Month: September 2019

Тээврийн цагдаагийн албаны Замын цагдаагийн газрын Техник, замын хяналтын хэлтсээс Нийслэлийн 6 дүүргийн нутаг дэвсгэрт зам тээврийн осол, хэргээс урьдчилан сэргийлэх зорилгоор гудамж замын гэрэлтүүлгийн асалтанд үзлэг шалгалт хийлээ.

Нийслэлийн дүүргүүдийн гудамж замуудад нийт 23.281 ширхэг гэрэлтүүлэг байгаагаас 84.5 хувь буюу 19.700 ажиллаж, 15.3 хувь буюу 1.230 ажиллахгүй гэрэлтүүлгийн асалт 94 хувьтай байна.

Гудамж замд толгойгүй болсон 235 шон, ламп нь шатсан 326 шон, хазайсан, унасан, хугарсан 82 шон, утас нь тасарсан 26 шонд эвдрэл гэмтэл тоологдсон бол шинээр 54 байршилд 2924 гэрэлтүүлэг шаардлагатай гэсэн судалгааг хийж холбогдох байгууллагад нь хүргүүлэв.

НҮБ-ын Ерөнхий Ассамблейн 74 дүгээр чуулганд оролцож буй Гадаад харилцааны сайд Д.Цогтбаатар Бүгд Найрамдах Парагвай Улсын Гадаад хэргийн сайд Антонио Ривастай 2019 оны 9 дүгээр сарын 25-нд уулзав.

Уулзалтын үеэр Монгол, Парагвайн эдийн засгийн хамтын ажиллагааны талаар санал солилцсоны зэргэцээ “Дипломат, албан болон энгийн паспорт эзэмшигчдийг визийн шаардлагаас чөлөөлөх тухай хэлэлцээр”-т гарын үсэг зурав.

Ингэснээр манай улсын иргэд тус улсад визгүй зорчих нөхцөл бүрдэж буй.

Энэ сарын 24-нд Завхан аймгийн Тосонцэнгэл сумын Оргих багт гарсан ойн түймрийг унтраахаар Аймгийн Онцгой байдлын газрын Тосонцэнгэл сум дахь Гал түймэр унтраах, аврах 39 дүгээр ангийн 12 алба хаагч, орон нутгийн 108 хүн, нийт 120 хүн, 20 автомашинтай ажиллаж өчигдөр өдөр цурманд оруулсан байна. Одоогоор түймрийг бүрэн гүйцэт унтраагаагүй байна.

“Түймрийн аюултай үе” гэж тухайн нутаг дэвгэрт ой хээрийн түймэр гарах байгалийн нөхцөл бүрдсэн хуурайшилт бүхий цаг хугацаа буюу жил бүрийн есдүгээр сарын 20-ны өдрөөс арваннэгдүгээр сарын 10-ны өдөр хүртэлх хугацааг хэлдэг. Тиймээс иргэдийг ой хээрийн түймрээс урьдчилан сэргийлж ил задгай гал гаргахгүй байхыг анхааруулж байна.

Монгол Улсын Ерөнхий сайд У.Хүрэлсүхийн ивээл дор зохион байгуулж буй Шинжлэх ухааны ажилтны улсын анхдугаар их хурал” өнөөдөр “Шинжлэх ухаан, технологи, инноваци-2019” үзэсгэлэнгийн нээлтээр эхэллээ.

Үзэсгэлэнгийн нээлтэд БСШУС-ын сайд Ё.Баатарбилэг, БСШУСЯ-ны Шинжлэх ухаан, технологийн газрын дарга С.Мөнхбат, ШУА-ийн ерөнхийлөгч Д.Рэгдэл, академийн харьяа хүрээлэн, их, дээд сургуулиудын удирдлагууд, эрдэмтэд оролцож, Монгол Улсын хөдөлмөрийн баатар, Академич Б.Ширэндэвийн хөшөөнд цэцэг өргөв.

БСШУС-ын сайд Ё.Баатарбилэг үзэсгэлэнг нээж хэлэхдээ, шинжлэх ухааны салбарын эрх зүйн орчныг боловсронгуй болгож, хөрөнгө санхүүжилтийг нэмэгдүүлэх чиглэлд онцгой анхаарч байгаагаа дурдаад, инновацын тэргүүлэх чиглэлийг Засгийн газраас тогтоож, гарааны компаниудыг дэмжинэ гэдгээ илэрхийллээ. Мөн инновацын бүтээгдэхүүн, мэдлэгийн шинэ төрлүүдийг бий болгож, тэдгээрийг эдийн засгийн эргэлтэд оруулах таатай нөхцөлийг бүрдүүлснээр хүрээлэн, их, дээд сургуулиудын дэргэдэх гарааны компаниудыг бойжуулж, өргөжүүлэхэд түлхэц болно гэв.

