Month: August 2019

Зам, тээврийн хөгжлийн яам, нийслэлийн Засаг даргын Тамгын газар, Японы ЖАЙКА олон улсын байгууллагын хооронд 2017 онд байгуулсан хамтран ажиллах санамж бичгийн хүрээнд Улаанбаатар хотын “Нийтийн тээврийн автобусанд дизелийн тортгийн шүүлтүүр DPF (Diesel Particulate Filter) суурилуулж, утааны РМ ялгарлын бууралтыг турших төсөл”-ийг 2017-2019 оны хооронд амжилттай хэрэгжүүлэн дуусаж байгаа юм. Уг төслөөр нийлүүлсэн тоног төхөөрөмжийг Улаанбаатар хотод хүлээлгэн өгөх ёслолын ажиллагаа өнөөдөр “Хангарди” ордонд боллоо. Ёслолын ажиллагаанд нийслэлийн Засаг даргын Хөгжлийн бодлогын асуудал хариуцсан нэгдүгээр орлогч Ж.Батбаясгалан, нийслэлийн Агаарын бохирдолтой тэмцэх газар, нийтийн тээврийн үйлчилгээний “Зорчигч тээврийн нэгтгэл”, “Зорчигч тээвэр гурав”, “Сутайн буянт” компанийн төлөөллүүд, Японы Элчин Сайдын яамны хоёрдугаар нарийн бичгийн дарга Мацухаши Томоюки, Жайка олон улсын байгууллагын Монгол дахь суурин төлөөлөгчийн газрын дарга Эрико Тамура, төслийн удирдагч Масанори Комори нар болон бусад холбогдох албаныхан байлцав.

Ёслолын ажиллагааны үеэр нийслэлийн Засаг даргын Хөгжлийн бодлогын асуудал хариуцсан нэгдүгээр орлогч Ж.Батбаясгалан төслийн хүрээнд гарсан үр дүнг онцолж хэлээд талархлаа илэрхийллээ. Тэрбээр “Төслийн хүрээнд манай улсад ашиглагдаж байгаа хүхэр ихтэй дизель түлшинд ашиглах боломжтой DPF шүүлтүүрийг 24 автобусанд суурилуулсан. Бодит туршилтаар хорт утааг 97 хувь хүртэл бууруулсан үзүүлэлт гарч цаашид хэрэглээнд нэвтрүүлэх боломжтой болох нь баталгаажсан” гэв.

Жайка олон улсын байгууллага нь 2017 оноос Улаанбаатар хотын нийтийн тээврийн автобусанд дизелийн тортгийн шүүлтүүр суурилуулж, утааны РМ ялгарлын бууралтыг турших төслөө хэрэгжүүлж, нийтийн тээврийн үйлчилгээний “Зорчигч тээврийн нэгтгэл”, “Зорчигч тээвэр гурав”, “Сутайн буянт” гэсэн гурван компанийн 24 автобусанд дизелийн тортгийн шүүлтүүр DPF (MoCobee CT-3 загвартай) болон иж бүрдлийг Япон улсын Жижиг, дунд үйлдвэрлэлийг хөгжүүлэх хөтөлбөрийн хүрээнд үнэ төлбөргүй суурилуулж, өнгөрсөн оны долдугаар сараас туршилтын ажлыг эхлүүлсэн байна.

Тортгийн шүүлтүүр нь дизель хөдөлгүүртэй тээврийн хэрэгслийн яндангаас гарах их хэмжээний тортгийг шүүж, агаарт хаягдах утааг цэвэршүүлэх зориулалттай систем юм байна. Уг төхөөрөмжийг Японд анх 2003 оноос туршиж эхэлсэн бөгөөд дизель хөдөлгүүртэй автобус, ачааны машин, гал унтраах машин зэрэгт голлон нэмэлтээр суурилуулан өнөөг хүртэл 15 жил гаруйн хугацаанд тасралтгүй ашигласан хамгийн аюулгүй, найдвартай систем аж.

Улаанбаатар хотод хүлээлгэн өгч буй тоног төхөөрөмжийн жагсаалт:

Он гарсаар эхний долоон сарын байдлаар объектын гал түймэр нийт 2885 удаа гарч, үүний улмаас 6.5 тэрбум төгрөгийн хохирол учирчээ. Обьектын гал түймрийн улмаас 41 хүн нас барж, 20 хүн түлэгдэж гэмтэн 578 толгой мал хорогдож, 1123 гэр орон сууц шатсан байна.

