Month: April 2019

Тээврийн цагдаагийн албанаас замын хөдөлгөөнд оролцож буй тээврийн хэрэгслүүдийн техникийн хяналтын үзлэгт хамрагдсан байдал, техникийн бүрэн бүтэн байдал, утаанаас ялгарах хорт бодисын хэмжээ зөвшөөрөгдөх түвшинд байгаа эсэх, өнгө үзэмж, гэрэлтүүлэх хэрэгсэл, дагалдах хэрэгсэл, иж бүрдэл хангагдсан эсэхийг шалгаж, зөрчлийг арилгуулах зорилгоор хяналт шалгалт хийж ажилласан.

Шалгалтыг Нийслэлийн Мэргэжилийн хяналтын газрын Автотээврийн хяналтын байцаагч, “Автотээврийн үндэсний төв” ТӨҮГ-ын мэргэжилтэн, оношлогч инженерүүдтэй хамтран 2019 оны 03 дугаар сарын 04-ний өдрөөс 04 дүгээр сарын 03-ны өдрүүдэд Нийслэлийн хэмжээнд зохион байгуулж ажилласан ба шалгалтад замын хөдөлгөөнд оролцож буй нийтийн зорчигч тээврийн үйлчилгээний их болон дунд багтаамжийн 229 автобус, Нийслэлийн гудамж замын хөдөлгөөнд оролцож буй тээврийн хэрэгслийн хамрагдлаа.

Нийтийн тээврийн чиглэлээр:

Нийслэлийн Тээврийн газрын тээврийн хэрэгслийн “Бүртгэлийн сан”-гаас үзэхэд нийт 18 аж ахуй нэгж байгууллага /төрийн-2, хувийн өмчийн-16/-ын 1147 их болон дунд багтаамжийн автобус үйлчилгээнд ажиллаж байгаа бөгөөд тэдгээрийн дундаж насжилт 8.9 жил байна. Ажлын өдөрт 934 автобус үйлчилгээнд ажиллаж, 600.0 мянга /давхардсан тоогоор/ гаруй зорчигч тээвэрлэж байна.

Шалгалтад хамрагдсан нийтийн зорчигч тээврийн үйлчилгээний их багтаамжийн 229 автобусыг шугам замд нь зогсоож, “Автотээврийн үндэсний төв” ТӨҮГ-ын хяналтын үзлэгийн явуулын төвөөр утааны тортогжилтын хэмжээг “Дизель хөдөлгүүртэй автомашин. Утааны тортогжилтын зөвшөөрөгдөх дээд хэмжээ ба хэмжих арга” MNS5014:2009 стандартад заасан шаардлагын дагуу шалгахад 67 автобусны утааны тортогжилтын хэмжээ зөвшөөрөгдөх дээд хэмжээнээс хэтэрсэн, 162 /70.7%/ нь хөдөлгүүрээс ялгарч буй утааны тортогжилтын хэмжээ хэвийн хэмжээнд байсан.

Шалгалтын явцад автобусны утааны тортогжилтын хэмжээ их тээвэрлэгч аж ахуйн нэгжүүдэд илэрсэн зөрчлийг арилгуулахаар хугацаатай үүрэг даалгавар өгч, гүйцэтгэлийг хангуулан ажилласан ба Зөрчлийн тухай хуульд заасны дагуу агаар бохирдуулах бодисын хаягдлын стандартаас хэтэрсэн бохирдуулах бодис гаргадаг хөдөлгөөнт эх үүсвэр ашиглан агаар бохирдуулсан, тээврийн хэрэгслийн техникийн шаардлага хангаж ажиллаагүй нийтийн зорчигч тээврийн үйлчилгээний 11 аж ахуйн нэгжид торгуулийн арга хэмжээг ногдууллаа.

Тээврийн хэрэгслийн бүрэн бүтэн байдлын чиглэлээр:

Автотээврийн хэрэгсэлд тавих ерөнхий шаардлага MNS 4598:2011 стандартын хэрэгжилтийг хангуулах ажлын хүрээнд тээврийн хэрэгслийн техникийн бүрэн бүтэн байдал, өнгө үзэмж, гэрэлтүүлэх хэрэгсэл зэргийг шалгасан.

Энэ шалгалтаар илт өнгө үзэмж муутай, оврын гэрэл өөр өнгийн гэрэл суурилуулсан, ойрын гэрэл, холын гэрэл асахгүй болсон, тоормосны гэрэл, оврын гэрэл анивчдаг гэрэлтэй, нэмэлтээр гэрэлтүүлэх хэрэгсэл суурилуулсан зэрэг нийт 4492 зөрчлийг илрүүлсэн ба техникийн үзлэгт хамрагдаагүй, гадна талын гэрэлтүүлэх хэрэгсэл зөрчилтэй тээврийн хэрэгсэл дийлэнх хувийг эзэлж байна.

