Month: September 2019

Өнөөдрийн Нийслэлийн Мэргэжлийн хяналтын газрын зөвлөлийн хурлаар зочид буудлуудад хийсэн хяналт шалгалтын талаар мэдээллээ.

Шалгалтад хамрагдсан 90 зочид буудал, 39 дэн буудал нийт 129 аж, ахуй нэгжээс нийт 393 зөрчил илэрч, 28,6 сая төгрөгийн мөнгөн торгууль оногдуулсан байна.

Буудлуудын ажилчдын 49 буюу тал хувь нь эрүүл мэндийн үзлэгт хамрагдаагүй, маш их хэмжээний гэдэсний халдвар, савханцар, нян бактер илэрсэн, ахуйн цагаан хэрэглэлээ угааж, ариутгадаггүй, хугацаа дууссан хүнсний бүтээгдэхүүнээр үйлчилдэг, зориулалтын бус байшин, барилгатай гэх мэт ноцтой зөрчлүүд ихээр илэрчээ.

Тиймээс Нийслэлийн Мэргэжлийн хяналтын зөвлөлийн хурлаар шалгалтад хамрагдсан 39 дэн буудлаас их болон дунд зөрчилтэй 34 дэн буудлын тусгай зөвшөөрлийг цуцлах шийдвэрийг Нийслэлийн аялал жуулчлалын газарт хүргүүлэхээр болов. Мөн ажилчид нь шинжилгээнд хамрагдаагүй зочид буудлуудын нэр, хаягийг ил болгож, иргэдэд анхааруулах үүрэг өглөө.

Үүнээс гадна зочид буудал болон дэн буудлын хажууд, зориулалтын бус өрөөнд ариун цэврийн шаардлага хангаагүй гоо сайхны газруудыг гаргах шаардлагыг холбогдох газарт хүргүүлэхээр боллоо.

Нийслэлийн Засаг даргын Тамгын газар, Германы олон улсын хамтын ажиллагааны нийгэмлэгтэй (GIZ) жендэрийн мэдрэмжтэй төсөвлөлтийг нийслэлд нэвтрүүлэх, жендэрийн тэгш бус байдлыг арилгах чиглэлд үр дүнтэй хамтран ажиллаж байна.

Хамтын ажиллагааны хүрээнд нийслэлийн есөн дүүргийн жендэрийн нөхцөл байдлын судалгааг GIZ байгууллагын төслийн нэгж, Жендэрийн Үндэсний хорооны шинжээчдийн бүлгийн ахлагч Б.Долгор, шинжээч Ш.Солонго нар гүйцэтгэжээ. Эдгээр судалгааны дүнд суурилсан жендэрийн дэд хөтөлбөрүүдийг нийслэл, дүүргүүд дээр байгуулсан ажлын хэсгүүд оролцоонд суурилсан аргачлалаар боловсрууллаа. Германы олон улсын хамтын ажиллагааны байгууллагаас НЗДТГ-т албан ёсоор нийслэл болон хоёр дүүргийн жендэрийн дэд хөтөлбөрийн төслийг хүлээлгэж өгсөн байна. Түүнчлэн нийслэлийн Засаг даргын орлогч Ш.Анхмаа жендэрийн дэд хорооны даргын хувьд СХД, БЗД-ийн дүүргүүдийн дэд хөтөлбөрийн төслийг Засаг даргын орлогч нарт нь гардуулж өгөв.

Нийслэлийн дэд хөтөлбөрийг Засаг даргын зөвлөлийн хурлаар танилцуулж, НИТХ-ын чуулганаар 2019 онд багтаан хэлэлцүүлэхээр төлөвлөж холбогдох хүмүүст чиглэл өглөө. Тус хөтөлбөрүүд батлагдсанаар нийслэлийн эрэгтэй, эмэгтэй хүмүүсийн улс төр, эрх зүй, эдийн засаг, нийгэм, соёлын ба гэр бүлийн харилцаанд тэгш эрхтэй оролцож, орон нутгийн эдийн засаг, хөрөнгө оруулалт, нийгэм, соёлын хөгжлийн үр шимээс тэгш хүртэх боломж нэмэгдэх юм.

Онцгой байдлын ерөнхий газраас АНУ-аас Монгол Улсад суугаа Элчин сайдын яам, Энэтхэг, Номхон далайн цэргийн командлалтай хамтран Дорноговь аймагт зохион байгуулж байгаа “Говийн чоно-2019” гамшгийн хор уршгийг арилгах олон улсын сургалт, дадлага сургуулийн хүрээнд техникийн болон онолын нийт 19 төрлийн сургалтыг зохион байгууллаа.

