Month: July 2019

Улаанбаатар хотын гүний усны нөөц 330 мянган м3/хоног байдгаас ашиглах боломжит нөөц нь 253.7 мянган м3/хоног юм. Нийслэл хотын хүн амын өсөлт, ашиглалтаас үүдэн гүний усны нөөцийг хамгаалах, хэрэглээг бууруулах шаардлага жилээс жилд нэмэгдэж байна. Ундны уснаас бусад хэрэглээнд гадаргын ус, цэвэршүүлсэн усыг ашиглах, усны зарцуулалт багатай техник технологийг нэвтрүүлэх замаар дээрх асуудлыг шийдвэрлэх боломжтой юм.

Улаанбаатар хотын усны үйлчилгээний тариф машин угаалгын газруудад литр тутамд 1.5 төгрөг байгаа бол бохир усны үйлчилгээний тариф м.куб тутамд 1700 төгрөг байна.

Нийслэлийн Байгаль орчны газраас нийслэлийн нутаг дэвсгэрт үйл ажиллагаа явуулж буй 90 гаруй авто угаалгын газруудын захирал, менежерүүдэд зориулсан авто угаалгын газруудад “Дахин ашиглах цэвэрлэсэн ус, техникийн ерөнхий шаардлага” MNS6734:2018 стандартыг нэвтрүүлэх, стандарт нэвтрүүлсэн газруудын туршлага хуваалцах уулзалт сургалтыг БОАЖЯ, Цэнгэг усны нөөц, байгаль хамгаалах төвтэй хамтран зохион байгууллаа.

2018 онд Улаанбаатар хотын хэмжээнд үйл ажиллагаа явуулж буй 170 авто угаалгын газрын захирал, менежерүүдэд зориулсан практик сургалтыг дэвшилтэт технологи бүхий хоёр угаалгын газрын материаллаг баазад тулгуурлан зохион байгуулж байсан ба сургалтын дараа угаалгын газруудад ус хэмнэх, дахин цэвэршүүлж ашиглах, технологийн шинэчлэл хийх зөвлөмж өгч, хэрэгжүүлэхэд нь дэмжлэг үзүүлэх үе шаттай арга хэмжээг нийслэлийн Байгаль орчны газраас авч хэрэгжүүлж байна.. Нэг автомашин угаахад дунджаар 40-50 литр цэвэр ус ашигладаг бөгөөд Улаанбаатар хотын замын хөдөлгөөнд оролцож байгаа 400 мянга /2017 оны байдлаар/ гаруй суудлын автомашиныг нэг удаа угаахад 1.6 сая литр цэвэр ус ашиглах тооцоо гарч байна. Газрын гүний цэвэр усыг ихээр ашиглаж байгаа энэ байдлыг өөрчлөхөд дээрх шаардлагын зорилго оршиж байгаа юм. Бохир усыг бохирдолтын төрөл, хэмжээнээс нь хамааран цэвэршүүлэх олон төрлийн аргыг хэрэглэдэг бөгөөд нанотехнологийн болон электрокоагуляцийн аргыг түлхүү ашиглаж байна. Өнөөдрийн байдлаар Улаанбаатар хотын усны үйлчилгээний тариф машин угаалгын газруудад литр тутамд 1.5 төгрөг байгаа бол бохир усны үйлчилгээний тариф м.куб тутамд 1700 төгрөг байна. Цаашид бохир усны үйлчилгээний тарифыг шатлан өсгөх, стандартаас давсан бохир ус төвлөрсөн шугам, хүрээлэн буй орчинд нийлүүлсэн тохиолдлыг олж илрүүлэх чадавхийг бэхжүүлэх, хариуцлагыг тухай бүр тооцож, таслан зогсоож байх шаардлагатай байна гэж Нийслэлийн Байгаль орчны газраас мэдээлэв.