“Бензин хөдөлгүүртэй автомашин–Утааны найрлага дахь хорт бодисын зөвшөөрөгдөх дээд хэмжээ ба хэмжих арга” MNS 5013:2009 стандартын хэрэгжилтийг хангуулах ажлын хүрээнд илт утаа их, стандартын шаардлага хангахгүй 127 тээврийн хэрэгслийг илрүүлэн, илэрсэн зөрчлийг арилгуулахаар Техникийн хяналтын үзлэгийн төвд дахин шалгуулах, автотээврийн хэрэгсэлд засвар үйлчилгээ хийлгэх талаар мэргэжил арга зүйн зөвлөгөө өгч ажилласан.

Өөрөөр хэлбэл дээрх шалгалтаар замын хөдөлгөөнд оролцож байгаа 3 тээврийн хэрэгсэл тутмын 1 нь бүрэн бус, техникийн шаардлага, стандартыг хангахгүй байна гэж үзэж болно.

Түүчнлэн Шалгалтад хамрагдсан нийт аж ахуйн нэгж, иргэд, инженер техникийн ажилтан, жолооч, ажиллагсдад илэрсэн зөрчлийг бүрэн арилгаж, үйл ажиллагаагаа сайжруулж ажиллах талаар мэргэжил, арга зүйн зөвлөгөө өгч, үр дүнтэй зохион байгууллаа.

Онцгой байдлын ерөнхий газар өнөөдөр нийслэлийн гамшгаас хамгаалах иж бүрэн сургуулийг Д.Сүхбаатарын талбайд зохион байгууллаа. 1990 оноос хойш 29 жилийн дараа хийж байгаа энэ сургуулийг Монгол Улсын Ерөнхий сайд У.Хүрэлсүх нээж үг хэлэв.

Энэ удаагийн иж бүрэн сургууль нь газар хөдлөлтийн аюулаас урьдчилан сэргийлэхэд төрийн захиргааны болон аж ахуйн нэгж, байгууллагын бэлэн байдлыг хангах, байгууллага хоорондын ажлын уялдаа, хамтын ажиллагааг сайжруулах, ард иргэдийн оролцоог нэмэгдүүлэх, байгууллага, иргэдийн үүрэг гүйцэтгэх чадавхийг дээшлүүлэх зорилготой юм.

Гамшгийн эрсдэлийг бууруулна гэдэг нь гарахаас нь өмнө урьдчилан сэргийлнэ гэсэн үг. Гамшиг тохиолдсоны дараа эрсдэлийг бууруулна гэж ярих нь оройтсон хэрэг. Иймд иргэн бүр газар хөдлөлтийн аюулаас өөрийн амь нас, эд хөрөнгөө, бусдын амь насыг авран хамгаалах аргад суралцах шаардлагатай. Хэдийгээр төсөв мөнгөний хүндрэл байгаа ч иргэдийнхээ амь нас, амьдралтай холбоотой энэ асуудлыг шийдэхийн төлөө бүх шатандаа хичээж, идэвхтэй ажиллах хэрэгтэй. Монгол Улсын Засгийн газар газар хөдлөлтийн аюулаас урьдчилан сэргийлэхийн төлөө онцгой анхаарна гэдгийг Ерөнхий сайд хэлэв.

Сүүлийн жилүүдэд манай улсад газар хөдлөлтийн идэвхжил нэмэгдэж, өнгөрсөн 10 жилд 260 мянган удаа газар хөдөлсөн байна. Улаанбаатар хот орчимд 2005 он хүртэл жилд дунджаар 200 орчим газар хөдөлж байсан бол 2013 онд энэ тоо 10 дахин өсчээ. 2019 оны эхний гурван сарын байдлаар 261 удаа газар хөдлөлт болсон нь 2018 оны эхний гурван сартай харьцуулахад 70 тохиолдлоор нэмэгдсэн байна.

Маргааш буюу 04 дүгээр сарын 25-ны өглөөний 07 цагаас 09 цаг 30 минутын хооронд Улаанбаатар хотын машин техникийн хөдөлгөөнийг бүрэн зогсоож, 08 цагт зарлан мэдээллийн дохио дуугарна. Энэ хугацаанд газар хөдлөлтийн аюул тохиолдсон үед ард иргэдийг аюулгүй цэг, талбайд шилжүүлэх зэрэг дадлага, сургууль хийх юм гэжЗасгийн газрын Хэвлэл мэдээлэл, олон нийттэй харилцах хэлтсээс мэдээллээ.

