Month: September 2019

НҮБ-ын Ерөнхий ассамблей 1990 онд жил бүрийн аравдугаар сарын 01-ний өдрийг “Олон улсын ахмадын өдөр” болгон зарласан билээ. Энэ өдрийг дэлхий нийтээр 29 дэх жилдээ, харин Монгол Улсад 27 дахь жилдээ ёсчлон тэмдэглэж байна.

Олон улсын болон Монголын ахмадын өдрийг тохиолдуулан Монгол Улсын Их Хурлын дарга Г.Занданшатар, Улсын Их Хурлын Тамгын газрын Ерөнхий нарийн бичгийн дарга Л.Өлзийсайхан, УИХ-ын Тамгын газрын удирдлагууд өнөөдөр (2019.09.24) Улсын Их Хурал болон Улсын Их Хурлын Тамгын газарт олон жил үр бүтээлтэй ажиллаж байгаад өндөр насны тэтгэвэрт гарсан ахмадуудаа Төрийн ордонд хүлээн авч уулзан, хүндэтгэл үзүүллээ.

УИХ-ын Тамгын газар нь Ардын Их Хурлын депутат, Улсын Бага Хурал болон Улсын Их Хурлын гишүүн байсан, Улсын Их Хурлын Тамгын газарт ажиллаж байгаад гавьяаны амралтдаа гарсан нийт 90 гаруй ахмадтай юм.

Улсын Их Хурлын дарга Г.Занданшатар ахмадуудад баярын мэндчилгээ дэвшүүлээд, уламжлалт уулзалтад хүрэлцэн ирсэнд талархал илэрхийлэв. Тэрбээр хэлсэн үгэндээ, “Саяхан Монгол Улсад байнгын ажиллагаатай парламент үүсэж, анхдугаар чуулган хуралдсаны 29 жилийн ойн өдөр тохиосон. Харин өнөөдөр байнгын ажиллагаатай парламентын Тамгын газар байгуулагдсаны 29 жилийн ой мөн тохиож байна. Та бүхэндээ УИХ-ын Тамгын газар байгуулагдсаны 29 жилийн ойн баярын мэндийг дэвшүүлье. Ахмадын өдрөөр ахмадууддаа хүндэтгэл үзүүлдэг, санал сургаалийг нь сонсдог уламжлал хэдийнээ тогтсон. Та бүхэн Монгол Улсад байнгын ажиллагаатай парламент байгуулагдах эхлэлийг тавьсан түүхэн гавьяатай хүмүүс. Ардын Их Хурал, Улсын Бага Хурал болон үе үеийн УИХ-д гишүүнээр, УИХ-ын Тамгын газарт олон төрлийн ажил мэргэжлээр ажиллаж байсан Монгол төрийн жинхэнэ түшээд Та бүхний дунд олон бий. Ард түмэндээ үйлчлэх, төрдөө үнэнчээр зүтгэх төрийн албаны мөн чанарыг тууштай, тогтвортой сахиж чадсан хүмүүс бол яах аргагүй УИХ-ын Тамгын газрын ахмадууд билээ. Та бүхэнтэйгээ зөвхөн баярын өдрөөр уулзаад өнгөрөх нь хангалтгүй. Тиймээс УИХ-ын Тамгын газраас ахмадуудтайгаа ойр ойрхон ажил хэргийн уулзалтыг хийж, зарим асуудлаар хэлэлцүүлэг өрнүүлж, үнэ цэнэтэй туршлагаас нь суралцах, зөвлөмжийг нь авдаг байх шинэ санаачилгыг гаргаж байгааг дуулгахад таатай байна. Үүнтэй холбоотойгоор УИХ-ын Мэдээлэл, судалгааны төвийг бие даасан газар болгохоор ажиллаж байгаа. Энэ намар Үндсэн хуульд оруулах нэмэлт, өөрчлөлтийн төслийг ард нийтийн санал асуулгаар батлуулах ажлыг зохион байгуулах гэж байна. Иргэд, олон нийтэд төслийн агуулгын ач холбогдлыг сурталчлан таниулах, тайлбарлах ажилд Та бүхнийг идэвхтэй хамтран ажиллахыг уриалж байна.

