Month: March 2019

Нийслэлийн Эрүүл мэндийн газраас менингококкт халдвараас урьдчилан сэргийлэх ажлын хүрээнд 2019 оны хоёрдугаар сарын 25-наас гуравдугаар сарын 05-ны өдрүүдэд Сүхбаатар, Баянзүрх дүүргийн эрүүл мэндийн төв, ШУТИС-ийн эрүүл мэндийн төв, ХААИС-тай хамтран тус сургуулиудын 3963 багш ажилтан, оюутнуудыг хамруулан хамар залгиурын үрэвсэл илрүүлэх үзлэгийг зохион байгуулж, 5424 оюутан, багш ажилчдад “Менингококк өвчнөөс урьдчилан сэргийлэх” сургалтыг хийж, 2681 ширхэг мэдээлэл сурталчилгааны материал түгээж ажиллалаа.

Мөн ШУТИС-ийн Оюутны холбоо, Улаан загалмайн нийгэмлэгтэй хамтран “Масктай 14 хоног” аяныг зохион байгуулж, оюутнуудыг идэвхижүүлэн, халдварт өвчнөөс сэргийлэх ажлыг өрнүүлж байна.

Улсын онцгой комиссын Шуурхай бүлэг 2019 оны 3 дугаар сарын 4, 5-ны өдрүүдэд Увс аймгийн Ховд, Өмнөговь, Улаангом, Малчин зэрэг суманд ажиллаж, алслагдмал аж төрж буй малчин өрх, отроор өвөлжиж буй малчны аж байдал, отрын штабын үйл ажиллагаатай газар дээр нь танилцаж, аймгийн Онцгой комиссын хуралдааныг зарлан хуралдуулав.

Увс аймагт 19 сумын 92 багийн 10711 өрхийн 3.1 сая толгой мал өвөлжиж байна. Өөр аймгийн нутагт 66 өрхийн 34.4 мянга, өөрийн аймгийн бусад сумдад 183 өрхийн 111.2 мянга, тусгай хэрэгцээний отрын бүс нутагт 21 өрхийн 7.2 мянга, улсын тусгай хамгаалалттай бүс нутагт 346 өрхийн 130.2 мянга, хилийн зурваст 1338 өрхийн 331.5 мянган мал тус тус хаваржиж байгаа юм. Аймгийн Баруунтуруун, Завхан, Зүүнхангай, Малчин, Наранбулаг, Өлгий, Өмнөговь, Сагил, Түргэн, Ховд, Хяргас сумдад 270 өрх оторлож байна.

Өнөөдрийн байдлаар тус аймгийн Завхан, Зүүнговь, Малчин, Наранбулаг, Өлгий, Өмнөговь, Сагил, Тариалан, Түргэн, Улаангом, Ховд, Хяргас зэрэг 12 суманд хаваржилт хүндрээд байна. 2018 оны 11, 12 дугаар сар, 2019 оны 1 дүгээр сард Баруунтуруун, Зүүнговь, Тэс, Малчин, Улаангом, Сагил зэрэг 6 суманд агаарын хэм -40.5 хэмээс -50 хэм хүрч, 66-82 хоног хүйтэрчээ.

Увс аймгийн нийт нутгийн 80 орчим хувь цасан бүрхүүлтэй байгаагаас Тэс, Малчин, Баруунтуруун, Зүүнговь, Улаангом, Хяргас сумын нутгаар цасны дундаж зузаан 10-23 см, хунгарласан газар, гуу жалгандаа 50-70 см хүрчээ. Ийнхүү цаг агаарын хүндрэлтэй нөхцөл байдлын улмаас малын идэш тэжээл, тарга хүч муу байна.

Хаваржилт хүндэрсэнтэй холбогдуулан аймгийн аюулгүйн нөөцөөс Өлгий, Өмнөговь, Тариалан, Малчин, Зүүнговь, Хяргас, Түргэн, Сагил, Наранбулаг сумын малчдад аймгийн аюулгүй нөөцөөс 91 тонн тэжээлийг 50 хувиар хямдруулан, 116 тонн өвсийг малын тооноос хамааран хуваарилсан аж. Мөн алслагдсан газарт отроор хаваржиж байгаа айл өрх, иргэдэд, төрийн үйлчилгээ, эрүүл мэндийн тусламж үйлчилгээг шуурхай үзүүлэхэд зориулан тус бүр 2 сая төгрөгийн дэмжлэг үзүүлжээ.

Ийнхүү гуравдугаар сарын дунд хүртэл хүйтэн байж, хаваржилт улам хүндрэх төлөвтэй байгаа тул буцалтгүй тусламжаар, хөнгөлөлттэй үнээр өвс, тэжээл олгох санал тавьсны дагуу Засгийн газрын тогтоолоор улсын нөөцөөс 400 тонн өвс, 400 тонн тэжээлийг 50 хувийн хөнгөлөлттэй үнээр олгохоор шийдвэрлэснийг Улсын онцгой комиссын Шуурхай бүлэг танилцууллаа. Түүнчлэн Завхан сумын Эрүүл мэндийн төвийн автомашины засварын хөрөнгийг шийдвэрлэж өгөхийг Шуурхай бүлгээс хүсэхэд холбогдох яаманд саналыг уламжлах болно гэв.