Аж үйлдвэрийн салбар дахь хамтын ажиллагааны Монгол-Оросын Ажлын багийн анхдугаар хуралдаан энэ сарын 22-ны өдөр Москва хотноо боллоо.

Хуралдаанд Монголын талаас Уул уурхай, хүнд үйлдвэрийн сайдын зөвлөх Х.Наранхүү, Монгол Улсаас ОХУ дахь Хэргийг түр хамаарагч О.Очирмаа, Уул уурхай, хүнд үйлдвэрийн яамны Төрийн захиргааны удирдлагын газрын дарга М.Баяраа, Оросын талаас Ажлын багийн Оросын хэсгийн дарга, Аж үйлдвэр, худалдааны дэд сайд, Төрийн нарийн бичгийн дарга В.Л.Евтухов тэргүүтэй төлөөлөгчид оролцож хоёр орны аж үйлдвэр, боловсрол, худалдааны салбарын цаг үеийн болон бодлогын асуудлаар санал солилцсон юм.

Тодруулбал, агаарын тээврийн хэрэгслийн үйлдвэрлэл, хөдөө аж ахуйн тоног төхөөрөмжийн үйлдвэрлэл, хөнгөн аж үйлдвэр, гангийн салбар дахь хамтын ажиллагааг өргөжүүлэх боломжтойг хоёр орны төлөөлөгчид онцлов. Түүнчлэн Монголын боловсролын тогтолцоонд Оросын боловсролын тоон шийдлийг нэвтрүүлэх, ашиглах боломж, Монголын Худалдааны төлөөлөгчийн газрыг Владивосток хотноо нээх эрх зүйн орчны талаар хэлэлцсэн юм.

ОХУ-ын Аж үйлдвэр, худалдааны дэд сайд, Төрийн нарийн бичгийн дарга В.Л.Евтухов, “Хоёр орны аж үйлдвэр, худалдааны салбарын цаг үеийн болон бодлогын асуудлаар мэдээлэл солилцсон чухал, ажил хэрэгч, найрсаг хурал болсныг тэмдэглэсэн юм. Тэрбээр ирэх 5 дугаар сард Улаанбаатар хотноо зохиох Худалдаа, эдийн засаг, шинжлэх ухаан, техникийн хамтын ажиллагааны ЗГХК-ын ээлжит 22 дугаар хуралдаанд биечлэн оролцохоо илэрхийлэв.

Хуралдааны үеэр, Монгол Улстай харилцаа, хамтын ажиллагаа тогтоох, хөгжүүлэх саналтай Оросын компаниудын зарим төлөөлөлтэй манай төлөөлөгчид уулзаж, ажил хэргийн холбоо тогтоов.

Онцгой байдлын ерөнхий газраас нийслэлийн Засаг даргын тамгын газартай хамтран нийслэлийн хэмжээнд Гамшгаас хамгаалах иж бүрэн сургуулийг 2019 оны 04 дүгээр сарын 24-26-ны өдрүүдэд зохион байгуулахаар бэлтгэл ажлыг ханган ажиллаж байна. Гамшгаас хамгаалах иж бүрэн сургууль нь гурван үе шаттайгаар зохион байгуулагдах юм.

Гуравдугаар шат 2019.04.25-нд явагдах бөгөөд зарлан мэдээллийн дуут дохионы цамхгаар “Газар хөдлөлт” болсон тухай зарлан мэдээлэл дамжуулан хүргэх ба 45 мянга гаруй орон сууцны 480 мянган иргэд гамшгаас хамгаалах 111 аюулгүйн талбайд гарах юм. Нийслэлийн Иргэдийн төлөөлөгчдийн хурлын 2016 оны 94 дүгээр тогтоолоор батлагдсан 111 аюулгүйн талбайн жагсаалтыг хүргэж байна.

Жич: Хорооны дугаар нь жагсаалтад хороо иргэд өөрт ойр байх аюулгүйн байршилд очно.

Гамшгаас хамгаалах иж бүрэн сургууль нийслэлийн хэмжээнд эхэллээ. Энэ хүрээнд өнөөдрөөс эхлэн архи согтууруулах ундаа худалдах, түүгээр үйлчлэхийг хориглолоо.

Нийслэлийн Засаг дарга бөгөөд Улаанбаатар хотын захирагч С.Амарсайханы захирамжаар энэ зохицуулалтыг хийж буй бөгөөд 04 дүгээр сарын 24-26-ны өдрүүдэд нийслэлийн нутаг дэвсгэрт архи согтууруулах ундаа худалдах, түүгээр үйлчлэхийг түр хориглож байна.