Month: July 2019

Гадаад харилцааны дэд сайд Б.Батцэцэг Испанийн Хаант Улсаас Монгол Улсад суугаа Онц бөгөөд Бүрэн эрхт Элчин сайд Рафаел Дескалларыг өнөөдөр хүлээн авч уулзав.

Уулзалтын эхэнд Элчин сайд Р.Дескаллар “Интерном” номын дэлгүүртэй хамтран монгол хэлнээ хөрвүүлсэн “Испанийн өгүүллэг, тууж” номын нээлтэд оролцох гэж буйдаа баяртай байгаагаа илэрхийлэв.

Тэрээр Монгол, Испанийн харилцаа, хамтын ажиллагааг аялал жуулчлал, тогтортой хөгжил, байгаль орчны салбарт өргөжүүлэн хөгжүүлэх, хоёр орны ГХЯ-ны зөвлөлдөх уулзалтыг Мадрид хотноо зохион байгуулах, оюутан залууст испани хэл суралцах боломж бүрдүүлэх зэрэг хийхээр төлөвлөж буй ажлаа танилцуулав.

Дэд сайд Б.Батцэцэг Элчин сайдын дээрх санал, санаачлагыг дэмжин, хоёр орны хамтын ажиллагааг хөгжүүлэхэд хамтран ажиллахаа илэрхийллээ.

ЗТХЯ, БНСУ-ын хөрөнгө оруулалттай “Монгол авто ресаикл парк” ХХК ашиглалтаас хасагдсан тээврийн хэрэгслийг дахин боловсруулах талаар хамтран ажиллах санамж бичиг байгуулав.

Хамтын ажиллагааны дүнд “Монгол авто ресаикл парк” ХХК манай улсад ашиглалтаас хасагдсан тээврийн хэрэгслийг дахин боловсруулах цогц үйлчилгээний төв барих юм. Барилгын ажлыг Улаанбаатар хотын “Налайхын барилгын материалын үйлдвэрлэл, технологийн парк”-д энэ оны 9 дүгээр сараас эхлүүлэн 2020 оны эхний улиралд багтаан дуусгахаар төлөвлөжээ.

Тээврийн хэрэгслийг дахин боловсруулах цогц үйлчилгээний төв нь жилд ашиглалтаас хасагдсан 5000 тээврийн хэрэгслийг цуглуулах, задлах, ангилах, сэргээн ашиглах, дахин боловсруулах, устгах юм. Тус төв ашиглалтад орсноор 50 орчим ажлын байр бий болно.

Манай улсад ашиглалтаас хасагдсан тээврийн хэрэгсэл болон ашиглалтын улмаас үүсч буй хог хаягдлыг устгах, дахин боловсруулах зохицуулалт, үйлдвэрлэл байхгүйн улмаас автомашин, дугуй, аккумулятор, ашиглагдсан тос, масло, хөргөлтийн шингэн гэх мэт хог хаягдал нь агаар, хөрсний бохирдлыг бүрдүүлэгч нэг эх үүсвэр болоод байгаа билээ.

2018 оны байдлаар манай улсад нэг сая орчим тээврийн хэрэгсэл бүртгэлтэйгээс 30 хувь нь 20 ба түүнээс дээш жил болжээ.

Баяр наадмын үеэр цагдаагийн байгууллага өндөржүүлсэн бэлэн байдлын хоёрдугаар зэрэгт шилжин ажилласан. Энэ үеэр гарсан гэмт хэрэг, зөрчлүүдийн талаар цагдаагийн байгууллагаас өнөөдөр мэдээлэл өглөө. “Баяр наадмын өдрүүдэд Төв цэнгэлдэх хүрээлэн болон Хүй долоон худаг орчимд 99 хүүхэд төөрснийг цагдаагийн алба хаагчид олж, эцэг эх асран хамгаалагчид нь хүлээлгэн өгсөн. Согтуугаар тээврийн хэрэгсэл жолоодсон 400 хүнийг саатуулж, гэр бүлийн хүчирхийлэл үйлдсэн 42 иргэнийг баривчилсан. Мөн 54 гэмт хэргийг халуун мөрөөр нь шуурхай илрүүлж ажилласан.

Энэ сарын 9-13-ны өдрүүдэд “Торгоны зам” олон улсын уралдаан Монгол Улсын нутаг дэвсгэрээр дайран өнгөрсөн учраас цагдаагийн байгууллага ачаалалтай ажилласан. Наадмын үеэр ноцтой гэмт хэрэг гараагүй ч зуны амралт үргэлжилж байгаа энэ үед иргэд тэр дундаа хүүхэд усанд осолдох тохиолдол нэмэгдэх хандлагатай байна” хэмээв. Тиймээс иргэддээ аль болох гол, уснаас хол амрах, усны ойролцоо согтууруулах ундаа хэтрүүлэн хэрэглэхгүй байх, бага насны хүүхдээ хараа хяналтгүй гол руу явуулахгүй байхыг анхаарууллаа.