Улсын Их Хурлаас ахмад настнуудын нийгмийн хамгааллын асуудлыг шийдвэрлэхэд манлайлан ажиллаж байна. Монгол Улсын хүн амын дундаж наслалт нэмэгдэж байгаа. Сүүлийн арван жилийн хугацаанд 7 жилээр нэмэгдсэн байна. Иймд цаашид төрөөс ахмадуудад тулгамдаж буй нийгэм, эрүүл мэндийн асуудлыг шийдэх цогц бодлого хэрэгжүүлэх ёстой. Сайн талаас нь харвал ажлын чадамж, ажил гүйцэтгэх чадвар хэвээрээ байгаа бол сөрөг тал нь насжилтаа дагаад эрүүл мэнд, нийгмийн даатгал, тэтгэврийн санд таагүй байдал үүсгэх магадлалтай болж байна. Манай улсад төдийгүй дэлхийн олон улс оронд үүнийг тооцож ажиллах шаардлага үүсэж байгаа. Энэ жил ахмадын өдрийг дэлхий даяар “Тогтвортой хөгжлийн зорилт 2030”-д заасан ахмадуудыг нас, хүйс, шашин шүтлэг, хөгжлийн бэрхшээл, угсаа гарал, орлогын байдал болон бусад статусаас үл хамааруулан нийгэм, эдийн засаг, улс төрийн амьдралд идэвхтэй оролцуулах боломжийг хууль, эрх зүйгээр хангах зорилтыг хэрэгжүүлэх уриан дор тэмдэглэж байна” гээд Монгол Улсын Их Хурлаас ахмад настнуудын эрхийг хамгаалах, эрүүл аюулгүй орчинд амьдрах баталгааг хангах, цалин орлого аж байдлыг сайжруулахад чиглэсэн олон ажлыг хэрэгжүүлж ажиллахаа илэрхийлэв.

Уулзалтад оролцсон ахмадуудыг төлөөлж Улсын Их Хурлын гишүүн асан Н.Тогтох үг хэлж, Монгол төрийн үйл хэрэгт хүчин зүтгэж ирсэн үе үеийн ахмад буурлуудад байнга анхаарал, халамж тавьдаг Улсын Их Хурлын удирдлага, түүний Тамгын газарт талархал илэрхийлээд цаашдын ажил үйлсэд нь өндөр амжилт хүслээ.

Хүндэтгэлийн уулзалтад Ардын Их Хурлын депутат, Улсын Бага Хурал болон Улсын Их Хурлын гишүүн байсан, Улсын Их Хурлын Тамгын газарт ажиллаж байгаад гавьяаны амралтдаа гарсан 60 гаруй ахмад оролцлоо гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.

Цагдаагийн Ерөнхий Газрын дарга, Интерполын Үндэсний төв товчооны дарга, цагдаагийн хурандаа С.Баатаржав /2019.09.23/ “Соёлын өвийн хууль бус эргэлттэй тэмцэх нь” сэдэвт Интерполын үндэсний ажлын уулзалтыг зохион байгуулах зорилгоор Монгол Улсад айлчилж буй Олон улсын Эрүүгийн цагдаагийн байгууллага-Интерполын ЕНБД-ын газрын Урлагийн бүтээлийн эсрэг гэмт хэрэгтэй тэмцэх хэлтсийн дарга Корадо Катесиг хүлээн авч уулзлаа.

Уулзалтын эхэнд ЦЕГ-ын дарга, Цагдаагийн хурандаа С.Баатаржав: “Монгол Улс нь 1991 онд Олон улсын эрүүгийн цагдаагийн байгууллага-Интерполд гишүүнээр элссэнээс хойш өнөөг хүртэлх хугацаанд Интерполоос санаачилсан аливаа ажил, арга хэмжээнүүдийг бүрэн дэмжиж, идэвхтэй хамтран ажиллаж ирсэн талаар ярьж, “Соёлын өвийн хууль бус эргэлттэй тэмцэх нь” сэдэвт энэ удаагийн уулзалт нь Интерполоос Монгол Улсад анх удаа зохион байгуулж байгаа үндэсний хэмжээний ажлын уулзалт болохыг онцолсон юм. Мөн цагдаагийн байгууллагын алба хаагчдаас гадна соёлын өвийг хамгаалах чиглэлээр тодорхой чиг үүргүүдийг хэрэгжүүлэн ажилладаг 10 гаруй төрийн байгууллагуудын удирдах албан тушаалтнууд болон мэргэжилтэн, алба хаагчид уригдан оролцож байгаа чухал ач холбогдолтой хэмээн онцоллоо.

