Month: September 2019

Мэргэжлийн Хяналтын Ерөнхий Газрын даргын баталсан “Зах зээлд худалдаалагдаж буй эм, биологийн идэвхт бүтээгдэхүүн, эмнэлгийн хэрэгсэлд урьдчилан сэргийлэх хяналт шалгалт хийх тухай” 01/43 дугаартай удирдамжийн хүрээнд урьдчилан сэргийлэх хяналт шалгалт хийлээ.

Шалгалтаар Баянгол дүүргийн 7-р хороо, ГССҮТ-ийн байранд байрлах МЭИК ХХК-ийн салбар эмийн санд хийхэд “Л-Карнитин 360”, “Л-Карнитин 360 оригинал” зэрэг гарал үүсэл тодорхойгүй, Монгол улсын эм/биологийн идэвхт бүтээгдэхүүний бүртгэлд бүртгэгдээгүй бүтээгдэхүүнийг илрүүлж, Зөрчлийн тухай хуулийн 6.6 дугаар зүйлийн 7.2 дахь заалтын дагуу арга хэмжээ тооцож, нийт 480.000 төгрөгийн бүтээгдэхүүнийг улсын байцаагчийн акт үйлдэн хурааж, зөрчлийг давтан үйлдэхгүй байх талаар албан даалгаврыг хүргүүллээ.

Иймд иргэд, аж ахуйн нэгжүүд эм импортлох тусгай зөвшөөрөлгүй байгууллагаас чанарын баталгаажилтгүй эм, биологийн идэвхт бүтээгдэхүүн авч борлуулахгүй байх, зориулалтын бус газраас чанарын баталгаажилтгүй эм, биологийн идэвхт бүтээгдэхүүнийг худалдан авахгүй байхыг анхааруулж байна.

Нью-Йорк хотноо үргэлжилж буй НҮБ-ын Ерөнхий Ассамблейн 74 дүгээр чуулганы Ерөнхий санал шүүмжлэлийн үеэр энэ 9 дүгээр сарын 25-нд “Энх тайван, аюулгүй байдлыг хангах чиглэлээр НҮБ, бүс нутаг болон дэд бүс нутгийн байгууллагуудтай хамтран ажиллах нь” сэдвээрх НҮБ-ын Аюулгүйн Зөвлөлийн нээлттэй хэлэлцүүлэг боллоо.

ОХУ-ын Гадаад хэргийн сайд Сергей Лавров даргалан явуулсан уг хэлэлцүүлэгт НҮБ-ын Ерөнхий нарийн бичгийн дарга Антонио Гутеррес үг хэлж, Шанхайн хамтын ажиллагааны байгууллага, Хамтын аюулгүй байдлын гэрээний байгууллага, Тусгаар тогтносон улсуудын хамтын нийгэмлэгийн удирдлага НҮБ болон дээрх бүс нутгийн байгууллага хооронд энх тайван, аюулгүй байдлыг хангах чиглэлээр хөгжүүлж буй хамтын ажиллагааны талаар танилцуулав.

НҮБ-ын Аюулгүйн Зөвлөлийн байнгын болон байнгын бус 15 гишүүн улс, Монгол, Энэтхэг, Иран, Пакистан, Казакстан, Беларусь, Азербайжан, Тажистан, Армени, Афганстан зэрэг 12 улсын Гадаад хэргийн сайд нар тус хэлэлцүүлэгт оролцон, терроризмтой тэмцэхэд НҮБ болон бүс нутгийн байгууллагуудын хамтын ажиллагааг үр дүнтэй болгох арга замын талаар байр сууриа илэрхийлж, үг хэлэв.

Гадаад харилцааны сайд Д.Цогтбаатар хэлсэн үгэндээ дэлхий дахины өмнө тулгарч буй сорилтууд, нэн ялангуяа терроризм, экстремизм, үндэстэн дамнасан зохион байгуулалттай гэмт хэрэгтэй тэмцэхэд НҮБ болон бүс нутгийн байгууллагуудын хамтын ажиллагаа чухал үүрэгтэйг тэмдэглэв.

