Month: May 2019

АТГ-аас судалгааны чиглэлээр ажилладаг төрийн бус байгууллагуудтай хамтран төрийн 15 байгууллагын авлигын эрсдлийг тооцож гаргаад байна. Энэ жилийн хувьд улсын 6 эмнэлэг, 3 их сургууль, төрийн өмчит 6 хуулийн этгээдийг авлигын эрсдлийн үнэлгээнд хамруулсан.

Авлигын эрсдлийн үнэлгээ хийхийн утга учир нь тухайн төрийн байгууллагад авлигын ямар эрсдэлтэй зан үйл, нөхцөл байдал, шинж тэмдэг байгааг тодорхойлох зорилготой. Өөрөөр хэлбэл, тэр төрийн байгууллагад байгаа “авлигын өвчний онош”-ийг тогтооно гэсэн үг. Тавьсан оношийн дагуу “эмчилгээ” хийнэ, тэр эмчилгээ нь авлигаас урьдчилан сэргийлэх, соён гэгээрүүлэх ажил байх болно. Авлигын эрсдлийн тайланг ирэх сард олон нийтэд нээлттэй танилцуулна.

Вьетнам улсын иргэн Н нь согтууруулах ундааны зүйл хэрэглэсэн үедээ Дархан-Уул аймгийн Дархан сумын наймдугаар багийн нутагт дэвсгэрт үйл ажиллагаа явуулдаг Вьетнам засварын газарт 2018 оны арванхоёрдугаар сарын 3-ны өдөр өөрийн улсын иргэн Х-тэй маргалдан цээжин тус газар нь хутгалж амь насыг нь хохироосон хэрэг гарчээ.

Харьяаллын дагуу тус хэрэгт Мөрдөн байцаах албаны Хүнд гэмт хэрэг мөрдөн шалгах хэлтсээс шалгаж, улмаар Нийслэлийн прокурорын газраас яллах дүгнэлт үйлдэн Дархан-Уул аймгийн сум дундын Эрүүгийн хэргийн анхан шатны шүүхэд шилжүүлжээ.

Үүний дагуу тус аймгийн шүүхээс 2019 оны тавдугаар сарын 22-ны өдөр хэргийг хянан хэлэлцээд Вьетнам улсын иргэнд 14 жилийн хорих ялыг оногдуулж тус ялыг хаалттай хорих ангид эдлүүлэхээр шийдвэрлэсэн байна.

Манай улс Вьетнам улстай ялтан шилжүүлэх чиглэлээр хэлэлцээр хийгээгүй учраас тус улсын иргэн Н нь Монгол Улсад ял эдлэх юм байна.

Эх үрсийн баярыг угтан “Эх оронч худалдан авалтыг дэмжих жил”-ийн хүрээнд үндэсний үйлдвэрлэгчийн бүтээгдэхүүний “Хүүхдэд зориулав-2019” үзэсгэлэн худалдааг 2019 оны 05 дугаар сарын 25,26-ны өдрүүдэд 09:00-18:00 цагийн хооронд Үндэсний цэцэрлэгт хүрээлэнд зохион байгуулна.

“Очир” төвийн зочид буудлын өрөөнд 13 настай охин бусдын гарт амь насаа алдсан хэрэг одоогоос хоёр жилийн өмнө гарсан билээ. Энэ хэрэгт М.Амарболд, Б.Жавхлан нар гэм буруутай нь тогтоогдож тэдэнд анхан, давж заалдах шатны шүүхээс бүх насаар нь хорих ялыг оноосон.

Гэмт этгээдүүд хоёр шатны шүүхийн шийдвэрийг эсэргүүцэж Дээд шүүхэд гомдол гаргасны дагуу Дээд шүүхэд уг хэргийг өчигдөр /2019.05.24/ хэлэлцээд М.Амарболд, Б.Жавхлан нарт бүх насаар нь хорих ялыг хэвээр үлдээжээ.

Малчид, тээвэрчид, иргэдийн анхааралд: Тавдугаар сарын 25-ны шөнө, маргааш буюу Ням гаригт нутгийн төв хэсгээр нойтон цас орж, говь тал хээрийн нутгаар салхи шуургатай байхыг анхааруулж байна.

