Month: August 2019

Онцгой байдлын ерөнхий газар, “Оюу толгой” ХХК-тай гамшгаас хамгаалах, гамшгийн үед хамтран ажиллах харилцан ойлголцлын санамж бичиг байгууллаа.

Санамж бичигт ОБЕГ-ын дарга, хошууч генерал Т.Бадрал, “Оюу толгой” ХХК-ийн гүйцэтгэх захирал Армандо Торрес нар гарын үсэг зурсан юм. Хамтын ажиллагааны хүрээнд “Оюу толгой” ХХК-ийн уурхайн талбайд тохиолдож болзошгүй гамшиг, үйлдвэрлэлийн осол, гал түймрийн аюулаас урьдчилан сэргийлэх, гамшиг, үйлдвэрлэлийн томоохон осол тохиолдсон үед гамшигтай тэмцэх ажиллагааг шуурхай, үр дүнтэй зохион байгуулах, төрийн бусад байгууллагын туслалцаа, дэмжлэгийг шуурхай авах, гамшигтай тэмцэх талаар сургалт зохион байгуулах, харилцан туршлага солилцоно.

Мөн мэргэжлийн анги, аврах багуудын үйл ажиллагааны журмыг хамтран боловсруулж хэрэгжүүлэх юм. Дашрамд дурдахад, ОБЕГ-ын харьяа Үндэсний аврах бригадын Уул уурхайн аврах ангийн алба хаагчид, Оюу толгойн гүний уурхайн аврах багтай туршлага солилцох хөтөлбөрийн хүрээнд уурхайн гүнд цуврал сургалтыг зохион байгуулж, харилцан туршлага солилцож байсан. Мөн Оюу толгойн Гэнэтийн ослын багийн хамт олон өөрсдийн санаачилгаар хандив цуглуулж, дунд оврын автомашин худалдан авч, гал унтраах төхөөрөмжөөр тоноглон Өмнөговь аймгийн Онцгой байдлын газрын Ханбогд сумын Гал түймэр унтраах, аврах 66 дугаар ангид хандивласан.

Түүнчлэн “Оюу толгой” компани сайн дурын аврагчдын эрүүл мэнд, аюулгүй байдлыг хамгаалах зорилготой “Аврагчдаа аваръя” ой, хээрийн гал түймрээс сэргийлэх төсөлд нэгдэж зориулалтын хувцас хэрэгсэл мөн хандивлаж байсан зэргээр Онцгой байдлын байгууллагын үйл ажиллагааг дэмжин, хамтран ажилладаг юм.

Монгол Улсын Засгийн газраас 2019 оныг “Иргэн төвтэй төрийн үйлчилгээний жил” болгон зарласантай холбогдуулан Засгийн газрын 2019 оны 149 дүгээр тогтоол, Нийслэлийн Засаг даргын 2019 оны А/510 дугаар захирамжийн хэрэгжилтийг хангах ажлын хүрээнд Төрийн үйлчилгээг операторын горимд шилжүүлэхтэй холбоотой оролцогч талуудын нээлттэй хэлэлцүүлгийг Нийслэлийн Засаг даргын Тамгын газар, Азийн сан хамтран 2019 оны 08 дугаар сарын 15-ны өдөр зохион байгууллаа.

Тус хэлэлцүүлэгт Нийслэлийн Засаг даргын Тамгын газар, Харилцаа холбоо, мэдээллийн технологийн газар, Нийслэлийн Архивын газар, Нийслэлийн Мэдээлэл, технологийн газар, Нийслэлийн Үйлчилгээний нэгдсэн төв, дүүрэг, хороодын болон холбогдох нийслэлийн нутгийн захиргааны байгууллагууд, хувийн хэвшлийн төлөөлөл идэвхтэй оролцсон байна.

Хэлэлцүүлгээр Нийслэлийн үйлчилгээний нэгдсэн төвөөс үзүүлдэг 325 үйлчилгээнээс операторын горимд нэн тэргүүнд шилжих боломжтой 20 үйлчилгээг сонгон авч, багаар ажиллан үйлчилгээний шалгуур үзүүлэлтийг тодорхойлсон.

Үйлчилгээг операторын горимд шилжүүлснээр төрийн үйлчилгээг иргэдэд түргэн, шуурхай үзүүлэх нөхцөл бүрдэх давуу талтай юм.