Тэрээр Монгол Улс терроризм, зохион байгуулалттай гэмт хэрэгтэй тэмцэх тухай НҮБ-ын конвенцид нэгдсэн, ОХУ, Киргиз Улстай терроризмтой тэмцэх тухай хэлэлцээр, гэмт хэрэгтэй тэмцэх чиглэлээр БНХАУ-тай хэлэлцээр байгуулсныг мэдээлж, терроризмтой тэмцэхэд улс орнуудын чадавхийг бэхжүүлэх, үндэстэн дамнасан зохион байгуулалттай гэмт хэргүүд, түүний дотор хар тамхи, зэвсэг, хүний наймаатай терроризм нь улам холбоотой болж буйд анхаарал хандуулах, терроризм, экстремизмээс урьдчилан сэргийлж, тэмцэхэд хүүхэд залуучуудын оролцоог нэмэгдүүлэхийг чухалчлан дурдлаа.

Нийслэлийн Засаг даргын 2019 оны 08 дугаар сарын 01-ний өдрийн А/772 тоот “Байгалийн голомтот тарваган тахал болон хүн, малын гоц халдварт өвчнөөс урьдчилан сэргийлэх ажлыг эрчимжүүлэх тухай” захирамж, Нийслэлийн Мэргэжлийн хяналтын газрын даргын 2019 оны 08 дугаар сарын 16-ны өдрийн А/46 тоот тушаалын хэрэгжилтийг хангуулахаар 2019 оны 09 дүгээр сарын 23-ны өдөр Эмээлтийн шалган нэвтрүүлэх товчоонд хяналт шалгалт хийлээ.

Шалгалтаар Архангай аймгийн нутаг дэвсгэрээс иргэн Н.Б нь …. АРХ улсын дугаартай HYUNDAI маркийн автобусаар 2 ширхэг тарваганы тулам тээвэрлэж явсаныг илрүүлж Зоонозын өвчин судлалын үндэсний төвийн мэрэгч амьтны төвд шилжүүллээ.

“Дүнжингарав”-ын түрээсийг гэнэт 42 хувиар буюу 995 мянган төгрөг болгон нэмсэн тул түрээслэгчид нь есдүгээр сарын 18-нд тус худалдааны төвийн урд жагсаал зохион байгуулсан. Гэвч жагсаал үр дүнд хүрээгүй юм. Иймээс тэмцлийн хурц хэлбэрт шилжиж, өлсгөлөн зарлахаар зэхэж байгаа талаар түрээслэгчид өнөөдөр /2019.9.26/ мэдээлэл хийлээ.

Одоогоор есөн түрээслэгч өлсгөлөнд нэгдэхээ илэрхийлээд байгаа бөгөөд тодорхой хугацаа товлолгүй ч ойрын хугацаанд өлсгөлөн зарлана гэдгээ мэдэгдсэн юм. Өлсгөлөнд Баянгол дүүргийн зарим худалдаачид нэгдэх юм байна. Мөн “Дүнжингарав” худалдааны төвийн эзэд гэх УИХ-ын гишүүн Б.Наранхүү, “Ажнай” корпорацийн ерөнхийлөгч Д.Бат-Эрдэнэ нарыг УИХ-ын ээлжит бус сонгуульд бэлтгэн, сонгуулийн мөнгөө олохын тулд түрээсийн төлбөрийг гэнэт нэмсэн гэж үзэж байна” гэгээ түрээслэгчид илэрхийлсэн юм. “Дүнжингарав” худалдааны төв нь 1200 гаруй түрээслэгчдтэй бөгөөд есдүгээр сарын 25-наас 450 мянган төгрөгийн түрээсийг 995 мянган төгрөг болгон нэмэгдүүлнэ гэдгээ мэдэгдээд байгаа юм.

