Month: July 2019

Өчигдрийн байдлаар Төв цэнгэлдэх орчимд 24 хүүхэд төөрчээ. Тиймээс бага насны хүүхдэд тавих анхаарал халамжаа сайжруулахыг цагдаагийн байгууллагаас анхааруулж байна. Хүй долоо худагт цагдаа, дотоодын цэргийн байгууллагаас 1400 гаруй алба хаагч гэмт хэргээс урьдчилан сэргийлэх, таслан зогсоох, нийтийн хэв журам хамгаалах, олон нийтийн аюулгүй байдлыг хангах зорилгоор ажиллаж байгаа. Тэд худалдаа үйлчилгээ эрхлэж байгаа иргэн, аж ахуй нэгжэд гэмт хэргээс урьдчилан сэргийлэх чиглэлээр анхааруулга зөвлөмжийг өгч, бага насны хүүхдийг төөрөхөөс сэргийлж эцэг, эхийн утасны дугаартай бугуйвчийг тараан, гадаадын иргэдэд гэмт хэрэг, зөрчилд өртөж хохирохоос сэргийлэх зөвлөмж өгч байгаа гэнэ.

Үндэсний их баяр наадмын өдрүүдээр Тээврийн цагдаагийн албаны 640 алба хаагч, Дотоод хэргийн их сургуулийн 70 сонсогч хөдөлгөөн зохицуулалт хийн өндөржүүлсэн бэлэн байдалд ажиллаж байна. 12-ны өдрийн 12 цагийн байдлаар Тээврийн цагдаагийн албаны Жижүүрийн шуурхай удирдлагын хэлтэс нийт 29 дуудлагыг хүлээн авснаас зам тээврийн ослын шинжтэй нэг дуудлага, мэдээллийг хүлээн авч, шалгалтын ажиллагаа явуулжээ. Бүртгэдсэн осол хэргийн улмаас нийслэлд нэг хүн гэмтэж бэртсэн байна. Хүй долоо худагаас хотыг чиглэлтэй замыг нэг чигийн урсгалд оруулан, хөдөлгөөн зохицуулалт хийж ажиллаж байгаа ажээ.Өнгөрсөн шөнө нийслэлийн хэмжээнд согтуугаар тээврийн хэрэгсэл жолоодсон 20 орчим иргэнийг саатуулжээ. Төв цэнгэлдэх хүрээлэнгийн орчим 2500, Хүй долоо худагт 7500 автомашины зогсоол, нөөц 6000 нийт 16000 тээврийн хэрэгсэл зогсох боломжийг бүрдүүлжээ.

Өнөөдөр соёолон морины уралдаан болно. Уралдаан эхлэх үед хүй долоо худгийг чиглэсэн замын ачаалал нэмэгддэг учир цаг үеийн нөхцөл байдалд тохируулж Тээврийн цагдаагийн албанаас хөдөлгөөний урсгалыг нэг чигт оруулахаар боллоо.

Соёолон морьдыг өглөө 08 цагаас шүдэлж эхлэх бөгөөд 09 цаг 30 минутанд гарааны зурхай руу хөдлөх юм байна. Иймд жолооч та бүхэн урсгал сөрөх, хайс хашлага мөргөх, хурд хэтрүүлэх зэрэг зөрчлийг гаргахгүй байхыг анхааруулж байна.

Мөн

• Аль болох ачаалал ихтэй замыг сонгохгүй байх: 7 буудал, зуслан, лагараас хүй 7 худаг зорих иргэд Гүнтийн даваа-61 гарам- хүй 7 худаг, Офицеруудын ордон болон хотын зүүн талаас хүй 7 буудлыг зорих иргэд Баянзүрхийн товчоо-Дүнжингаравын зам буюу уулын зам-Наадамчдын гудамж буюу яармагийн зам-Сонсголонгийн гүүр- товчооны зам гэсэн маршрутаар
• Амгалан-аас Давааны өртөө хүртэл Рейлбусын өглөө 6 цагаас эхлэн аялана
• Жолооч, зорчигчдын аюулгүй байдлыг хангах, хүүхдийг зориулалтын суудалд суулгаж явах
• Зогсоолын зөвшөөрлийн дагуух маршрутаар замын хөдөлгөөнд оролцохыг зөвлөж байна.

Тулгар төрийн 2228, Их Монгол Улсын 813, Ардын хувьсгалын 98 жилийн ойн Үндэсний их баяр наадмын өдрүүдэд Тээврийн цагдаагийн албаны 700 гаруй алба хаагчид болон ХСИС-ийн 70 сонсогч нийслэл болон Хүй долоо худагт Замын хөдөлгөөний аюулгүй байдлыг хангах, зам тээврийн гэмт хэргээс урьдчилан сэргийлэх, хамгаалалт зохион байгуулан ажиллаж байна гэж ТЦА-аас мэдээллээ.

Үндэсний их баяр наадмын өдрүүдэд цагдаагийн байгууллагаас гэмт хэрэг, зөрчил, гомдол, мэдээллийг шуурхай шалгаж шийдвэрлэх, иргэдэд туслах, үйлчлэх зорилгоор байнгын 24 цагийн 3 пост, мөрдөн шалгах болон хөдөлгөөний аюулгүй байдлыг хангах бүлгийг Төв цэнгэлдэх, Хүй долоо худгийн орчимд ажиллуулж байна.

Үүний зэрэгцээ Нийслэлийн Онцгой байдлын газартай хамтран Туулын голын Хар усан тохойгоос Сонсголонгийн гүүр хүртэл голын эрэг дагуу хэв журмын болон завьт эргүүл ажиллаж байгаа юм. 2019 оны зургаадугаар сараас хойш 5 иргэн анхаарал, сонор сэрэмжгүй байдлаас болж амь насаа алдаад байгаа билээ.

Иргэд та бүхэн баяр наадмын өдрүүдэд гол усны аюулаас урьдчилан сэргийлж, бага насны хүүхдээ хараа хяналттай байлгаж, архи согтууруулах ундаа хэтрүүлэн хэрэглэхгүй байхыг цагдаагийн байгууллагаас сэрэмжлүүлж байна.