Month: April 2019

Мэргэжлийн хяналтын ерөнхий газрын Байгаль орчин, геологи, уул уурхайн хяналтын газраас “Иргэдийн оролцоотой байгаль орчны хяналт” сарын аяны хүрээнд Барилгын салбарын хууль, эрх зүйн орчин сургалтаар Геодези, зураг зүйн тухай хууль, тогтоомж, стандартын хүрээнд Барилгын геодезийн ажил, зөрчлөөс урьдчилан сэргийлэх сэдвээрдэд бүтцийн салбарын 40 мэргэшсэн, зөвлөх инженерүүдэд сургалт хийлээ.

Сургалтаар Геодези, зураг зүйн тухай, Кадастрын зураглал ба газрын кадастрын тухай хууль, Барилгын геодезийн ажил БНбД 11-08-06, Хөрс. Барилга, байгууламжийн буурийн хэв гажилтыг хэмжих аргууд MNS 3672:1984 стандартын хэрэгжилтийг хангуулан ажиллах, барилга, байгууламж, инженерийн шугам сүлжээний зураг төсөл боловсруулах, барих, ашиглах үед хийгдэх геодезийн ажил, геодезийн хэмжилт зураглал хийх нарийвчлал, геодезийн хэмжилт хийх технологийн дараалал, зөрчил гарч байгаа шалтгаан нөхцөл, түүнээс урьдчилан сэргийлэх талаар мэргэжил арга зүйн зөвлөгөө өгч, байгаль орчны хяналтад иргэн, аж ахуйн нэгж байгууллагын эрх үүрэг, Засгийн газрын 2011 оны 311дүгээр тогтоолоор дотоод хяналтыг зохион байгуулах талаар танилцуулав.

Орон сууцнуудын нэг давхарт нийтийн хоол болон бусад чиглэлээр үйл ажиллагаа явуулдаг газрууд их болж байгаатай холбоотойгоор иргэдээс ирэх гомдол, санал мөн ихсэж байгааг АТГ-аас мэдээллээ.

Түүгээр зогсохгүй сүүлийн үед нийтийн хоолны газраар үйлчлүүлсэн иргэдийн дунд хоолны хордлого авсан тохиолдолд ч нэмэгдэж байгаа.

Тиймд энэ чиглэлээр мэргэжлийн хяналтын байгууллага болон бусад холбогдох төрийн байгууллага, аж ахуйн нэгжүүд хэрхэн ажиллаж буйг эргэн харах зорилгоор өнөөдөр “Нийтийн хоолны үйлчилгээн дэх эрсдэлд суурилсан мэргэжлийн хяналт шалгалт ба аж ахуйн нэгжийн дотоод хяналтыг бэхжүүлэх” сэдэвт хэлэлцүүлгийг АТГ-аас холбогдох байгууллагуудын хамтаар зохион байгууллаа.

ТӨРИЙН БАЙГУЛЛАГУУДЫН УЯЛДАА ХОЛБОО, ЭРХ ЗҮЙН ОРЧНОО НЭГ МӨР БОЛГОХ ЗЭРЭГ АСУУДАЛ НЬ ДУТМАГ БАЙГАА НЬ АЖИГЛАГДСАН

Нийтийн хоолны чиглэлээр үйл ажиллагаа явуулдаг газруудад хяналт тавьж, асуудал шийдэх ёстой байгууллагууд хэрхэн ажиллаж буй талаар Авлигатай тэмцэх газрын Урьдчилан сэргийлэх, соён гэгээрүүлэх хэлтсийн ажилтан, комиссар Ж.Сарангэрэл “Нийтийн хоолны үйлчилгээний газруудад төрийн хяналт шалгалтын ажил явагдаж байгаа төдийгүй энэ чиглэлээр иргэдээс ирэх гомдол их гарч байна.

Төрийн байгууллагууд хуулийн дагуу хийх ёстой ажлаа хийгээгүй бол тэр чинь ч гэсэн ардаа авлига байж болно.