“Бүлэг-2” хэсэгчилсэн арга хэмжээний хүрээнд Нийслэлийн цагдаагийн удирдах газрын Мөрдөн шалгах газрын Хүнд гэмт хэрэгтэй тэмцэх хэлтэс, Урьдчилан сэргийлэх хэлтсийн алба хаагчид хамтран Баянзүрх, Сүхбаатар, Сонгинохайрхан дүүргийн нутаг дэвсгэрт тодорхой цэгүүдэд зохион байгуулалттай бусдын биеийг үнэлүүлдэг, биеэ үнэлдэг, тээврийн хэрэгслээр үйлчилдэг болон дээрэмдэх гэмт хэрэг үйлддэг бүлэг этгээдүүдийг илрүүллээ. Дээрх 18-45 насны 35 этгээдүүдэд шалгалтын ажиллагаа явуулж дээрэмдэх гурав, танхайрах нэг гэмт хэрэг, эрэн сурвалжлагдаж байсан гурван этгээдийг олж тогтоон ажиллалаа. Уг иргэдэд гэмт хэрэг, зөрчлөөс урьдчилан сэргийлэх, цаашид дахин гэмт хэрэг, зөрчил үйлдүүлэхгүй байх чиглэлээр Нийслэлийн цагдаагийн удирдах газрын Урьдчилан сэргийлэх хэлтсээс ухуулга, нөлөөллийн болон холбогдох хууль эрхзүйн сургалтыг зохион байгуулжээ.

Зуны спортын XXXII Олимпийн наадам 2020 оны долдугаар сарын 24-нөөс наймдугаар сарын 9-нд Япон улсын нийслэл Токио хотноо болно. Монголын үндэсний олимпийн хорооны Тэргүүн дэд ерөнхийлөгч, “Токио – 2020” олимпийн наадамд оролцох Монголын багийн ахлагч Б.Баттүшиг, Токио хотын жуулчдын хамгийн олноор зорин очдог төв цэг болох “Токио цамхаг”-ийн удирдлагуудтай уулзаж, Олимпийн наадмын үеэр “Mongolia house” байгуулан ажиллах санамж бичгийг үзэглэжээ. “Mongolia House” нь “Токио – 2020” олимпийн наадам зохиогдох хугацаанд нийт 14 хоног үйл ажиллагаа явуулах бөгөөд, Монгол Улсын соёл, ёс заншил, Спорт-Олимпизмийн түүхэн замналыг олон нийтэд сурталчлах үзмэрүүд байрлаж, урлагийн тоглолтууд, үндэсний брэндийн үзэсгэлэн зэрэг олон талт арга хэмжээнүүд зохион байгуулагдана.

Мэргэжлийн хяналтын ерөнхий газраас сургууль, цэцэрлэгийн орчимд худалдаалагдаж буй хүнсний бүтээгдэхүүний нэр төрөл, баталгаажилт, хадгалалт, тээвэрлэлтийн байдалд урьдчилан сэргийлэх хяналт шалгалт хийжээ. Ингэхдээ Чингэлтэй дүүргийн 19 дүгээр хороо, Салхит, Санзайн зам, 23 тоотод байрлах “Баян Монгол хоршоо” Дундын хоршооны “Баяжих” хүнсний дэлгүүрийг хамруулсан байна. Шалгалтаар хадгалалтын хугацаа дууссан бүтээгдэхүүн худалдан борлуулж байсан, дотоод хяналт шалгалтын журам тогтоож мөрдүүлээгүй нь тогтоогдож Зөрчлийн тухай хуулиар шийтгэл оногдуулж, хадгалалтын хугацаа хэтэрсэн 37 нэрийн 119 ширхэг, 214.670 төгрөгийн хүнсний бүтээгдэхүүнийг улсын ахлах байцаагчийн актаар хураан авч устгуулахаар Нийслэлийн зөвлөлд шилжүүлжээ.