Month: August 2019

Засгийн газраас “Монголросцветмет” ТӨҮГ-ын мэдэлд байсан Асгатын мөнгөний ордыг “Эрдэнэс Монгол” ХХК-д шилжүүлсний дагуу өнгөрсөн зургаадугаар сард ашигт малтмал, газрын тосны газраас уг ордын ашиглалтын дөрвөн тусгай зөвшөөрлийг шилжүүлсэн юм.

“Эрдэнэс Монгол” ХХК-ийн төлөөлөл Ашигт малтмал, газрын тосны газар болон Онцгой байдлын ерөнхий газрын алба хаагчидтай хамтран Асгатын мөнгөний ордын өнөөгийн нөхцөл байдалтай танилцаж, уг ордыг эдийн засгийн эргэлтэд оруулах боломжийг судаллаа.

Энэ үеэр “Эрдэнэс Монгол” ХХК-ийн Уул уурхай, техник, технологийн газрын захирал Б.Элбэгзаяа тэргүүтэй төлөөлөл Баян-Өлгий аймгийн удирдлагуудтай уулзаж, уг ордыг эдийн засгийн эргэлтэд оруулах талаар санал бодлоо солилцов.

Баян-Өлгий аймгийн ИТХ-ын дарга Д.Бауыржан уг ордыг эдийн засгийн эргэлтэд оруулснаар орон нутгийн төсөвт дэмжлэг болж, иргэдийг ажлын байраар хангах боломжтой болж буйг дурдаад аймгийн удирдлага бүхий л талаар дэмжиж, хамтран ажиллахаа илэрхийлсэн байна.

Гачууртын уулзвараас Налайх-Чойрын уулзвар хүртэлх 20.9 км авто замын барилгын ажил өнөөдрийн байдлаар 37 хувийн гүйцэтгэлтэй байна. Үргэлжлэн орсон усархаг борооны улмаас ажил саатаж, төлөвлөгөөнөөсөө 8 хувиар хоцорч явааг албаны хүмүүс Хотын захирагч с.Амахрсайханд мэдээллээ.

Тус замд нийт 38 газарт борооны ус зайлуулах шугам хийхээс 35-ыг нь хийгээд байна. Авто машин болон мал амьтны гурван нүхэн гарц хийхээс нэг нь 100 хувь, нөгөө хоёр нь 80 гаруй хувийн гүйцэтгэлтэй байгааг дурьдлаа. Түүнчлэн асфалтан хучилтыг энэ сарын 20-нд эхлэхээр төлөвлөн ажиллаж байгаа талаараа нийслэлийн Авто замын хөгжлийн газрын орлогч дарга Г.Баттогтох Хотын захирагчид танилцууллаа.

Уг замын ерөнхий гүйцэтгэгчээр БНХАУ-ын Синохидро компани, туслан гүйцэтгэгчээр Монгол Улсын “Тэгшплант” ХХК, “Гашууны гол”ХХК, “Дарданговь” ХХК гэсэн гурван компани ажиллаж байна. Хотын захирагчийн зүгээс Синохидро болон Дарданговь комданиудын хариуцан ажиллаж байгаа газруудад ажил хангалтгүй явагдаж байгаа, үүнд арга хэмжээ авч, ажлыг түргэн шуурхай явуулах шаардлагатайг дурьдлаа. Нийслэлийн Авто замын хөгжлийн газрын орлогч дарга Г.Баттогтохоос энэ талаар тодруулахад “Бидний зүгээс ерөнхий гүйцэтгэгч компанид туслан гүйцэтгэгч компанийнхаа тоог нэмж ажиллуулах шаардлагыг тавьж ажиллаж байгаа” хэмээв.