“Далай ээж” олон улсын эко соёлын аяны талаар зохион байгуулагчдын зүгээс өнөөдөр мэдээлэл хийлээ. Энэхүү аяныг ЮНЕСКО-д Хөвсгөл нуурыг бүртгүүлэх зорилгоор “Хөвсгөл далайн эзэд хөдөлгөөн”, “Түгээмэл эрх хөгжил”, “Дөрөв дэх өнцөг”, “Захиргааны шинэ санаачилга” ТББ-ууд хамтран санаачилжээ. Олон улсын эко соёлын аян энэ сарын 5-18-ны хооронд Улаанбаатар хот, Орхон аймаг, Хөвсгөл аймгийн Мөрөн, Хатгал суманд болно. Энэ үеэр дэлхийн өнцөг булан бүрт амьдарч буй найман орны зураач, дуучин, хөгжимчин, байгаль хамгаалагч идэвхтэн, хуульч зэрэг 50 хүний бүрэлдэхүүнтэй баг Хөвсгөл нуурын төлөө сэтгэлээ нэгтгэн цугларах аж.

ХӨВСГӨЛ НУУР ДЭЛХИЙН БАЙГАЛИЙН ӨВ БОЛОХ ГУРВАН ШАЛГУУР ҮЗҮҮЛЭЛТИЙГ ХАНГАЖ БАЙГАА

“Аянаар дамжуулан Хөвсгөл нуурыг олон улсад таниулан алдаршуулах зорилготой юм. Далай ээж дэлхийн өв болсноор байгалийн болон соёлын аялал жуулчлалыг хөгжүүлэх маш том боломж. Өнөөдөр дэлхийд цэвэр усны хомстол тулгамдаж буй асуудал болсныг та бүхэн мэднэ. Цэвэр усгүйгээс болж дэлхийд өдөрт 4,500 хүүхэд нас барж байна. Манай улс ч мөн адил цэвэр усны хангалттай нөөцтэй орон ч биш. Харин Хөвсгөл нуурын нийт усны эзлэхүүн 381 км куб байдаг нь дэлхийн нийт цэнгэг усны 0.4 хувьтай тэнцдэг.

Гэхдуу нуурын усанд асуудал үүсэж эхэлсэн. Хэрэв асуудал үүсээгүй бол энэхүү санаачилга гарахгүй байсан байх. Өөрөөр хэлбэл, манай улсын хамгийн их цэнгэг усны нөөцтэй нуур учраас бид хайрлан хамгаалж, одоогийн байдлаас нь дордуулахгүй байхад анхаарах хэрэгтэй байна.

ЮНЕСКО-гийн Дэлхийн байгалийн өв болоход тухайн байгалийн өв нь хосгүй, нөхөгдөшгүй, унаган байдлаа хадгалсан байх гурван шалгуур үзүүлэлт байдаг. Тэгвэл Хөвсгөл нуур нь энэ гурван шалгуур үзүүлэлтийг хангаж байгаа учраас бид дэлхийн өв болгохыг зорьсон” гэдгийг тус аяныг зохион байгуулагчдын нэг ”Хөвсгөл далайн эзэд” ТББ-ын тэргүүн Б.Баярмаа онцоллоо.

Аяны хүрээнд “Далай ээж”-ийн хүрээлэн буй орчны хог хаягдал, ариун цэврийн байгууламжаас шалтгаалсан орчны бохирдол, загас агнуур, худалдааны загасчлал, усан завь, моторт дугуй ихэссэнээс үүдсэн зорчигчдын аюулгүй байдал болон цэнгэг усанд нөлөөлж буй аюул, эрсдэл зэрэг асуудлыг олон нийт, шийдвэр гаргагчдын анхааралд хүргэх нь дараагийн зорилго нь байна. Түүнчлэн эрдэм шинжилгээний бага хурал, урлаг соёлын концерт, шоу тоглолт, уран зургийн дуудлага худалдаа, гудамжны дүрслэх урлагийн бүтээл урлах, Хөвсгөл нуурыг ЮНЕСКО-гийн Дэлхийн байгалийн өвд бүртгүүлэхийг дэмжсэн гарын үсэг цуглуулах зэрэг олон арга хэмжээ зохион байгуулахаар төлөвлөжээ. Тухайлбал, олон улсын уран бүтээлчдийн хамтарсан тоглолтыг энэ сарын 09-нд 20:00 цагт “On and Off” продакшны байранд зохион байгуулах аж. Иймээс Хөвсгөл нуурыг дэлхийн байгалийн өв болгох аянд нэгдэхийг зохион байгуулагчдын зүгээс нийт Монголчууддаа уриаллаа.

