Month: April 2019

Авто тээврийн үндэсний төв /АТҮТ/-ийн үүдэнд өнөөдөр /2019.04.15/ Хөвсгөл-Улаанбаатар чиглэлд тээвэр эрхэлдэг жолооч нар жагслаа.

Хөвсгөл-Улаанбаатар чиглэлд өдөр бүр 08:00, 15:00, 18:00, 20:00 цагуудад автобус явдаг ч АТҮТ-өөс өнгөрсөн долоо хоногт буюу энэ сарын 12-ноос эхлэн 19:00 цагийн шинэ давтамж нэмж, “Чингүн хурд транс” компанид өгөх шийдвэр гаргажээ. Дээрх шийдвэрийг эсэргүүцэж байна гэж тэд мэдэгдэв. Өмнө нь “Нөхөрлөл зам хоршоо”, “Мин транс” зэрэг компани 19:00 цагт давтамж авах хүсэлтийг АТҮТ-д өгч байсан аж. Гэтэл ямар ч сонгон шалгаруулалт зарлалгүйгээр “Чингүн хурд транс ” компанийг 19:00 цагийн давтамжид оруулсан нь шударга бус. Үүнийг эсэргүүцэж байна” гэж жагсагчид мэдэгдсэн юм.

Тэгвэл АТҮТ-ийн Тээвэр зохицуулалтын хэлтсийн зорчигч тээврийн тасгийн дарга Г.Дуламсүрэн:

АТҮТ-өөс гаргасан шийдвэр нь албан бусаар, гэрээгүйгээр нэмэлт автобус гаргаж явуулдаг байдлыг бид цэгцэлсэн төдий. Өөрөөр хэлбэл, албан ёсоор баталгаажуулах үүднээс энэ сарын 12–ноос эхлэн 19:00 цагийн давтамжийг шинээр нэмж оруулан “Чингүн хурд транс” компанид өгсөн.

Энэ байдлыг ойлгохгүйгээр манай хоёр компани бид нар явах ёстой гэж үл ойлголцлын асуудал үүсгээд байна. Бид Авто тээврийн тухай хууль, Нийтийн зорчигч тээврийн үйлчилгээний стандартын хүрээнд гэрээ байгуулдаг. Гурван компанийн хувьд гурвуулаа нийтийн зорчигч тээврийн үйлчилгээ эрхлэх стандарт шаардлагыг хангачихсан.

Гэхдээ үндсэн тээвэрлэгчид нь болох “Нөхөрлөл зам хоршоо, “Мин Транс” компани нь 18:00, 20:00 цагуудад албан бус төлөвлөлт хийж, нэмэлт хийн хоёр тээврийн хэрэгсэл гаргадаг байсан юм.

Тээвэрлэлтийн хүчин чадлаас нь харахад “Мин транс” компани паркийнхаа 84 хувийг, “Нөхөрлөл зам хоршоо” компани 54 хувийг ашиглаж байна. Харин “Чингүн хурд транс” компани долоон хоног нэг рейс /өдөр/ гүйцэтгэдэг ба паркийнхаа зургаан хувийг л ашиглаж байна. Цаана нь 90 гаруй хувийн нөөцтэй бий гэсэн үг. Тиймд чөлөөт өрсөлдөөнийг бий болгох үүднээс “Чингүн хурд транс” компаниас ирсэн хүсэлтийг үндэслэн давтамж гаргаж өгсөн хэрэг.

Түүнээс биш үндсэн явж байгаа хоёр компанийн явж буй цаг дээр оруулаагүй. Эрэлт байгаа учраас нэмэлт цагийг оруулсан гэдгийг иргэд болон жолоочид маань зөвөөр ойлгох хэрэгтэй” гэлээ.

Нийтийн эзэмшлийн гудамж, зам талбай, орон сууц, гэр хорооллын гудамж, гуу жалганд ил задгай хог хаягдал ихээр үүсэж байгаатай холбогдуулан хог хаягдлын үйлчилгээний чанар, хүртээмжийг нэмэгдүүлэх зорилгоор энэ сарын 20-ны өдөр Улаанбаатар хотын хэмжээнд бүх нийтийн их цэвэрлэгээг зохион байгуулах гэж байна. Тодруулбал, Иргэдийн эрүүл аюулгүй цэвэр орчинд амьдрах эрхийг хамгаалахад аж ахуй нэгж байгууллага, иргэдийн оролцоог нэмэгдүүлэхийн тулд ирэх Бямба гаригт их цэвэрлэгээний 90 минут арга хэмжээг зохион байгуулах гэж байна. Улаанбаатар хотын Ерөнхий менежерийн баталсан хуваарийн дагуу дүүргийн нутаг дэвсгэр үйл ажиллагаа явуулж буй иргэн аж ахуй нэгжүүд орчны 50 метр газар, нийтийн эзэмшлийн зам талбай, өөрийн хашаан доторх хог хаягдал, хатсан хөл газрын ургамал болон байгууллагын хаяг, хаягийн байгууламжийг цэвэрлэх юм.

