Month: April 2019

Аргын тооллын дөрөвдүгээр сарын 25, Бархасвадь гариг. Билгийн тооллын 21, Суулга одтой, хар луу өдөр. Өдрийн наран 5:46 цагт мандан, 19:55 цагт жаргана. Тухайн өдөр хулгана, бич жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр архи уух, тамхи татах, сэтгэл муутантай нөхөрлөх зэргийг цээрлэх хэрэгтэй ба лус тахих, бороо хур оруулах, зэтгэрийг номхотгох, хөгжмийн зэмсэг урлахад сайн. Гүүр тавих, газар ухах, цөөрөм байгуулахад муу. Өдрийн сайн цаг нь бар, луу, могой, бич, тахиа, гахай болой. Хол газар яваар одогсод хойш мөрөө гаргавал зохистой.

Үс шинээр үргээлгэх буюу засуулахад тохиромжгүй.

Нийслэлийн Засаг даргын Тамгын газар, Онцгой байдлын ерөнхий газартай хамтран нийслэлд анх удаа зохион байгуулж буй нийслэлийн Гамшгаас хамгаалах иж бүрэн сургууль эхэллээ.

Тодруулбал Өнөөдөр 07.00-.09.30 цагийн хооронд тээврийн хэрэгслийн хөдөлгөөнийг түр хугацаагаар хязгаарлах ажиллагааг НЗДТГ болон Тээврийн цагдаагийн албанаас зохион байгуулна.

Тээврийн хэрэгслийн хөдөлгөөнийг түр хугацаагаар хязгаарлахдаа автомашины дугаарын хязгаарлалтын бүсчлэлийн зуны хуваарийг мөрдөх аж. Шаардлага гарвал тойргийг тэлэх юм.

Зуны бүсчлэлд Геологийн төв лабораторийн уулзвар, Саппорогийн тойрог, Дамбадаржаагаас Бэлх салдаг уулзвар, Долоон буудлын арын цагдаагийн пост, Цайз захын уулзвар, ХСИСургууль, ХААИС-ийн уулзвар, Их тэнгэрийн уулзвар, Яармагийн гүүрээс дотогш хүрээг хамруулдаг. Ингэснээр Саппоро, Их тойруу, 100 айл, Зүүн дөрвөн зам, Тэмээтэй хөшөө орчмоор тээврийн хэрэгслийн хөдөлгөөнийг хязгаарлана гэсэн үг юм.

Тэгэхээр Таваншард амьдардаг иргэн 22-ын товчоо, Баянхошуу, Нисэх, Сонсголон руу ажилдаа автомашинаараа явж болно. Харин МУИС-т сурдаг оюутан автомашинтай хичээлдээ ирэх боломжгүй. Гэхдээ өглөөний 07.00 цагаас өмнө автомашинаа унаж ажил, хичээлдээ явах эрх хүн бүхэнд бий.

Мөн Улаанбаатараас гарах, орох хөдөлгөөнийг 07.00-09.30 цагийн хооронд түр хязгаарлах юм байна.

Арваад хоногийн өмнө, амралтын өдрүүдээр зуслангийн байшингууд өдөр дараалан шатаад сүйд хийсэн. Тэр үеэр Гоодойн аманд хэдэн айлын зуслангийн байшин шатаж байх үед Нийслэлийн Засаг даргын орлогч бөгөөд Агаар орчны бохирдол хариуцсан төслүүдийн удирдагч Д.Мөнхжаргал гэдэг эмэгтэй сэлфи хийж цахим сүлжээнд тавьсан.

Тэрбээр зурагныхаа тайлбар болгож “Нийслэлийн агаар орчны бохирдол хариуцсан төслүүдийн удирдагчаар ажиллаж эхэлсэн болно” гэж бичсэн байв. Энэ нь олны дургүйцлийг төрүүлж хэдэн хоногийн турш “трэнд” болсон байдаг. НЗДТГ-аас Д.Мөнхжаргалын энэ үйлдэлд хариуцлагын асуудал яригдах байх гэсэн мэдээллийг өгч байлаа.

