Month: June 2019

Тарваган тахал өвчний эсрэг дархлаажуулалтын 10 хоногийг 2019 оны 7 дугаар сарын 1-10-ны өдрүүдэд улсын хэмжээнд зохион байгуулна. 21 аймгийн Эрүүл мэндийн газар, нийслэлийн есөн дүүргийн эрүүл мэндийн төвд 32,400 хүн тун вакциныг хүргүүллээ. Дархлаажуулалтад заавал хамрагдах шаардлагатай иргэд харьяа аймаг, сум, дүүргийн Эрүүл мэндийн төв, Зоонозын өвчин судлалын төвүүдэд хандана.

Дархлаажуулалтад:

• Тарваган тахлын цэвэр өсгөвөр, халдвартай, халдварын сэжигтэй материал болон туршилтын амьтадтай ажиллагсад;
• Тарваган тахлын голомтот нутагт геологийн хайгуул шинжилгээ, бэлчээр усжуулалт, агнан бэлтгэл эрхэлдэг иргэд;
• Тарваган тахлын голомтот нутагт оршин суугчид, бэлчээрийн мал аж ахуй эрхэлдэг малчид;
• Бүх шатны эрүүл байгууллагын ажиллагсад ялангуяа тарваган тахлын байгалийн идэвхтэй голомтот нутгийн эрүүл мэндийн байгууллагын ажиллагсад;
• Хууль сахиулах болон Онцгой байдлын байгууллагын албан хаагчид хамрагдана гэж Зоонозын өвчин судлалын үндэсний төвөөс мэдээллээ.

Монгол Улсын Үндсэн хуульд оруулах нэмэлт, өөрчлөлтийн төслийг хоёр, гурав дахь хэлэлцүүлэгт бэлтгэх үүрэг бүхий ажлын хэсэг ажиллаж байгаа энэ өдрүүдэд Улсын Их Хурлын гишүүд тойрогтоо ажиллан, иргэд сонгогчдод төслийн талаар танилцуулж, саналыг нь сонсож байгаа юм. Улсын Их Хурлын дэд дарга Л.Энх-Амгалан Улсын Их Хурлын сонгуулийн 39 дүгээр тойрог буюу Хөвсгөл аймгийн Мөрөн сумын 1, 2, 3, 4, 6 дугаар баг, Жаргалант, Галт, Төмөрбулаг, Тосонцэнгэл, Рашаант, Их-Уул сумдад ажиллан, иргэдтэй уулзаж, төслийн талаар танилцуулан саналуудыг нь сонсож ажиллав. Тэрбээр 2019 оны 06 дугаар сарын 19-25-ны өдрүүдэд тойргийнхоо нийт 7 сум, хөдөөгийн 20 багт хүрч 3000 гаруй хүнд Монгол Улсын Үндсэн хуульд оруулах нэмэлт, өөрчлөлтийн төслийн талаар мэдээлэл хүргэж, саналыг нь сонссон байна.

Тодруулбал, 2019 оны 06 дугаар сарын 19-ны өдөр Хөвсгөл аймгийн Жаргалант сумын Цэцүүх, Хөнжил багийн 350 гаруй иргэн оролцсон уулзалтын үеэр Үндсэн хуулийн өөрчлөлт хийхээр төлөвлөсөн үзэл баримтлалыг харахад бүгд ард иргэдийн хүсдэг зөв өөрчлөлтүүд хэмээн нийтээрээ дэмжиж буйгаа илэрхийлсэн байна.

Улсын Их Хурлын дэд дарга Л.Энх-Амгалан Хөвсгөл аймгийн Жаргалант суманд 2019 оны 06 дугаар сарын 20-ны өдөр ажиллаж, Цагаан бургас, Харгана, Галт сумын Нүхт багийн иргэдтэй уулзсан. Энэ удаагийн уулзалтад оролцсон 420 гаруй иргэн төслийг дэмжиж буйгаа илэрхийлсэн ч сумын Засаг дарга цөөн хэдэн ИТХ-ын төлөөлөгчиддөө барьцаалагдаж тэдэндээ үйлчилдэг байдлыг онцлон анхаарахыг хэлж, сум, багийн дарга нарын боловсролыг харгалзан сонгодог болгох саналыг хэлж байжээ.

Хөвсгөл аймгийн Галт сумын Рашаант, Хужирт, Зүрх багийн иргэдтэй Улсын Их Хурлын дэд дарга 2019 оны 06 дугаар сарын 21-нд уулзаж, төслийн талаар танилцуулан, саналыг нь сонсоход уулзалтад оролцсон 400 гаруй иргэдээс Улсын Их Хурлын гишүүдийн ёс зүйн асуудал анхаарах, Улсын Их Хурлын гишүүд маш цөөн ирцтэй хуулиудыг баталдаг байдлыг шүүмжлэн, тэднийг сонгогчид нь эгүүлэн татдаг заалтыг төсөлд тусгуулах саналтай байгаагаа илэрхийлж байсан.