Зэвсэгт хүчний дугаар ангиас өнгөрсөн хугацаанд их хэмжээний байлдааны сум, галт хэрэглэл алдагдан шүүх хяналтын байгууллага хэргийг шалгаж байна. Тэгвэл энэхүү хэрэгтэй холбоотойгоор Зэвсэгт хүчний 311, 345-р ангийн захирагчаар тухайн үед ажиллаж байсан бригадын генерал Л.Гансэлэмийг 2019 оны долдугаар сарын 5-ны өдрийн ЗХЖШ-ын даргын зөвлөлийн хурлаар албан тушаалаас нь чөлөөлөх шийдвэрийг гаргалаа. Түүнчлэн дахин галт хэрэглэл, цэргийн анги салбаруудаас алдагдсан тохиолдолд тухайн ангийн захирагчийг албан тушаалаас нь чөлөөлөх заалтыг тушаалд оруулахаар болсон талаар Зэвсэгт хүчний жанжин штабаас мэдээллээ.

Туульч, хуурч, хөөмийч Эрдэнэцогтын Баатаржавт Монгол Улсын Соёлын элчийн гэрчилгээг Гадаад харилцааны Дэд сайд Б.Батцэцэг өнөөдөр гардуулан өглөө. Туульч Э.Баатаржав нь Монголын соёлын өвийг өвлөн тээгч бөгөөд 1995 оноос “Шанхайн эртний Ази”, “Хоолойн дуу хөөмийн олон улсын наадам”, “Бад Эзинерийн фестиваль” зэрэг олон улсын наадамд амжилттай оролцож ирсэн. Мөн АНУ-ын Веслианы их сургууль, Стэнфорд, Харвардын их сургууль зэрэг томоохон их сургуулиудад хөөмий, цуурын урлагийн талаар лекц уншиж, Монголын өв соёлыг сурталчлан таниулах, цаашлаад ЮНЕСКО-ийн соёлын өвд язгуур өвийн талаас баримтжуулан бүртгүүлэх үйл ажиллагаанд үнэтэй хувь нэмрээ оруулсан уран бүтээлч юм.

Нийслэлийн Засаг дарга бөгөөд Улаанбаатар хотын Захирагч С.Амарсайхан өчигдөр /2019.07.04/ Гачууртын уулзвараас Налайх-Чойрын уулзвар хүртэлх 20.9 км авто замыг шинэчлэн засах ажлын явцтай танилцаж, холбогдох албан тушаалтнуудад үүрэг чиглэл өглөө. Нийслэлийн Авто замын хөгжлийн газрын дарга Ж.Тогтохбаяр “Нийт 20.9 км авто замын далангийн ажил одоогоор 60 хувьтай, шинэчлэл, өргөтгөлийн ажил 25 хувийн гүйцэтгэлтэй байна. 37 хоолой хийхээс 15 нь бэлэн болсон. Хоолойны ажлууд төлөвлөсөн графикийн дагуу явж байна. Ойрын үед бороо хур ихтэй уулархаг газар үер их бууж байгаа учраас ганц, хоёр өдөр хүлээх асуудал гарч байна. Цаашдаа бороо хур гайгүй байвал алдсан хугацаагаа нөхөөд хугацаандаа ажлаа дуусгах бүрэн боломжтой” гэж ярьсан юм. Нийслэлийн Засаг дарга бөгөөд Улаанбаатар хотын Захирагч С.Амарсайхан “Замын ажлыг төлөвлөсөн хугацаанд хурдан шуурхай, чанартай хийж гүйцэтгэх шаардлагатай. Ямар нэгэн шалтгаанаар ажил зогсох ёсгүй. Мөн аюулгүй байдлыг хангаж, ажлын гүйцэтгэлд хяналт тавьж ажилла” гэдгийг онцолж хэлэв. Энэ зам нь хоёр эгнээ байсныг дөрвөн эгнээ болгон өргөтгөн шинэчилж байна. Замыг дөрвөн эгнээ болгон өргөтгөн шинэчилснээр алслагдсан дүүргийг нийслэлтэй холбох, Монгол Улсын төвийн бүсийн авто замын сүлжээг өргөтгөж, замын хөдөлгөөний нэвтрүүлэх чадвар, аюулгүй байдлыг нэмэгдүүлэх, авто замын түгжрэл, агаарын бохирдлыг бууруулах, зорчигч тээврийн аюулгүй, тав тухтай зорчих нөхцөлийг хангах зэрэг олон талын давуу тал бий болох юм.

