Month: August 2019

“Сургуулийн өмнөх боловсролын үйлчилгээний хүртээмжийг нэмэгдүүлэх талаар авах зарим арга хэмжээний тухай“ Засгийн газрын тогтоолын дагуу байгууллагын дэргэдэх цэцэрлэгийг дэмжих нь цэцэрлэгийн хүртээмж нэмэгдүүлэхэд чухал нөлөө үзүүлэх юм.

Боловсрол соёл, шинжлэх ухаан, спортын яам Монголын худалдаа аж үйлдвэрийн танхимтай хамтран энэ сарын 13-ны өдөр “Байгууллагын цэцэрлэгийг хөгжүүлэхэд төр-хувийн хэвшлийн хамтын ажиллагаа, түншлэл” сэдэвт уулзалт зохион байгуулж, аж ахуйн нэгжүүд байгууллагын дэргэдэх цэцэрлэгийг дэмжихээ илэрхийлсэн.

Тэгвэл энэ удаад Монголын Ажил олгогч эздийн нэгдсэн холбооны гишүүн үндэсний томоохон 20 гаруй аж ахуйн нэгжийн удирдлагатай уулзалт хийлээ. Уулзалтад

• АПУ ХК
• Мобиком
• Монос групп
• Төрийн банк
• Таван богд ХХК
• Улсын клиникийн төв эмнэлэг
• Делта Констракшн ХХК
• Энержи Ресурс ХХК
• МАК
• Ленд ТН ББСБ
• Хөгжил Трейд ХХК
• Хайпер Маркет ХХК
• Адмон ХХК -ийн удирдлагууд оролцож, “Байгууллагын цэцэрлэг” санаачилгад нэгдэн ажиллахаар боллоо.

Хувийн хэвшлийн байгууллагын зүгээс ажилтнуудынхаа нийгмийн асуудлыг шийдвэрлэх, хөдөлмөрийн бүтээмж, ажлын цаг ашиглалтыг сайжруулах, чадварлаг боловсон хүчнийг тогтвор суурьшилтай ажиллуулахад дэргэдээ Цэцэрлэг байгуулан ажиллуулах нь чухал ач холбогдолтой юм.

Улсын Нэгдүгээр төв эмнэлгийн Эрчимт эмчилгээний тасгийг 12 жилийн дараа бүрэн засварлаж, ашиглалтанд орууллаа.

Энэ удаад тус тасгийн дулааны шугам сүлжээ, цэвэр бохир усны шугамыг шинээр солих, цахилгааны угсралт, барилгын бүрэн засвар шинэчлэл, хүчилтөрөгчийн шугамын ажлуудыг хоёр сарын хугацаанд бүрэн хийж дуусчээ.

Анх 1977 онд байгуулагдсан Эрчимт эмчилгээний тасагт хүнд өвчтөнийг оношлох, эмчлэх гуравдугаар шатлалын тусламж үйлчилгээ үзүүлдэг бөгөөд мэргэжлийн чиглэлээр улсын хэмжээний сургалт судалгааны лавлагаа төвийн үүрэг гүйцэтгэдэг гэдгийг эмч мэргэжилтнүүд хэлж байв.

Барилгын засварын ажлыг Эрүүл мэндийн яамнаас санхүүжүүлж, “Жаргалан дулаан” компани хийж гүйцэтгэсэн байна. Харин “Алтан хийц” компани нийгмийн хариуцлагын хүрээнд өөрсдийн хөрөнгөөр цонх, хаалга сольж, хана тааз будах, өрөө коридорын гэрэлтүүлэг болон шалны хулдаасыг бүрэн шинэчлэх ажлуудыг хандив болгон хийж өгчээ.

Онцгой байдлын байгууллагаас иргэдийн аюулгүй байдлыг хангах, үер ус, усны ослоос урьдчилан сэргийлэх ажлыг улсын хэмжээнд эрчимжүүлэн ажиллаж байна.

Дархадын хотгорын сав нутгаас 700-800 жилийн тэртээ мөнх цэвдэгт тэс хөлдүү хадгалагдсан гурван ваар дүүрэн өрөм, нэг ваар дүүрэн шар тос олдсон нь Монголын төдийгүй дэлхийн археологийн судалгаанд нэн ховор нээлт болж байна.

Энэ нь урьдчилсан байдлаар зул байх магадлалтай гэдгийг Монголын Үндэсний музейн эрдэм шинжилгээний төвийн дарга, доктор Ж.Баярсайхан, АНУ-ын талаас доктор Жулиа Кларк нар танилцууллаа.

Монголын эзэнт гүрний үед холбогдох эдгээр ховор нандин олдворуудыг ирэх онд олны хүртээл болгоно. Одоогоор гурван ваар дүүрэн өрөм, нэг ваар дүүрэн шар тос болох олдворуудыг -18 градуст тусгай хөргүүрт хадгалж байгаа аж.