Хөвсгөл аймгийн Төмөрбулаг сумын уулзалтад Бүгдгээн, Нарийн, Тээл багийн 500 орчим иргэн оролцож, төслийн талаарх мэдээлэл сонсов. Уулзалтын төгсгөлд Улсын Их Хурлын гишүүд давхар дээлгүй зөвхөн хуулиа боловсруулж баталдаг байх, Улсын Их Хурал, Засгийн газрын гишүүд хувийн эрх ашигт нийцүүлж төрийн нэртэй зээл, тендер, бусад давуу эрх эдлэхгүй байх зохицуулалтыг төсөлд тусгах саналыг гаргаж байлаа.

Тус аймгийн Мөрөн сумын хэсгийн ахлагч нартай 2019 оны 06 дугаар сарын 22-нд уулзаж, Монгол Улсын Үндсэн хуульд оруулах нэмэлт, өөрчлөлтийн төслийн талаарх мэдээллийг Улсын Их Хурлын дэд дарга дэлгэрэнгүй танилцуулав. Уулзалтад 250 гаруй иргэн оролцсон бөгөөд сонирхсон асуултуудаа асууж, хариулт авсан. Энэ удаагийн уулзалтад оролцсон иргэд аймгийн төвүүдийг хотын статустай болгох шаардлагын талаар санал хэлж, энэ тохиолдолд хүн ам олонтой аймгууд өөрийн гэсэн эмнэлэгтэй болж, аймгуудын нэгдсэн эмнэлгийн ачаалал буурах ач холбогдолтой болохыг тайлбарлаж байв.

Улсын Их Хурлын дэд дарга Л.Энх-Амгалан Хөвсгөл аймгийн Тосонцэнгэл сумын Тахилт, Тосны гол баг, Их-Уул сумын Шивээ багийн иргэдтэй 06 дугаар сарын 23-ны өдөр уулзалт зохион байгуулсан юм. Уулзалтад оролцсон 330 гаруй иргэний олонх1992 онд Монголын өнцөг булан бүрээс сонгогдсон 465 хүн Үндсэн хуулийг баталж байсан гэдгийг онцлон сануулж байсан юм. Харин Хөвсгөл аймгийн Их-Уул сумын Асгат, Их-Уул, Мандал багийн 290 орчим иргэнтэй 06 дугаар сарын 24-ний өдөр уулзалт зохион байгуулж, Улсын Их Хурлын дэд дарга Л.Энх-Амгалан төслийн талаарх дэлгэрэнгүй мэдээлэл, тайлбарыг танилцуулж, иргэдийн сонирхсон асуултад хариулт өглөө. Энэ удаагийн уулзалтад оролцсон иргэд сумын засаг даргыг иргэдээс сонгодог болчихвол бас эрсдэл үүсэх талаар хэлж, бэлчээр хомсдож байгаагаас малчдын дунд бэлчээрээ булаалдах маргаан их гарч байгааг хэлж байсан.

Улсын Их Хурлын дэд дарга 06 дугаар сарын 25-ны өдөр Хөвсгөл аймгийн Рашаант суманд ажиллаж, Өвөрбулаг, Жаргалант багийн 470 гаруй иргэнтэй уулзаж, Монгол Улсын Үндсэн хуульд оруулах нэмэлт, өөрчлөлтийн төслийн талаар танилцуулсан. Уулзалтад оролцсон иргэд Засгийн газар маш тогтворгүй байгааг шүүмжилж, үүнээс үүдэн төрийн бодлого иргэдэд хүрэхдээ удаашралтай байдгийг хэлж байлаа. Мөн Ерөнхий сайд нь мэргэжлийн багаар Засгийн газрын танхимаа бүрдүүлэх нь зүйтэй гэдэг саналыг олонтаа хэлж байв.

Монгол Улсын Засгийн газраас усны ослоос урьдчилсан сэргийлэх талаар авч хэрэгжүүлсэн байгаа арга хэмжээний нэгдсэн тайлан, мэдээ, судалгааг олон улсад хийгдэж байгаа аргачлалын дагуу хийж Номхон далайн баруун бүс, Зүүн өмнөд Азийн бүсийн улс орнуудын тайланд нэгтгэж оруулах анхны “Зөвлөлдөх уулзалт”-ыг ОБЕГ-т зохион байгууллаа. Уулзалтад ОБЕГ, ЦЕГ, ЭМЯ, БСШУСЯ, ЗТХЯ, МХЕГ, ҮСХ-ны болон харьяа агентлагийн төлөөллүүд оролцсон юм.

Энэ үеэр усны ослоос урьдчилан сэргийлэх талаарх хууль эрх зүйн орчин, усны ослоос урьдчилан сэргийлэх үйл ажиллагааны явц, усны ослын талаарх бүртгэл, судалгааны ажил, дүн мэдээ, салбар дундын зохицуулалтын талаар хэлэлцлээ.

Мөн Дэлхийн эрүүл мэндийн байгууллагаас ирүүлсэн асуумжийн дагуу Монгол Улсын Засгийн газраас авч хэрэгжүүлж байгаа ажлыг “Бүс нутгийн хэмжээнд усны ослоос урьдчилан сэргийлэх тайлан”-д (BRSRDP) оруулахаар ажиллаж байна.