Дээрх гал түймрийн аюулаас Онцгой байдлын байгууллагын алба хаагчид 660 хүний амь нас, төр, аж ахуйн нэгж, байгууллагын 42.4 тэрбум төгрөгийн өмч хөрөнгийг авран хамгааллаа. Обьектод гарсан гал түймрийг өнгөрсөн оны мөн үетэй харьцуулахад гал түймрийн тоо 23.6 хувиар өсөж, харин учирсан хохирлын хэмжээ нэг дахин буурсан үзүүлэлттэй байна.

Төв аймгийн удирдлагууд Их Монгол улс байгуулагдсаны 813, Ардын хувьсгалын 98 жилийн ой, Үндэсний их баяр наадамд Төв нутгийн нэрийг өндөрт өргөсөн үндэсний спортын шилдгүүддээ хүндэтгэл үзүүллээ.

Тодруулбал, улсын их баяр наадамд 40 сумнаас 39 онож түрүүлэн Монгол Улсын “Мэргэн” цол хүртсэн Зуунмод сумын иргэн Э.Цогбаяр, Өсвөрийн бөхийн барилдаанд амжилттай барилдаж 7 давж түрүүлэн Монгол Улсын “Шонхор” цол хүртсэн Заамар сумын Ерөнхий боловсролын сургуулийн сурагч Б.Ган-Эрдэнэ, мөн амжилттай барилдан 4 давж шөвгийн 8-д үлдсэн сурагч Н.Нямдаваа, Батсүмбэр сумын сурагч Н.Баттулга, Хурдан морины уралдаанд 1 түрүү, 4 айраг, Монголын шигшмэл хурдан морьдын “Их хурд-8” уралдаанд азаргатүрүүлгэсэн Баян сумын уяач Б.Нямжав, шүдлэн насанд түрүү хүртсэн Алтанбулаг сумын уяач Г.Ганбаяр нарт Аргалант суманд зохион байгуулагдсан “Төв түмний цэнгэл” баяр наадмын үеэр аймгийн ИТХ болон Засаг даргаас хүндэтгэл үзүүлсэн байна.

Мөн энэ үеэр “Монгол Улсын мэргэн” Э.Цогбаярыг үндэсний сурын харваагаар өндөр амжилт үзүүлснийг үнэлж, Аймгийн “Хүндэт тэмдэг”-ээр шагналаа

“Армейские игры-2019” цэргийн мэргэжлийн олон төрөлтийн олон улсын тэмцээнд дэлхийн 10 улсын нутагт дэвсгэрт ирэх 8 сарын 3-ны өдөр нээлтээ хийнэ. Цэргийн наадамд Азербайджан, Алжир, Бангладеш, Беларусь, Египет, ОХУ, Монгол Улс, БНХАУ зэрэг 34 улсын 216 багийн 6000 гаруй цэргийн алба хаагчид уралдааны нийт 31 төрлөөр оролцох юм.

Манай улсын Зэвсэгт хүчнээс уг олон улсын уралдаанд 5 төрөлд хүч үзэн оролцоно. Тэмцээний нэгэн төрөл болох “Аравт” морин цэргийн олон улсын уралдааныг манай улс эх орондоо зохиохоор болсон бөгөөд тамирчид бэлтгэлээ хэдийнээ эхлүүлээд байгаа билээ.

Цэргийн наадмын Олон Улсын шүүгчээр ЗХЖШ-ын Стартеги бодлого, төлөвлөлтийн газрын дарга, бригадын генерал Х.Даваацэрэн томилогдон Москва хотноо ажиллаж байна. Энэ сарын 25-ны өдөр “Танкийн биатлон”, “Инженерийн томъолол” тэмцээнүүдэд оролцох бие бүрэлдэхүүн Москва хотноо байрлах “Алабино” сургалтын төв, “Тюмен” хотод иржээ.