АТГ-аас баг гаран нийтийн хоолны чиглэлээр үйлчилгээ үзүүлдэг байгууллагуудын бүгдийнх нь ажилтай танилцсан. Санасныг бодоход төрийн байгууллагууд ажлаа хийж байгаа нь харагдсан. Гэхдээ төрийн байгууллагуудын уялдаа холбоо, эрх зүйн орчноо нэг мөр болгох зэрэг асуудал нь дутмаг байгаа нь ажиглагдсан. Дээрээс нь эрсдэлийг зөв тодорхойлоход анхаарах ёстой нь харагдаж байгаа.

Өөрөөр хэлбэл, мэргэжлийн хяналтын газар гэхэд нийтийн хоолны салбарын үйл ажиллагаанаас олон зөрчил илрүүлдэг. Тэгээд зөрчил гаргасан газруудын тусгай зөвшөөрлийг нь цуцлуулах саналыг холбогдох газруудад нь буюу Нийслэлийн захирагчийн ажлын албанд хүргүүлдэг боловч тэр болгон цуцалдаггүй. Энэ нь зөрчил буурахгүй байх бас нэгэн шалтгаан болж байна.

Мөн орон сууцны нэг давхарт үйл ажиллагаа явуулдаг байгууллагууд ашиглалтын тусгай зөвшөөрлийн шаардлага хангахгүй байгууллагуудыг улсын бүртгэлийн газар битгий бүртгээрэй гэхэд бүртгэчихсэн байх жишээтэй. Энэ байдал нь төрийн байгууллагууд уялдаа холбоогоо сайжруулах шаардлагатайг харуулж байна” гэлээ.

НИЙСЛЭЛИЙН ХЭМЖЭЭНД АРХИ СОГТУУРУУЛАХ УНДААНЫ ТУСГАЙ ЗӨВШӨӨРӨЛТЭЙ, ТҮҮГЭЭР ҮЙЛЧИЛДЭГ 4,008 ОБЪЁКТ БИЙ

Энэ онд нийслэлийн хэмжээнд нийт 315 объектод төлөвлөгөөт хяналт шалгалт хийхээр зарлагдсан ба тус ажил 25 хувьтай явж байна. Мөн нийслэлийн хэмжээнд мэргэжлийн хяналтад бүртгэлтэй архи согтууруулах ундааны тусгай зөвшөөрөлтэй түүгээр үйлчлүүлэх нийт 4,008 объект бий.Тэдгээр газрыг аддестатчилах хяналт шалгалтыг бусад харьяа байгууллагуудтай хамтран явуулж байгааг НМХГ-ын улсын ахлах байцаагч Б.Хонгор хэлсэн юм.

Орон сууцны нэг давхарт үйл ажиллагаа явуулдаг хоолны газруудтай холбоотойгоор иргэдээс,

1. Нийтийн зориулалттай орон сууцны нэг давхарт зориулалтын бус байранд үйл ажиллагаа явуулдаг
2. Хоолны газрын гал тогооны өрөө стандартад нийцэхгүй жижиг талбайтай
3. Механик агааржуулалтын моторын дуу чимээ их, хоолны үнэр байнга үнэртдэг
4. Агааржуулалт болон цэвэр бохирын хоолойгоор жоом дамжиж амгалан тайван байдал алдагдуулдаг.
5. Шөнийн цагаар дуу чимээ их гаргаж оршин суугчдын амгалан тайван байдлыг алдагдуулдаг
6. Шингэрүүлсэн шатдаг хийн баллоныг орон сууцанд байрлуулж, хэрэглэдэг
7. Хоолны газраас болж бохирын шугам бөглөрдөг зэрэг гомдлууд дийлэнхдээ ирдэг байна.

Харин нийслэлийн захирагчийн албанаас согтууруулах ундаа худалдах, түүгээр үйлчлэх тусгай зөвшөөрөлтэй газрын судалгаанаас харахад нийслэлийн есөн дүүрэгт нийт 1,158 ресторан, 1,057 баар, 324 кафе байдаг аж.

НӨАТ-ын урамшууллын 2019 оны 3 дугаар сарын сугалааны тохирлын нэвтрүүлэг дөрөвдүгээр сарын 14-ний Ням гарагт Боловсрол телевизээр орон даяар шууд явагдана.

Энэ удаагийн тохирлын сугалааны супер шагнал 70,000,000 төгрөг байна.

