Month: March 2019

ЗХЖШ-ын алба хаагч золгүй байдлаар амиа алдсан хэрэг гарсан талаар мэдээлсэн билээ.

Тэгвэл энэ хэрэгтэй холбоотойгоор ЗХЖШ-ын Хяналт, шалгалт үнэлгээний газрын шинжилгээ үнэлгээний ахлах мэргэжилтэн, дэд хурандаа С.Өлзийтогтох тайлбар өглөө. Тэрбээр “Хоёрдугаар сарын 28-нд 310 дугаар ангийн сарын төлөвлөгөөт ажлын дагуу “Найман шарга” сувиллын газар хайрга татахаар томилогдсон хоёр ажилтан албан үүргээ гүйцэтгэж явахдаа осолд орсон. Хайрга татах ажилд нэг жолооч, мөн ахлах ахлагч Я.Г туслах жолоочоор томилогдон явж байсан. Тухайн үед ачааны машин дээр хайрга ачиж дуусаад хөдөлсөн. Зуун мод орчмын элсний карьер дээр хөрс нь элсэрхэг, газар нь гулгамтгай нөхцөл байдалтай байсан учраас машин дээшээ өгсөж явахдаа хүч алдан зогссон. Ийм нөхцөлд машинаа хөдөлгөхийн тулд ахлах ахлагч Г нь буугаад ивээс хайн туслахаар болсон. Энэ үед жолооч, ахлах ахлагч хоёр үл ойлголцсоны улмаас машин ухарч, гулган осол гарсан байна. Манай 310 дугаар ангийн харьяа “Найман шарга” сувиллын газрын барилгын ажиллагаанд буюу цахилгааны шугам татах ажилд туслахаар явж байсан. Ослын газарт 19.00 цагийн орчимд очиход цагдаагийн байгууллагад мэдэгдээд цагдаагийнхан ирж ослын газар үзлэг, шалгалт хийсэн. Осол гаргасан жолоочийг Налайх дүүргийн цагдаагийн байгууллагад шалгаж байгаа учраас хэргийн талаар дэлгэрэнгүй мэдээлэл өгөх боломжгүй” гэлээ

Олон жил хуулийн байгууллагад шалгагдаж байгаа “Жаст” группийн ерөнхийлөгч асан Ш.Батхүү, “Алтжин”-гийн Г.Алтан нарт холбогдох эрүүгийн хэргийг шалгаж дуусаад, шүүхэд шилжүүлсэн байгаа билээ. Тэгвэл өнөөдөр Хан-Уул дүүргийн Эрүүгийн хэргийн анхан шатны шүүхэд Ш.Батхүү “Эрдэнэт” үйлдвэрийн Ч.Ганзориг, хуулийн зөвлөх асан Б.Мөнхжаргал Г.Амарбат “Алтжин”-гийн Г.Алтан түүний хүү Э.Сүрэн нарын урьдчилсан хэлэлцүүлэгийн шүүх хурал өнөөдөр 13.30 цагт эхлэхээр товлогджээ.

Худалдаа хөгжлийн банкны эзэн Д.Эрдэнэбилэгийг баривчлаад байгаа. Тэгвэл яг одоо Худалдаа хөгжлийн банкны гүйцэтгэх захирал О.Орхонг Эрүүгийн цагдаагийн албаныхан дайчлан баривчилж, Эрүүгийн цагдаагийн албаны байранд авчирсан байна.

Монгол Улсаас БНЧУ-д суугаа ЭСЯ 2019 оны гуравдугаар сарын 2-ны өдөр “Чех-Монголын соёлын төв” ТББ-тай хамтран “Амжилтын үндэс” уулзалт, ярилцлагыг ЭСЯ-нд зохион байгууллаа. Хилийн чанадад эх орноо сурталчилан, амжилттай хөдөлмөр эрхлэн яваа хүмүүсийг урьж оролцуулах зорилготой “Амжилтын үндэс” уулзалт, ярилцлагын анхны зочноор загвар зохион бүтээгч, стилист А.Цэцгээ Франц Улсаас хүрэлцэн ирж оролцлоо.

Загвар зохион бүтээгч, стилист А.Цэцгээ нь “Аюураа” брендийг үүсгэн 10 дахь жилдээ үйл ажиллагаа явуулж байгаагийн зэрэгцээ стилистийн зөвлөгөө үзүүлдэг бөгөөд тэрээр уулзалт ярилцлагад хүрэлцэн ирсэн зочдод өөрийн “Аюураа” брендийн талаар болон хувь хүний гадаад имидж бүрдүүлэлтийн талаар зөвлөгөө өглөө.

“Амжилтын үндэс” уулзалт, ярилцлагыг улирал тутам зохион байгуулахаар төлөвлөөд байгаа бөгөөд тус ЭСЯ Монгол Улсын Засгийн газрын үйл ажиллагааны мөрийн хөтөлбөрт заасны дагуу монгол иргэдийн үүсгэл санаачлагаар байгуулагдсан холбоо, ТББ-уудын үйл ажиллагааг дэмжин хамтран ажиллаж байна.

Испани Улс дахь Монгол Улсын Соёлын элчээр томилогдсон Д.Мэндмаад гуравдугаар сарын 4-ны өдөр Элчин сайд А.Баттөр Соёлын элчийн гэрчилгээг гардуулж өгөв. Мадрид хотын Хөгжмийн консерваторид төгөлдөр хуурын багшаар ажилладаг Д.Мэндмаа 2019 оны дөрөвдүгээр сард Испани Улсын Мадрид хотноо зургаа дахь удаа өөрийн зохион байгуулах олон улсын төгөлдөр хуурын тэмцээн “Gran Klavier”-ийн талаар мэдээлэл өгч, цаашид хоёр орны соёл, хүмүүнлэгийн хамтын ажиллагааг хөгжүүлэх чиглэлээр төлөвлөсөн ажлуудаа танилцуулав.

Монгол Улсаас Бүгд Найрамдах Франц Улсад суугаа ЭСЯ-нд 2018 оны гуравдугаар сарын 1-ний өдөр францын аж ахуй нэгж, байгууллагуудад ажилладаг Монгол иргэд болон Засгийн газрын тэтгэлгээр суралцаж буй оюутнуудын уулзалтыг зохион байгуулав. Уулзалтыг Элчин сайд А.Баттөр нээж, Элчин зөвлөх Э.Есүхэй Монгол, Францын харилцааны талаар товч танилцуулга хийж, Францын хөгжлийн агентлагийн Зээл, санхүүгийн асуудал эрхэлсэн мэргэжилтэн Д.Батчимэг өөрийн ажиллаж буй байгууллагыг танилцуулав. Мөн оролцогчдоос урьдчилж авсан санал асуулгын дагуу оюутны тэтгэлэг, Франц дахь монголчуудын хоорондын харилцаа холбоо, сургалт семинар зохион байгуулах нэгдсэн мэдээллийн сан үүсгэх боломжууд, бизнес боломжуудын талаар санал солилцож, чөлөөт хэлэлцүүлэг өрнүүлэв.