Цэвэрлэгээний явцад Нийслэлийн мэргэжлийн хяналтын газрын Улсын байцаагчид бүрэн хяналт тавих бөгөөд хангалтгүй оролцсон аж ахуй нэгжүүдийг зохих хууль журмын хүрээнд хариуцлага тооцох аж.

Иймд дүүргийн нутаг дэвсгэрт үйл ажиллагаа явуулж буй иргэн, аж ахуй нэгжүүд Их цэвэрлэгээний 90 минутад идэвхтэй оролцоно уу хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Үндэсний статистикийн хороо өнөөдөр 2019 оны гуравдугаар сарын нийгэм, эдийн засгийн байдлыг танилцуулав.

Уг тайлангаар өнгөрсөн гуравдугаар сард хэрэглээний бараа, үйлчилгээний үнэ улсын хэмжээнд өмнөх сараас 0.7%, өмнөх оны эцсээс 1.8%, өмнөх оны мөн үеэс 6.7%-аар өссөн байна.

Инфляц өмнөх оны мөн үеэс ийнхүү 6.7 хувиар өсөхөд

1. Хүнсний бараа, ундаа, усны бүлгийн үнэ дүнгээрээ 8.2 хувь, тэр дундаа

• мах, махан бүтээгдхүүний дэд бүлгийн үнэ 20.5 хувь
• согтууруулах бус ундааны дэд бүлгийн үнэ 6.2 хувь
• сүү, сүүн бүтээгдэхүүн, өндөгний дэд бүлгийн үнэ 3.1 хувь өссөн бол

2. Согтууруулах ундаа, тамхины бүлгийн үнэ дүнгээрээ 4.1 хувь

3. Тээврийн бүлгийн үнэ дүнгээрээ 4.9 хувь

4. Орон сууц, ус, цахилгаан, хийн болон бусад түлшний бүлгийн үнэ дүнгээрээ 8.7 хувь, үүнд цахилгаан, хийн болон бусад түлшний дэд бүлгийн үнэ 9.3 хувь

5. Эм тариа, эмнэлгийн үйлчилгээний бүлгийн үнэ дүнгээрээ 9.9 хувиар өссөн нь голлон нөлөөлсөн байна.

Харин өмнөх сараас 0.7% өсөхөд хүнсний бараа, ундаа, усны бүлгийн үнэ дүнгээрээ 1.9 хувь, согтууруулах ундаа, тамхины бүлгийн үнэ дүнгээрээ 0.2 хувь, хувцас, бөс бараа, гутлын бүлгийн үнэ 0.6 хувиар өссөн нь голлон нөлөөлсөн байна.

Тэгвэл Улаанбаатар хотод хэрэглээний бараа, үйлчилгээний үнэ 2019 оны гуравдугаар сард өмнөх сараас 0.8%, өмнөх оны эцсээс 1.5%, өмнөх оны мөн үеэс 7.5 хувиар өслөө.

Нийслэлд инфляци өмнөх оныхоос 7.5% өсөхөд

• хүнсний бараа, ундаа, усны бүлгийн үнэ 7.7 хувь,
• хувцас, бөс бараа, гутлын бүлгийн дүн 10.5 хувь,
• орон сууц, ус, цахилгаан, түлшний бүлгийн үнэ дүнгээрээ 12.0 хувь,
• согтууруулах ундаа, тамхины бүлгийн үнэ дүнгээрээ 4.6 хувь,
• тээврийн бүлгийн үнэ 4.2 хувиар өссөн нь голлон нөлөөлжээ.

Улаанбаатар хотод 2019 оны 3 дугаар сард өмнөх сараас хэрэглээний сагсны 344 нэрийн бараа, үйлчилгээний 34.6 хувь буюу 119 бараа, үйлчилгээний үнэ өсөж, 4.9 хувь буюу 17 бараа, үйлчилгээний үнэ буурч, 60.5 хувь буюу 208 бараа үйлчилгээний үнэ өөрчлөлтгүй байв.

Судалгаанд сонгогдсон хүнсний 100 нэрийн барааны 62 нэрийн барааны үнэ нэмэгджээ.

