Month: May 2019

“Олон Улсын хүүхдийн эрхийг хамгаалах өдрийг тэмдэглэн өнгөрүүлэх тухай” нийслэлийн Засаг даргын 2019 оны тавдугаар сарын 3-ны өдрийн А/409 дугаар захирамжийн дагуу ажлын хэсгийн хоёр дахь удаагийн хурлыг тавдугаар сарын 22-ний өдөр Хангарди ордонд зохион байгууллаа.

Хурлыг ажлын хэсгийн ахлагч нийслэлийн Засаг даргын Хүний хөгжил, нийгмийн бодлогын асуудал хариуцсан орлогч Ш.Анхмаа удирдан явуулж, ажлын хэсгийн нарийн бичиг нийслэлийн Соёл, урлагийн газрын дарга Ж.Дамдинцэрэн болон холбогдох гишүүд үйл ажиллагааны бэлтгэл ажлын талаар мэдээлэл хийж санал хүсэлтээ нэгтгэлээ. Энэ жилийн төв талбайн баярын тоглолтыг Монгол Улсын Хүүхэлдэйн театрын хамт олон хариуцан ажиллаж байгаа бөгөөд ерөнхий найруулагчаар тус театрын ерөнхий найруулагч МУСТА М.Ариунтуяа ажиллаж байна.

Олон Улсын хүүхдийн эрхийг хамгаалах өдрийг нийслэлийн хэмжээнд тэмдэглэн өнгөрүүлэх нэгдсэн хөтөлбөрийг энэ сарын 24-ний өдөр нийтэд мэдээлнэ гэжнийслэлийн Соёл, урлагийн газраас мэдээллээ.

Голуудын усны түвшин нэмэгдэн хүчтэй үерлэж байна. Хаврын шар усны үерээс сэрэмжлээрэй. 2019 оны тавдугаар сарын 23-ны өдрийн байдлаар Хангай нурууны арын Идэр, Хойд тамир, Чулуут, өврийн Буянт, Завхан, Алтай нуруунаас эхтэй Ховд, Сагсай, Булган, Харбут зэрэг голын усны түвшин өмнөх өдрийнхөөс 25-50 см нэмэгдэж олон жилийн дундаж түвшинг 10-30 см, Хөвсгөлийн уулсаас эхтэй Дэлгэрмөрөн, Бэлтэс голын усны түвшин өмнөх өдрөөс 50-110 см нэмэгдэж, үерийн түвшинг 10-35 см даван тус тус хүчтэй үерлэж байна.

Иймд дээр дурдсан голын эрэг дагуу суурьшиж, нутаглаж буй ард иргэд, аж ахуйн нэгж байгууллага, аялал зугаалгаар яваа хүмүүсийг үерийн аюулаас байнга сонор сэрэмжтэй байхыг онцгойлон анхааруулж байна.

Төрийн удирдах албан тушаалтнуудад зориулсан “Жендэр ба Хүний эрх” сургалт 2019 оны 05 дугаар сарын 23-нд Сэлэнгэ аймагт эхэллээ. Тус сургалтыг Монгол Улсын Хүний эрхийн Үндэсний Комиссын гишүүн П.Оюунчимэгээр ахлуулсан Ажлын хэсэг зохион байгуулж байна.

Монгол Улсад мэргэшсэн төрийн албыг бий болгоход дэмжлэг үзүүлэх, төрийн байгууллагад жендэрийн тэгш байдлыг бүрдүүлэхэд төрийн албан хаагчдын үүрэг, оролцоог нэмэгдүүлэх, удирдах албан тушаалтнуудын жендэр ба хүний эрхийн мэдлэг, чадавхийг бэхжүүлэх зорилготой энэхүү сургалтыг Сэлэнгэ, Орхон, Дархан-Уул аймгийн төрийн байгууддагуудын удирдлагуудад явуулах юм. Ажлын хэсэг дээрх аймгуудад 2019 оны 05 дугаар сарын 22-29-нийг хүртэл ажиллаж, сургалт нөлөөлийн ажиллагаа явуулахаас гадна Жендэрийн эрх тэгш байдлын тухай хуулийн хэрэгжилтийн нөхцөл байдлыг шалгана. Шалгалтыг аймаг, сумдын холбогдох төрийн байгууллагуудад хийх бөгөөд хууль тогтоомжийн хэрэгжилттэй танилцах, төрийн үйлчилгээ, хөдөлмөрийн харилцаан дахь жендэрийн тэгш бус байдал, ялгаварлан гадуурхалт, ажлын байран дахь бэлгийн дарамт зэрэг хүний эрхийн зөрчигдөж байгаа эсэхийг тогтоож шаардлагатай арга хэмжээг авах юм.

Хүний эрхийн Үндэсний Комисс уг ажиллагааг НҮБ-ын Хөгжлийн Хөтөлбөрийн санхүүжилтээр Төрийн албаны зөвлөлөөс 2018-2021 онд хэрэгжүүлж буй ” Монгол Улсад мэргэжлийн , иргэн төвтэй төрийн албыг төлөвшүүлэх нь ” төслийн ” Төрийн захиргаан дахь жендэрийн тэгш байдлыг дээшлүүлэх ” 3 дахь үр дүнгийн ажлын хүрээнд хариуцан гүйцэтгэж, хамтран ажиллаж байна.

Өнгөрсөн дөрөвдүгээр сарын 26-ны өдөр Баянзүрх товчооны ойролцоох “Сансар” худалдааны төвөөс авсан “Сүү” ХХК-ийн үйлдвэрлэдэг “Амтлаг” тарагнаас хулгана гарч ирлээ гэх мэдээллийг иргэн Б хамгийн анх олон нийтийн сүлжээд нийтэлсэн байдаг. Тэрбээр уг асуудлаар Мэргэжлийн хяналт, цагдаагийн байгууллага, Халдварт өвчин судлалын үндэсний төвд хандсан юм. Иргэний гомдлын дагуу Сонгинохайрхан дүүргийн мэргэжлийн хяналтын газрын лаборатори хулгана гарсан тарагнаас дээж авч шинжлэхэд “Хулгана үйлдвэрийн орчинд уутанд орсон бус гэрийн нөхцөлд орсон” гэдэг нь шинжилгээгээр тогтоогджээ. Одоогоор шинжилгээний дүгнэлтийг Прокурорт шилжүүлсэн тул ямар нэгэн мэдээлэл өгөх боломжгүй байна гэв.

Гаалийн Ерөнхий Газрын харъяа Замын-Үүд дэх гаалийн газрын гаалийн хяналтын бүсээр 2019 оны тавдугаар сарын 20-ны өдөр Монгол Улсад бүртгэлтэй “С” ХХК-ийн импортлож буй цемент дунд “полиэтиленгликолийн лав” гэх их хэмжээний химийн бодис нуусан байсныг гаалийн хяналт шалгалтаар илрүүлжээ. Тус компаний 11.7 тонн химийн бодисыг гаалийн байгууллагад “цемент” гэж мэдүүлэн, улсын хилээр хууль бусаар нэврүүлэхийг завдсан үйлдлийг шалгаж, прокурорын байгууллагад шилжүүлсэн байна.