Дашрамд дурдахад, Монгол Улсын хэмжээнд сүүлийн таван жилийн хугацаанд нийт 23.680 удаагийн гамшиг, аюулт үзэгдэл, ослын тохиолдол бүртгэгдэн 1150 хүн амь насаа алдсан байна. Үүнээс 508 нь усны осол бөгөөд ослын улмаас 555 хүн амь насаа алдсан нь нийт гамшиг, аюулт үзэгдэл, ослын тохиолдлоос үүдсэн нас баралтын бараг 50 хувийг эзэлж байна.

Он гарсаар 06 дугаар сарын 27-ны өдрийн байдлаар нийт 27 удаагийн усны осол гарч, 30 хүн амь насаа алджээ. Үүнээс 4 нь хүүхэд, 26 нь том хүн байна.

Гол, усны осол нь ихэвчлэн иргэдийн анхаарал болгоомжгүй байдал, бага насны хүүхдийг хараа хяналтгүй орхисноос, согтууруулах ундаа хэрэглэсэн үедээ гол усанд орох зэрэг шалтгаанаас үүдэлтэй байгаа юм. Иймд болзошгүй үер, усны аюулаас урьдчилан сэргийлэх арга хэмжээг зохион байгуулах удирдамж гаргаад байна. Цаг агаарын урьдчилан сэргийлэх мэдээгээр 7,8,9 дүгээр сард түр зуурын усархаг аадар бороо, мөндөр орох, үер, аянга буух, гол усны түвшин огцом нэмэгдэх, хүчтэй салхи шуурга болох зэрэг цаг агаарын аюулт болон гамшигт үзэгдлийн тоо, давтамж нэмэгдэх хандлагатай байна. Иймд үер, усны аюулаас урьдчилан сэргийлэх ажлыг эрчимжүүлэх, голомтод үүрэг гүйцэтгэх хүч хэрэгслийн бэлтгэл, бэлэн байдлыг хангуулах, ард иргэдэд сэрэмжлүүлэг, сурталчилгааг шат дараалалтай зохион байгуулж, бэлэн байдлыг дээшлүүлэхэд чиглэгдэх нэгдсэн арга хэмжээг 07 дугаар сарын 01-ээс 09 дүгээр сарын 30-ны өдрийг хүртэлх хугацаанд зохион байгуулах юм.

Засгийн газрын ээлжит хуралдаанаар Ерөнхий сайд У.Хүрэлсүх Улаанбаатарт “Чингис хааны музей” байгуулах асуудлыг ирэх долоо хоногийн хурлаар хэлэлцүүлж, батлуулахыг БСШУС-ын сайд Ё.Баатарбилэгт үүрэг болгожээ. Ингэснээр Чингис хааны музейг байгуулах шийдэл анх удаа гарч, энэ нь түүх соёл, өв уламжлалаа хойч үедээ үлдээхээс гадна жуулчдыг татах боломж нээгдэх юм.

Мөн Чингис хаан судлалыг Монгол судлалын бие даасан салбар шинжлэх ухаан болгон хөгжүүлэх зорилгоор 2019 оны дөрөвдүгээр сарын 10-ны өдрийн Засгийн газрын хуралдаанаар “Чингис хаан судлалын хүрээлэн” байгуулах шийдвэрийг гаргаж байсан билээ.

НМХГ-аас Баянзүрх дүүрэг, Бөхийн өргөөний автобусны буудлын арын 62-р байрны 46 тоотод байрлах Ааг фарма ХХК-ийн Хүрмэн эмийн санд шалгалт хийлээ. Шалгалтаар тус байгууллага нь эмийн сангийн үйл ажиллагаа эрхлэх тусгай зөвшөөрөлгүй байсан ба өөр хаяг дээрх эмийн сангийн тусгай зөвшөөрлийг эмийн сандаа байрлуулсан байв. Иймд Зөрчлийн тухай хуулийн холбогдох заалтыг үндэслэн зөрчлийн хэрэг нээн ажиллаж байна.

Мөн Насны зам ХХК-д цацрагийн аюулгүй байдлын чиглэлээр төлөвлөгөөт хяналт шалгалт хийлээ. Хяналт шалгалтаар зам, барилгын ажлын зузаан, чийг, нягтыг тодорхойлох цөмийн хэмжүүр багажийг тусгай зөвшөөрөлгүй, цацрагийн аюулгүй ажиллагааны шаардлагуудыг хангаагүй байранд хадгалж байсан зөрчлийг шалган шийдвэрлэж торгох шийтгэлийн арга хэмжээ авлаа. Тус цөмийн хэмжүүрийг прокурорын тогтоолоор 3 сарын хугацаагаар хэсэгчлэн түр зогсоож, зөрчил дутагдлыг арилгуулахаар эрх бүхий албан тушаалтны албан даалгаврыг хүргүүлж, болзошгүй аюулаас урьдчилан сэргийллээ.