Month: April 2019

АНУ-ын Чикаго хотод амьдардаг 32 настай монгол эмэгтэй, Н.А сураггүй алга болсон талаарх мэдээлэл олон нийтийн сүлжээгээр цацагдсан.

Дээрх мэдээллийн дагуу бүсгүйг эрэн хайх ажиллагааг Чикаго хотод ажиллаж, амьдардаг монголчууд идэвхтэй зохион байгуулжээ. Эрлийн үр дүнд бүсгүйг өчигдөр /2019.04.10/ тус хотоос олсон ажээ. Бүсгүй алга болсон хугацаанд гэмт хэргийн золиос болоогүй бөгөөд арав гаруй хоног эмнэлэгт хэвтэхдээ хүндэтгэх шалтгааны улмаас холбоо барих боломжгүй байсан гэдгээ хэлсэн байна.

Болсон явдлыг сануулбал, А гэх эмэгтэй нь 2019 оны гуравдугаар сарын 30-ны Бямба гаригт Чикаго хотын хойд дүүргээс алга болсон бөгөөд тус хотын цагдаагийн газраас эрэн сурвалжилж эхэлсэн ч өчигдрийг хүртэл ямар нэгэн сэжүүр гаргаагүй байсан юм. Бүсгүйг алга болсны дараа Чикаго хотод оршин суудаг монголчууд нэгдэн, түүний унаж явсан автомашиныг хайж, хувийн мөрдөгч хөлслөхөөр хандивын аян өрнүүлж байжээ. Түүнийг эрэн хайх ажилд АНУ дахь Монгол Улсын Элчин сайдын яамнаас дэмжлэг үзүүлэн ажиллажээ.

Энэ сарын 10-ны өдөр Узбекистан Улсын Ташкент хотноо Монгол, Узбекистаны ГХЯ хоорондын ээлжит зөвлөлдөх уулзалт болов. Уулзалтыг монголын талаас Гадаад харилцааны дэд сайд Б.Батцэцэг, узбекистаны талаас Гадаад хэргийн дэд сайд Д.Х.Ахатов нар ахалж, Монгол, Узбекистаны харилцааг улс төр, эдийн засаг, худалдаа, хөрөнгө оруулалт, соёл, хүмүүнлэг, хөдөө аж ахуй, аялал жуулчлалын зэрэг салбарт өргөжүүлэн хөгжүүлэх, олон улс, бүс нутгийн талбарт уялдаа холбоотой хамтран ажиллах талаар дэлгэрэнгүй санал солилцов.

Талууд худалдаа, хөрөнгө оруулалт, аялал жуулчлал, хөдөө аж ахуй, аж үйлдвэр, экспортыг дэмжих чиглэлд явуулж буй тус тусын бодлогыг танилцуулав. Узбекистан Улс аялал жуулчлалыг хөгжүүлэхэд онцгой ач холбогдол өгч, тодорхой арга хэмжээ авсны дүнд ердөө нэг жилийн дотор гаднаас ирэх жуулчдын тоог нэг дахин өсгөж 5.3 саяд хүргэж чадсан туршлагаасаа танилцуулав. Хоёр улсын худалдааны эргэлт одоогоор бага хэмжээтэй боловч өсөлттэй байгааг дурдаад мал аж ахуйн гаралтай бүтээгдэхүүн импортлох, машин техник, автобус, хөдөө аж ахуйн техник, тоног төхөөрөмж, жимс жимсгэнэ зэрэг хүнсний эко бүтээгдэхүүн Монголын зах зээл рүү экспортлох сонирхолтой байгаагаа илэрхийлэв.

Дэд сайд Б.Батцэцэг Төв Азийн улс орнууд руу хөдөө аж ахуйн гаралтай бүтээгдэхүүн, түүний дотор мах, махан бүтээгдэхүүн экспортлох хүсэлтэй байгаагаа илэрхийлж, энэ чиглэлд хоёр талын мэргэжлийн байгууллагуудын хооронд хэлхээ холбоо тогтоож хамтран ажиллахыг санал болгов.

Талууд тээврийн коридоруудыг хөгжүүлэх талаар үргэлжлүүлэн ярилцахаар тогтов. Узбекистан Улс энэ онд гадаадын улс орнуудаас иргэд визгүй зорчих улсуудын жагсаалтад Монгол Улсыг хамруулахаар шийдвэрлэснээ мэдэгдэж, Агаарын харилцааны хэлэлцээрийг ойрын үед байгуулахыг мөн санал болгов.