Ноён Корадо Катесигийн зүгээс энэ удаагийн үндэсний ажлын уулзалтыг Интерполтой хамтран зохион байгуулахад идэвх санааачлага гарган ажилласан явдалд Монгол Улсын Цагдаагийн ерөнхий газарт талархал илэрхийлээд, Интерполын зүгээс соёлын өвийн хууль бус эргэлттэй холбоотой гэмт хэрэгтэй тэмцэх чиглэлээр Монгол Улсын цагдаагийн байгууллагын алба хаагчдын мэдлэг, ур чадварыг дээшлүүлэх чиглэлээр цаашид шаардлагатай дэмжлэгийг үзүүлж, нягт хамтран ажиллах болно гэлээ.

Өнөөдрийн нийгэмд харилцаа холбоо, мэдээллийн технологийн салбар өдөр бүр шинэчлэгдэн хөгжиж байна. Монгол улсын их хурал, Засгийн газар цахим засаглалыг хөгжүүлэх, дижитал шилжилт хийх чиглэлд анхаарч холбогдох бодлогуудыг баталж хэрэгжүүлсээр байна.

Статистик мэдээллээс үзэхэд тус салбарын нийт орлого 2018 оны эцэс гэхэд 1,2 их наяд төгрөгт хүрч улсын төсөвт 194,4 тэрбум төгрөг төвлөрүүлсэн байна. Үүрэн холбооны идэвхитэй хэрэглэгчийн тоо 4,2 саяд хүрсэн байна. Энэ чиглэлийг манай улсад хөгжүүлэхэд мэргэжлийн холбоодын үүрэг оролцоо чухлаар тавигдсаар ирсэн.

Тэгвэл Мэдээлэл харилцаа холбооны үндэсний ассоциацийн ерөнхийлөгчөөр УИХ-ын гишүүн, Цахим бодлогын түр хорооны дарга Н.Учрал сонгогджээ.

Н.Учрал гишүүний хувьд дижитал эрин үед энэ чиглэлээр бодлого боловсруулах, дижитал шилжилт, цахим засаглалын зорилтыг хэрэгжүүлэх, харилцаа холбооны салбарын хувийн хэвшил, төрийн бус байгууллагын түншлэлийг дэмжих, холбоочдын эрх ашгийг хамгаалахад хамтран ажиллана гэдгээ илэрхийлсэн байна.

Улаанбаатар – Дархан чиглэлийн 204.11 километр замын их засвар шинэчлэлийн ажил одоогоор 40 хувийн гүйцэтгэлтэй үргэлжилж, эхний багц дээр асфальт бетон хучилтыг хийж эхэлсэн байна. Ерөнхий гүйцэтгэгчээр БНХАУ-ын дөрвөн компани ажиллаж байгаа бол туслан гүйцэтгэгчээр Эсто ХХК, Үйлсийн зам ХХК зэрэг дотоодын 10 гаруй аж ахуйн нэгж ажиллаж байгаа юм.

Швейцарын хөгжлийн агентлаг, Ногоон-Алт малын эрүүл мэнд төслийн санхүүжилтээр Хөдөө аж ахуйн үйлдвэрлэлд шинжлэх ухаанын ололтыг нэвтрүүлэх төв 2019 онд Төв аймгийн Сүмбэр, Борнуур суманд малын ногоон тэжээл, царгас тариалах төслийг амжилттай хэрэгжүүлж байна. Мал аж ахуй, газар тариалан хосолсон бүсэд эрчимжсэн аж ахуй эрхэлж буй малчид хамтран ногоон тэжээл тариалснаар өөрсдөө тэжээлээ үйлдвэрлэн, худалдан авах тэжээлийн зардлаа бууруулж чаджээ. Малчдын оролцоотой тариалалт хийснээр малчид тэжээл тариалах дадлага, туршлага олж авснаар цаашид аж ахуй эрхлэхэд тулгарах бэрхшээлийг шийдвэрлэх, аж ахуйгаа эрхлэхэд хөрөнгө оруулалт болж байв

Малын холимог ногоон тэжээл нь байгалийн хадланг бодвол малд шингэх шингэц, шимт чанар сайтай учир малын ашиг шимийн гарцад сайнаар нөлөөлөх юм. Царгас олон наст ургамал нь нэгэнт тарьсан байхад жил бүр өөрөө ургаж, нөхөн төлждөг, уургийн хаан гэгддэг малын хүчит тэжээл төдийгүй хөрсийг нөхөн сэргээдэг байна. Харин 2019 онд Төв аймгийн Сүмбэр, Борнуур суманд тус бүр 30 га-д ногоон тэжээл, 5 га-д тус тус царгас тариалсан байна. 1 га талбайн 50 хувьд улаан буудай, 38 хувьд овьёос, 12 хувьд арвай тарихаар тооцоолжээ. Ингэж тарьсан тэжээлийн холимог нь энгийн малын тэжээлийг бодвол чанар сайтай байдаг учраас малын ашиг шимийг нэмэгдүүлэхэд тустай юм.