2019-2020 оны хичээлийн жилд нийслэлийн ерөнхий боловсролын сургуулийн нэгдүгээр ангид элсэн суралцах сурагчдыг тавдугаар сарын 13-наас 27-ны өдрүүдэд бүртгэсэн. Дахин бүртгэл энэ сарын 21-30-ны хооронд явагдана гэдгийг Нийслэлийн Боловсролын газрын дарга Ж.Гантулга мэдээллээ.

Статистик үзүүлэлтээр

• Баянгол дүүрэг 5577,
• Баянзүрх дүүрэг 6838,
• Багануур дүүрэг 465,
• Багахангай дүүрэг 110,
• Сүхбаатар дүүрэг 3396,
• Сонгинохайрхан дүүрэг 5616,
• Хан-Уул дүүрэг 3883,
• Чингэлтэй дүүрэгт 2408,
• Налайх дүүрэгт 676 хүүхэд бүртгүүлжээ.

Харин нийслэлийн төрийн өмчийн цэцэрлэгт шинээр элсэх, үргэлжлүүлэн суралцах хүүхдийн бүртгэлийг долдугаар сарын 22-ны өдрөөс эхлэн наймдугаар сарын 22-ны өдрийг дуустал цахим хэлбэрээр зохион байгуулж байна. Цахим бүртгэлд энэ сарын 15-ны өдрийн байдлаар 28181 хүүхэд бүртгүүлсэн байна.

Эрүүл мэндийн сайд Д.Сарангэрэл Гэмтэл, согог судлалын үндэсний төвийн захирлаар ажиллаж байсан, гэмтлийн мэс засалч Т.Мөнхсайханыг Улсын нэгдүгээр төв эмнэлгийн захирлаар томилсон байна. Т.Мөнхсайхан нь гэмтлийн эмнэлгийн захирлаар хоёр жил гаруй хугацаанд ажиллахдаа эмнэлгийн зохион байгуулалт, тусламж үйлчилгээний чанар, нэр төрлийг нэмэгдүүлэх, гадаад харилцааг хөгжүүлэх чиглэлээр үр дүнтэй ажилласан хэмээн салбарынхан үнэлдэг аж. Тэрбээр 2006 оноос хойш ГССҮТ-д ажилласан бөгөөд хиймэл үений мэс засал, үений дурангийн мэс заслын чиглэлээр мэргэшсэн эмч юм. ГССҮТ-ийн ерөнхий захирлаар тус эмнэлгийн Эмнэлгийн тусламж, үйлчилгээ хариуцсан орлогч захирлаар ажиллаж байсан, мэс заслын эмч Э.Галбадрахыг томилсон байна. Нийслэлийн эрүүл мэндийн газрын дарга Л.Төмөрбаатар ажлын хариуцлага алдсан гэж үзэж харьяаны хоёр эмнэлгийн удирдлагыг албан тушаалаас нь чөлөөлсөн. Баянгол дүүргийн Эрүүл мэндийн төвийн дарга Ө.Батжаргалыг чөлөөлж, уг албан тушаалд Эрүүл мэндийн яаманд ажиллаж байсан Балдандугарыг томилжээ. Мөн Нэгдүгээр амаржих газрын дарга Г.Баясгаланг чөлөөлж, тус амаржих газрын Эмчилгээ эрхэлсэн орлогч захирлаар ажиллаж байсан Дүүрэнгэрэлийг захирлын үүрэг гүйцэтгэгчээр томилсон байна.

Булган аймгийн Сэлэнгэ сумын Сангалтай багийн Цүүц гэдэг газар энэ сарын 17-ны өдрийн 19.10 цагаас 19.30 цагийн хооронд түр зуурын ширүүн бороо, мөндөр оржээ. Борооны өмнө хүчтэй шуурсаны улмаас таван айлын гэр нурж, нэг айлын байшингийн дээврийн төмөр хууларч, 13 ширхэг цахилгааны модон багана унасан байна. Мөн тариан талбай мөндөрт цохиулжээ. Яг одоо газар дээр нь Булган аймгийн онцгой байдлын аврагчид ажиллаж байна.