БАРУУН АЙМГУУДЫН НУТГААР: Солигдмол үүлтэй. Хангайн уулархаг нутгаар бага зэргийн хур тунадас орно. Салхи баруун хойноос секундэд 4-9 метр, шөнөдөө нутгийн өмнөд хэсгээр секундэд 13-15 метр хүрч ширүүснэ. Сэрүүсч Алтай, Хангайн уулархаг нутаг, Завхан голын эх, Идэр, Тэс голын хөндийгөөр шөнөдөө 7-12 градус хүйтэн, өдөртөө 6-11 градус, Алтайн өвөр говиор шөнөдөө 6-11 градус, өдөртөө 16-21 градус дулаан, бусад нутгаар шөнөдөө 1 градус дулаанаас 4 градус хүйтэн, өдөртөө 12-17 градус дулаан байна.

ТӨВИЙН АЙМГУУДЫН НУТГААР: Үүлэрхэг. Шөнөдөө ихэнх нутгаар, өдөртөө зарим газраар бороо, уулархаг нутгаар нойтон цас орно. Салхи баруун өмнөөс баруун хойш эргэж секундэд 7-12 метр. Шөнөдөө Дархадын хотгор, Хангай, Хөвсгөлийн уулархаг нутгаар 2-7 градус хүйтэн, бусад нутгаар 2 градус дулаанаас 3 градус хүйтэн, өдөртөө Хангай, Хөвсгөл, Хэнтэйн уулархаг нутаг, Туул, Тэрэлж голын хөндийгөөр 5-10 градус, бусад нутгаар 11-16 градус дулаан байна.

ОТРЫН НУТАГ ХЭРЛЭНБАЯН-УЛААН ОРЧМООР: Үүлэрхэг. Бага зэргийн бороо орно. Салхи зүүн хойноос секундэд 7-12 метр, зарим үед секундэд 14-16 метр хүрч ширүүснэ. Шөнөдөө 2-4 градус, өдөртөө 11-13 градус дулаан байна.

ГОВИЙН АЙМГУУДЫН НУТГААР: Солигдмол үүлтэй. Шөнөдөө бороо орохгүй, өдөртөө нутгийн хойд хэсгээр бороо орно. Салхи баруун өмнөөс хойш эргэж секундэд 7-12 метр, зарим газраар секундэд түр зуур 18-20 метр хүрч шороон шуурга шуурна. Сэрүүсч Өмнөговь, Дорноговийн өмнөд хэсгээр шөнөдөө 10-15 градус, өдөртөө 17-22 градус, бусад хэсгээр шөнөдөө 3-8 градус, өдөртөө 10-15 градус дулаан байна.

УЛААНБААТАР ХОТ: Үүлэрхэг. Шөнөдөө хур тунадас, өдөртөө бага зэргийн хур тунадас орно. Салхи баруун өмнөөс баруун хойш эргэж секундэд 5-10 метр, зарим үед секундэд 12-14 метр хүрч ширүүснэ. Сэрүүсч шөнөдөө 1-3 градус, өдөртөө 8-10 градус дулаан байна.

Онцгой байдлын байгууллагаас зохион байгуулж байгаа гурван үеийн дөрөвдүгээр чуулга уулзалт Орхон аймагт өнөөдөр /2019.05.25/эхэллээ. Чуулга уулзалтын нээлтийн ажиллагаанд ОБЕГ-ын дэд дарга, хурандаа Ц.Ганзориг болон даргын зөвлөлийн гишүүд, Ахмадын холбооны дарга, комиссар Д.Хишигбаатар нарын удирдлагууд оролцсон юм. “Онцгой байдлын байгууллагын ахмад, дунд, залуу үеийн оролцоо, идэвхийг дээшлүүлье” уриан дор зохион байгуулагдаж байгаа тус чуулганд төв, орон нутгийн Онцгой байдлын газар, хэлтэс, анги, байгууллагын ахмадын хорооны дарга, удирдлага, дунд болон залуу үеийн төлөөлөл нийт 140 гаруй алба хаагч оролцож байна. ОБЕГ-ын дэд дарга, хурандаа Ц.Ганзориг чуулганыг нээж хэлсэн үгэндээ, “Онцгой байдлын байгууллага 15 жилийн хугацаанд хууль эрхзүйн орчныг бүрдүүлж, бэхжүүлэх, алба хаагчдын нийгмийн асуудлыг шийдвэрлэх, ахуй, хангамжийг сайжруулах, албаны бэлтгэл, бэлэн байдлыг дээшлүүлэх, гамшгийн эрсдлийг бууруулахад иргэд, олон нийтийн оролцоог нэмэгдүүлэх зэрэг гамшгаас хамгаалах төрийн бодлогыг хэрэгжүүлэхэд Та бүхний үнэтэй санал санаачлага, оролцоо, хичээл зүтгэл, хамтын хүч хөдөлмөр хамгийн үнэтэй хувь нэмрийг оруулсан” гэж онцоллоо.

