Month: August 2019

Монгол Улсад зохион байгуулагдаж буй “Азийн төлөөх Боао форум”-ын Улаанбаатарын Бага хуралд оролцохоор хүрэлцэн ирсэн форумын дарга, НҮБ-ын Ерөнхий нарийн бичгийн дарга асан Бан Ги Мүн тэргүүтэй төлөөлөгчдийг Монгол Улсын Ерөнхийлөгчийн Тамгын газрын дарга З.Энхболд өчигдөр хүлээн авч уулзлаа.

Тэрээр “Азийн төлөөх Боао форум”-ын төлөөлөгчидтэй уулзаж байгаадаа баяртай байгаагаа илэрхийлээд, форумын санаачлагч орнуудын нэг болох Монгол Улс нь форумын үйл ажиллагаанд идэвхтэй оролцохыг зорьж ирснийг тэмдэглэв.

Түүнчлэн Монгол Улсын Ерөнхийлөгчийн Тамгын газрын дарга З.Энхболд Боао форум дахь эрдэмтэн судлаачид, бизнес эрхлэгчид, төр, засгийн албаны хүмүүсийн оролцоо нь Ази тивийн асуудлаар санал мэдээлэл солилцох, эдийн засгийн хамтын ажиллагааг өргөжүүлэх боломжийг ярилцахаас гадна Монгол Улстай явуулж буй бизнесийн харилцаанд тулгарч буй саад бэрхшээлийг даван туулах, цаашид өргөн хүрээнд хамтран ажиллах бололцоог эрэлхийлэх завшаан олгож буйг онцлон тэмдэглэв.

Монгол Улсын Ерөнхийлөгчийн Тамгын газрын дарга З.Энхболд Боао форумын үйл ажиллагаанд Монгол Улс идэвхтэй оролцох бодлого баримтлахын сацуу ноён Бан Ги Мүний тэргүүлдэг байгаль орчны байгууллагуудтай хамтын ажиллагаагаа өргөжүүлэх сонирхолтой байгааг илэрхийллээ.

Ноён Бан Ги Мүн Боао форумын арга хэмжээг анх удаа эх орондоо зохион байгуулж байгаа Монгол Улсын Засгийн газарт талархал илэрхийлж, Монгол Улсын эдийн засаг, нийгмийн хөгжил хурдацтай өсч буй үед энэхүү форумыг зохион байгуулж байгааг онцлов.

Мөн ирэх жил тохиох “Азийн төлөөх Боао форум”-ын 20 жилийн ойн үйл ажиллагаанд Монгол Улсын Ерөнхийлөгч Х.Баттулгыг оролцохыг урьж байгаагаа форумын дарга ноён Бан Ги Мүн уулзалтын үеэр уламжлав.

Түүнчлэн ноён Бан Ги Мүн уур амьсгалын өөрчлөлтөөс улбаалсан олон улс, бүс нутаг дахь сорилтуудыг хөндөж, Зүүн хойд Азийн Цэвэр агаарын түншлэл (NEACAP), өөрийн тэргүүлдэг Даян дэлхийн ногоон хөгжлийн байгууллага (GGGI) зэрэг механизмуудын хүрээнд Монгол Улстай агаарын бохирдлыг бууруулах, ногоон хөгжлийг дэмжих чиглэлээр хамтран ажиллах боломжтойг тэмдэглэлээ.

Талууд бүс нутгийн агаарын чанарыг сайжруулах, эрчим хүчний хүртээмжийг нэмэгдүүлэх арга замын талаар дэлгэрэнгүй санал солилцсон юм.

Монгол Улсын Засгийн газрын ээлжит хуралдаан яг одоо болж байна. Хуралдаанаар Зарим газар нутгийг улсын тусгай хамгаалалтад авах тухай, Хөвсгөл нуур орчмын бүсийг “Эко аялал жуулчлалын бүс” болгон хөгжүүлэх талаар дэд бүтэц, ус, хөрс, орчны бохирдлоос хамгаалах болон Биеийн тамир, спортыг хөгжүүлэх үндэсний хөтөлбөр батлах тухай зэрэг нийт 24 асуудал хэлэлцэнэ.

Байгаль орчин, аялал жуулчлалын сайд Н.Цэрэнбат Азийн төлөөх Боао форумын дарга, НҮБ-ын 8 дахь Ерөнхий нарийн бичгийн дарга Бан Ги Мүн тэргүүтэй төлөөлөгчдийг хүлээн авч уулзав.

Ноён Бан Ги Мүн бүс нутгийн төдийгүй дэлхий дахины хэмжээнд байгаль, орчны асуудлуудыг түлхүү анхаарч ажиллах нь чухлыг тэмдэглээд энэ жилд бүс нутгийн хэмжээнд зохион байгуулагдах томоохон хурлуудын талаар танилцуулан Монгол Улсыг идэвхитэй оролцон хамтран ажиллана гэдэгт итгэлтэй байгаагаа уулзалтын эхэнд тэмдэглэн хэлэв.