Гэхдээ тэр Хотын орлогч хэвээрээ үлдэв. Д.Мөнхжаргалыг “иймхэн үндэслэл”-ээр Хотын орлогчоос чөлөөлөх ч боломжгүй юм байна. Учир юу гэвэл Д.Мөнхжаргалыг Нийслэлийн Засаг даргын орлогч бөгөөд Агаар орчны бохирдол хариуцсан төслүүдийн удирдагч болгосон хүн нь МАН-ын генсек Д.Амарбаясгалан юм байна. Энэ хоёр хүн маш нарийн холбоотой аж. Гэхдээ буруугаар ойлгох хэрэггүй. Д.Амарбаясгалан нь Д.Мөнхжаргалаас найман насаар дүү юм. Тэрхүү нарийн холбоо нь Говь-Алтай аймаг ажээ. Д.Амарбаясгалан Тайшир сумынх, Д.Мөнхжаргал нь Халиун сумынх юм байна. Эгч дүү хоёр хоёулаа НИТХ-ын төлөөлөгчийн сонгуульт ажилтай. Тиймээс НИТХ-д ч Д.Амарбаясгалан нутгийн “аниа”-гаа нэлээд өргөсөн. Тэрээр Д.Мөнхжаргалыг НИТХ-ын Нийгмийн хөгжлийн хорооны дарга болгосон гэдэг.

Д.Мөнхжаргал ч нутгийн дүүгийнхээ ачийг яаж хариулахаа мэднэ. НИТХ дээр болдог ямар ч асуудалд Д.Амарбаясгалангийн ард байдаг “асаалттай танк”-нуудын нэг болж иржээ. Д.Амарбаясгалан ирэх 2020 оны сонгуульд Говь-Алтайдаа нэр дэвших гээд тойргоо “услаад” эхэлсэн. Тэр ажилд нь ч Д.Мөнхжаргал ханцуй шамлан орохоор ажиллаж эхэлсэн байна. Ийм учир шалтгаантай учраас Д.Амарбаясгалангийн “аниа” Д.Мөнхжаргал Хотын орлогч хэвээр үлдсэн байгаа юм.

Ө.Бааст

Эх сурвалж: http://unuudur.mn

Гамшгаас хамгаалах иж бүрэн сургуулийн хүрээнд газар хөдлөх гамшгийн үед иргэд аюулгүй талбайд түр цуглах дадлага маргааш хийнэ. Энэ хүрээнд 07.00-09.30 цагийн хооронд нийслэлээс орох, гарах болон зарим замын хөдөлгөөнийг хаах юм.

Тодруулбал, Саппоро төвийн уулзвараас Зүүн 4 замын уулзвар, 32-ын тойргоос 120-ын уулзвар хүртэлх буюу Энхтайвны өргөн чөлөө, Чингисийн өргөн чөлөө, Нарны зам, Их тойруугийн автозамын хөдөлгөөнийг түр хугацаагаар хязгаарлана. Харин дээрх бүсчлэлээс гарах чиглэлийн хөдөлгөөнийг зөвшөөрнө. Тээврийн цагдаагийн албанаас зам нээх үеэр хөдөлгөөний аюулгүй байдлыг хангах, осол, хэргээс урьдчилан сэргийлэх чиглэлээр хөдөлгөөн зохицуулж, хянаж ажиллана. Мөн үеэр замын хөдөлгөөний ачаалал эрс нэмэгдэх тул тухайн өдөр иргэдийг хувийн тээврийн хэрэгслээс татгалзаж нийтийн тээврийн хэрэгсэл, унадаг дугуй болон явганаар хөдөлгөөнд оролцохыг зөвлөж байна.

Өнөөдөр “Монгол цэргийн нэгдсэн холбоо”-ноос “Үндэсний ой санамж” сэдэвт хэлэлцүүлгийг зохион байгуулж байна. Арга хэмжээг зохион байгуулагчдын зүгээс “Улс төр, аюулгүй байдал, геополитик, олон улсын харилцаа чиглэлээр судалгаа хийдэг мэргэжлийн байгууллагууд болон улс төрч, эрдэмтэн судлаачид хамтран Монгол Улсын “ҮНДЭСНИЙ ОЙ САНАМЖ”-ийг сэргээх талаарх онол практикийн мэдлэгээ солилцох, хамтын ажиллагааг хөгжүүлэх зорилго бүхий ач холбогдолтой арга хэмжээ” хэмээн тодотгов.

