Month: July 2019

Цэцэг төвийн урд уулзварыг энэ сарын 16-18-ны хооронд хаахаар болжээ.

Тодруулбал, Чингэлтэй дүүргийн 1-р хороо, Цэцэг төвийн уулзварын авто замын хөдөлгөөнийг 2019 оны 07 сарын 16-18-ны өдрийн хооронд хааж, Хууль зүйн яамны захиалгаар “Хурд Групп” ХХК нь дулааны шугамын өргөтгөл, шинэчлэлтийн ажлыг хийж гүйцэтгэнэ.

Иргэд та бүхэн хөдөлгөөний эрчим ихтэй уулзварт ажил гүйцэтгэх хугацаанд бусад замыг сонгон, аюулгүй байдлаа ханган хөдөлгөөнд оролцоно уу.

Эх сурвалж: Нийслэлийн Авто замын хөгжлийн газар

Нийслэл хотын хэмжээнд 2019 оны эхний 6 сард гэмт хэрэг, зөрчлийн шинжтэй нийт 222212 дуудлага, мэдээлэл цагдаагийн байгууллагад бүртгэгдсэн нь өнгөрсөн оны мөн үетэй харьцуулахад 27682 буюу 11.1 хувиар буурлаа. Үүний 32146 буюу 30.4 хувийг хүүхэд, гэр бүлийн хүчирхийллийн шинжтэй дуудлага, мэдээлэл эзэлж байна.

Энэ оны эхний 6 сард Зөрчлийн болон гэр бүл хүчирхийлэлтэй тэмцэх тухай хууль тогтоомж зөрчсөн зөрчил нэг бүрийг шалган шийдвэрлэх ажлыг эрчимжүүлж ажилласны үр дүнд өмнөх оны мөн үетэй харьцуулахад:

• Торгуулийн шийтгэл ногдуулсан хүн 75424 байгаа нь 22465 хүнээр буюу 42,4 хувиар, торгуулийн дүн 3 тэрбум 238 сая төгрөг болж 1 тэрбум 104 сая төгрөгөөр,
• Эрүүлжүүлсэн хүн 36250 байгаа нь 9923 хүнээр буюу 37,6 хувиар,
• Архины албадан эмчилгээнд 363 хүнийг хамруулсан нь 191 хүнээр буюу 2,1 дахин,
• Баривчлах шийтгэлийг 2811 хүнд ногдуулсан нь 1514 хүнээр буюу 2 дахин,

Нийт зөрчил гаргасан 114848 хүнд Зөрчлийн тухай хуулиар хариуцлага тооцсон нь 34093 хүнээр буюу 42,2 хувиар тус тус өссөн байна.

Үүний зэрэгцээ гэмт хэрэг, зөрчлөөс урьдчилан сэргийлэх чиглэлээр 18000 иргэнд ухуулга, нөлөөллийн ажлыг тасралтгүй зохион байгуулсанаар 780 хүн сайн дураараа архинаас татгалзах эмчилгээнд хамрагдсан байна.

Ингэснээр дээрх тооны иргэдийг дахин гэмт хэрэг, зөрчилд өртөж хохирохоос урьдчилан сэргийлж, олон мянган айл өрхийг айдас хүйдэсгүй, амгалан тайван, ая тухтай амьдрах нөхцлийг бүрдүүлж чадсан ажил боллоо.

Үүний үр дүнд нийслэлд нийт гэмт хэрэг 2880 буюу 19.8 хувь, тэр дундаа хүний эрүүл мэндийн халдашгүй байдлын эсрэг гэмт хэрэг 14.5 хувь, хулгайлах гэмт хэрэг 2214 буюу 37.7 хувиар тус тус буурч, гэмт хэргийн илрүүлэлт 8.2 хувиар, зөрчлийн илрүүлэлт 2 дахин өссөн байна.

Мөн улсын хэмжээнд 2018 оны эхний хагас жилд бүртгэгдсэн гэмт хэргийн 72.7 хувь нь нийслэлд үйлдэгдэж байсан бол 2019 оны эхний хагас жилийн байдлаар энэ үзүүлэлт 66.2 хувь болж буурчээ.

Баяр наадмын үйл ажиллагаа болсон цэгүүдэд 2-12 насны нийт 99 хүүхэд төөрснийг эцэг эхэд нь хүлээлгэн өгч ажилласан тухай Цагдаагийн байгууллагаас мэдээллээ.

Тодруулбал, энэ сарын 10-ны Хүй долоон худагт 4 хүүхэд төөрсөн бол энэ сарын 11-нд 24 хүүхэд төөрсөн байна. Харин Төв цэнгэлдэх хүрээлэнд энэ сарын 11-нд 30, энэ сарын 12-нд 10 хүүхэд төөрсөн. Түүнчлэн Сүхбаатарын талбайд болсон “Эх орноо магтан дуулъя” цэнгүүний үеэр 15 хүүхэд төөрснийг эцэг эхэд нь хүлээлгэн өгчээ.

Төөрсөн хүүхдүүдийг явуулын “Хүүхдийн түр хамгаалах байр”-нд байлгаж, хоол, ундаар үйлчилж, тайвшруулах, эцэг, эхчүүдэд зөвлөгөө өгөх, үүнээс урьдчилан сэргийлэх зорилгоор эцэг, эхийн утасны дугаар бүхий бугуйвч тараах, Наадмын зохион байгуулах комисстой хамтран сэрэмжлүүлэг, хэвлэл, мэдээллийн хэрэгслээр зөвлөмж, голын эрэг дагуу амарч зугаалж буй иргэдэд хүүхдийн аюулгүй байдлыг онцгой анхаарч ажиллах талаар мэдээллийг тус тус хүргэжээ.