Гамшгийн эрсдэлийг бууруулах үндэсний зөвлөл өнгөрөгч гуравдугаар сард анхдугаар хуралдаанаа зохион байгуулсан. Тус хурлаас орон нутгийн зөвлөл, яам, агентлаг, төрийн болон төрийн бус байгууллагад хандан зөвлөмжийг гаргаад байна.

Нэг. Гамшгийн эрсдэлийг бууруулах үндэсний зөвлөлийн гишүүд, орон нутгийн зөвлөлийн дарга, гишүүдэд:

1.1. Гамшгийн эрсдэлийг бууруулах нийслэл, орон нутгийн зөвлөлийн үйл ажиллагааг тогтмолжуулах;

1.2. Улсын хэмжээнд онц чухал обьектын жагсаалтыг шинэчлэх, засаг захиргаа, нутаг дэвсгэрийн нэгж, гамшгаас хамгаалах алба, шинэчлэн баталсан улсын онц чухал обьектын хэмжээнд гамшгийн эрсдэлийн тойм судалгаа, үнэлгээ хийх;

1.3. Гамшгийн эрсдэлийн тойм судалгаа, үнэлгээнд суурилан орон нутгийн гамшгийн эрсдэлийг бууруулах төлөвлөгөө боловсруулж, хэрэгжүүлэх;

1.4. Гамшгийн эрсдэлийг бууруулах арга хэмжээ, холбогдох санхүүжилтийг улс,орон нутгийн эдийн засаг, нийгмийг хөгжүүлэх үндсэн чиглэл, орон нутгийн болон салбарын бодлого, төлөвлөлтөд тусгаж, хэрэгжүүлэх;

1.5. Ашиглалтын шаардлага хангаагүй сургууль, цэцэрлэг, эмнэлэг, орон сууц, нийтийн үйлчилгээний барилгуудын судалгааг гаргаж, газар хөдлөлт тэсвэржилтийн үнэлгээг улсын хэмжээнд зохион байгуулж, их засвар, хүчитгэл, шинээр барихад шаардлагатай хөрөнгө оруулалтыг шийдвэрлэх;

1.6. Гамшгаас хамгаалах улсын алба бүрт Гамшгаас хамгаалах тухай хуулийн 33.2-т заасны дагуу гамшгаас хамгаалах асуудал хариуцсан орон тооны алба хаагчийг батлагдсан төсөв, орон тоонд багтаан томилох, гамшгаас хамгаалах улсын албаны бэлэн байдал, харилцан ажиллагааг хангаж ажиллах;

1.7. Гамшгийн эрсдэлийг бууруулах Азийн сайд нарын бага хурлаас баталсан “Улаанбаатарын тунхаглал”, “Гамшгийн эрсдэлийг бууруулах Сендайн хүрээ хөтөлбөрийг хэрэгжүүлэх Азийн бүсийн 2018-2020 оны төлөвлөгөө”-ний хэрэгжилтийг хангах ажлыг эрчимжүүлэх;

1.8. Аймаг, нийслэл, сум, дүүрэгт гамшгийн аюулаас амжиж анхааруулах, эрт зарлан мэдээлэх тогтолцоог бүрдүүлэх;

1.9. Аюулт үзэгдэл, осол, гамшгийн цагийн байдлын талаарх мэдээ, мэдээллийн найдвартай, эх сурвалжийн нэгдмэл байдлыг хангаж, мэргэжлийн байгууллагууд хоорондын ажлын уялдааг хангах;

1.10. “Болзошгүй гамшиг, нийгмийн эрүүл мэндийн ноцтой байдлын үеийн салбар хоорондын мэдээлэл солилцох, хариу арга хэмжээг шуурхай зохион байгуулах” журмын хэрэгжилтийг хангаж ажиллах.

Хоёр. Байгаль орчин, аялал жуулчлалын яам, Үндэсний хөгжлийн газар, Онцгой байдлын ерөнхий газарт:

2.1. Олон улсын түвшинд батлагдсан Тогтвортой хөгжлийн хөтөлбөр, Уур амьсгалын өөрчлөлтийн эсрэг Парисын хэлэлцээр, Гамшгийн эрсдэлийг бууруулах Сендайн үйл ажиллагааны хүрээ баримт бичгүүдийг үндэсний хэмжээнд харилцан уялдаатай хэрэгжүүлэхэд нягт хамтран ажиллах.

