Month: April 2019

Нийслэлийн Үйлдвэрлэл, инновацын газрын дарга Б.Бат-Эрдэнэ өнөөдөр Их Британийн Оксфордын их сургуулийн Технологийн хөгжлийн комисс болон “Аксесс солушин” ХХК-ийн бие төлөөлөгчдийг хүлээн авч уулзлаа. Дээрх байгууллагууд Монгол Улсын эдийн засагт орчин үеийн цахим мэдээллийн технологийн нөлөөллийн талаарх “Технологийн хөгжлийн зөвлөмж боловсруулах” төслийг хамтран хэрэгжүүлж байгаа юм.

Уулзалтын үеэр Б.Бат-Эрдэнэ төлөөлөгчдөд Улаанбаатар инновацын төвийг танилцуулахын сацуу уг төслийн хэрэгжилтийг дэмжин төслийн судалгааны багийг Улаанбаатар инновацын төвд байрлуулж, хэрэгцээт мэдээллээр ханган хамтран ажиллах боломжтой гэдгээ илэрхийллээ.

Оксфордын их сургуулийн технологийн хөгжлийн комиссын үйл ажиллагааны зорилго нь хөгжиж буй улс орнуудын эдийн засаг дахь орчин үеийн дэвшилтэт технологийн эерэг болон сөрөг талыг судлах, ялангуяа засгийн газрын үйл ажиллагааны чиглэлд мэдээллийн сан, үйлчилгээ, нийгмийн халамж зэрэг салбаруудад автоматжуулалт, цахим технологи нэвтрүүлэхийн давуу болон сул талыг судлахад чиглэдэг.

Энэхүү төслийн үр дүнд УИХ-ын 2019 оны намрын чуулганаар хэлэлцэх технологийн чиглэлийн хуулийн хэлэлцүүлэгт ашиглагдах бодлогын зөвлөмжүүд гарах юм. Үүнд:

• Цахим хөгжлийн бэлэн байдал, одоогийн түвшингээ тогтоох
• Цахим хөгжлийн хүчирхэг суурийг тавих зорилгоор үндэсний хэлэлцүүлгүүд зохион байгуулах
• Цахим хөгжил, технологийн дэвшлийн хүртээмжтэй өсөлтийг дэмжих улс орны хөгжлийн төлөвлөгөөнд дэмжлэг үзүүлэх зэрэг багтаж байгаа юм гэж нийслэлийн Үйлдвэрлэл, инновацын газраас мэдээлэв.

Нийслэлийн иргэдийн Төлөөлөгчдийн Хурлын 2018 оны 16/08 дугаар тогтоолоор батлагдсан “Нийслэлийн иргэдийн хууль, эрх зүйн боловсролыг дээшлүүлэх” дэд хөтөлбөрийн хүрээнд Нийслэлийн Засаг даргын Тамгын газар, Багануур дүүргийн Засаг даргын Тамгын газартай хамтран тус дүүргийн иргэдэд зориулсан төрийн үйлчилгээ, эрх зүйн зөвлөгөө өгөх өдөрлөгийг энэ сарын 18-ны өдөр зохион байгуулах гэж байна.

Өдөрлөгт Нийслэлийн Газар зохион байгуулалтын алба, Гэр бүл, хүүхэд, залуучуудын хөгжлийн газар, Нийгмийн халамжийн газар, Татварын газар, Хөдөлмөр эрхлэлтийн газар, Нийслэлийн Цагдаагийн газар, Монголын Хуульчдын холбоо, Хүмүүнлэгийн Ухааны их сургууль зэрэг байгууллагууд хамтран оролцоно гэж нийслэлийн ЗДТГ-ын Хууль, эрх зүйн хэлтсээс мэдээлэв.

Онцгой байдлын ерөнхий газрын даргын 2019 оны А/122 тоот тушаалаар Дотоод хяналт шалгалт, аюулгүй байдлын газрын дарга, хурандаа Г.Бат-Эрдэнээр ахлуулсан ажлын хэсэг Дархан- Уул аймгийн Онцгой байдлын газарт иж бүрэн шалгалтыг зохион байгуулан ажиллаж байна.