Улсын нөөцөөс малчдад хөнгөлөлттэй үнээр олгох өвс, тэжээл хуваарилахыг ажлыг тухайн орон нутаг зохион байгуулах бөгөөд энэ үеэр Увс аймгийн Засаг дарга Д.Батсайхан хаваржилт хүндэрч буй сумдад өвс, тэжээл хүргэх ажлыг яаралтай зохион байгуулахыг аймгийн Онцгой комисст даалгалаа.

Монгол Улсын Засгийн газрын 2019 оны 02 дугаар сарын 20-ны өдрийн 72 дугаар тогтоолоор улсын нөөцөөс зарим аймаг, сумдад шуурхай албаны автомашиныг олгохоор шийдвэрлэсэн.

Шуурхай албаны автомашин гардуулах ажиллагаа өнөөдөр Онцгой байдлын ерөнхий газарт боллоо.

Онцгой байдлын ерөнхий газарт 15 тн-ын шатахуун тээвэрлэгч автомашин, Хил хамгаалах ерөнхий газар, Завхан аймгийн Тосонцэнгэл, Хэнтий аймгийн Онцгой байдлын газрын Бор-Өндөр сумын Онцгой байдлын хэлтэст УАЗ-31519 хантер маркийн автомашин, Завхан аймгийн Тэс суманд УАЗ-22069 маркийн фургон автомашины түлхүүрийг ОБЕГ-ын Улсын нөөц, хүмүүнлэгийн тусламжийн газрын дарга, дэд хурандаа Ч.Цогбаяр гардуулан өглөө.

Мөн Завхан аймгийн Яруу сум, Өвөрхангай аймгийн Онцгой байдлын газрын Хархорин сумын Онцгой байдлын хэлтэст УАЗ-31519 хантер маркийн автомашин, Дорноговь аймгийн Онцгой байдлын газарт аврах ажиллагааны автомашин, мөн аймгийн Хүнс, хөдөө аж газарт 2 тн-ын ариутгал автомашин, Архангай аймгийн Өндөр-Улаан, Хашаат сум, Сүхбаатар аймгийн Эрдэнэцагаан сумдад нийт 74 гэрийг улсын нөөцөөс олгоод байна гэж Онцгой байдлын ербнхий газраас мэдээллээ.

Алтан булаг сум дахь Хилийн цэргийн 0243-р ангийн 15 алба хаагч зохих хууль ёсны зөвшөөрөлгүйгээр 57 ширхэг нойтон нарс мод бэлтгэж байна гэх мэдээллээр цагдаагийн алба хаагчид очиж шалгасан байна. Тэрээр хууль бусаар ойгоос мод бэлтгэж байсан ба гуравдугаар сарын 5-ны өдрийн оройн 23:40 цагт Төв аймгийн Алтан булаг суманд хууль бусаар мод бэлтгэж байгаад баригджээ. Уг хэргийг тус аймгийн цагдаагийн хэлтэс шалгаж байгаа аж.

М.САЙНЗАЯА

УИХ-ын 42 дугаар тойрог /Хэнтий/-т явуулах нөхөн сонгуулийг зохион байгуулах Хэнтий аймгийн Сонгуулийн хорооны гишүүд томилогдсон байна.

Сонгуулийн хорооны даргаар аймгийн ЗДТГ-ын дарга Ж.Ганбаатар, нарийн бичгийн даргаар аймгийн ИТХ-ын Ажлын албаны ажилтан Ш.Эрдэнэжаргал, гишүүдээр Эрдэм баян Хэрлэн 4-р сургуулийн захирал Б.Жавхланбаяр, ИТХ-ын нарийн бичгийн дарга С.Бат-Эрдэнэ, аймгийн Татварын хэлтсийн мэргэжилтэн М.Мөнхнаран, ЗДТГ-ын Санхүү, Төрийн сангийн хэлтсийн дарга С.Нямдаваа, “Насан туршийн боловсрол” төвийн мэргэжилтэн Д.Борхүү, ЗДТГ-ын Хууль, эрх зүйн хэлтсийн дарга Л.Бат-Октябрь, Эрүүл мэндийн газрын дарга Ц.Гэрэлмаа нарын есөн хүний бүрэлдэхүүнтэйгээр байгуулжээ. Нөхөн сонгуульд нэр дэвшигчдийн бүртгэл ирэх 5 дугаар сарын 5-аас эхлэх юм.

Хан-Уул дүүргийн эрүүгийн хэргийн анхан шатны шүүхийн 2019.03.05-ний өдрийн Ш.Батхүү Ч.Ганзориг Б.Мөнхжаргал Г.Амарбат Г.Алтан Э.Сүрэн нарын урьдчилсан хэлэлцүүлэгийн шүүх хурлаар хэргийг прокурорт буцаан шийдвэрлэжээ.

Ш.Батхүү нь Г.Алтан, түүний хүү Э.Сүрэн нар санаатай нэгдэж бүлэглэн, ”Иргэний хэргийн шүүн таслах ажиллагаанд оролцохдоо нотлох баримтыг хуурамчаар бүрдүүлж, Төрийн банкийг залилан мэхлэж их хэмжээний хохирол учруулсан” буюу залилан мэхлэх гэмт хэргийг байнга үйлдэж амьдралын эх үүсвэрээ болгосон” гэх хэрэгт 2019 оны 01 дүгээр сарын 14-ний өдөр прокурорын яллах дүгнэлт үйлдэн, хэргийг Хан-Уул дүүргийн эрүүгийн хэргийн анхан шатны шүүхэд шилжүүлээд байсан юм. Гэвч шүүхээс уг хэргийг прокурорт буцаалаа.