Month: July 2019

Үндэсний их баяр наадам, Ардын хувьсгалын 98 жилийн ойг тохиолдуулан Монгол Улсын Ерөнхийлөгчийн зарлигаар Хөвсгөл аймгийн Онцгой байдлын газрын Эрэн хайх, аврах салбарын бүлгийн дарга, ахлах дэслэгч Х.Мөнхбат “Үйлчилгээний гавьяат ажилтан цол”-оор шагнууллаа.

Шагналыг өнөөдөр Монгол Улсын Ерөнхийлөгч Х.Баттулга төрийн ордны Есөн хөлт, цагаан тугт танхимд гардуулан өгсөн юм.

Ахлах дэслэгч Х.Мөнхбат Онцгой байдлын байгууллагаас төрөн гарсан долоо дахь гавьяат буюу энгийн аврагчаас төрсөн хоёр дахь залуу гавьяат болж байна.

Тэрбээр Онцгой байдлын байгууллагад 11 дэх жилдээ ажиллаж байгаа бөгөөд энэ хугацаанд 182 иргэний амь нас, ард иргэд, аж ахуйн нэгж, байгууллагын 950.0 сая төгрөгийн эд хөрөнгийг авран хамгаалжээ.

Түүнчлэн “НИК Петровис” компанийн шатахуун тээвэрлэгч хоёр автомашин Хөвсгөл нуурын мөсөн дээгүүр тээвэр хийж яваад нуурын мөс цөмөрч осолдсон дуудлагаар 35-45 градусын хүйтэнд 47 м-ийн гүнд гурван хоног нийт 9 удаагийн шумбалт хийж, 1 хүний цогцсыг гаргасан бол хоёр автомашиныг Хөвсгөл нууранд шатахуун асгалгүйгээр татан гаргах ажиллагааг амжилттай гүйцэтгэхэд оролцсон юм.

Мөн хүчтэй цасан шуурганаар Хатгал тосгоноос 9 км-ийн зайтай “Модот булан” гэдэг газраас Хатгал тосгоны чиглэлд явж байгаад Хөвсгөл нууран дээр төөрсөн 13 автомашинтай 45 иргэнийг, нуурын мөсөн дээр баримжаагаа алдан төөрч явсан явган 8 иргэний амь насыг авран хамгаалсан зэрэг аврах ажиллагаануудад амжилттай үүрэг гүйцэтгэн ажиллаж байна гэж Онцгой байдлын ерөнхий газраас мэдээллээ.

Улсын нэгдүгээр төв эмнэлгийн Ерөнхий захирлыг үүргийг түр орлон гүйцэтгэгч Д.Чулуунбаатарыг долдугаар сарын 5-ны өдөр үүрэгт ажлаас нь чөлөөлж, нөхөн томилгоог хийжээ. Тодруулбал, Улсын нэгдүгээр төв эмнэлгийн Ерөнхий захирлаар Гэмтэл согог судлалын үндэсний төвийн захирал Т.Мөнхсайхан томилогдсон байна.

Тэрбээр анагаах ухааны магистр, клиникийн профессор бөгөөд 2006-2016 он хүртэл ГССҮТ-д Их эмч, Үений дурангийн Нийгэмлэгийн захирал, Монголын түлэнхийн сангийн тэргүүлэгч, Олон улсын үе судлалын нийгэмлэгийн тэргүүлэгч, гишүүн зэрэг үүргийг хавсран гүйцэтгэж байжээ.

Хууль зүйн сайд Ц.Нямдоржийг сайдын суудлаасаа огцрохыг шаардсан иргэд”Мэнгэтэй жагсаал” хийж байна.

Мэнгэтэй жагсагчид хуульзүйн яамны гадна талбайд эсэргүүцлээ илэрхийлж байгаа юм.