Сайд Н.Цэрэнбат Монгол Улсын уур амьсгалын өөрчлөлтийн чиглэлээр авч хэрэгжүүлж буй арга хэмжээний талаар танилцуулан ноён Бан Ги Мүний дурдсанчлан байгаль, орчныг хамгаалах асуудал нь салбар дундын зохицуулалтаас гадна олон улсын хамтын ажиллагааны хүрээнд нэгдэн шийдвэрлэх шаардлагатай гэсэнтэй санал нэгтэй байгаагаа онцлов. Улмаар уур амьсгалын өөрчлөлт, байгалийн гамшигт үзэгдэлээс үүдэлтэйгээр дотоодын шилжилт хөдөлгөөн нэмэгдэн, хүн ардын амьжиргаа төдийгүй эрүүл мэнд, нийгмийн асуудлуудад нөлөөлөөд буй агаарын бохирдлыг бууруулах хүрээнд хэрэгжүүлж буй олон шатны үйл ажиллагааны талаар танилцуулга хийн санал солилцов.

“Ногоон паспорт” аяныг дэмжин ажиллахаа илэрхийлэв

Түүнчлэн уулзалтын үеэр Байгаль орчин, аялал жуулчлалын яамны санаачилгаар хэрэгжиж буй хүүхэд залуучуудад байгаль орчныг хамгаалах, зохистой хэрэглээг дэмжих зорилготой “Ногоон паспорт” аяны явцын талаар ярилцаад БОАЖ-ын сайд Н.Цэрэнбат энэхүү санаачлагад нэгдэн ажиллахыг хүссэн бөгөөд ноён Бан Ги Мүн төслийг сайшаан ирээдүй болсон хүүхэд залуучуудыг уриалах ажлыг дэмжин ажиллахаа илэрхийллээ.

Талууд дэд бүс болон бүс нутгийн хамтын ажиллагааны бусад санал, санаачилгын асуудлуудаар санал солилцоод цаашид уур амьсгалын өөрчлөлт, агаарын бохирдолоор төдийгүй холбогдох чиглэлүүдээр хамтын ажиллагаагаа өргөжүүлэх, эрчимжүүлэх нь чухал болохыг хэлэлцэв.

Засгийн газрын ээлжит хуралдаан болж байна. Хуралдаанаар хэлэлцэн шийдвэрлэсэн асуудлын талаар БОАЖ-ын сайд Н.Цэрэнбат мэдээлэл хийлээ. Тэрбээр:

-Засгийн газрын өнөөдрийн хуралдаанаар Зарим газруудыг улсын тусгай хамгаалалтад авах, хилийн зааг өөрчлөлт оруулах тухай тогтоолын төсөл боловсруулж УИХ-д өргөн мэдүүлэхээр боллоо. Ингэснээр Онон, Балжийн байгалийн цогцолборт газрын хилийн заагт Хэнтий аймгийн Дадал, Биндэр сумын зарим хэсгийг, Байгалийн нөөц газрын хилийн заагт Увс аймгийн Ховд, Хөхмөрөн сум, Баян-Өлгий аймгийн Ногооннуур сумын заагт орших Ачит нуурыг хамруулан өргөтгөж байгалийн цогцолборт газрын ангиллаар, Хэнтий аймгийн Батширээт, Биндэр сумын нутагт орших Гутайн даваа мөн байгалийн цогцолборт газрын ангиллаар, Баянхонгор аймгийн Галуут сумын нутаг оршин Хан уул орчмын газрыг Хангайн нурууны орчмын өргөтгөлөөр тус тус улсын тусгай хамгаалалтад авлаа. Ингэснээр 6 аймгийн нутаг дэвсгэрийг хамарсан улсын тусгай хамгаалалтад авч байгаа газрын хэмжээ 1.2 сая га гаруй, нийт газар нутгийн 0.83 хувиар нэмэгдэж байна.

Мөн Хөвсгөл нуурын орчмыг эко аялал жуучлалын бүс болгон зарлалаа. Ингэснээр Хөвсгөл нуурын эрэг орчим цаашид газар олгогдохгүй. Тухайн бүс нутгий хөгжүүлэх үүднээс тогтоол батлагдсан.

Түүнчлэн байгал орчинд хууль бус үйл ажиллагаа явуулсан 19 аж ахуйн нэгжийн 23 тусгай зөвшөөрлийг цуцлах шийдвэр гаргалаа хэмээв. БОАЖ-ын сайд Н.Цэрэнбат мэдээлэл хийснийхээ дараа сэтгүүлчдийн асуултад хариулсан юм.