Төрийн цэргийн болон хууль сахиулах байгууллагуудын дэргэд ажилладаг 30 шахам төрийн бус байгууллага нэгдэж энэхүү “Монгол цэргийн нэгдсэн холбоо” хэмээх нийгэмд үйлчилдэг төрийн бус байгууллагыг байгуулжээ. Байгуулагдсан даруйдаа Төрийн ордноо анхдугаар хурлаа зохион байгуулж, тэргүүнээр Монгол Улсын Ерөнхий сайд У.Хүрэлсүхийг сонгож томилсон юм. Уг байгууллагын эрхэм зорилгыг “Эх оронч үзэл, үндэсний бахархлыг хөгжүүлэн, ард түмнээ соён гэгээрүүлж Монгол Улсынхаа тусгаар тогтнол, аюулгүй байдлын оюуны дархлаа, үнэт зүйлсийг хамгаалан бэхжүүлэх үйлсэд төр, иргэний нийгмийн байгууллагуудтай хамтран зүтгэхэд оршино” хэмээн тодорхойлж, нийгэм, ирээдүй хойч үедээ чиглэсэн ажил, үйлчилгээгээ ийнхүү эхлүүлээд байгаа юм. Эх орныхоо дархан хилийн манаанд зогсох хүндтэй үүргийг ухамсарт амьдралынхаа зорилго болгосон ахмад хилчид, харь оронд дайн самууны хүнд нөхцөлд төр улсынхаа даалгаврын биелүүлэн энхийг сахиулах үйлсэд хүчин зүтгэсэн дайчид, хүн ардынхаа амар амгалан амьдралын төлөө амь биеэ үл хайрлан үүргээ үнэнчээр биелүүлсэн онцгой байдал, хууль сахиулах байгууллагын албан хаагчдын асар их хүчийг ард түмэн болоод ирээдүй хойч, залуу үеийнхэндээ эх оронч үзэл, үндэсний бахархлыг төлөвшүүлэхээр “МОНГОЛ ЦЭРГИЙН НЭГДСЭН ХОЛБОО” ажилласаар байна.

“ҮНДЭСНИЙ ОЙ САНАМЖ” хэлэлцүүлгийг Удирдлагын академ, ШУА-ын Олон Улсын харилцааны хүрээлэн, Философийн хүрээлэн, Түүх археологийн хүрээлэн, МУИС-ийн Олон Улсын харилцаа, нийтийн удирдлагын сургууль, Шинжлэх ухааны сургууль, Монголын дипломатын Академи зэрэг олон байгууллага дэмжлэг үзүүлэн хамтран зохион байгуулсан юм.

Улаанбаатар хотод 2019.04.24-26-ны өдрүүдэд зохион байгуулагдаж байгаа гамшгаас хамгаалах иж бүрэн сургуулийн хүрээнд болзошгүй газар хөдлөлтийн гамшгийн үед иргэд аюулгүй талбайд түр цугларах дадлагыг маргааш буюу 2019.04.25-ны өдрийн 07.00-09.30 цагийн хооронд зохион байгуулахтай холбоотойгоор дээрх хугацаанд дараах автозамуудын хөдөлгөөнийг хязгаарлана.

Үүнд: Саппоро төвийн уулзвараас Зүүн 4 замын уулзвар, 32-ын тойргоос 120-ын уулзвар хүртэлх буюу Энхтайвны өргөн чөлөө, Чингисийн өргөн чөлөө, Нарны зам, Их тойруугийн автозамын хөдөлгөөнийг түр хугацаагаар хязгаарлах бөгөөд уг бүсчлэлээс гарах чиглэлийн хөдөлгөөнийг зөвшөөрөх юм.