Төв аймгийн Борнуур, Сүмбэр суманд малын ногоон тэжээл тариалахад “Тайшир өргөө”- ХХК-тай хамтран 2 сумын Сумын бэлчээр ашиглах хэсгийн малчдын нийт 60 га талбайд тариалах холимог ногоон тэжээл, 10 га талбайд тариалах олон наст тэжээлийн ургамал болох царгасын сайн чанарын үрээр хангаж, сүүлийн үеийн дэвшилтэт техник технологийн тусламжтай үрийн нормыг тооцоолон тарилтыг хийж гүйцэтгэжээ. Сум, орон нутгийн удирдлагаас дэмжиж бэлчээр ашиглах хэсгийн малчиддаа хүн хүч, техникийн туслалцаа үзүүлж ажилласан байна.

Энэ жил тэжээл тариалахдаа хугацаагаа зөв сонгож, хур чийг угтуулж тариалснаар тэдний тооцоолсноос илүү их ургац хураан авч, БАХ-ын малчид хөдөлмөрийн үр шимээ хүртэж байна. Төв аймгийн Сүмбэр сумын Бэлчээр ашиглалтын хэсгийн малчид ногоон тэжээл хураан авч эхэлсэн байна. Энэ жил тариалсан ногоон тэжээлийн ургацынхаа 30 хувийг даршлах ажлын зохион байгууллаа. Даршилсан ногоон тэжээлийг ирэх хавар худалдаанд гаргаж, олсон орлогоороо үрийг худалдан авч тариалахаар төлөвлөж байна. Үлдсэн тэжээлийн ургамалын Бэлчээрийн ашиглалтын хэсгийн малчид өөрсдийн хэрэгцээнд ашиглах юм.

Төв аймгийн Борнуур суманд Тайшир өргөө ХХК малын ногоон тэжээл тариалж, хураалт үргэлжилж байна. Тус компани үхэр, хонины эрчимжсэн аж ахуйд ногоон тэжээл нийлүүлж байна.

Бүгд Найрамдах Өмнөд Судан улсад явагдаж буй НҮБ-ын мандаттай Энхийг сахиулах ажиллагааны IX ээлжинд үүрэг гүйцэтгэх алба хаагчдыг үдэх ажиллагаа өнөөдөр боллоо.

Энэ үеэр ОБЕГ-ын дэд дарга, хурандаа Ц.Ганзориг “Онцгой байдлын албаны алба хаагчид НҮБ-ын энхийг сахиулах ажиллагаанд 2012 оноос эхлэн тасралтгүй оролцож, 280 гаруйалба хаагч дэлхийн энх тайвныг батлан хамгаалахад хүчин зүтгэж Онцгой байдлын алба төдийгүй Монгол Улсын нэр хүндийг олон улсад өндөрт өргөн үүргээ нэр төртэйгээр биелүүлж байгаад баяртай байна. Нэг жилийн хугацаанд та бүхэн гэр бүл, үр хүүхдээсээ хол, цэрэг байлдааны талбарт очиж ажиллана. Бие бялдрын болоод сэтгэл санааны өндөр бэлтгэлтэй байх ёстой. Та бүхнээр Онцгой байдлын албаныхан бахархаж байгаа” хэмээн бие бүрэлдэхүүнд амжилт хүслээ.

Тэрбээр Онцгой байдлын албаны тугийг есдүгээр ээлжийн бие бүрэлдэхүүнийг ахалж яваа ОБЕГ-ын харьяа Үндэсний аврах бригадын мэргэжилтэн, ахмад Г.Батсүхэд гардуулан өгсөн юм.

НҮБ-ын мандаттай Энхийг сахиулах ажиллагааны IX ээлжинд Онцгой байдлын албаны 20 алба хаагч үүрэг гүйцэтгэнэ гэж Онцгой байдлын ерөнхий газраас мэдээллээ.

Монгол Улсын Ерөнхийлөгч Х.Баттулга Бүгд найрамдах Энэтхэг улсад айлчиллаа. Энэхүү айлчлалын хүрээнд нэлээд хэдэн асуудал яригдсаны нэг нь тус улсад сурч буй монгол оюутнуудад тэтгэлэг олгох явдал юм байна. Тодруулбал, буддын шашны чиглэлээр тус улсад сурч буй оюутнуудад Энэтхэгийн Засгийн газраас тэтгэлэг олгохоор болжээ.