Нисэхийн эцсийн автобусны буудлаас” Буянт–Ухаа” 21 дүгээр гудамж хүртэлх хатуу хучилттай 2.8 км авто замын өргөтгөл, шинэчлэлтийн ажил наймдугаар сарын 15-наас эхэлжээ. Үүнтэй холбоотойгоор наймдугаар сарын 15-26-ныг хүртэл тус авто замыг хэсэгчлэн хаахыг Тээврийн цагдаагийн газраас мэдээлжээ.

Зам, тээврийн хөгжлийн яамны захиалгаар Хан-Уул дүүргийн 9-р хорооны нутаг дэвсгэрийн эхлэл хэсэг болох “Буянт-Ухаа-1” орон сууцны хорооллын баруун талын гэрлэн дохиогоор хойш Нисэхийн эцсийн автобусны буудал хүртэлх 2.8 км авто замын хучилтын ажлыг хийж гүйцэтгэх юм байна. Тус чиглэлд зорчих жолооч бусад замыг сонгон хөдөлгөөнд оролцохыг албаныхан зөвлөж байна. Дээрх хугацаанд тухайн авто замаар дайран өнгөрдөг нийтийн тээврийн үйлчилгээний чиглэлүүдэд түр хугацаагаар өөрчлөлт оржээ.

А

Газар зохион байгуулалтын албаны орлогч дарга Д.Нямдаваа, нийслэлийн Газар зохион байгуулалтын албаны газрын ашиглалт, бүртгэлийн хэлтсийн дарга Д.Бат-Өлзий, Хан-Уул дүүргийн Газар зохион байгуулалтын албаны дарга Ч.Мөнхбаатар нар мэдээлэл хийлээ.

Нийслэлийн нутаг дэвсгэрт иргэдийн эрүүл, аюулгүй орчинд амьдрах эрхийг ханган газар ашиглалтыг сайжруулах, явган хүний зам талбайн хүрэлцээ хангамжийг нэмэгдүүлэх, авто замын түгжрэлийг бууруулах болон тохижилтын ажил гүйцэтгэх боломжийг бүрдүүлэх зорилгоор нийслэлийн Засаг дарга бөгөөд Улаанбаатар хотын Захирагч С.Амарсайхан 2019 оны дөрөвдүгээр сарын 17-нд А/322 тоот захирамжийг гаргасан.

Захирамжийн хэрэгжилтийг хангах ажлын хүрээнд авто замын орц гарц, явган хүний зам талбай, нийтийн эзэмшлийн газарт зохих зөвшөөрөлгүйгээр зөөврийн байгууламж байрлуулсан, зуслангийн бүсэд гудамж зам хаасан, эзэмшил ашиглалтад байгаа газраа дур мэдэн нэмж хашаа, барилга байгууламж барьсан зэрэг зөрчлийг 90 байршилд илрүүлж 140 обьектыг чөлөөлөх ажил хийгдсэн байна.

Нийслэлийн Газар зохион байгуулалтын албаны орлогч дарга Д.Нямдаваа хэлэхдээ “Хорооллын дундах авто замын 26 байршилд орц гарц нээгдсэн.Нийтийн эзэмшлийн 12 байршилд 2890м.кв талбай нэмэгдсэн. Явган хүний зам хаагдсан 45 байршилд 3883 м.кв талбайг чөлөөлөн тохижилт хийж газар ашиглалтыг сайжруулах арга хэмжээ авч байна. Чингэлтэй дүүрэгт 1, Баянгол дүүрэгт 12, Баянзүрх дүүрэгт 7, Сонгинохайрхан дүүрэгт 11, Сүхбаатар дүүрэгт 13, Хан-Уул 9 байршилд газар чөлөөлөх ажил хийгдсэн” гэлээ.

Дотоодын нислэгийн тийзийн үнийг үе шаттай бууруулах, орон нутгийн нисэх буудлуудын үйл ажиллагааг идэвхжүүлэх ажлууд шат дараалалтай хийгдсээр байгаа. Энэ ажлын хүрээнд ирэх 9 дүгээр сарын нэгний өдрөөс “Аэромонголиа” авиа компани орон нутгийн чиглэлийн бүхангиллын тийзийн үнийг дахин 10 хувь бууруулахаар төлөвлөж байгаагаа ИНЕГ–ын даргад мэдэгдлээ.

Тус компани өнгөрөгч долдугаар сарын 26-ны өдөр мөн орон нутгийн бүх чиглэлийн, бүхангиллын тийзийн үнийг 10 хувиар бууруулах шийдвэр гарган хэрэгжүүлээд байсан юм. “Аэромонголиа” авиа компани нь Өлгий, Ховд, Алтай, Улаангом, Мөрөн чиглэлүүдэд ERJ-145 маягийн агаарын хөлгөөр нислэг үйлдэж байна гэж Иргэний нисэхийн ерөнхий газраас мэдээллээ.