Гурав. Хууль зүй, дотоод хэргийн яам, Батлан хамгаалахын яаманд:

3.1. Гамшгаас урьдчилан сэргийлэх, хор уршгийг арилгах үйл ажиллагаанд төрийн цэргийн болон тусгай чиг үүргийн байгууллагын оролцоо, чадавхыг нэмэгдүүлэх.

Дөрөв. Гадаад харилцааны яаманд:

4.1. Гамшгаас хамгаалах салбарын хоёр болон олон талт хамтын ажиллагааг өргөжүүлэх, чадавхыг нэмэгдүүлэхэд дэмжлэг үзүүлэн ажиллах;

4.2. Гамшгийн эрсдэлийг бууруулах дэлхийн болон бүс нутгийн платформоор дамжуулан үндэсний зөвлөлийн чадавхыг нэмэгдүүлэх.

Тав. Сангийн яаманд:

5.1. Даатгалын өнөөгийн эрх зүйн болон санхүүгийн зохицуулалтын орчинд суурь судалгаа хийж,Монгол Улсын нөхцөл байдалд нийцсэн гамшгийн даатгалын болон давхар даатгалын тогтолцоог бий болгох.

Зургаа. Барилга, хот байгуулалтын яам, Шинжлэх ухааны академид:

6.1. Аймгуудын газар хөдлөлтийн бичил мужлалын зургийг боловсруулж, газар зүйн болон зайнаас тандан судлах технологийг хөгжүүлэх,гамшгийн эрсдэлийг бууруулах үйл ажиллагаанд нэвтрүүлэх.

Долоо. Уул уурхай, хүнд үйлдвэрийн яам, Эрчим хүчний яам, Эрүүл мэндийн яаманд:

7.1. Гамшгаас хамгаалах эрүүл мэндийн улсын алба, эрчим хүний улсын алба, зам тээврийн улсын албанд эрсдэлийн тойм судалгаа, гамшгийн эрсдэлийн үнэлгээ хийх.

Найм. Хүнс, хөдөө аж ахуй, хөнгөн үйлдвэрийн яам, Байгаль орчин, аялал жуулчлалын яаманд:

8.1. Ган, зудын эрсдэлийг тооцох, аюулыг эртнээс сэрэмжлүүлэх, эрт хариу авах арга хэмжээг төлөвлөн хэрэгжүүлэх.

Ес. Хөдөлмөр нийгмийн хамгаалалын яам, Боловсрол, соёл, шинжлэх ухаан, спортын яаманд:

9.1. Гамшгийн эрсдэлийг бууруулах чиглэлээр бүх насны хүүхэд, эмэгтэйчүүд, хөгжлийн бэрхшээлтэй хүмүүсийн чадавхыг нэмэгдүүлэх арга хэмжээг төлөвлөн хэрэгжүүлэх.

Арав. Барилга, хот байгуулалтын яам, Мэргэжлийн хяналтын ерөнхий газарт:

10.1. Улсын хэмжээнд ерөнхий боловсролын сургууль, цэцэрлэг, эмнэлэг, нийтийн орон сууцны барилга, байгууламжийг газар хөдлөлтийн аюулд тэсвэртэй байх нөхцлийг хангах, хяналтыг дээшлүүлэх.

Арван нэг. Харилцаа, холбоо, мэдээллийн технологийн газарт:

11.1. Гамшгийн эрсдэлийг бууруулахад шинэ техник, технологи, инновацийг нэвтрүүлэх.

Арван хоёр. Үндэсний аюулгүй байдлын зөвлөлийн Стратегийн судалгааны хүрээлэнд:

12.1. Гамшгаас хамгаалах бодлого, хөтөлбөр, салбаруудын бодлого, төлөвлөлт, аймаг, нийслэлийн эдийн засаг, нийгмийг хөгжүүлэх үндсэн чиглэл, хөгжлийн бодлого, хөтөлбөрт гамшгийн эрсдэлийг бууруулах үйл ажиллагааг тусгасан байдалд дүн шинжилгээ хийх.

