Month: April 2019

ХЭҮК-ын гишүүн П.Оюунчимэгээр ахлуулсан Ажлын хэсэг 2019 оны 04 дүгээр сарын 08-18-ны өдрүүдэд Өвөрхангай, Баянхонгор, Говь-Алтай аймгуудад ажиллаж байна. Ажлын хэсэг дээрх аймгуудын Засаг даргын Тамгын газар болон холбогдох төрийн байгууллагаас Жендэрийн эрх тэгш байдлыг хангах тухай хуулийг хэрэгжүүлж буй нөхцөл байдалтай танилцах, төрийн албан, хөдөлмөрийн харилцаан дахь жендэрийн тэгш бус байдал, ялгаварлан гадуурхалт, ажлын байрны бэлгийн дарамт зэрэг хүний эрхийн зөрчил үүсэхээс урьдчилан сэргийлэх, зөрчил гаргасан тохиолдолд хариуцлага тооцуулахаар ХЭҮК-ын гишүүний Шаардлага хүргүүлж, хүний эрхийг сахин хамгаалах зорилготой ажиллаж байна. Мөн өнгөрсөн жил Хүний эрхийн Үндэсний Комиссоос бэлтгэсэн жендэр, хүний эрхийн сургагч багш нарыг чадавхжуулах сургалтуудыг явуулж байгаа юм.

Олон улсын хөдөлмөрийн байгууллагаас жил бүрийн 04 дүгээр сарын 28-ны өдрийг “Ажлын байран дахь хөдөлмөрийн аюулгүй ажиллагаа, эрүүл ахуйн дэлхийн өдөр” болгон 2003 оноос хойш тэмдэглэн өнгөрүүлж байна.

Энэхүү өдрийг угтан ОБЕГ-ын харьяа Үндэсний аврах бригадын Уул уурхайн аврах ангиас зохион байгуулж байгаа “Хөдөлмөрийн аюулгүй байдал, эрүүл ахуйн сарын аян”-ы нээлтийн ажиллагаа өнөөдөр боллоо.

Нээлтийн ажиллагаанд МУ-ын Шадар сайдын ажлын албаны дарга Л.Саянаа, ОБЕГ-ын дарга, хошууч генерал Т.Бадрал, Гамшиг судлалын хүрээлэнгийн Нөөц судлалын төвийн дарга, хошууч генерал П.Даш болон Уул уурхайн аврах ангийн бие бүрэлдэхүүн оролцсон юм.

Алба хаагчдын хөдөлмөрийн аюулгүй байдлын талаарх ойлголт, мэдлэгийг дээшлүүлэх, стандарт, шаардлага хангасан эрүүл, аюулгүй ажлын байрыг бүрдүүлэх, аливаа болзошгүй ослоос өөрийгөө болон бусдыг урьдчилан сэргийлэх соёл, хандлагыг төлөвшүүлэх зорилгоор тус аяныг өрнүүлж байна.

Аяны хүрээнд Уул уурхайн аврах ангиас хөдөлмөрийн эрүүл мэнд, аюулгүй байдлын менежментийн тогтолцооны олон улсын ISO 45001:2018 стандартыг нэвтрүүлэхээр ажиллаж байгаа юм.

Энэ үеэр тус стандартыг нэвтрүүлэхэд хамтарч ажиллах, туршлага солилцох уулзалт, хурал зохион байгуулах, хөдөлмөрийн аюулгүй байдал, эрүүл ахуйн үр дүнд суурилсан сургалтын хөтөлбөр боловсруулах чиглэлээр хамтран ажиллахаар Мэргэшсэн хөдөлмөрийн аюулгүй байдал, Эрүүл ахуйн мэргэжилтнүүдийн холбоотой хамтын ажиллагааны гэрээ байгууллаа гэж Онцгой байдлын ерөнхий газраас мэдээллээ.