Үзэсгэлэнд төрийн болон төрийн бус өмчийн эрдэм шинжилгээний байгууллага, их, дээд сургууль, аж ахуйн нэгж, гарааны компаниас бүрдсэн 45 байгууллагын 350 орчим бүтээл, бүтээгдэхүүн дэлгэжээ. Тухайлбал, хоолойн махны үрэвслийн эсрэг эмийн бэлдмэл, Агаарын чанарыг мэдээлэх систем, Эрүүл мэндийг өдөр тутам хянах зүүдэг төхөөрөмж, Цомцогт бэр цэцгээс гарган авсан бактерийн эсрэг ам зайлагч, Экскаваторын зарим эд ангийг үйлдвэрлэх технологи, Угаадасны нүхний бохирыг цэвэрлэх бэлдмэл зэрэг монгол эрдэмтдийн бүтээсэн шилдэг бүтээл, бүтээгдэхүүнийг танилцуулж байна.

Тухайлбал, ШУА-ийн Хими, химийн технологийн хүрээлэнгийн эрдэмтэд давирхайтай тос, давирхайтай сүүлний тос, өтгөн барагшун, үсний тэжээлийн тос, ванны давс, гэдэс цэвэрлэх эрдэст цай зэрэг эрүүл мэндийн бүтээгдэхүүн дэлгэсэн байлаа. Мөн тус хүрээлэнгийн гарааны компаниуд хуурай шар сүү, чацаргана, шар сүүн ванны бөмбөлөг, малын тэжээл, цэвэрлэгээний нунтаг, ус цэнгэгшүүлэгч, гумины бордоо, үнэр дарагч бэлдмэл зэргийг танилцуулж байв.

Тус үзэсгэлэн Д.Сүхбаатарын талбайд маргааш үргэлжлэх юм.

Эрдэс баялаг, уул уурхайн нэгдсэн чуулган “Дисковер Монголиа-2019” ШангриЛа-д маргааш эхлэх гэж байна. Өмнөх жилүүдэд хоёр өдөр болдог байсан уг чуулган энэ жил нэг өдөрт болох юм. Чуулганыг Уул уурхай, хүнд үйлдвэрийн сайд Д.Сумъяабазар “Монголын уул уурхайн компаниудад өрсөлдөх чадварыг бий болгох нь” сэдэвт илтгэлээр нээх бол “Эрдэнэс Монгол” компанийн гүйцэтгэх захирал П.Ганхүү “Уул уурхай салбар дахь төр хувийн хэвшлийн түншлэл” сэдвээр илтгэл тавихаар болжээ. Оюу толгой компанийн гүйцэтгэх захирал Армандо Торрес “Оюу толгой” төслийн явцын талаар илтгэл тавих юм байна. Чуулганы үдээс өмнөх хуралдааныонцлох илтгэлийг Фэнвэй эрчим хүч мэдээллийн үйлчилгээ лимитед компанийн ерөнхийлөгч Чанг Юү Жин тавина. Тэрээр “БНХАУ болон дэлхийн нүүрсний зах зээлийн дүн шинжилгээ” сэдвээр илтгэл тавих аж. “Эрдэнэс Таван толгой” ХК-ийн гүйцэтгэх захирал Б.Ганхуяг “Эрдэнэс Таван толгой IPO: Төрийн өмчит компанийг олон улсын зах зээлд гаргах нь” сэдвээр илтгэл тавина гэж чуулганы хөтөлбөрт тусгажээ.

