Month: April 2019

Улаанбаатар хотноо 30 жилийн дараа зохион байгуулж буй Гамшгаас хамгаалах иж бүрэн сургуулийн нээлт өнөөдөр өглөө Сүхбаатарын талбайд болсон. Харин одоо Танхимын команд штабын дадлага-сургууль “Crocus event hall”-д үргэлжилж байна.

Танхимын команд штабын дадлага сургуульд УИХ-ын Тамгын газар, ОБЕГ, нийслэлийн төрийн болон төрийн бус байгууллагуудын төлөөллөөс гадна НҮБ-ын байгууллагын суурин төлөөлөгч тэргүүтэй гамшгийн эрсдэл тохиолдсон үед онцгой нөхцөлд ажиллах иргэний нийгмийн байгууллагуудаас хүндэт зочид төлөөлөгчид оролцож байгаа юм.

ОБЕГ-ын дарга, хошууч генерал Т.Бадрал Танхимын команд штабын дадлага сургуулийг нээж хэлсэн үгэндээ, “Улаанбаатар хотод сүүлийн жилүүдэд газар хөдлөлийн томоохон голомтууд идэвхжиж, их, бага хэмжээний чичирхийлэл байнга мэдрэгдэх болсон. Тиймээс бүх нийтээрээ гамшгаас урьдчилан сэргийлэх, авран хамгаалах үйл ажиллагааны талаар мэдлэг мэдээлэл, дадалтай болж, бэлэн байдлыг хангаж хэвших нь нэн чухал болоод байна. Бүх шатны төрийн захиргааны байгууллага болон ААН-үүд, цэргийн албан хаагчид өнөөдрийн команд штабын сургуульд оролцож байна. Газар хөдлөлтийн үед нүүлгэн шилжүүлэх, хээрийн нөхцөлд эрүүл мэндийн тусламж үзүүлэх, гамшгийн аюулд бэлэн байх зэрэг ажлыг энэ өдрүүдэд өндөр зохион байгуулалтын дор явуулна. Төгсгөлд нь төрийн захиргааны байгууллагууд үйл ажиллагаагаа дүгнэх, үр дүнг нэгтгэх юм. Монгол Улс хэлтэй, хилтэй, хуультай. Тиймээс хүн бүр иргэнийхээ үүргийг биелүүлж гамшгаас хамгаалах сургуульд идэвхтэй, хариуцлагатай оролцохыг уриалж байна” гэв.

Нийслэлийн Засаг дарга бөгөөд Улаанбаатар хотын захирагч С.Амарсайхан хэлэхдээ, “Сүүлийн сар гаруйн хугацаанд бид энэ сургуулийг зохион байгуулахад ач холбогдол өгч, үр дүнтэй байлгахын тулд ихээхэн анхаарч ажиллалаа. Мөн иргэд, олон нийтийг өргөнөөр татан оролцуулахын тулд нийслэлийн хэмжээнд 116 байгууллага, ААН-үүдийн бэлтгэл ажлыг хангалаа. Гамшгаас хамгаалах, урьдчилан сэргийлэх, тэмцэх ажлыг зохион байгуулах мэргэжлийн ангийн хүч бололцоог бодит нөхцөл байдалд хэрхэн зөв төлөвлөж, хуваарилж, зохион байгуулж, харилцан уялдаа холбоотой ажиллуулах тухай болон гамшгийн бэлэн байдлыг хангах асуудлыг дээшлүүлэхэд энэ сургуулийн гол зорилго оршиж байна. Энэ хүрээнд олон ажлыг гурав хоногийн хугацаанд хийнэ. Бид цаашдаа энэ ажлыг жил бүр уламжлал болгон зохион байгуулж, гамшгаас хамгаалах чиглэлээр тодорхой төсөв мөнгийг нийслэлийн төсөвт суулгадаг болно” хэмээв.

Нийслэлийн Засаг даргын Тамгын газрын нэгдүгээр орлогч Ж.Батбаясгалан, “Нийслэлийн гамшгаас хамгаалах иж бүрэн сургуулийн бэлтгэл ажлыг бүрэн хангаж, өглөө Сүхбаатарын талбайд нийт бие бүрэлдэхүүн бүрэн жагслаа. Одоо Танхимын команд штабын дадлага сургуульд Улаанбаатар хотод дайчилгаатай бүх байгууллага, дээрээс нь нийслэлийн бүх удирдлагууд, тусгай бие бүрэлдэхүүн хамрагдаж байна. Энэ мөчөөс эхлээд хэдэн ч цаг минутад ямар ч цаг үеийн байдал зарлагдсан даван туулахад бэлэн байх зэрэглэлтэйгээр ажиллаж байна” гэв.

Гамшгаас хамгаалах иж бүрэн сургуулийн Танхимын команд штабын дадлага сургууль яг одоо ерөнхий цагийн байдлын I чиглэлийн хүрээнд дадлага сургуульд оролцогч байгууллагууд цагийн байдлыг илтгэхэд бэлтгэж байна.

Япон улсын нийслэл Токио хотноо болсон “Японы 36 дахь удаагийн аварга шалгаруулах каратегийн олон улсын нээлттэй тэмцээн”-д долоон настай бяцхан тамирчин Н.Нэмүн аваргалсан билээ.

