Month: March 2019

Дөнгөж сая Худалдаа Хөгжлийн Банкны Д.Эрдэнэбилэгийг Эрүүгийн Цагдаагийн Албанаас гүйцэтгэх ажиллагаа явуулж Хан-Уул дүүрэг дэх гэрээс нь баривчиллаа. Энэ тухай дэлгэрэнгүй мэдээллийг эргэж мэдээлэх болно.

ДЭМБ-ын мэдээлснээр дэлхийд сонсгол бууралт, дүлийрэлттэй 466 сая хүн байгаагийн 34 сая нь хүүхэд байна (2018 он). Хүүхдийн сонсгол бууралтын 60 хувь нь сэргийлж болох шалтгаануудаар үүсгэгддэг байна. 15-35 насны залуучууд хөгжим, чихэвч, зугаа цэнгээний газрын хэт чанга дуу, шуугианаас болж сонсгол алдах эрсдэлд орох нь элбэ байна. Дэлхий нийтээр сонсгол бууралтын эсрэг жил бүр 750 тэрбум доллар зарцуулж байна.

Ямар нэгэн арга хэмжээ авахгүй тохиолдолд дээрх үзүүлэлтүүд жил ирэх тусам нэмэгдэх хандлагатай байгааг тэмдэглэх нь зүйтэй. Урьдчилан тооцоогоор сонсгол бууралт, дүлийрэлтийн тоо 2030 онд 630 сая, 2050 онд 900 саяд хүрэхээр байна.

Сонсгол бууралтаас урьдчилан сэргийлэх болон олон нийтэд сурталчлан таниулах, зөв хэвшилд дадуулах, эрт оношлон эмчлэх нь өрх гэр, нийгэм эдийн засгийн ач холбогдолтой.
Тиймээс ДЭМБ жил бурийн 3-р сарын 3-ны өдрийг “Дэлхийн Сонсгол Хамгаалах Өдөр” болгон зарласан юм. Энэ жил дэлхийн сонсгол хамгаалах өдрийг “Ирээдүйг сонсохын тулд өнөөдрөөс сонсголоо шалгуулцгаая” уриан дор тэмдэглэж байна.
Жил бүр ЭХЭМҮТ-ийн ЧХХМЗТ-ийн хамт олон уламжлал болгон ерөнхий боловсролын сургууль, хүүхдийн асрамжийн газар, хүүхэд хамгаалах төвүүдэд чих хамар хоолойн болон сонсголын урьдчилан сэргийлэх үзлэг, оношилгоо, зөвлөгөөг өгч сургалт явуулдаг.

Бид 2019 онд сонсгол хамгаалах өдрийг тохиолдуулан дараах арга хэмжээг зохион байгууллаа.Үүнд:

1. Хүүхдийн төв сувиллын дутуу нярайн тасгийн 20 нярайд сонсголын скрининг шинжилгээ, сувиллын 68 хүүхдэд ЧХХ-н урьдчилан сэргийлэх үзлэг, эхчүүдэд сургалт зохион явууллаа.
2. Баянхошууны асрах төвийн “Хөх тэнгис цэцэрлэгт”-ийн 28 хүүхэд; Улаан чулуутын хогийн цэгт байрлах “Нарны хүүхдүүд цэцэрлэг”-ийн 85 хүүхдэд урьдчилан сэргийлэх үзлэг, сонсголын скрининг хийж, зөвлөгөө өгч, сургалт хийв.
3. Мөн C1 телевиз, TV-25 телевиз, Эмчийн өргөө TV болон FM 104.4-р “Сонсголоо хэрхэн хамгаалах” талаар шууд нэвтрүүлэгт оролцож, ард иргэдэд зориулж сонсгол хамгаалах талаарх мэдээллийг түгээв.
4. Мөн ЭХЭМҮТ-н Хүүхдийн Зөвлөх Поликлиникээр үйлчлүүлж буй үйлчлүүлэгч нарт сургалтын материал тараан, эрүүл мэндийн боловсрол олгох сургалтыг зохион явуулав. 30 нярайд сонсголын скрининг хийж, 40 гаруй хүүхдийн сонсголыг шалгалаа.
5. Сонсгол хамгаалах өдрийн хүрээнд нийт 250 гаруй хүүхдэд чих хамар хоолойн урьдчилан сэргийлэх үзлэг хийж, үүнээс сонсгол бууралтыг илрүүлэх шинжилгээг 50 хүүхдэд хийсэн байна.