Үндсэн хуралдааны дараа чуулганы оролцогчид “Төслийн үнэлгээ хөгжлийг дэмжих нь” сэдвээрхуралдах нь. Тус хуралдааны үеэр “Лайон менежер лимитед” компанийн гүйцэтгэх захирал Хэдли Видапп “Олон улсын зах зээл: Өнгөрсөн жилийн хугацаанд хөрөнгө оруулагчийн хандлага хэрхэн өөрчлөгдөв” сэдвээр илтгэл тавих бол Оюу толгойнхэмжээний үнэ цэнэтэй дараагийн ордын хайгуулын ажлыг хийж буй “Кинкора коппер” компанийн ерөнхийлөгч ба гүйцэтгэх захирал Сэм Спринг өрөмдлөгийн явцаа танилцуулахаар болжээ. Тус хуралдааны үеэр “Эрдэнэ ресурс девелопмент” корпорацийн ерөнхийлөгч ба гүйцэтгэх захирал Сэм Спринг “Алтны өндөр агуулга бүхий шинэ дүүргийг хөгжүүлэх нь” сэдэвтэй илтгэл тавих юм байна. Хөвсгөлийн Овоотын ордоос нүүрс экспортлох төлөвлөгөөтэй ажиллаж буй “Аспайр майнинг” компанийн үйл ажиллагаа хариуцсан захирал Дэвид Полл “Монголын дараагийн коксжих нүүрсний уурхайг байгуулах нь” сэдвээр илтгэл тавина гэж чуулганы зохион байгуулагчид хэлж байна.

“Дисковер Монголиа”-гийн үдээс хойшхи хуралдаан эрчим хүчийг онцолно. Эрчим хүчийг онцолсон хуралдааны даргалагч нь Монголын бизнесийн зөвлөлийн тэргүүн Б.Бямбасайхан. Тус хуралдааны үеэр “Эликсир энержи лимитед” компанийн үйл ажиллагаа хариуцсан захирал Нейл Йонг “Дотоодын зах зээлийг нүүрсний давхаргын метанаар хангах тухай” гэсэн сэдвээр илтгэл тавих юм. Үүнээс гадна “Монгол газрын тос боловсруулах үйлдвэр” ТӨХХК-ийн гүйцэтгэх захирал Д.Алтанцэцэг “Газрын тос боловсруулах үйлдвэр” гэсэн сэдвээр илтгэл тавихаар болжээ. Уг илтгэлүүдийн дараа “Монгол улсын геологийн боломжууд” сэдвээр хэлэлцүүлэг өрнөнө.

“Дисковер Монголиа-2019” чуулганы сүүлийн хуралдаан “Монгол улсын хөгжлийг дэмжих нь” гэсэн сэдэв дор өрнөнө. Тус хуралдааны үеэр Монголын бизнесийн зөвлөлийн тэргүүн Б.Бямбасайхан “Нэгдсэн Ази хэмээх тодорхойлолт нь Монгол улсын хувьд ямар ач холбогдолтой вэ?” гэсэн сэдвээр илтгэл тавихаар болжээ. “Ковер Монголиа”-гийн үүсгэн байгуулагч Б.Мөнхдөл улстөрийн нөхцөл байдлын тухай илтгэл тавих аж. Уг хуралдааны хэлэлцүүлэгт Уул уурхай, хүнд үйлдвэрийн сайд Д.Сумъяабазар, УУХҮС-ийн дэргэдэх олон улсын зөвлөлийн дарга Камерон МакРей, Монголын бизнесийн зөвлөлийн тэргүүн Б.Бямбасайхан, Дэлхийн банкны Монгол улс дахь суурин төлөөлөгчийн газрын ахлах эдийн засагч Жийн Паскаль Н.Нгану нар оролцох юм байна.

Мэргэжлийн хяналтын байгууллагаас дотоодын болон импортын хүнсний ногоо, жимс жимсгэний чанар аюулгүй байдал, стандартын шаардлага хангаж буй эсэх, бүтээгдэхүүний аюулгүй байдлыг хамгаалах, ургамлын өвчин, хортон, хог ургамал, пестицидийн үлдэгдэл тодорхойлох урьдчилан сэргийлэх хяналт шалгалтыг хийж гүйцэтгэлээ.

50 гаруй нэр төрлийн хүнсний ногоо, жимс жимсгэнээс 840 дээж авч үнэ төлбөргүй шинжилгээнд хамруулахад 99.8 хувь нь ургамлын өвчин, хортон, токсин, нян судлал, пестицид, нитратын үзүүлэлтүүдээр шаардлага хангаж байлаа.

Шинжилгээнд хамрагдсан дээжний 52.3 хувь нь дотоодод тариалсан, 47.6 хувь нь импортын төмс хүнсний ногоо, жимс жимсгэнэ эзэлж байна.