Month: June 2019

Иргэдийн эрэлт хэрэгцээнд тулгуурлан 2017 оноос хойш хот хоорондын зорчигч тээврийн үйлчилгээнд шөнийн тээвэрлэлтийн үйлчилгээг нэвтрүүлсэн. Үүний хүрээнд эрэлт ихтэй 10 чиглэлд шөнийн тээвэрлэлтийн үйлчилгээний давтамжийг нэмэгдүүлсэн байдаг. Эхний хагас жилийн байдлаар Өвөрхангай Арвайхээр, Өмнөговь Даланзадгад, Увс, Завхан, Говь-Алтай, Хөвсгөл, Сэлэнгэ Алтанбулаг, Хэнтийн Чингис хот, БНХАУ-ын Эрээн зэрэг чиглэлүүдэд давхардсан тоогоор шөнийн цагт 3113 тээврийн хэрэгслээр 92251 зорчигч тээвэрлэсэн байна.

Сүүлийн жилүүдэд хот хоорондын нийтийн тээвэрт гарсан зам тээврийн ослын 40 гаруй хувь нь шөнийн тээвэрлэлтийн үед гарсан судалгаа бий.

Олон улсын жишигт хот хоорондын нийтийн тээврийн үйлчилгээнд шөнийн тээврийн үйлчилгээг олон арга хэлбэрээр гүйцэтгэдэг нь зам тээврийн ослоос урьдчилан сэргийлэх боломжийг бүрдүүлдэг.

Тэгвэл Авто тээврийн үндэсний төв, ТӨҮГ-аас зорчигчдын амь нас, эрүүл мэндийг болзошгүй эрсдэлээс хамгаалах зорилгоор тодорхой зохион байгуулалтын ажлыг хийхээр холбогдох судалгаа, төлөвлөлтийн ажлуудыг хийж байна. Зам тээврийн осол зөрчилөөс урьдчилан сэргийлэхийн тулд улс, хот хоорондын зорчигч тээврийн үйлчилгээ эрхэлж буй аж ахуй нэгжүүдийн үүрэг хариуцлагыг нэмэгдүүлж, жолоочийн ажил, амралтын дэглэмийг чанд мөрдүүлэхэд анхаарч ажиллана хэмээн тус үйлдвэрийн газрын захирал Б.Гүрсоронзон хэллээ.

Үүний тулд 1000 километрээс дээш зайтай чиглэлүүдэд тээвэрлэлт хийхдээ авто буудлыг түшиглэн богино эргэлтээр өртөөчилсөн хэлбэрээр зохион байгуулах судалгааны ажлыг хийж байгаа аж. Ингэснээр тээвэрлэлт гүйцэтгэж буй жолоочийн ажил, амралтын дэглэмийг мөрдүүлэх зорилгоор жолоочийг сэлгэн ажиллуулах, амраах бөгөөд энэ нь зам тээврийн ослоос сэргийлэх нөхцөл бүрдэх чухал ач холбогдолтой хэмээн АТҮТ-өөс мэдээллээ.

Буудлага спортын 2019 оны насанд хүрэгчдийн улсын аварга шалгаруулах тэмцээн болж өндөрлөлөө.

Тус тэмцээнд “Токио-2020” олимпийн эрхээ аваад байгаа ОУХМ Э.Даваахүү хийн гар бууны дасгалд 587 оноогоор Монгол Улсын рекорд амжилтыг шинэчилж, эмэгтэйчүүдийн гурван байдлаас буудах дасгалд ОУХМ О.Янжинлхам 458,9 оноогоор финалын рекорд тогтоолоо.

Олимпийн мөнгө, дэлхийн хүрэл медальт О.Гүндэгмаа, Азийн наадмын аварга Г.Нандинзаяа, Ч.Нарантуяа, Зүүн Азийн наадмын аварга Ц.Мөнхзул нарын шилдгүүд насанд хүрэгчдийн улсын аварга шалгаруулах уг тэмцээнд оролцсон юм.

Үерийн аманд барьсан барилга, орон сууцнууд эхнээсээ хөрсний ус, бороо усанд автаад эхэлжээ. Усыг нь зайлуулах системгүйгээс төвлөрсөн бохирын шугамруу нийлүүлэх асуудалд хүндрэл гарч байгаа аж.

Үүнээс болоод төв цэвэрлэх байгууламжийн ачааллыг нэмэгдүүлж, улмаар шугам, хоолой эвдэрч гэмтэх асуудал үүсээд зогсохгүй өндөр үнээр худалдаж авсан орон сууцны суурь бетон нь чанарын шаардлага хангахгүйгээс болоод тухайн барилга хэзээ мөдгүй нурж ард иргэдийн амь нас, эрүүл мэнд, эд хөрөнгөөр хохироох эрсдэл яригдаж эхэлжээ. Нийслэлийн захирагчийн ажлын албанаас “Хөрсний усанд автсан барилга, байгууламжийн судалгаа, дүгнэлтийн талаар танилцуулах уулзалт”-ыг зохион байгуулав. Хуралд Улаанбаатар хотын Захирагчийн ажлын албаны Инженерийн байгууламжийн хэлтэс, Нийслэлийн онцгой байдлын газар, СӨХ-ны дээд зөвлөл, Хувийн орон сууцны мэргэжлийн холбоод болон ШУТИС-ын багш нарын төлөөлөл бүхий 20 гаруй төлөөлөгчид оролцсон байна. Тус хурлаар Улаанбаатар хотын Захирагчийн ажлын алба, Нийслэлийн онцгой байдлын газар, Геодези, усны барилга байгууламжийн газар болон ШУТИС-аас хамтран хэрэгжүүлсэн “Хөрсний усанд автсан барилга, байгууламжид хийсэн судалгаа”-ны дүгнэлтийг танилцуулж, цаашид авч хэрэгжүүлэх арга хэмжээнд ашиглахад зориулан гаргасан “Барилга, байгууламжийн газар доорх хэсгийн ус, чийгний хамгаалалт –гарын авлага” номыг тарааж өгсөн. Мөн усанд автсан барилга, байгууламжуудыг хариуцан ажилладаг СӨХ, Орон сууц, нийтийн аж ахуйн байгууллагуудад тус судалгааны дүгнэлтийг хүргүүлэх тухай мэдээллийг өглөө. Улаанбаатар хотын Захирагчийн ажлын албанаас дээрх асуудлыг дан ганцаар хариуцан шийдвэрлэх боломжгүй байгаа бөгөөд цаашид Засгийн газрын хэмжээнд буюу салбарын зохицуулалтын бодлого, эрх зүйн хүрээнд шинэчлэн, сайжруулах шаардлагатай байгаа талаар дурдаж, Барилга, хот байгуулалтын сайдын зөвлөлийн хуралд тус санал, зөвлөмжийг хүргүүлнэ гэдгээ илэрхийлжээ.