Монгол Улс гадаад улс орнуудад хадгалагдаж буй Монголын түүх, соёлын өв, дурсгалуудаа бүртгэх, судлах, мэдээллийн нэгдсэн сан бүрдүүлэхэд ач холбогдол өгч байгаа бөгөөд энэ хүрээнд Узбекийн музей, архивт хадгалагдаж буй түүх, соёлын өвөөс олон нийтэд танилцуулахад чиглэсэн хамтарсан үзэсгэлэн зохион байгуулахыг монголын тал санал болгов. Мөн “Дэлхийд тархсан монгол өв” ном нийтлүүлэх төслийг хэрэгжүүлэх хүрээнд Узбекистан Улсын ШУА-ийн Дорно дахины хүрээлэнгийн сан хөмрөгт хадгалагдаж байгаа Рашид-Ад-Дины “Судрын чуулган” бүтээлийн перс хэл дээрх хамгийн эртний эх хувь зэргийг хувилан авч уг номонд оруулахад дэмжлэг хүсэв. Узбекийн тал эдгээр саналыг нааштай судлан үзэхээр болов.

Авлигын гэмт хэрэг, мансууруулах эм, сэтгэцэд нөлөөт бодистой холбоотой гэмт хэрэг, хүүхдийн эсрэг үйлдсэн хүчиндэх гэмт хэрэг, хүрээлэн буй орчны эсрэг болон улс, орон нутгийн хэмжээнд олон нийтийн анхаарлыг татсан хэргийг шүүхээр хянан хэлэлцэж шийдвэрлэсэн даруй прокурор хэвлэл, мэдээллийн хэрэгслээр олон нийтэд мэдээлж байхыг Улсын ерөнхий прокурор чиглэл болгожээ.

Гэмт хэргээс урьдчилан сэргийлэх, мэдээллийн нээлттэй, ил тод байдлыг хангах, бодитой, үнэн зөв мэдээллийг эх сурвалжаас нийтэд хүргэхэд чиглэсэн энэ арга хэмжээг хэрэгжүүлэхэд хэвлэл мэдээллийн байгууллагууд, сэтгүүлч нартай хамтран ажиллах, хуулиар хориглосноос бусад тохиолдолд шаардлагатай мэдээ, мэдээллээр хангах, прокурорын байгууллагын цахим хуудсаар дамжуулан иргэдэд мэдээллийг хүртээмжтэй хүргэх ажлыг идэвхжүүлэхийг нийт прокурорын газруудад даалгасан байна.

Сонгуулийн Ерөнхий Хорооны дарга Ч.Содномцэрэн Европын аюулгүй байдал, хамтын ажиллагааны байгууллагын Ардчилсан институт, хүний эрхийн алба (АИХЭА)-ны Сонгуулийн ахлах зөвлөх ноён Стивэн Мартин, Монголыг хариуцсан ажилтан ноён Улви Ахундлу нарыг хүлээн авч уулзав.

Тус албаны төлөөлөгчид Гадаад харилцааны сайдын хүсэлтээр Монгол Улсад айлчилж байгаа бөгөөд Монгол улсын сонгуулийн хууль, эрх зүйн орчинг боловсронгуй болгох, сонгуулийн хуулийн төсөлд санал, зөвлөгөө өгөх, бусад орны туршлагаас хуваалцах юм. Мөн Монгол Улсад байгуулах Сонгуулийн олон улсын ажиглагчийн бүсийн сургалтын төвийн сургалтын хөтөлбөр, төлөвлөгөөг боловсруулахад тусална.

Уулзалтын үеэр, СЕХ-ны дарга Ч.Содномцэрэн 2020 оны УИХ-ын ээлжит сонгуулийн бэлтгэл ажлын хүрээнд авч хэрэгжүүлж буй ажлуудыг танилцуулсанаас гадна тулгарч буй зарим хүндрэл бэрхшээлийн талаар товч мэдээлэл өгч, Европын аюулгүй байдлын хамтын ажиллагааны байгууллагын Ардчилсан институт, хүний эрхийн алба нь хамтран ажиллаж дэмжлэг үзүүлж байгаад талархалаа илэрхийлэв.

АИХЭА нь олон улсын сонгуулийн ажиглагчдаас бүрдсэн Сонгуулийн ажиглалтын хороог 57 гишүүн орон (Европ, Төв Ази, Хойд Америк)-нууддаа байгуулан тухайн орны сонгуулийн үйл ажиллагааг бүх талаас нь судлан, ажиглаж өөрсдийн санал, зөвлөмжөө боловсруулан танилцуулдаг олон улсын сонгуулийн мэргэжлийн байгууллага юм.