Энэ жилийн танкийн биатлон тэмцээнд дэлхийн 25 орны 500 гаруй танкчид оролцох бөгөөд энэ сарын 29-ний өдөр оролцогч орнууд танкийн өнгө болон уралдах замаа сонгож, танкуудаа хүлээн авна. ЗХЖШ-ын Ар талын газрын Техникийн хангалтын хэлтсийн дарга, хурандаа Ц.Төрмөнхөөр ахлуулсан танкийн биатлонд оролцох танкчид 6 дахь жилдээ оролцож байгаа. Танкийн биатлон тэмцээний энэ жилийн нэг онцлог нь өмнөх жил оролцсон баг тамирчдыг чансаагаар нь ангилан 1,2 дугаар хэсэгт хуваан тэмцээнийг зохион байгуулахаар шийдвэрлэжээ. Манай танкчид нэгдүгээр хэсэгт буюу 2018 онд эхний 12 дугаарт эрэмбэлэгдсэн улсууд болох ОХУ, БНХАУ, Беларусь, Казахстан, Азербайджан, Серби, Иран, Армения, Венесуэл, Киргиз, Сири гэсэн 11 орны баг тамирчидтай өрсөлдөхөөр болоод байна. Энэ жилийн манай улсын танкчид чансаагаараа 25 орноос ОХУ, БНХАУ, Беларусь, Казахстан, Азербайджан улсын дараа 6 дугаарт эрэмбэлэгдэж байна.

Зэвсэгт хүчний 234 дүгээр ангийн захирагч, хурандаа н.Энхцогоор ахлуулсан “Инженерийн томъолол” тэмцээнд манай цэргийн инженерүүд анх удаа оролцож байгаа агаад ОХУ-ын “Тюмен” хотод болно.

ЗХЖШ-ын Ар талын газрын Зэвсэглэлийн хэлтсийн дарга, хурандаа П.Чинзоригоор ахлагчтай ”Мэргэн буудагчийн зааг” тэмцээний тамирчид болон ЗХЖШ-ын Ар талын газрын Материал хангалтын хэлтсийн ахлах мэргэжилтэн, хурандаа Б.Батнямаар ахлуулсан “Хээрийн гал тогоо” тэмцээнд оролцох баг тамирчид энэ сарын 26-ны өдөр эх орноосоо мордсон бөгөөд энэ сарын 30-ны өдөр Москва хотноо ирж тэмцээний бэлтгэлээ хангаж эхэлжээ. Харин мэргэн буудагчид цааш Беларусь улсыг зориод байгаа аж.

Монгол танкчид улаан өнгийн танкаараа дахин уралдана

Энэ сарын 29-ны өдөр “Танкийн биатлон”тэмццээнд оролцох 25 орны танкчид танкийн өнгө болон гараагаа сугалжээ. Энэ жилийн танкийн өнгө шодох арга хэмжээ урьд жилүүдийнхээс илүү онцлогтой болсон хийгээд оролцогч орнуудын танкийн олон улсын шүүгч, ахлагч нар танкийнхаа өнгө гарааг тусгайлан бэлтгэсэн тайзан дээр гарч сугалав.

Манай улсаас “Танкийн биатлон” тэмцээний олон улсын шүүгч, хурандаа Ц.Төрмөнх улаан өнгийн танкийг сугалсан юм. Улаан өнгө нь манай танкчидын хувьд ихэд ивээлтэй өнгө гэгдэж, хүч чадлыг билэгдэж ирсэн. Өмнөх 2 жилд ч мөн энэхүү өнгийг сугалан уралдаж байсан нь амжилтаа ахиулсан үзүүлэлтийг гаргаж байсан. Тийнхүү манай танкчид ирэх 8 дугаар сарын 4, 6, 8-ны өдрүүдэд 3 дугаар гараанд Сири, Венесуэл, Казакстан улсын танкчидтай уралдахаар боллоо. Эл өдөр оролцогч 25 орны танкчид шодож авсан өнгийн танкуудаа хүлээн авч үзлэг оношлогоог хийн, уралдах зам маршруттайгаа танилцжээ.

Монголын цэргийн тогооч нар дөрөв дэх жилдээ ур чадвараа сорино

Цэргийн наадмын нэг төрөл ” Хээрийн гал тогоо” тэмцээнд манай улсын цэргийн тогооч нар 4 дэх жилдээ оролцож байна. Энэ жил уг тэмцээнд 10 орны цэргийн тогооч нар оролцох юм. 7 дугаар сарын 31-ний өдөр оролцогч орнууд сугалаагаа сугалан, Олон улсын шүүгч, багийн ахлагч хурандаа Б.Батням багаа төлөөлөн сугалсанаар манай улс Казахстан, Азарбайджан улсын хатуухан багуудтай учраа таарлаа. Учир нь дээрхи 2 орон өнгөрсөн жил 3, 4 дүгээр байруудыг эзлэж байсан удаатай. Ийнхүү манай тогооч нар эхний хэсгийн тэмцээнээ 8 сарын 6-ны өдөр буудлагаар эхлүүлэх бол 8 дугаар сарын 7-ны өдөр хар хайрцаг, талх нарийн боовны төрлөөр тэмцээнээ үргэлжлүүлнэ ээ. Тогооч нарын хувьд өмнөх жилүүдэд оролцож байсан туршлагатай агаад дасгалжуулагч болон техникийн нийт 9 хүний бүрэлдэхүүнтэйгээр оролцож байна. Энэ өдөр мөн багууд тэмцээнд хэрэглэгдэх тоног төхөөрөмж, багаж хэрэгслэлээ хүлээн авав.