Хэвлэлийн хүрээлэнгээс Монголын хэвлэл мэдээллийн салбарын статистик мэдээлэл бүхий “Монголын хэвлэл мэдээлэл – Өнөөдөр” 2019 оны тайланг хэвлэн нийтэлж, салбарын хөгжлийн чиг хандлагын талаар мэдээлэл хийлээ.

Судалгааны мэдээллээс харахад сүүлийн таван жилд уламжлалт хэвлэл мэдээллийн хэрэгслийн тоо жил бүр буурч байсан бол 2018 онд өмнөх оноос 14-өөр өсчээ. Цаасан сонины борлуулалтын тоо өмнө жилээс 3 хувиар өссөн бол сэтгүүлийн тоо өссөн ч борлуулалт 7 орчим хувиар буурсан байна. Радиогийн долоо хоногийн нэвтрүүлгийн дундаж цаг хорин цагаар, телевизийнх хоёр цагаар тус тус багасчээ.

Мэдээллийн сайтын тоо өнгөрсөн жилтэй харьцуулахад 9-өөр нэмэгдэж 2019 оны эхний байдлаар 109 мэдээллийн сайт тогтмол ажиллаж байна. Уламжлалт мэдээллийн хэрэгсэл буюу сонин, сэтгүүл, радио, телевиз цахим аргаар агуулгаа цацах, сурталчлах, захиалга авах зэрэг нь эрчимжиж байна. Үүнд ялангуяа фэйсбүүк чухал үүрэг гүйцэтгэж байна. Тухайлбал уламжлалт хэвлэл мэдээллийн хэрэгслийн 50 гаруй хувь өөрийн албан ёсны фэйсбүүк хуудсыг ажиллуулж, мэдээллээ түгээн, сурталчилж, хэрэглэгчидтэй шууд харьцаж байна.

Хэвлэл мэдээллийн салбарт 4700 орчим хүн ажиллаж буйн тал хувийг сэтгүүлч, редактор эзэлж байна. Хэвлэл мэдээллийн байгууллагад ажиллагсдын 50 гаруй хувь нь телевизийн салбарт ажиллаж байна. Орон нутагт сэтгүүл, сонин хоёрын тоо тус бүр нэгээр буурсан үзүүлэлттэй гарчээ. Орон нутгийн сонины борлуулалт нийт сонины борлуулалтын 9 хувийг эзэлж байсан бол энэ нь өнгөрсөн жилийнхээс 3,6 хувиар өсчээ.

Н.ЭНХЖИН

Тулгар төр байгуулагдсаны 2228 жил, Ардын хувьсгалын 98 жилийн ой, Үндэсний их баяр наадмын тасалбарыг нийслэлийн Нэгдсэн үйлчилгээний төвүүд буюу “Дүнжингарав”, “Драгон”, “Мишээл”, “Оргил” гэсэн дөрвөн цэгээр худалдан борлуулна. Наадмын тасалбарыг долоодугаар сарын 8-9-ний өдрүүдэд борлуулна. Ард иргэдэд 6000 тасалбар худалдан борлуулах бол жуулчдад 3000 тасалбар олгоно. Үндэсний их баяр наадмын нээлт, хаалт болон үндэсний бөхийн барилдааны багц тасалбарын үнэ урьд жилүүдийнхтэй адил буюу 16 000, 24 000 гэсэн хоёр янз байх юм. Өнгөрсөн жил жуулчдад 2500 тасалбар худалдан борлуулсан бол өнөө жил 500-гаар нэмэгдүүлж, 3000 тасалбар борлуулахаар төлөвлөөд байна. Автомашины зөвшөөрлийг мөн адил долоодугаар сарын 8-9-нд нийслэлийн Нэгдсэн үйлчилгээний төвүүд буюу “Дүнжингарав”, “Драгон”, “Мишээл”, “Оргил” гэсэн дөрвөн цэгээр худалдан борлуулах бөгөөд үнэ нь 10 000 төгрөг байна.