Энэ сарын 09-ний өдөр загасчилж байсан иргэн тогонд цохиулж амиа алдлаа гэсэн дуудлага цагдаагийн байгууллагад иржээ. Улаанбаатар хотын харьяат 39 настай эрэгтэй Б нь Хөвсгөл аймгийн Жаргалант суманд байрлах “Жаргал жигүүр” амралтын газарт амарч, загасчлах үеэрээ тогонд цохиулсан байна. Загасны уургаа дээш өргөн сунгах үед салхи гаран цахилгааны утсанд загасны уурга нь хүрснээр тогонд цохиулж амиа алджээ.

Одоогоор шалгалтын ажиллагаа явагдаж байгаа аж.

БНХАУ-ын Засгийн газрын хөнгөлөлттэй зээлийн хөрөнгөөр хэрэгжиж буй “Туул гол дээгүүрх Баянзүрхийн 321.4 у/м болон Сонсголонгийн 289.4 у/м төмөрбетон гүүрийг шинээр барих” төслийн хүрээнд шинэ гүүрийн хөдөлгөөнийг 2019 оны 07-р сарын 05-ны өдөр нээж ашиглалтад оруулсан.

Үргэлжлүүлэн хуучин гүүрийн хөдөлгөөнийг 2019 оны 07-р сарын 16-ны өдрөөс хааж, засварын ажлыг эхлүүлж, 2 сарын хугацаанд гүйцэтгэж дуусахаар төлөвлөөд байна.

Төслийн ерөнхий гүйцэтгэгч “Бээжин Юни-Констракшн Групп” ХХК, туслан гүйцэтгэгч үндэсний үйлдвэрлэгч “Гангүүр” компаниуд ажиллаж байна

Хүүхдийн Урлан бүтээх төвийн орчимд байх ТҮЦ-нд үл таних этгээд өөрийгөө цагдаагийн албан хаагч хэмээн торгоно гэж сүрдүүлэн 40 000 төгрөг болон хоёр хайрцаг тамхи авсан хэрэг гарчээ. Уг явдлыг Сүхбаатар дүүргийн цагдаагийн I хэлтсийн алба хаагчид шалгахад 25 настай эрэгтэй У гэгч цагдаагийн ажилтны нэр барин дээрх хэргийг үйлдсэн болох нь тогтоогдсон байна. Худалдаа үйлчилгээ эрхэлж байгаа аж ахуйн нэгж байгууллагууд хууль зөрчилгүй үйл ажиллагаагаа явуулж ашиг хонжоо олох гэсэн иргэдийг гэмт үйлдэлд автагдахгүй байж болзошгүй эрсдлээс урьдчилан сэргийлж ажиллахыг анхаарууллаа.

Тогтвортой хөгжлийн асуудлаарх улс төрийн өндөр түвшний чуулга уулзалтын үеэр Монгол Улсаас НҮБ-ын дэргэд суугаа БТГ, НҮБ-ын Ази, Номхон далайн эдийн засаг, нийгмийн комисстой хамтарч “Цаг уурын өөрчлөлттэй тэмцэхэд удирдлага, оролцоог бэхжүүлэх нь” сэдэвт тусгай арга хэмжээг НҮБ-ын төв байранд 7 дугаар сарын 10-нд зохион байгуулав.

Тусгай арга хэмжээг нээж Монгол Улсаас НҮБ-ын дэргэд суугаа Онц бөгөөд Бүрэн эрхт Элчин сайд, Байнгын төлөөлөгч С.Сүхболд хэлсэн үгэндээ байгаль орчны асуудал, тэр дундаа уур амьсгалын өөрчлөлт нь бүх нийтэд томоохон сорилт болж, хөгжингүй болон хөгжиж буй орнууд аль аль нь эл асуудалтай хамтарч тэмцэх шаардлагатайг онцлов.

Уур амьсгалын өөрчлөлт гэх сорилтыг даван туулахад засгийн газар, төрийн бус байгууллага, хувийн хэвшил, иргэний нийгэм гээд бүх нийтийн хамтын хүчин чармайлт нэн чухал гэдгийг онцлоод Монгол Улсад тулгарч буй сорилтууд, түүнийг даван туулахад Монгол Улсын Засгийн газраас авч хэрэгжүүлж буй үндэсний арга хэмжээний талаар танилцуулав.

Тусгай арга хэмжээнд оролцсон НҮБ-ын төрөлжсөн байгууллагууд, НҮБ-ын гишүүн орнуудын төлөөлөгчид байр сууриа илэрхийлж, байгаль орчны асуудал, цаг уурын өөрчлөлттэй тэмцэхэд хэрэгжүүлж буй сайн туршлагуудын танилцуулж, харилцан санал солилцов.