сарын хугацаанд Америкийн Нэгдсэн Улсын НАСА-гийн сансар судлалын төвийн дарга, ОХУ-ын Шинжлэх ухаан Академийн Ерөнхийлөгч, Энэтхэгийн Сансар судлалын төв, шинжлэх ухаан, технологийн судалгааны газруудын удирдлагатай ажил хэргийн уулзалтууд хийгээд байгааг эрдэмтэн судлаачид Та бүхэн анхаарч, энэ ажлуудад идэвх санаачилга гаргаж, хамтран ажиллахыг хүсэж, уриалж байна.

Өнөөдрийн шинжлэх ухааны анхдугаар их хурлаар Монголын шинжлэх ухааны ойрын болон хэтийн ирээдүйн талаар хэлэлцэж, эрдэмтэд санал бодол, судалгааны үр дүнгээ чөлөөтэй ярилцаж, төр засгийн бодлого шийдвэр гаргах түвшний хүмүүс анхааралтай сонсож, ач холбогдол өгч, зөв зохистой шийдвэрийг гаргана гэдэгт миний бие найдаж байна. Тэрхүү шийдвэр нь зөвхөн цаасан дээр үлдэх биш төрийн бодлого шийдвэрт бодитой тусаж, хэрэгжүүлэх төлөвлөгөөнд нь санхүүгийн дэмжлэг туслалцааг үзүүлж, зөв зохистой хамтран ажиллах шаардлагатай. Нөгөө талаараа нэгэн зууны турш буй болгож чадсан Шинжлэх ухааны Академийнхаа үйл ажиллагааг онцгойлон дэмжиж, бодитой судалгааны ажлууд хийх боломжит орчин, сайн лабораториуд байгуулж, малтлага судалгааны томоохон ажлуудыг нь анхаарч дэмжих алхмууд хийх хэрэгтэй. Өнөөг хүртэл улс төрөөс ангид байж, өөр өөрийн өмнөх ажлаа төр засагт дараа төвөг бололгүй хэрэгжүүлж ирсэн бараг цорын ганц салбар бол шинжлэх ухааны салбар гэдэгтэй хэн ч маргахгүй биз ээ.

Харин мөрөөрөө судалгаагаа хийж байгаа эрдэмтэн судлаачдаа сонсохгүй, анхаарахгүй, судалгааны нөр их хөдөлмөрийн үр дүнг ашиглахгүй байж олохгүйг төр засгийн бодлого баригч хүмүүс онцгой анхаарах хэрэгтэй. Нийгэмд өндөр технологи, орчин үеийн шинжлэх ухааны салбаруудыг хөгжүүлэхээс гадна нийгмийн соён гэгээрэлд хамгийн чухал үүрэг гүйцэтгэх түүх, хэл, соёл, гүн ухааны салбаруудыг онцгойлон анхаарч дэмжлэг үзүүлж ажиллах ёстой. Бидэнд бусдаас ялгарах Монголын өнгө төрхийг харуулж чадах зүйл бол түүх соёлын салбар юм. Эх түүх, өв соёл, монгол судлалын чиглэлийг эрчимтэй хөгжүүлэх ёстой. Бид бүхний хэн байсан зөвхөн түүхэнд л үлдэнэ. Тэгвэл шинжлэх ухааны хөгжлийн түүхэнд үлдэх түүхэн шийдвэр гаргах, түүхэн дэмжлэг үзүүлэх боломжийг өнөөдрийн их хурал хэлэлцэх байх гэдэгт миний бие тун их найдаж байна.

Мөнх тэнгэрийн хүчин дор, эрдэмтэн судлаачдынхаа хичээл зүтгэлээр Монголын шинжлэх ухаан хөгжин дэвших болтугай.

Анхдугаар их хуралд оролцогчдод амжилт хүсье.

Дорвитой, санаачилгатай, үр дүнтэй хурал байгаасай гэж чин сэтгэлээсээ хүсэж байна.

Баярлалаа” гэсэн юм.

Монгол Улсын Ерөнхийлөгч, Зэвсэгт хүчний Ерөнхий командлагч Х.Баттулга өнөөдөр Хөдөлмөрийн гавьяаны улаан тугийн одонт, Монгол Улсын гавьяат барилгачин, Хошууч генерал Х.Жүгдэрнамжилийн нэрэмжит Зэвсэгт хүчний 017 дугаар ангийн үйл ажиллагаатай танилцлаа.

Монгол Улсын Ерөнхийлөгчийг дагалдан Батлан хамгаалахын сайд Н.Энхболд, Зэвсэгт хүчний жанжин штаб /ЗХЖШ/-ын дарга, хошууч генерал А.Ганбат, Монгол Улсын Ерөнхийлөгчийн Тамгын газрын дарга З.Энхболд, Монгол Улсын Ерөнхийлөгчийн Батлан хамгаалах бодлого, аюулгүй байдлын асуудал хариуцсан зөвлөх Д.Даваа нар тус ангид ажиллав.

Барилгын цэргийн гэж нэрлэгддэг тус анги барилга угсралт, төмөр бетон материал хийцийн үйлдвэр /мужааны, вакум цонхны, агааржуулалт, халаалтын тогоо үйлдвэрлэлийн зэрэг цех багтана/ гэсэн үндсэн салбартай үйл ажиллагаатай явуулдаг талаар Зэвсэгт хүчний 017-р ангийн захирагч, ахмад Т.Амартүвшин танилцуулсан юм.

Энэ анги 16 хүртэлх давхар барилга угсралтын ажил гүйцэтгэх, зураг төслийн ажил боловсруулах, барилга-инженерийн ангиудын барилгын бага мэргэжилтэн бэлтгэх тусгай зөвшөөрөлтэй ажилладаг байна. Энэ хүрээнд 2009 оноос эхлэн барилгын засал чимэглэл, өрөг угсрагч, мужаан, гагнуурчин, бетон арматурчин зэрэг өргөн мэргэжлээр алба хаагчдад хос мэргэжил эзэмшүүлжээ.

Барилга угсралтаас гадна төмөр бетон материал хийцийн үйлдвэр нь нүхтэй блок, эко хавтан, авто болон явган замын хашлага, 2-3 давхар шиллэгээтэй вакуум цонх, хаалт, төрөл бүрийн металл хийц, ширээ сандал, тавцан, сүүдрэвч гээд маш олон төрлийн бүтээгдэхүүн үйлдвэрлэж байгаа юм байна.

Монгол Улсын Ерөнхийлөгч, Зэвсэгт хүчний Ерөнхий командлагч Х.Баттулга төмөр замын бүтээн байгуулалт эхэлсэн энэ цаг үед барилгын цэргийн суурь болсон 017-р ангийг бүтээн байгуулалтын ажилд манлайлан оролцох ёстой гээд энэ асуудалд анхаарал хандуулахыг ЗХЖШ-ын дарга А.Ганбатад үүрэг болгосон юм. Мөн энэ ангид байгаа барилгын угсралтын мэргэжилтэн, техник хэрэгслийг бүрэн ашиглаж, аливаа бүтээн байгуулалт, тендерт оролцуулах асуудлаар Батлан хамгаалахын сайд Н.Энхболдтой ярилцлаа.