Арван гурав. Засгийн газрын Хэрэг эрхлэх газрын Хэвлэл мэдээлэл, олон нийттэй харилцах хэлтэст:

13.1. Олон нийтэд гамшгийн эрсдэлийг бууруулах мэдлэг ойлголтыг олгох, Үндэсний зөвлөлийн үйл ажиллагааг сурталчлан таниулах, хэвлэл мэдээллийн байгууллагын оролцоог хангах.

Арван дөрөв. Монголын Улаан загалмайн нийгэмлэг, Монголын Үндэсний худалдаа, аж үйлдвэрийн танхимд:

14.1. Гамшгийн эрсдэлийг бууруулахад иргэн, аж ахуйн нэгж, төрийн бус байгууллагын оролцоог нэмэгдүүлж төр, иргэний нийгэм, хувийн хэвшлийн түншлэлийг хөгжүүлэх, гамшгийн эрсдэлийг бууруулахад хувь нэмэр оруулсан иргэн, хуулийн этгээдийг урамшуулах эрх зүйн орчин, механизмыг бий болгох зэрэг зөвлөмжийг гаргаад байна гэж Онцгой байдлын ерөнхий газрас мэдээллээ.

Олон улсын статистикийн газраас хийсэн судалгаагаар Монгол Улс явган зорчигчдод хамгийн эрсдэлтэй орны жагсаалтыг тэргүүлсэн байдаг. Тэр дундаа осолд өртсөн бага насны хүүхдийн тоогоор дэлхийн улс орны жагсаалтыг манлайлж байгаа юм. Өнгөрөгч онд гэхэд л 375 хүүхэд осол гэмтлээр амиа алдсан байна. Амиа алдсан хүүхдүүд ямар ч дайн байлдаан, алан хядах ажиллагааны золиос болоогүй зөвхөн авто замын ослын улмаас хорвоог орхисон нь харамсалтай.

Зам тээврийн осолд өртөгсөд ихэвчлэн хавсарсан хүнд гэмтлийн улмаас амь насаа алддаг бөгөөд ГССҮТ-д өдөртөө 500 гаруй иргэн яаралтай түргэн тусламжаар үйлчлүүлдэг аж. Тээврийн цагдаагийн албанаас мэдээлснээр осол гэмтлийн 80 гаруй хувь нь орон нутгийн замд үйлдэгддэг бөгөөд ихэнхдээ суудлын бүс зүүгээгүй, согтууруулах ундаа хэрэглэсэн үедээ тээврийн хэрэгсэл жолоодсон, хүүхдийг зориулалтын суудалд тээвэрлээгүй зэргээс үүддэг байна.

Тэгвэл өнөөдөр /2019.04.11/ “Осол, гэмтлээс сэргийлэх тогтвортой хөгжил–2030” салбар дундын үндэсний чуулганыг угтан нийслэлийн эрүүл мэндийн байгууллагууд, Тээврийн цагдаагийн алба хамтран “Авто ослоор алаг үрсээ алдсаар байх уу” өдөрлөг зохион байгуулж байна. Энэ хүрээнд эрүүл мэндийн салбарын бүх эмч, эмнэлгийн мэргэжилтнүүд 12.30-13.00 цагийн хооронд “Авто ослоор алаг үрсээ алдсаар байх уу” уриан дор дуу хоолойгоо нэгтгэн, байгууллагынхаа гадна талбай болон ойролцоох авто замын дагуу осол, гэмтлээс сэргийлэх уриалга, улаан өнгийн анхааруулга тэмдэг бүхий лоозон барьж зогсон зам тээврийн ослоос урьдчилан сэргийлэхэд нэгджээ.

Нийслэлийн баруун хойд хэсэгт орших “Далан давхар”-ын оршуулгын газарт түймэр гарчээ. Уг түймрийг унтраахаар Онцгой байдлын алба хаагчид ажиллаж байна. Гал гарсан тухай дуудлага Нийслэлийн онцгой байдлын газарт 03.00 цагийн орчимд иржээ.

Галын шалтгааныг одоогоор урьдчилсан байдлаар хэлэх боломжгүй гэж Нийслэлийн онцгой байдлын газраас мэдээлсэн бөгөөд орон гэргүй хүмүүс гал алдсан байж болзошгүй байгаа аж.