Хотын захирагч С.Амарсайхан “Замын ажлыг түргэн шуурхай хийж, төв зам ашиглалтад ортол түр замын асуудал дээр анхаарч ажилла. Түр замаар том оврын авто машин, нийтийн тээврээс авахуулаад маш их машин зорчиж байгаа. Ойр ойрхон замыг түрж тэгшлэн, усалгааг сайн хийгээд иргэдийг аюулгүй зорчих тал дээр маш сайн анхаар. Үүссэн нүх сүвийг нь бөглөөд аргацаагаад өнгөрч болохгүй. Түүнчлэн хайрга, дайрганы асуудал ярьж байна. Бидний зүгээс та бүхний хүсэлтийн дагуу бүхий л асуудлыг ажил эхлэхэд шийдэж өгсөн. Одоо бидний өмнө ямар нэг тайлбар тавиад зогсож байж таарахгүй. Энэ асуудлаа өөрсдөө шийдэж, ажлаа төлөвлөгөөт хугацаанд нь хүлээлгэж өгөх тал дээр анхаарч ажилла” хэмээв.

Онцгой байдлын байгууллагаас иргэдийн аюулгүй байдлыг хангах, үер, усны ослоос урьдчилан сэргийлэх ажлыг улсын хэмжээнд эрчимжүүлэн ажиллаж байна.

Тухайлбал, голын дагуу амарч зугаалж байгаа иргэдийн аюулгүй байдлыг хангах, усанд осолдохоос урьдчилан сэргийлэх зорилгоор улсын хэмжээнд завьт эргүүл, морин эргүүл, хөдөлгөөнт эргүүлийг зохион байгуулж, гол, мөрөн, нуурын дагуу усанд орохыг хориглосон тэмдэг тэмдэглэгээ байрлуулах, голын эрэг дагууд амарч зугаалж байгаа иргэдэд сэрэмжлүүлэг хүргэх зэрэг ажлыг зохион байгуулан ажиллаж байгаа юм.

.“Цэцээ гүн”-ий оргил өөд явган аялал хийх явцдаа төөрч сураггүй алга болсон БНСУ-ын иргэн эсэн мэнд ирсэн тул эрэн хайх ажиллагааг зогсоожээ.

Тодруулбал Төв аймгийн Сэргэлэн сумын Эрдэнэ-Уул багийн “Манзуширын-Ам” гэдэг газар /сумын төвөөс хойд зүгт 21 км-т/ “Билгүүн туул” ХХК-ийн зохион байгуулсан Богд-Хан ууланд “Цэцээ гүн”-ний оргил өөд явган аялал хийж явсан БНСУ-ын иргэн Л /61 настай, эмэгтэй/ 08.11-ний өдрийн 17:00 цагийн орчим сураггүй болсон тухай дуудлага 2019.08.11-ний өдрийн 17:05 цагт Онцгой байдлын албанд иржээ.

Дуудлагын дагуу Үндэсний аврах бригадын 39 алба хаагч, 12 нохой, 3 автомашин, НОБГ-ын 32 алба хаагч 1 нохой, 5 автомашин, Төв аймгийн Онцгой байдлын газрын 19 алба хаагч, 3 автомашин, Төв аймаг дахь Цагдаагийн газрын 10 алба хаагч, 1 нохой, 2 автомашин, Баянзүрх дүүргийн Цагаагийн 3 дугаар хэлтсийн 11 алба хаагч, 2 автомашин, нийт 111 хүн, 14 нохой, 15 автомашинтай эрэн хайх ажиллагааг зохион байгуулсан байна.

Эрлийн явцад тухайн иргэн 08.12-ны өдрийн 08:00 цагт эсэн мэнд байгаа тухайгаа нөхрийнхөө гар утсанд цахим захидал илгээсэн бөгөөд 12:40 цагт Баянзүрх дүүргийн 11 дүгээр хорооны нутаг дэвсгэрт үйл ажиллагаа явуулдаг “Скай Ресорт” цанын баазад өөрөө эсэн мэнд ирсэн тул эрэн хайх ажиллагааг зогсоожээ.