Онцгой байдлын ерөнхий газар, ОХУ-ын ОБЯ-ны Бүгд Найрамдах Буриад Улс дахь Ерөнхий газар хоорондын “2018 оны хамтын ажиллагааг дүгнэх, 2019 оны хамтын ажиллагааны төлөвлөгөөг батлах ажлын уулзалт” энэ сарын сарын 07-10-ны өдрүүдэд Улаан-Үүд хотноо зохион байгуулагдлаа.

Уулзалтад ОБЕГ-ын Улсын нөөц, хүмүүнлэгийн тусламжийн газрын дарга, дэд хурандаа Ч.Цогбаяр, Гадаад хамтын ажиллагааны хэлтсийн мэргэжилтэн, дэслэгч Э.Энэрэлбуян, ХСИС-ийн ОБС-ийн захирал, хурандаа Х.Сүхбаатар болон Орхон, Булган, Дархан-Уул, Сэлэнгэ, Төв аймгийн Онцгой байдлын газрын дарга нар оролцсон юм.

Энэ үеэр талууд хил орчмын гамшгаас хамгаалах, гамшгийн аюулаас урьдчилан сэргийлэх хамтын ажиллагааны хүрээнд 2018 онд гарсан ахиц дэвшил, хор уршгийг арилгахад гарсан тэргүүн туршлага, гамшиг ослын өнөөгийн нөхцөл байдлын талаар харилцан санал солилцлоо. Мөн 2018 онд хамтран ажилласан төлөвлөгөөний хэрэгжилтийг дүгнэн, 2019 онд хэрэгжүүлэх үйл ажиллагааны төлөвлөгөөнд гарын үсэг зурсан юм.

Уулзалтын хүрээнд Хойд бүсийн төв-Орхон аймгийн Онцгой байдлын газрын Шуурхай удирдлага, зарлан мэдээллийн төв болон ОХУ-ын Бүгд Найрамдах Буриад Улсын Иргэний хамгаалалт, Онцгой байдлын газрын Шуурхай удирдлага, зарлан мэдээллийн төвүүдийг холбож, хамтран ажиллахаар боллоо гэж Онцгой байдлын ерөнхий газраас мэдээллээ.

ДЭМБ-аас жил бүр уламжлал болгон зохион байгуулдаг “Дэлхийн тамхигүй өдөр”-ийг энэ жил “ӨДӨР БҮРИЙГ ТАМХИГҮЙ ӨДӨР БОЛГОЦГООЁ” уриан дор ирэх тавдугаар сарын 31-нд тэмдэглэн өнгөрүүлэх гэж байна.

Тус өдрийг угтаж “Эрүүл цагдаа”, “Тамхигүй Улаанбаатар” хөтөлбөрийн хэрэгжилтийг хангах зорилгоор “Тамхины хорт зуршил, дам тамхидалт, түүнээс урьдчилан сэргийлж, таслан зогсоох арга зам”, “Эрчүүдийн эрүүл мэнд” сургалт, өдөрлөгийг Нийслэлийн Эрүүл мэндийн газар, Нийслэлийн Цагдаагийн газар, Наркологийн эмнэлэг, “Рамона медиа” компани, “Штада” төлөөлөгчийн газартай хамтран энэ сарын 5-наас эхлэн зохион байгуулж байна. Сургалтын арга хэмжээнд нийт 2000 гаруй цагдаагийн алба хаагч, ажилтнууд хамрагдах бөгөөд өнөөдрийн байдлаар Баянгол, Сонгинохайрхан, Багануур дүүргийн цагдаагийн хэлтсүүд хамрагдаад байна.

Тус сургалтын зорилго нь нийт цагдаагийн алба хаагч, ажилтан нарт эрүүл мэндийн боловсрол олгох, эрүүл зөв аж төрөх ёс, зан үйлийг төлөвшүүлэх, эрүүл чийрэг бие бялдар, сэтгэл зүйг бэлтгэх, тамхины хорт зуршлаас татгалзах, багасгах сэдэл төрүүлэх, эрэгтэйчүүдийн эрүүл мэндийн чиглэлээр мэдээлэл хүргэж, хамтран ажиллахад оршиж буй юм.