Хан-Уул дүүргийн иргэдийн хурлын төлөөлөгч С.Сарангуа “Хууль зүйн яамны сайд Ц.Нямдорж над дээр нэг хэрэг үүсгэчихсэн явж байгаа гэнэ. Тэр хэргээр намайг Зөрчлийн тухай хууль зөрчсөн гээд өөрийнхөө байгуулсан 409 гэнэ үү, шорондоо хийх юм байх. Би Захиргааны хэргийн шүүхэд хандаад өнгөрсөн долоо хоногт яллаа. Учир нь Монгол Улсын иргэн Үндсэн хуулиар олгосон эрхийнхээ дагуу жагсаж, үзэл бодлоо илэрхийлсэн юм байна. Захиргааны байгууллага, Ц.Нямдорж ба түүний нөхөд, Чингэлтэй дүүргийн Засаг дарга энэ эмэгтэйн эрхийг зөрчсөн байна” гэдэг шийдвэрийг гаргасан. Тийм учраас энэ хүмүүс над дээр үүсгэсэн хэргээ татгалзаад хаахаас өөр арга байхгүй. Монголын ард түмэн энэ хүнд доромжлуулж явдаг цаг өнгөрсөн. Танихгүй хүн хүртэл Ц.Нямдоржийн эсрэг дугарахаас айдаг юм байна. Зарим нь “Чамд хилс хэрэг үүрүүлж байгаад шоронд хийнэ шүү” гэж хүртэл хэлж байна. Харин эсрэгээрээ эд нар биднээс айж явах ёстой. Хууль зүйн сайд Ц.Нямдорж надаас айж байна. Энэ хүн олон хоног элдвээрээ хэлүүлчихээд яагаад гарч ирээд тайлбар хэлэхгүй байгаа юм. Чадахгүй байхгүй юу. Монголын ард түмэндээ хандаж хэлэхэд Ц.Нямдоржоос айгаад байхаар хүн биш юм байна. Бид шударга үнэнээр амьдарч байгаа учраас биднээс айж явах ёстой гэдгийг дахин хэлье” гэсэн юм. Эсэргүүцлийн жагсаалыг зохион байгуулагчид өнөөдөр албан ёсоор шүүхээс эрхээ аваад, Хууль зүйн сайд Ц.Нямдоржийг огцруулах жагсаал цуглаанаа үргэлжлүүлж байна гэдгийг хэлсэн юм. Жагсаалд оролцогчдын ихэнх нь эмэгтэйчүүд байлаа. Тэд цаашдаа ч сайдын суудлаасаа огцрох хүртэл эсэргүүцлээ илэрхийлнэ хэмээн хэллээ.

Хөвсгөл аймгийн Алаг-Эрдэнэ сумын Эрхэлийн хөндий Эрдэнэхайрханы өвөрт байрлах 50:100 “Энергийн төв” нээлтээ хийлээ.

Дэлхийн бөмбөрцгийн хойд өргөргийн 50 градус, зүүн уртрагийн 100 градусын огтлолцлын цэг болох тус газарт энерги байна гэдгийг анх Монгол-Японы эрдэмтэд тогтоосон байдаг. Дэлхий дээр 50, 100 градусын огтлолцол таарсан дөрвөн цэг байдаг. Үүний хоёр нь Атлантын далайд, нэг нь Канад улсын хурдны зам дээр таардаг. Эдгээр огтлолцлын цэгүүд дээр хүн саатах боломжгүй бөгөөд дөрөв дэх цэг буюу Хөвсгөл аймгийн Алаг-Эрдэнэ сумд байрлах энэ огтлолцлын цэг дээр хүмүүс ирж үзэх боломжтой, тэр цэг дээр зогсох боломжтой гэдгээрээ давуу талтай юм.

Энэхүү энергийн төв нь Хөвсгөл аймгийн Алаг-Эрдэнэ сумын нутагт Мөрөн хотоос 30 км зайд Эрхэл нуураас хойш байрлаж байна.