Тус уулзалтад Монгол Улсын Их Хурлын гишүүн, Засгийн газрын гишүүн, Монгол Улсын Шадар сайд Ө.Энхтүвшин өөрийн илгээлтээ ирүүлсэн байна. Тэрбээр, залуу халуун насаа эх орон ард түмэндээ зориулж, өнөөгийн энэхүү хөгжлийг авчирсан ахмад үеийнхэн, тэдний үйл хэргийг нэр төртэй залгамжлан авч яваа залуу, хойч үеийнхний хамтын ажиллагааг улам бэхжүүлэх, үе үеийн алба хаагчдын санал бодлыг сонсон, алдаа оноогоо хэлэлцэж, цаашдынхаа чиглэлийг тодорхойлоход өнөөдрийн чуулганы зорилго оршиж байна. Ард иргэдийнхээ аюулгүй байдлыг сахин хамгаалдаг нэр хүндтэй бөгөөд хариуцлагатай албаныхаа төлөө цаг үргэлж санаа тавьж, цаашид улам их хөгжүүлэхийн төлөө Онцгой байдлын байгууллагын ахмад үеийнхэн үргэлж идэвх санаачилга гарган ажиллаж байдагт миний бие байнга талархаж байдаг. Монголчууд бид ахмад настнаа хүндлэн дээдэлж, тэднээсээ цаг үргэлж суралцаж ирсэн оюуны арвин их өв, уламжлалтай, гайхамшигтай соёлын өвтэй ард түмэн билээ.

Иймд ахмадуудынхаа түүхэн замнал, алдар гавьяа, ололт амжилт арвин их баялаг туршлагаас суралцах, тэднийхээ нийгмийн асуудлыг шийдвэрлэх, аливаа үйл ажиллагаанд ахмадуудынхаа оролцоог хангах боломжийг байнга эрэлхийлж байх нь залуу хойч үеийнхний үүрэг юм. Мөн чуулга уулзалтаас гарсан зөвлөмжийг ажил амьдралдаа хэрэгжүүлж, дараагийн уулзалтад хийсэн ажилтай, хэлэх үгтэй ирэх нь энэхүү чуулга уулзалтын үр дүнг илэрхийлэх юм. Онцгой байдлын алба нь төрийн үйлчилгээг иргэдэд түргэн шуурхай хүргэх, эрдэнэт хүний амь нас, эд хөрөнгө, хүрээлэн буй орчин, түүх соёлын үнэт зүйлсийг гамшгийн аюулаас урьдчилан сэргийлэх, аврах хамгаалах үүргээ нэр төртэй гүйцэтгэж Монгол Улсад төдийгүй олон улсад хүлээн зөвшөөрөгдсөн байгууллага болон хөгжиж байгаа нь ахмад, дунд, залуу үеийн гурван цагийн хэлхээ болсон Та бүгдийн хамтын хөдөлмөрийн үр дүн билээ. Өргөсөн тангарагтаа ямагт үнэнч байж, эргэх дөрвөн цаг дор эр зориг, тэсвэр хатуужил гарган эх орон, ард түмнийхээ төлөө нэгэн үзүүрт сэтгэлээр зүтгэж байдаг та бүхний ариун үйлсээр ирээдүй хойч үеийнхэн үргэлж бахархаж байх болно гэдэгт эргэлзэхгүй байна. Чуулга уулзалтын үйл ажиллагаанд амжилт хүсэж, Та бүхэнд болон гэр бүлд тань эрүүл энх, аз жаргал, ажлын их амжилтыг хүсэн ерөөе гэжээ.