Халхын голын байлдааны ялалтын 80 жилийн ойн хүрээнд ҮБХИС, “Тусгаар тогтнолын үнэ цэнэ” ТББ, Улаанбаатар хот дахь Ховд аймгийн Манхан сумын нутгийн зөвлөл хамтран БНМАУ-ын баатар Ц.Олзвойн бунханы дурсгалын хөшөөг шинэчилсэн байна. Гэрэлт хөшөөний нээлтэд УИХ-ын гишүүн С.Бямбацогт, УИХ-ын гишүүн асан Д.Дэмбэрэл, Батлан хамгаалахын дэд сайд Т.Дуламдорж, Зэвсэгт хүчний Хуурай замын цэргийн командлагч, бригадын генерал Б.Амгаланбаатар, ҮБХИС-ийн захирал, хурандаа П.Жаргалан, ЗХЖШ-ын АУГ-ын орлогч дарга, бригадын генерал Л.Онцгойбаяр нарын албаныхан оролцсон юм.

Төв аймгийн Хөшигийн хөндийд шинээр барьж буй олон улсын нисэх онгоцны буудлыг түшиглэн олон улсын зорчигч, ачаа тээвэр, логистик, банк санхүү, мэдээллийн технологи, аялал жуулчлал, чөлөөт бүс бүхий агаар, төмөр зам болон авто замын зангилаа төв болох шинэ хот байгуулахаар энэ оны нэгдүгээр сард Засгийн газраас 29 дугаартай тогтоол гаргасан. Нисэх буудлыг даган байгуулах шинэ хот /Аэросити/-ын хөгжлийн ерөнхий төлөвлөгөөтэй нийслэлийн ИТХ-ын дарга Р.Дагва танилцаж, холбогдох албаныхантай санал солилцов.

Олон улсын нисэх онгоцны шинэ буудлыг даган хөгжих хотын ирээдүйн хөгжлийг дэлхийн жишигт нийцсэн ухаалаг байхаар төлөвлөжээ. Улмаар тус төлөвлөгөөтэй уялдуулан хүн амын суурьшил болон эдийн засгийн таталцал нөлөөллийг уялдуулж төлөвлөлтийн үндсэн шийдэл, хөгжлийн тэргүүлэх чиглэлийг тодорхойлсон аж. Ингэхдээ хил залгаа орших хаяа хот, тосгод, аймаг, сумдын ерөнхий төлөвлөгөөний дагуу хэрэгжүүлэхээр төлөвлөж буй үйлдвэрлэлийг тус хотод давхар бий болгохгүй гэдгийг холбогдох албаныхан хэллээ.

Тус хотыг 12.000 га талбайд байгуулахаар төлөвлөсөн бөгөөд үндсэн зургаан бүсчлэлээр хөгжүүлэх юм байна. Тодруулбал, орон сууцны, олон нийтийн ажил хэргийн, үйлдвэрийн, ногоон байгууламжийн, холимог ашиглалтын, инженерийн шугам сүлжээний гэсэн үндсэн бүсчлэлээр хөгжүүлэх аж. Тэдгээрээс ногоон байгууламжийн бүс хамгийн том буюу 5000 орчим га талбайг хамрах юм байна.

Нийслэлийн ИТХ-ын дарга Р.Дагва уулзалтын үеэр “БХБЯ, БОАЖЯ, БСШУСЯ болон Төв аймгийн удирдлага шинэ суурьшлын бүсийн стратеги, төлөвлөлтийн талаар санал солилцлоо. Төв аймгийн удирдлага бодлого, төлөвлөлт гаргасан байна. Улаанбаатар хотын удирдлага ямар бодлого баримтлахаа мөн танилцууллаа. Чиглэлийн яамдуудын төлөөллүүд уулзалтын үеэр тодорхой саналуудаа хэллээ. Тэгэхээр бид тархай байгаа эдгээр концевц, саналыг нэгтгэх ёстой юм. Гэхдээ суурьшлын шинэ бүс байгуулах ажлыг эхлүүлсэн нь сайшаалтай” гэв.

Энэ оны гуравдугаар сард улсын хэмжээнд 6,551 хүүхэд мэндэлжээ.

Нийт төрсөн хүүхдийн 3,311 нь эрэгтэй, 3,240 нь эмэгтэй хүүхэд байна. Эдгээрээс 170 нь ихэр хүүхэд байсныг ЭМЯ-ны цахим бүртгэлд тэмдэглэжээ. Шинээр төрсөн хүүхдүүдийн дундаж жин 3,394 грамм байсан бол дундаж өндөр 51 см байна. Нийт амаржсан эхчүүдийн 3.9 хувь нь 20 хүртэлх насныхан байгаа бол 4.0% нь 40-өөс дээш насныхан байжээ. Мөн амаржсан эхчүүдийн 44.5 хувь нь гэрлээгүй, 1.4 хувь нь гэрлэлтээ цуцлуулсан болохыг Үндэсний статистикийн хорооноос танилцуулсан 2019 оны гуравдугаар сарын нийгэм, эдийн засгийн байдлын тайланд тусгасан байна.