Баяр наадмын гурван өдрийн байдлаар Хүй долоон худагт мориноос унасан 40 хүүхдэд эмнэлгийн тусламж үзүүлжээ.

Улаанбаатар хотын ус сувгийн удирдах газар нь нийслэл Улаанбаатар хотын нийт хүн амыг унд ахуйн усаар хангаж, гарсан бохир усыг нь татан зайлуулах эрхэм зорилготой ажиллаж байна. Улаанбаатар хотод нийт хүн амын 60 гаруй хувь нь гэр хороололд амьдардаг. Тус хэсэгт цэвэр усыг зөөврөөр болон шугамаар түгээж, 228339 хэрэглэгчдийг унд ахуйн усаар хангаж байна. Үндэсний их баяр наадмаар ажиллах ус түгээх байрны цагийн хуваарийг хүргэж байна.

Сэлэнгэ мөрөн Хялганат сум орчимд усны түвшин 80 см нэмэгдэж, олон жилийн дундаж түвшинг 35 см, Ховд гол, Увс нуур, Хархираа зэрэг голууд 5-20 см нэмэгдэж, үерийн түвшинг даван үерлэж байна. Иймд:

• Голын эрэг дагуу суурьшиж, нутаглаж буй малчид, тариаланчид, аж ахуйн нэгж байгууллага, ард иргэд, аялал зугаалгаар яваа хүмүүс үерийн аюулаас байнга сонор сэрэмжтэй байх,
• Хөдөө орон нутгийг зорих иргэд бэлтгэл бэлэн байдлаа сайн хангаж, замд гарах,
• Гол, мөрөн нуурын ойролцоо амарч зугаалахдаа өндөр сонор сэрэмжтэй байх,
• Гэр бүл найз нөхөд, хамт олноороо амралт зугаалгаар явахдаа нэгдсэн зохион байгуулалттай, нэгнээ бүртгэдэг байх,
• Хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулах, ялангуяа хүүхдүүд янз бүрийн хийлдэг завь, хийлдэг гудастай усанд орж эргээсээ холддог, энэ нь усанд осолдох шалтгаан болж байна.
• Борооны үед гол мөрний усны түвшин нэмэгдэх учраас баталгаатай гүүр, гарам, гарцтай газраар автомашинтай зорчиж үер усны аюул болон усны ослоос урьдчилан сэргийлэхийг анхааруулж байна.

Тулгар төрийн 2228, Их Монгол Улсын 813, Ардын хувьсгалын 98 жилийн ойн Үндэсний их баяр наадмын хүрээнд иргэд, наадамчин олондоо зориулан жанжин Д.Сүхбаатарын талбайд урлагийн томоохон үйл ажиллагаануудыг зохион байгуулдаг билээ. Энэ жилийн Улаанбаатарын үдэш “Эх орноо хамтдаа дуулья” цэнгүүний хоёр өдөр үргэлжиллээ. Цэнгүүнийг нийслэлийн Засаг дарга бөгөөд Улаанбаатар хотын Захирагч С.Амарсайхан нээж, нийслэлийн Засаг даргын Хөгжлийн бодлогын асуудал хариуцсан нэгдүгээр орлогч Ж.Батбаясгалан, НЗДТГ-ын дарга Э.Содномжамц нар оролцов.

Цэнгүүнийг нээж, Хотын Захирагч С.Амарсайхан хэлсэн үгэндээ “Та бүхэнд Үндэсний их баяр наадмын мэндийг өргөн дэвшүүлье. Жил бүрийн энэ үдэш Улаанбаатарын үдэш “Эх орноо хамтдаа дуулья” цэнгүүнийг нийслэл Улаанбаатар хотынхоо төв талбайд зохион байгуулж ирсэн уламжлалтай. Монгол түмний их баяр наадам маань ЮНЕСКО-гийн “Соёлын биет бус өвийн жагсаалт”-д бүртгэгдсэн нь дэлхийн олон улсын жуулчид, судлаачдын сонирхлыг татаж, Монгол наадмыг үзэж сонирхохоор ирдэг жуулчдын тоо жил бүр өссөөр байна. Энэ жилийн цэнгүүний онцлог нь залуучуудын сонсох дуртай олон арван уран бүтээлчид өөрсдийн уран бүтээлийн сороороо хоёр өдрийн турш төв талбайд нийслэлчүүддээ, наадамчин олондоо зориулан тоглох юм. Та бүхэн маань хотол олноороо сайхан наадаарай” хэмээлээ.
Энэ жилийн Улаанбаатарын үдэш “Эх орноо хамтдаа дуулъя” цэнгүүнд Харанга хамтлагийн дуучин Х.Лхагвасүрэн болон рок попын одод, “Яг түүн шиг”, “Voice”, “Авьяаслаг Монголчууд” шоуны шилдэг оролцогчид ая дуугаа өргөж байна. Мөн БНХАУ-ын ӨМӨЗО-ны “Top line” хамтлаг уг цэнгүүнд оролцлоо. Шоу тоглолтын үеэр Сөүл-Улаанбаатар хотууд ах дүүгийн харилцаа тогтоосны 25 жилийн ойн хүрээнд Сөүл хотын зүгээс 100 гэрэлт дроны үзүүлбэрээр бэлэг барисан юм.