Он гарсаар эхний долоон сарын байдлаар объектын гал түймэр нийт 2885 удаа гарч, үүний улмаас 6.5 тэрбум төгрөгийн хохирол учирчээ. Обьектын гал түймрийн улмаас 41 хүн нас барж, 20 хүн түлэгдэж гэмтэн 578 толгой мал хорогдож, 1123 гэр орон сууц шатсан байна. Дээрх гал түймрийн аюулаас Онцгой байдлын байгууллагын алба хаагчид 660 хүний амь нас, төр, аж ахуйн нэгж, байгууллагын 42.4 тэрбум төгрөгийн өмч хөрөнгийг авран хамгааллаа. Обьектод гарсан гал түймрийг өнгөрсөн оны мөн үетэй харьцуулахад гал түймрийн тоо 23.6 хувиар өсөж, харин учирсан хохирлын хэмжээ нэг дахин буурсан гэж Онцгой байдлын ерөнхий газраас мэдээллээ.

Төв аймгийн Засаг даргын санаачлагаар Эдийн засаг нийгмийг хөгжүүлэх үндсэн чиглэлд зорилтот бүлгийн иргэдийг орон байраар хангаж иргэдийнхээ аж байдлыг дээшлүүлэх зорилгоор “ГЭР” төслийг хэрэгжүүлэхээр тусгасан.

Энэ хүрээнд сум бүрт 3 гэр, нийт 27 сумын 81 өрхөд гэр олгохоор шийдвэрлэсэн юм. Төслийг үе шаттайгаар хэрэгжүүлж байгаа бөгөөд Аргалант суманд зохион байгуулагдсан “Төв түмний цэнгэл” баяр наадмын үеэр Алтанбулаг, Аргалант, Баянхангай, Лүн, Угтаалцайдам сумын 15 өрхөд гэр олголоо.

ХХААХҮЯ-ны Жижиг, дунд үйлдвэр, үйлчилгээ, хоршооны хөгжлийн бодлого зохицуулалтын газрын дарга Я.Эрдэнэсайхан энэ оны тавдугаар сард БНСУ-д албан томилолтоор ажиллах үеэр тус улсын Наксэн хоршоотой холбоо тогтоон хамтран ажиллахаар тохирсон билээ.

Үүний дагуу тус хоршооны дарга Чун Жэе Ёонг Хүнс, хөдөө аж ахуй, хөнгөн үйлдвэрийн яаманд өчигдөр зочиллоо. Төлөөлөгчид БНСУ-ын хоршооны бүтэц, зохион байгуулалт, хоршооны хөгжил, Сүхбаатар аймгаас аймаг, сум, хоршооны ерөнхий мэдээллийг танилцуулж, цаашид хамтран ажиллах чиглэлийг хэлэлцэж тогтлоо.

Наксэн хоршоо нь Монгол Улсад “Загвар хоршоо” байгуулахад хууль эрх зүйн зөвлөгөө, хоршооны хүний нөөцийг бэлтгэх, чадавхжуулах, мэргэжил дээшлүүлэх болон шинэ дэвшилтэт технологийг нэвтрүүлэх, хөдөө аж ахуйн барилга байгууламж, тоног төхөөрөмжийн туслалцаа үзүүлэх чиглэлээр хамтран ажиллахаар Сүхбаатар аймгийн Хүнс, хөдөө аж ахуйн газар, Сүхбаатар аймгийн Сүхбаатар сумтай хамтран ажиллах “Санамж бичиг” байгууллаа.

Хүнс, хөдөө аж ахуй, хөнгөн үйлдвэрийн Сайд Ч.Улаан уулзалтад оролцогсдод хандан Монгол Улсын Засгийн газар болон тус яамны зүгээс энэхүү хамтын ажиллагааг хуулийн хүрээнд бүх талаар дэмжиж ажиллах болно гэж мэдэгдлээ.