Амралтын өдрүүд буюу энэ сарын 17-18-ны өдрүүдэд Тээврийн цагдаагийн албаны Жижүүрийн шуурхай удирдлагын хэлтэс нийт зам тээврийн ослын шинжтэй 327 дуудлага, мэдээллийг хүлээн авч, шалгалтын ажиллагаа явуулжээ. Бүртгэгдсэн осол, хэргийн улмаас нийслэлд 15 хүн гэмтэж, ноцтой зам тээврийн ослын улмаас нийслэлд хоёр, орон нутагт гурван хүний амь нас хохирсон байна.

Тухайлбал, ням гаригт орон нутагт 19.20 цагийн орчимд Хөвсгөл аймгийн Мөрөн сум Ачмаг нуур гэх газар асфальтан замд Mitsubishi Colt маркийн А жолоочтой автомашин онхолдож, зорчигч 18настай, эмэгтэй Ч нас баржээ.

• 19.40 цагийн орчимд Төв аймгийн Борнуур сумын төв Петровис шатахуун түгээх станцын хойд асфальтан замд улсын дугааргүй Мустанг-5 маркийн мотоциклын жолооч М нь амины Dayun Б жолоочтой мотоциклтой мөргөлдөж, зорчигч 33 настай, эмэгтэй У нас барсан байна.
• 00.57 цагийн үед Төв аймгийн Баян сумын 3-р баг Цавчир гэх газар асфальтан замд Mitsubishi L200 автомашины жолооч А нь Toyota Alphard М жолоочтой автомашинтай мөргөлдөж, зорчигч 48 настай, эмэгтэй О нас барж, жолооч 35 настай, эрэгтэй А, зорчигч 30 настай, эмэгтэй У, 31 настай, эмэгтэй Д, 12 настай, эрэгтэй Н, 35 настай, эрэгтэй Б нарын таван хүн гэмтсэн
• Нийслэлд 18.20 цагийн орчимд Сонгинохайрхан 11 дүгээр хороо Баянхошууны Хөтөлийн зам, Пирамид хүнсний дэлгүүрийн урд замд Toyota Lexus H-400 автомашины жолооч Б нь “Нийслэлийн хот тохижилтын газар”-ын M-580 Г жолоочтой механизмтай мөргөлдөж, зорчигч 35 настай, эрэгтэй Г нас баржээ.

Тиймээс жолооч та бүхэн замын хөдөлгөөний дүрмээ биелүүлж, бусдад аюул осолтой байдал үүсгэхгүйгээр зорчихыг Тээврийн цагдаагийн албанаас сэрэмжлүүлж байна.

Нийслэлд байгалийн голомтот болон хүн, мал, амьтны гоц халдварт өвчний халдвар зөөгдөн орж ирэхээс урьдчилан сэргийлэх зорилгоор Нийслэлийн Засаг даргын “Тарваган тахал өвчнөөс урьдчилан сэргийлэх талаар авах зарим арга хэмжээний тухай” А/772 дугаар захирамж гарсан.

Захирамжийн хүрээнд 2019 оны наймдугаар сарын 15-ны өдрөөс аравдугаар сарын 30-ны өдрүүдэд нийслэлийн Онцгой байдлын газар, Мэргэжлийн хяналтын газар, Цагдаагийн газар, Замын цагдаагийн албан хаагчид хамтран 24 цаг, 3 ээлжээр шалган нэвтрүүлэх товчоодод үүрэг гүйцэтгэн ажиллаж байна. Алба хаагчид Сонгинохайрхан дүүргийн Эмээлт, Баруун турууны авто тээврийн Шалган нэвтрүүлэх товчоо, Налайх дүүргийн Тэрэлж, төмөр замын 4-р зөрлөгийн авто тээврийн шалган бүртгэх товчоо, Баянзүрх дүүргийн авто тээврийн шалган бүртгэх товчоо, Багануур дүүргийн Хэрлэнгийн гүүрний авто тээврийн шалган нэвтрүүлэх товчоо, Багахангай дүүргийн Замын цагдаагийн пост, Хан-Уул дүүргийн Яармаг, Нисэх, Биокомбинатын шалган нэвтрүүлэх товчоодод байнгын үүрэг гүйцэтгэн ажиллах юм гэж нийслэлийн Онцгой байдлын газраас мэдээллээ.