Ажлын хэсэг иж бүрэн шалгалтыг Дархан, Орхон аймгийн Онцгой байдлын газарт, биелэлтийн шалгалтыг Булган аймгийн Онцгой байдлын газарт энэ сарын 16-22-ны өдрүүдэд зохион байгуулах юм гэж Онцгой байдлын ерөнхий газраас мэдээллээ.

Онцгой байдлын ерөнхий газраас нийслэлийн Засаг даргын тамгын газартай хамтран нийслэлийн хэмжээнд гамшгаас хамгаалах иж бүрэн сургуулийг энэ сарын 24-26-ны өдрүүдэд гурван үе шаттайгаар зохион байгуулахаар бэлтгэл ажлыг хангаж байна. Сургуулийн бэлтгэл ажлыг хангах хүрээнд нэгдсэн жагсаалын урьдчилсан бэлтгэлийг өнөөдөр 05:00 цагт Сүхбаатарын талбайд зохион байгууллаа. Жагсаалын бэлтгэлд нийслэл, дүүргийн Онцгой комисс, Гамшгаас хамгаалах алба, мэргэжлийн анги, нийслэлийн Засаг даргын Тамгын газар, Засаг даргын хэрэгжүүлэгч агентлаг, орон нутгийн өмчит газар, аж ахуйн нэгж, байгууллагын 4300 гаруй ажилтан, алба хаагч оролцлоо. Гамшгаас хамгаалах иж сургууль энэ сарын 24-ний өглөө “Яаралтай цуглар” дохиогоор нийслэл, дүүргийн Онцгой комисс, Гамшгаас хамгаалах алба, мэргэжлийн анги, нийслэлийн Засаг даргын Тамгын газар, Засаг даргын хэрэгжүүлэгч агентлаг, орон нутгийн өмчийн газар, аж ахуйн нэгж байгууллагуудын удирдлагууд Сүхбаатарын талбайд цуглаж, гамшгаас хамгаалах бэлэн байдлаа шалгуулан нэгдсэн жагсаалын арга хэмжээг зохион байгуулснаар эхлэх юм гэж Онцгой байдлын ерөнхий газраас мэдээллээ.

Дархан-Уул аймгийн нийт 16 цэцэрлэг эцэг эхчүүдээс хууль бус хандивын мөнгө авч байсан зөрчил илэрчээ. Тодруулбал, Авлигатай тэмцэх газрын Хяналт шалгалт, дүн шинжилгээний хэлтсийн албаны дарга, ахлах комиссар Ц.Цэцэгдэлгэрэхээр ахлуулсан ажлын хэсэг, тус аймаг дахь Иргэний хяналтын зөвлөлийн гишүүд хамтран иргэдээс ирүүлсэн гомдол, мэдээллийн мөрөөр шалгал зохион байгуулсан байна. Аймгийн төвийн нийт 18 цэцэрлэг, есөн сургуулийн “Үдийн цай” хөтөлбөр, хандив тусламж болон худалдан авах үйл ажиллагааны нөхцөл байдлыг газар дээр нь хянасан аж. Шалгалтаар, аймгийн хэмжээнд 2017-2018 онд эцэг, эхчүүдээс 132,8 сая төгрөгийн хандив авсан нь илэрсэн байна.

Монголбанк энэ сарын 8-ны өдөр Капитал банкийг татан буулгаж буйгаа мэдэгдэн, үйл ажиллагааг нь зогсоосон билээ. Тус банк санхүүгийн үйл ажиллагаа явуулах чадамжгүй болсон учраас татан буулгаж буйгаа тайлбарласан.

Тэгвэл өнөөдрөөс прокурорын байгууллагаас Капитал банктай холбоотой асуудлаар хэрэг бүртгэлийн хэрэг нээж, шалгаж эхэллээ. Капитал банкны удирдлагын эрх бүхий албан тушаалтнуудын үйлдэлд банкийг татан буулгахад хүргэсэн хууль бус үйл ажиллагаа байгаа эсэхэд хэрэг бүртгэлтийн хэрэг нээж, мөрдөн шалгах ажиллагаа явуулж эхэлсэн байна.

Нийслэлийн прокурорын газраас хяналт тавьж байгаа энэ хэрэгт мөрдөн шалгах тодорхой ажиллагаа явуулж эхэлсэн бөгөөд шалгалтын явц байдал, үр дүн, хэргийн шийдвэрлэлтийн талаар тухайн үед нь прокурорын байгууллагаас мэдээлэхээр болжээ.