Үндэсний их баяр наадмын замын хөдөлгөөний зохицуулалтын талаар Тээврийн цагдаагийн албаны Урьдчилан сэргийлэх хэлтсийн дарга, цагдаагийн хурандаа Э.Бөхбат мэдээлэл өглөө. Тэрбээр “Үндэсний баяр наадмын үеэр төв цэнгэлдэх орчимд 2,500 тээврийн хэрэгслийн зогсоол бэлэн болсон бол Хүй долоон худагт 7,500, нөөцөд 6,000 орчим тээврийн хэрэгслийн зогсоол бэлэн болоод байна. Иргэд авто машины зөвшөөрлийн ард байгаа явах маршрутыг анхаарах хэрэгтэй. Мөн уулзварууд дээр цагдаагийн алба хаагчид ялгалт хийдэг. Уулзварууд дээр байршуулсан чигийн заалт тэмдэгүүдийн дагуу цагдаагийн албан хаагчийн ажилд хүндрэл учруулахгүй явах боломж жолооч нарт бий. Төв цэнгэлдэх орчимд зогсоолын хүрэлцээ муу учир жолооч нар Мишээл экспо, Дүнжингарав худалдааны төвийн зогсоолд машинаа тавиад, гурван минут тутамд үнэ төлбөргүй явж байгаа нийтийн тээврийн автобусаар стадионд очих боломжтой. Удаан хугацаанд түгжирч, хугацаа алдалгүйгээр авто машинаа тавиад нийтийн тээврийн автобус сонгохыг наадамчиддаа зөвлөж байна.

Соёолон насны морьд гарах өглөө Улаанбаатараас Хүй долоон худаг руу нэг чигийн хөдөлгөөнд оруулна. Харин соёолон насны морьдын уралдаан дуусахад Хүй долоон худагаас Улаанбаатар хот руу нэг чигийн хөдөлгөөнд оруулна. Мөн хотод хөдөлгөөний зохицуулалт олон хийгдэхээр байгаа. Энэ талаар цагдаагийн байгууллага хэвлэл мэдээллийн хэрэгслүүдээр дамжуулан тогтмол мэдээлэл өгөх болно. Тиймээс иргэд хэвлэл мэдээллийн хэрэгслүүдийг анхаарч, замаа сонгох хэрэгтэй байна.

Өнгөрсөн жил баяр наадмын өдрүүдээр 423 зам тээврийн осол бүртгэгдсэнээс 390 хүн бэртэж гэмтэж, 16 хүн нас барсан. Нас барсан 16 хүний 13 нь орон нутгийн замд хурд хэтрүүлсэн, согтууруулах ундааны зүйл хэрэглэсэн шалтгааны улмаас нас барсан. Тиймээс замын хөдөлгөөний дүрмээ баримталж, соёлтой оролцохыг уриалж байна” гэв.

НОБГ-ын Чингэлтэй дүүргийн Онцгой байдлын хэлтсээс Гамшгаас хамгаалах сайн дурын хэсэгтэй хамтран “Үерийн аюултай үед хорооны гамшгаас хамгаалах албаны харилцан ажиллагааг зохион байгуулах нь” сэдэвт дадлага сургуулийг зохион байгууллаа. Дадлага сургуульд Гал түймэр унтраах, аврах 10 дугаар анги, 7 дугаар хорооны ажлын алба болон 1-16 дугаар хэсгийн гамшгаас хамгаалах сайн дурын бүлгийн нийт 110 гаруй ажилтан, алба хаагч, 5 автомашин, техник хэрэгсэлтэйгээр оролцсон юм. Энэ үеэр 7 дугаар хорооны 10, 11 дүгээр хэсгийн үерт өртөж болзошгүй айл, өрхүүдийн судалгааг гарган, анхааруулга зөвлөгөө өгч, гамшгаас хамгаалах сайн дурын бүлэг, иргэдийн үер, уснаас урьдчилан сэргийлэх мэдлэг, мэдээллийг дээшлүүллээ гэж НОБГ-ын Чингэлтэй дүүргийн Онцгой байдлын хэлтсээс мэдээллээ.