Тээврийн цагдаагийн албаны Жижүүрийн шуурхай удирдлагын хэлтэст өнгөрсөн амралтын өдрүүд буюу дөрөвдүгээр сарын 6, 7-ны өдрүүдэд нийт 555 дуудлага, мэдээлэл хүлээн авснаас зам тээврийн ослын шинжтэй 413 дуудлагыг хүлээн авч шалгажээ. Бүртгэгдсэн осол, хэргийн улмаас нийслэлд хоёр хүн, орон нутагт гурван хүний амь нас хохирч, 12 хүн гэмтэж бэртсэн ноцтой зам тээврийн ослууд бүртгэгдсэн байна. Тухайлбал,

Онцгой байдлын ерөнхий газраас нийслэлийн Засаг даргын Тамгын газартай хамтран нийслэлийн хэмжээнд Гамшгаас хамгаалах иж бүрэн сургуулийг 2019 оны 04 дүгээр сарын 24-26-ны өдрүүдэд зохион байгуулахаар бэлтгэл ажлыг ханган ажиллаж байна.

Энэхүү сургууль нь 1990 оноос хойш Улаанбаатар хотын хэмжээнд анх удаа зохион байгуулагдаж байгаа томоохон сургууль гэдгээрээ онцлог юм.

Сүүлийн жилүүдэд нийслэл хотод газар хөдлөлтийн идэвхжил нэмэгдэж байгаатай холбогдуулан Гамшгаас хамгаалах иж бүрэн сургуулийн хүрээнд газар хөдлөлтийн дараах нүүн шилжих дадлага сургуулийг Улаанбаатар хотын бүх иргэдийг хамруулан нийслэлийн хэмжээнд байдаг 111 аюулгүй талбайд зохион байгуулна. Энэ үеэр Улаанбаатар хотын орох, гарах хөдөлгөөнийг хязгаарлаж, тээврийн хэрэгслийн хөдөлгөөнийг түр зогсоох юм.

Мөн дадлага сургуулийн хүрээнд төвийн зургаан дүүргийн иргэдийг аюулгүй газар нүүлгэн шилжүүлэхээс гадна эрэн хайх, аврах ажиллагаа, хээрийн эмнэлэг дэлгэх дадлага сургуулиудыг зохион байгуулна.

Хээрийн эмнэлэг дэлгэх дадлага сургуульд улсын гуравдугаар шатлалын эмнэлгүүд оролцож, томоохон хэмжээний гамшиг осол тохиолдлоо гэхэд эмчилгээ, үйлчилгээ үзүүлэх нөөц боломжоо тодорхойлох юм.

Сургалтын бэлтгэл ажлыг хангах хүрээнд гамшгаас хамгаалах сургалтыг хороо, дүүргийн хэмжээнд шат дараалалтайгаар зохион байгуулан ажиллаж байна гэж Онцгой байдлын ерөнхий газраас мэдээллээ.

Мэргэжлийн хяналтын ерөнхий газар 2019 оныг “Иргэн төвтэй үйл ажиллагааны жил” болгон зарлаж байгаль орчин, дэд бүтэц, хөдөлмөр нийгмийн хамгаалал, уул уурхайн чиглэлээр сар бүр тодорхой ажлууд зохион байгуулахаар боллоо.

Тухайлбал, энэ дөрөвдүгээр сарыг иргэдийн оролцоотой байгаль орчны хяналт болон эрүүл аюулгүй орчин сэдвийн хүрээнд хяналт, шалгалт, зөвлөн туслах үйлчилгээг үзүүлэх ажээ.

Жилийн аяны нээлтийн арга хэмжээнд МХЕГ-ын удирдлага болон Орхон аймагт үйл ажиллагаа явуулж буй 60 байгууллагын 100 гаруй иргэн оролцсон юм. Аяны хүрээнд хууль тогтоомжийг сурталчлах, аюул, ослоос урьдчилан сэргийлэх заавар зөвлөгөөг өгөх аж. Ялангуяа төлөвлөгөөт шалгалтад хамрагдаагүй аж ахуйн нэгжүүдэд зөвлөн туслах чиглэлээр хамтран ажиллах гэнэ. Мэргэжлийн хяналтын газар нь 24 чиглэлээр хяналт, шалгалт хийдэг байна.