Нийслэлийн Гэр бүл, хүүхэд, залуучуудын хөгжлийн газраас Монгол улсын хүүхдийн эрхийн тухай хууль, Хүүхэд хамгааллын тухай хууль Нийслэлийн Иргэдийн төлөөлөгчдийн тэргүүлэгчдийн хурлын 2017 оны 103-р тогтоол “Хүүхдийн насны онцлогт тохирсон хөгжлийг дэмжих дэд хөтөлбөр”, Нийслэлийн засаг даргын Сар бүрийн 09-ны өдрийг бидний эрүүл мэнд аюулгүй байдлыг хангах өдөр болгон зарласантай холбогдуулан бага насны хүүхдийг болзошгүй осол гэмтлээс урьдчилан сэргийлэх, тэдэнд эерэг дадал хэвшүүлэх нөлөөллийн ажлыг зохион байгуулж, эцэг эх олон нийтэд эрүүл аюулгүй орчинд амьдрах уриалга дэвшүүлэн ажиллаж байна.

Болзошгүй осол гэмтлээс урьдчилан сэргийлэх үйл ажиллагааг Монголын сурагчдын холбоотой хамтран хэрэгжүүлж байгаа бөгөөд ерөнхий боловсролын сургуулийн бага ангийн сурагчид болон тэдний эцэг эхэд чиглэсэн сургалт нөлөөллийн ажил энэ сарын 9-ний өдрөөс эхэллээ. Өнгөрсөн хугацаанд нийслэлийн ерөнхий боловсролын 20, 16, 9 дүгээр сургуулийн 450 хүүхэд болон тэдний 450 эцэг эхэд эрүүл аюулгүй орчин бүрдүүлэх талаар сургалт нөлөөллийн ажлыг зохион байгуулсан. Уг ажлын хүрээнд “Алтан-Аргай, Мөнгөн-Аргай” хүүхдийн үлгэрийн баатрууд хүүхэд багачуудад үзүүлэх сургалтыг зохион байгуулж байгаа бөгөөд баатруудын үйл явдалтай үлгэр, зохиолын хэлбэртэй зурагт зөвлөмжүүдийг олон нийтэд түгээж байна гэж Нийслэлийн Хүүхэд, гэр бүлийн хөгжлийн газраас мэдээллээ.

Нийслэлийн хэмжээнд 2019 оны 04 дүгээр сарын 24-26-ны өдрүүдэд ‘’Гамшгаас хамгаалах иж бүрэн сургууль’’ нэгдсэн арга хэмжээ зохион байгуулагдах гэж байгаа. Үүнтэй холбогдуулан дүүргийн Онцгой комиссын Газар хөдлөлтийн гамшгийн үед ажиллах ажлын хэсгийн ахлагч Т.Батцогт дүүргийн 28 хорооны Засаг дарга болон Зохион байгуулагчдад үүрэг даалгавар, мэдээлэл өгөв.

Тодруулбал, дүүргийн Онцгой комиссын IV хуралдаанаар гаргасан ‘’Гамшгаас хамгаалах иж бүрэн сургууль’’-ийн үед дүүргийн Онцгой комисс хэрхэн ажиллах төлөвлөгөөг хороодод танилцуулж, мэдээлэл, гарын авлагаар хангасан байна.

Сургуулийн хүрээнд ‘’Дүнжингарав’’ худалдааны төвийн урд талбайд гамшгийн дуут дохиогоор цугларсан 500 иргэнийг дүүргийн 20 дугаар хороо ‘’Монгол шилтгээн’’ амралтын газарт байрлах түр орогнуулах байр руу нүүлгэн шилжүүлэх юм. Түүнчлэн сүүлийн жилүүдэд Нийслэл хотод газар хөдлөлтийн идэвхжил нэмэгдэж байгаатай холбогдуулан дүүргийн 14 дүгээр хороо Халдварт өвчин судлалын үндэсний төвд ‘’Газар хөдлөлтийн гамшиг’’-ийн дуурайлган үзүүлэх дадлага сургуулийг зохион байгуулах юм хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.