Нийслэлийн 23 дугаар сургуулийн “Хос Уянга” монгол бичгийн дугуйлангийн сурагчид Шадар сайдад монгол бичгийг төрийн албан ёсны бичиг болгох, монгол бичгийн хэрэглээг нэмэгдүүлэх, цахим орчинд Монголбичгийн хэрэглээг бий болгох зэрэг асуудлуудыг хөндсөн захидал бичсэн байна. Иймд Монгол Улсын Шадар сайд Ө.Энхтүвшин “Хос уянга” моншгол бичгийн дугуйлангийн багш Н.Золжаргал, тус сургуулийн 12а ангийн сурагч З.Мишээл, 10в ангийн сурагч Г.Эрдэнэчимэг нарыг хүлээн авч уулзжээ. Уулзалтаар монгол бичгийн хэрэглээг нэмэгдүүлэх асуудлаар санал солилцсон аж. Тэрээр 23 дугаар сургуулийн монгол бичгийн дугуйланд 90 гаруй хүүхэд суралцдаг бөгөөд тэд цахим орчинд найз нартайгаа монгол бичгээр харилцаж монгол бичгийн мэдлэг, чадвараа нэмэгдүүлэх хүсэлтэй байгаагаа илэрхийлсэн.

Харин Шадар сайд Ө.Энхтүвшин “Хос Уянга” дугуйлангийн хүүхдүүдийн санаачилгыг дэмжин хүлээн авч, үйл ажиллагааг нь магтжээ. Мөн “Монгол хэлний хууль бүрэн хэрэгжиж, 2025 оноос эхлэн төрийн болон орон нутгийн удирдах байгууллага албан хэргээ крилл болон үндэсний хос бичгээр хөтлөн явуулахад Ерөнхий боловсролын сургуулиуд чухал үүрэгтэй” Шадар сайдын харьяа “Стандарт, хэмжил зүйн газар”-т Монгол бичгийн кодчиллын ажлыг эрчимжүүлэх үүрэг даалгавар өгч, монгол бичгийн кодчиллын стандартыг боловсруулах ажлын хэсэг байгуулан ажиллаж байгаа тухайгаа ярьсан байна.

М.САЙНЗАЯА

Эрүүл мэндийн сайд Д.Сарангэрэл Бүгд Найрамдах Франц Улсаас Монгол Улсад суугаа Элчин сайд Филипп Мерлин-ыг хүлээн авч уулзлаа.

Уулзалтын эхэнд Эрүүл мэндийн сайд Д.Сарангэрэл эрүүл мэндийн салбар нь Монгол-Францын хамтын ажиллагааны уламжлалт салбаруудын нэг болохыг онцлоод Гэмтэл согог судлалын үндэсний төвийн мэс заслын тасгийг шинэчлэх Бүгд Найрамдах Франц Улсын Засгийн газрын 10.0 сая франкийн буцалтгүй тусламжийн хөрөнгөөр хэрэгжсэн төсөл болон 5.05 сая еврогийн хөнгөлөлттэй зээлийн хөрөнгөөр 2013-2018 онд хэрэгжсэн тус төвийн хүлээн авах, яаралтай тусламжийн тасгийг шинэчлэх төсөл нь Монгол Улсын хүн амд үзүүлэх эмнэлгийн тусламж үйлчилгээний чанар, хүртээмжийг дээшлүүлэхэд үнэтэй хувь нэмэр оруулж байгаад талархал илэрхийлэв.

Мөн Эрүүл мэндийн салбарт Дэлхийн эмч нар, Аксион Монголи, Санте Сюд, Апау зэрэг хэд хэдэн ТББ-ууд эрүүл мэндийн тусламж үйлчилгээний чанар, хүртээмжийг сайжруулах, байгууллага хөгжүүлэх, хүний нөөцийг чадавхжуулах, эм, эмнэлгийн хэрэгсэл багаж, тоног төхөөрөмж хандивлах, хамтарсан мэс засал хийх, эмч мэргэжилтнүүдэд сургалт явуулах, хамтарсан судалгаа хийх, оношилгоо, эмчилгээний шинэ дэвшилтэт арга барил нэвтрүүлэх зэргээр үйл ажиллагаа явуулж байгаа нь манай улсын эрүүл мэндийн салбарын хөгжилд чухал ач холбогдолтой арга хэмжээ болж байгааг мөн онцоллоо.