Тэгвэл Гэр бүл, хүүхэд, залуучуудын хөгжлийн газрын дарга О.Алтансүх Н.Нэмүнийг хүлээн авч уулзаж, “Шилдэг хүүхэд” медалиар шагнасан байна.

О.Алтансүх “Н.Нэмүн хүү шиг хүүхэд олон байгаасай. Сүүлийн үед монгол хүүхдүүдийн амжилт маш их сайжирч байгаа нь бахархалтай байна. Каратегийн спортоор хичээллэдэг хүүхдүүд даруухан, зөв төлөвшилтэй хүүхэд болж хүмүүждэг. Энэ жил гэр бүл, хүүхэд, залуучуудын хөгжлийн төвөөс “Найрамдал” зуслангийн нэг ээлжинд дан гоц авьяастай, үе тэнгийн найзуудаа манлайлдаг хүүхдүүдийг амраахаар төлөвлөсөн. Н.Нэмүн хүү бас яваарай” гэлээ.

УИХ-ын Байгаль орчин, хүнс, хөдөө аж ахуйн байнгын хорооны дарга Л.Элдэв-Очир болон УИХ-ын гишүүн Б.Батзориг, Б.Саранчимэг, С.Жавхлан, А.Сүхбат нар өчигдөр ХХААХҮЯ-нд ажиллаж, газар, хэлтсийн дарга нартай уулзан, тулгамдаж байгаа асуудал, шийдвэрлэсэн ажлуудын тайлан мэдээтэй танилцав.

Сүүлийн таван жилд малын тоо толгой тогтмол нэмэгдсэн бөгөөд үүнийг дагаад малын гаралтай бүтээгдэхүүн төрөл бүрээр өсжээ. Тухайлбал, 2018 онд 93 сая литр сүү, сүүн бүтээгдэхүүн үйлдвэрлэсэн нь өмнөх оныхтой харьцуулахад 7.4 хувиар өссөн үзүүлэлт аж. Газар тариалангийн бүтээгдэхүүн ч мөн өсөлттэй байгаагийн дотор улаан буудай, төмсний хэрэгцээгээ дотооддоо 100 хувь хангаж буй талаар газрын дарга Я.Эрдэнэсайхан танилцуулгадаа онцолсон.

ХХААХҮ-ийн сайд Ч.Улаан томилогдсоноосоо хойш авч хэрэгжүүлж байгаа зарим ажлынхаа тухай мэдээлэл өгөхдөө “Хүнс, хөдөө аж ахуй, хөнгөн үйлдвэрлэлийн салбарт 2019 онд хийх эрх зүйн шинэчлэлд нэн түрүүнд Бэлчээрийн тухай хууль хүлээгдэж байна. 20 гаруй жил ярьж байгаа ч эрх зүйн зохицуулалтгүйн улмаас бэлчээр цөлжиж, үлийн цагаан оготно огцом нэмэгдэж, бэлчээрийн доройтол эмзэг асуудал боллоо. Харин тариалангийн чиглэлд Таримал ургамлын үр, сортын тухай болон Жижиг, дунд үйлдвэрийн тухай хуулийг энэ парламент хэлэлцэн батална гэдэгт итгэж байна” гэв.

Байнгын хорооны дарга Л.Элдэв-Очир “Бэлчээрийн тухай хуулийг батлах цаг болсон. Энэ асуудлаар байнгын хороо, ажлын хэсэг нухацтай ажиллана” гэлээ. Мөн “Энэ жил ноолуурын үйлдвэрүүдэд 300 тэрбум төгрөгийн санхүүгийн дэмжлэг олгоно. Тиймээс ирэх онд ноолуурын ханшийг буулгахгүй байх бодлого барих хэрэгтэй” хэмээн сануулсан юм.

Төрийн тахилгат Шилийн богд ууланд энэ сарын 22-нд бөө нар гал алдсаны улмаас түймэр гарч тус ууланд суулгасан таримал сакура зэрэг мод, өвс шатсан бөгөөд хохирлын хэмжээг тогтоогоогүй байна.

Сүхбаатар аймгийн Дарьганга сумын төвөөс 60 км зайд орших эл ууланд гарсан түймрийг хэсгийн төлөөлөгч, ЗДТГ-ынхан, нутгийн иргэд, жуулчны баазын ажилтнууд, хилийн 0184 дүгээр ангийнхан нийлж газар авхуулалгүй унтраасан байна. Баттай эх сурвалжуудаас авсан мэдээллээр Улаанбаатар хотоос очсон, нэг машинтай таван хүн бөөгийн зан үйл хийж байгаад гал алдсан гэнэ. Орон нутгийн цагдаагийн байгууллагынхнаас энэ талаар тодруулахад “Дарьганга сумын нутаг дахь улсын тусгай хамгаалалттай, байгалийн дурсгалт газар болох Шилийн богд уулын хойд энгэр хэсэгт уртаашаа 800, өргөн нь 400 м талбайг хамарсан түймэр гарсныг унтраан шалгаж байна. Гал тавьсан байж болзошгүй хэмээн таван хүнийг саатууллаа” гэсэн юм.