Улаанбаатар хотын авто машин хэрэглэгчид өдөрт 1 цагийг, жилд 45 хоногийг зам дээр түгжирч өнгрөөдөг болохыг судалгаагаар тогтоосон. Түүнчлэн Замын хөдөлгөөнд өдөрт 5 цагийн турш оролцдог иргэдийн 79.2 хувь нь зорилтот ажлынхаа 3/1 буюу 37 хувийг л амжуулдаг хэмээн хариулсан байдаг. Энэ байдлаараа цаашид удаан явбал иргэд оршин суугчдын ахуй амьдралд төдийгүй улс хэмжээнд маш их мөнгө төгрөг, цаг хугацааг үргүй зарцуулсаар байх тул Улаанбаатар хотын замын хөдөлгөөний хэт их ачааллыг бууруулах ажлын хүрээнд автозамыг А, В, С бүсчлэлд хуваахаар төлөвлөн, бэлтгэл ажлыг хангаж эхэллээ. Энэ хүрээнд нийслэл дэх зогсоолын тоог нэмэгдүүлж, бүсчлэлээс хамааран төлбөр нь харилцан адилгүй байхаар төлөвлөсөн. Түүнчлэн нийтийн тээврийн үйлчилгээг сайжруулах, Улаанбаатар хотын замын хөдөлгөөний босоо, хэвтээ тэнхлэг дагуу экспресс автобус үйлчилгээнд явуулах гэх мэт зохицуулалт хийх юм. Бүсчлэлийн тухайд гэвэл Замын хөдөлгөөний дүрмийн зөрчлийн торгуулиа барагдуулаагүй, автомашинаа тээврийн хэрэгслийн хяналтын улсын үзлэгт хуваарийн дагуу оруулаагүй, эсвэл тэнцээгүй жолооч нар А, В бүсэд нэвтрэхгүй байх зэрэг хэд хэдэн зохицуулалт хийхээр бэлтгэж байна. Уг ажилд иргэдийн оролцоог нэмэгдүүлэх зорилгоор олон нийтийн дунд дараах санал асуулгыг явуулж байна. Иргэн та ЭНД дарж саналаа өгнө үү гэж нийслэлийн Замын хөдөлгөөн төлөвлөлт, зохицуулалт, инженерчлэлийн газраас мэдээлэв.

Хүний эрхийн дэд хорооноос “Хүний эрх ба эрүү шүүлтийн асуудал” хэлэлцүүлгийг зохион байгууллаа. 2017 онд эрүү шүүлттэй холбоотойгоор 51 гомдол мэдээлэл ирснээс 40 гомдол нь цагдаагийн албан хаагч, 11 нь шүүхийн шийдвэр гүйцэтгэх болон прокурорын байгууллагын албан хаагчдын үйлдэлтэй холбоотой байжээ. Харин улсын хэмжээнд 2006-2018 онд нийт 11 гэмт хэргийг хянан шийдвэрлэж, 13 хүнд ял шийтгэл оногдуулжээ. Сүүлийн гурван жилийн хугацаанд мөрдөн шалгах явцад нийтдээ есөн удаа эрүүдэн шүүсэнтэй холбоотой гомдол Хяналтын шатны шүүхэд иржээ.a

Сэлэнгэ аймгийн Хушаат сумын Даагатай багийн “Товуу-Хан” гэдэг газар /сумын төвөөс баруун урд зүгт 8 км-т/ “Орхон” голд нийслэлийн Сонгинохайрхан дүүргийн харьяат иргэн А /30 настай, эмэгтэй/ өчигдөр 13:03 цагийн орчимд осолджээ.

Сэлэнгэ аймгийн Онцгой байдлын газрын Эрэн хайх аврах ангийн 5 алба хаагч, сумын Цагдаагийн хэсгийн 2 алба хаагч, ар гэрийн 4 иргэн, нийт 11 хүн, 4 техник хэрэгсэлтэй ажиллаж, “Товуу-Хан” гэдэг газраас хойд зүгт 6 км-т завиар урсаж, 3-4 метрийн гүнд 2 удаа шумбалт хийж, “Орхон” голын эрэг, тохой дагуу 7 км-т явганаар эрэн хайх ажиллагааг зохион байгуулсан боловч үзэгдэх орчин хязгаарлагдсаны улмаас 21:26 цагт эрэн хайх ажиллагааг зогсоосон байна. Өнөөдөр 06:00 цагаас эрэн хайх ажиллагааг дахин эхлүүлжээ.