Үүний дараагаар Элчин сайд хоёр улсын харилцаа хамтын ажиллагаа 1992 оноос өнөөг хүртэл өргөжин хөгжиж байгааг онцлоод энэ хугацаанд төсөл хөтөлбөрүүдийг амжилттай хамтран хэрэгжүүлж ирсэнд сэтгэл хангалуун байгаагаа илэрхийлэв. Одоогоор эрүүл мэндийн салбарт Дэлхийн эмч нар, Аксион Монголи ТББ идэвхтэй үйл ажиллагаа явуулж байгаа бөгөөд эдгээр байгууллагуудын шугамаар шаардлагатай тоног төхөөрөмж, эм эмнэлгийн хэрэгслийг хилээр нэвтрүүлэхэд татварын асуудал хүндрэлтэй байдаг тул энэ тал дээр анхаарч өгөхийг хүслээ.

Мөн хоёр улсын Гадаад харилцааны яамд хоорондын зөвлөлдөх уулзалтаар хамтын ажиллагааны замын зураглал гарган, цаашдын үйл ажиллагааны зорилго, чиглэлийг тодорхойлон ажиллахаар харилцан тохиролцсон тул эрүүл мэндийн салбарт хамтран ажиллах тэргүүлэх чиглэл, шийдвэрлэвэл зохих асуудлуудаа тусган ажиллах нь зүйтэй болохыг мэдэгдлээ.

Түүнчлэн Онцгой байдлын ерөнхий газартай хамтран нисдэг тэрэг нийлүүлэх төслийг хэрэгжүүлэхээр яригдаж байгаа бөгөөд уг төслийн хүрээнд зөвхөн гамшиг, ослын үед төдийгүй эмнэлгийн тусламж үйлчилгээг хурдан шуурхай үзүүлэх, шаардлагатай тохиолдолд алслагдсан аймгуудаас өвчтөн, эм тариа тээвэрлэх болон бусад чиглэлээр хамтран ажиллах боломжтой болохын зэрэгцээ төслийн хүрээнд яаралтай түргэн тусламжийн эмч нарт зориулсан сургалтууд тогтмол явагдахаар төлөвлөж байгаа тул энэ тал дээр дэмжиж ажиллах саналыг дэвшүүлэв. Уулзалтын явцад талууд хамтын ажиллагааг өргөжүүлэх талаар дэлгэрэнгүй харилцан ярилцаж, Эрүүл мэндийн сайд Д.Сарангэрэл эрүүл мэндийн салбарт хэрэгжүүлэх аливаа төсөл, хөтөлбөр, хамтын ажиллагааны саналуудыг дэмжиж ажиллахаа мэдэгдсэнээр уулзалт өндөрлөлөө.

“Эрдэнэт Үйлдвэр”-ийн 49 хувийг ОХУ-аас худалдан авах үйл ажиллагааг зохион байгуулсан “Монголиан коппер корпорейшн” ХХК-ийн гүйцэтгэх захирал Ц.Пүрэвтүвшинг өнөөдөр үүрээр Цагдаагийн Ерөнхий Газрын Эрүүгийн цагдаагийн албанаас баривчилсан гэх мэдээлэл гараад байгаа юм. Албаны эх сурвалжууд түүнийг саатуулаагүй. Харин яг одоо байцаалт авч байгаа гэлээ.

Монголд суугаа БНСУ-ын элчин сайдын яамд өдөрт 700-800 хүн визийн хүсэлт өгч байна. Үүнийг даган Солонгос улсын хилээр нэвтэрсэн хүмүүс дундаас сард дунджаар 500-аас дээш хүн хууль бусаар оршин суухаар үлдэж байгаа аж. Иймээс БНСУ-ын элчин сайдын яамнаас визийн материалыг илүү нарийн шалгах шаардлагатай байгааг дуулгасан байна. Иймээс өнгөрсөн хугацаанд хуримтлагдсан материалууд болон хойшид визийн хүсэлт өгч буй Монгол иргэдийн визийн материалыг хамгийн багадаа 50 өдөр (ажлын өдөр, 10 долоо хоног) болон түүнээс дээш хугацаа зарцуулагдах болсныг мэдэгджээ. Гагцхүү хүндэтгэх шалтгааны улмаас(Солонгос улсад яаралтай хагалгаанд орох эсвэл олон улсын арга хэмжээнд ) яаралтай виз авах хүсэлтэй байгаа тохиолдолд төлөөлөн гүйцэтгэх байгууллагад материалаа бүртгүүлэхдээ “яаралтай виз гаргах хүсэлт” бөглөж өгөх боломжтой бөгөөд нөхцөл байдлаас хамааран хариуг олгох юм.