Эдгээр сургалтууд нь аврагчдын мэргэжлийн ур чадварыг дээшлүүлэх, удирдах албан тушаалтан болон томилгоот бие бүрэлдэхүүний гамшигтай тэмцэх аргазүйг нэмэгдүүлэхэд чиглэгдсэн юм.

Онолын болон танхимын сургалтаа бататгах, гамшгаас хамгаалах арга ажиллагаанд харилцан туршлага солилцох зорилгоор Монгол, Америкийн аврагчид газар хөдлөлтийн гамшгийн үед нурсан барилгаас нэрвэгдэгсдийг эрэн хайх, аврах, галт тэрэгний ослын үед химийн хорт бодис алдагдах, зам тээврийн ослын үеийн хариу арга хэмжээний дууриалган үзүүлэх дадлага, сургуулийг энэ сарын 21-нд зохион байгуулахаар бэлтгэл ажлыг ханган ажиллаж байна гэж Онцгой байдлын ерөнхий газраас мэдээллээ.

Санхүүгийн зохицуулах хороо, ХБНГУ-ын Олон улсын хамтын ажиллагааны нийгэмлэг (GIZ), Хүртээмжтэй даатгалын асуудлаарх Азийн орнуудын мэдлэг туршлага солилцох сүлжээ( MEFIN)-тэй хамтран зохион байгуулж буй “Уур амьсгалын өөрчлөлтийн эрсдэлийн даатгал” сэдэвт төр, хувийн хэвшлийн олон улсын зөвлөлдөх ээлжит VII уулзалтыг Улаанбаатар хотноо есдүгээр сарын 17-18-ны өдрүүдэд амжилттай зохион байгууллаа.

Уулзалтыг нээж СЗХ-ны Ажлын албаны дарга Б.Ариунаа, ОБЕГ-ын дэд дарга, хурандаа Ц.Ганзориг, GIZ RFPI ASIA III төслийн удирдагч Антонис Малагардис, GIZ Mongolia OIC байгууллагыг төлөөлж хатагтай Биети Диппмар нар үг хэлсэн.

Уулзалтаар тус сүлжээний ( MEFIN) байнгын гишүүн орнуудад болох Филиппин, Индонез, Пакистан, Шри Ланка, Вьетнам улсаас болон ХБНГУ-ын Олон улсын хамтын ажиллагааны нийгэмлэг (GIZ), Швейцар, Герман улсаас төлөөлөгчид ирж, уур амьсгалын өөрчлөлтийн эрсдэлийн даатгалын эрхзүйн орчин ба зохицуулалт, бизнес загвар, технологид суурилсан даатгал, төр хувийн хэвшлийн хамтын ажиллагаа гэсэн дөрвөн агуулгын хүрээнд хэлэлцүүлэг өрнүүлэв. Мөн төрийн байгууллагууд болон хувийн хэвшлийнхэнд туршлага солилцох боломжийг олгосон юм.

Хурлын үеэр уур амьсгалын өөрчлөлтийн эрсдэлийн даатгалын талаар нэгдмэл нэг ойлголттой байх тухай болон хууль эрх зүйн зохицуулалт, технологийн дэвшил, оролцогч бусад улс орнуудын туршлага, уур амьсгалын даатгалын бүтээгдэхүүнийг бий болгох гол зорилтот бүлэг, зорилтот түвшин зэрэг асуудлыг онцлон хэлэлцлээ.

Онцгой байдлын ерөнхий газар, АНУ-аас Монгол Улсад суугаа Элчин сайдын яам, Энэтхэг, Номхон далайн цэргийн командлалтай хамтран Дорноговь аймагт зохион байгуулж байгаа “Говийн чоно-2019” гамшгийн хор уршгийг арилгах олон улсын сургалт, дадлага сургуулийн хүрээнд техникийн болон онолын нийт 19 төрлийн сургалтыг зохион байгууллаа.

Эдгээр сургалтууд нь аврагчдын мэргэжлийн ур чадварыг дээшлүүлэх, удирдах албан тушаалтан болон томилгоот бие бүрэлдэхүүний гамшигтай тэмцэх аргазүйг нэмэгдүүлэхэд чиглэгдсэн юм.

Онолын болон танхимын сургалтаа бататгах, гамшгаас хамгаалах арга ажиллагаанд харилцан туршлага солилцох зорилгоор Монгол, Америкийн аврагчид газар хөдлөлтийн гамшгийн үед нурсан барилгаас нэрвэгдэгсдийг эрэн хайх, аврах, галт тэрэгний ослын үед химийн хорт бодис алдагдах, зам тээврийн ослын үеийн хариу арга хэмжээний дууриалган үзүүлэх дадлага, сургуулийг энэ сарын 21-нд зохион байгуулахаар бэлтгэл ажлыг ханган ажиллаж байна гэж Онцгой байдлын ерөнхий газраас мэдээллээ.