Он гарсаар гамшиг, аюулт үзэгдэл, ослын 2293 удаагийн дуудлага нийслэлийн Онцгой байдлын газарт ирсэн байна. Дуудлагын дагуу нийслэлийн харьяа анги, байгууллагуудын алба хаагчид ажиллан, 900 гаруй иргэний амь нас, иргэд, аж ахуйн нэгж, байгууллагын 27 тэрбум төгрөгийн эд хөрөнгийг авран хамгаалжээ.

Мөн Туул гол дагуу усны осол, үерийн аюулаас урдчилан сэргийлэх зорилгоор зохион байгуулж байгаа завьт эргүүл арга хэмжээнд 1650 ажилтан, алба хаагч, 176 техник хэрэгсэлтэйгээр ажиллаж байна гэж нийслэлийн Онцгой байдлын газраас мэдээллээ.

Улаанбаатар хотын Ерөнхий менежерийн 2019 оны 5-р сарын 20-ны өдрийн А/145 дугаар тушаалын дагуу Баянзүрх дүүргийн Засаг даргын Тамгын газраас “Харшлын эсрэг хамтдаа” уриатай “Шарилжгүй Улаанбаатар-4” аяныг дүүргийн нутаг дэвсгэрт амжилттай зохион байгуулж байгаа билээ. Тус аяны зорилго нь хөл газрын ургамлын тоосноос үүдэх харшлын өвчлөлөөс сэргийлэх, өвчлөлийн тоог бууруулах, хөл газрын ургамлыг шинжлэх ухааны үндэслэлтэйгээр тайрах, хадах, ногоон масс болон малын тэжээл болгон ашиглах, иргэдэд нэгдсэн мэдлэг, зөв ойлголтыг өгөх, цэвэрлэгээний үйл ажиллагаанд иргэдийн оролцоог нэмэгдүүлэх юм. Аяны эхний шатны цэвэрлэгээ 2019 оны 06 дугаар сарын 29-ны өдөр зохион байгуулагдсан бол хоёрдугаар шатны цэвэрлэгээ энэ сарын 17-ны өдөр болох гэж байна. Иймд дүүргийн нутаг дэвсгэрт үйл ажиллагаа явуулж буй иргэн, аж ахуй нэгж байгууллагууд хөл газрын ургамал, шарилжны их цэвэрлэгээнд идэвхтэй оролцохыг Баянзүрх дүүргийн ЗДТГ-аас уриалж байна.

“Халх гол, Ялалтын 80 жил” үзэсгэлэн өчигдөр Үндэсний музейд нээлтээ хийлээ.

Үзэсгэлэнд тус музейн сан хөмрөгөөс 80 орчим биет үзмэр, ОХУ-ын Бүгд Найрамдах Буриад улсын Үндэсний музейгээс гэрэл зураг, архивын баримтыг зургаар харуулсан тайлбар бичвэр бүхий үзүүлэнт самбарууд үзмэрт дэлгэгдэв. Нээлтэнд БСШУСЯ-ны Соёл урлагийн бодлогын газрын дарга Б.Сэргэлэн, Засгийн газрын хэрэгжүүлэгч агентлаг Соёл урлагийн газрын дарга Г.Эрдэнэбат, ОХУ-аас Монгол Улсад суугаа Элчин Сайдын Яамны Элчин Зөвлөх Ракшаев Рыгзын Ракшаевич, Монголын Үндэсний музейн захирал Д.Сүхбаатар, ОХУ-ын Бүгд Найрамдах Буриад улсын Үндэсний музейн захирал Татъяна Анатолывна Бороноева болон Дотоодын цэргийн 805 дугаар ангийн ажилтан албан хаагчид, бусад олон зочид хүрэлцэн ирж, үзэж сонирхлоо. “Халх гол, Ялалтын 80 жил” үзэсгэлэн наймдугаар сарын 12-25-ны өдрүүдэд Монголын Үндэсний музейн үзэсгэлэнгийн танхимд олон нийтэд нээлттэй гарна. Эрхэм хүндэт үзэгчид та бүхнийг урьж байна.