Month: January 2019

Нийслэлийн Засаг даргын захирамжийн дагуу нийслэлийн цэргийн тоо бүртгэлийн ажлыг энэ сарын 4-21-ний өдрүүдэд засаг захиргааны анхан шатны нэгж буюу хороодын байранд ажлын өдрүүдэд 09:00-19:00 цагийн хооронд, амралтын өдрүүдэд 10:00-18:00 цагийн хооронд байгуулах гэж байна.

Цэргийн бүртгэлд 65 нас хүртэл бэлтгэл офицер, 18-50 нас хүртэл цэргийн үүрэгтэн, цэрэгт бүртгэлтэй мэргэжил бүхий эмэгтэйчүүд 50 нас хүртэл хамрагдах аж.

Цэргийн албанй тухай хуульд:

Цэргийн бэлтгэл үүрэгтэн нь цэргийн үүрэгтний үнэмлэхтэй байна.

Цэргийн бэлтгэл алба хаах насны иргэн жил бүр цэргийн бүртгэлд бүртгүүлж, цэргийн үүрэгтний үнэмлэхэд тэмдэглэл хийлгэнэ.

Цэрэгт бүртгэлтэй мэргэжил эзэмшсэн эмэгтэйчүүд цэргийн бүртгэлд бүртгүүлнэ хэмээн заасан байдаг.

Цэргийн бүртгэлд тус хуулийн 16.1-д заасан үндэслэлээр чөлөөлөгдсөн, цэргийн жинхэнэ алба хааж байгаа, ял эдэлж байгаа иргэн хамрагдахгүй гэж заасан байдаг. Тиймээс цэргийн бүртгэлд хамрагдах иргэн нутгийн захиргааны анхан шатны нэгж /баг, хороо/-ийн байранд тогтоосон хугацаанд ирж цэргийн бүртгэлд хамрагдах, цэргийн үүрэгтний үнэмлэхийг хаяж, үрэгдүүлэхгүй байх, хаяж үрэгдүүлсэн тохиолдолд нөхөж авах, цэрэг татлагын үеэр гурван сараас дээш хугацаагаар гадаад улсад зорчих бол энэ тухайгаа мэдэгдэх, өөр газар шилжин суурьших тохиолдолд тухайн оршин суугаа газрынхаа цэргийн бүртгэлээс хасуулж, шилжин очсон газраа цэргийн бүртгэлд бүртгүүлэх зэрэг үүргийг хүлээдэг байна.

Нийслэлийн Цэргийн штабаас 2019 онд “Хууль тогтоомжийн хэрэгжилтйиг хангах, төрийн батлан хамгаалах үйлчилгээний хүртээмжийг нэмэгдүүлэх жил” хэмээн тодорхойлж

1.Орон нутгийн хамгаалалт, дайчилгааны төлөвлөлтийн баримт бичгийг боловсруулах бэлтгэлийг хангах

2.Төрийн болон албаны нууцын тухай хуулийг хэрэгжүүлэх, мэдээллийн аюулгүй байдлыг чанд сахих

3.Төрийн батлан хамгаалах үйлчилгээний чанар, үр ашигийн дээшлүүлэх

4.Албан тушаалтнуудын цэргийн бүртгэл, сургалтыг зохион байгуулах, эх орноо батлан хамгаалах бэлтгэлийг хангуулах

5.Цэргийн албаны үнэлэмжийг дээшлүүлэх, бие бүрэлдэхүүний сахилга хариуцлага, ёс зүй, цэргийн мэдлэг, дадлагыг нэмэгдүүлэх зэрэг зорилтуудыг дэвшүүлэн ажиллахаар төлөвлөжээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Ахмад настны нийгмийн хамгааллын тухай хуульд зааснаар Цагаан cap, Үндэсний их баяр наадам, Ардын хувьсгалын ойн баярыг тохиолдуулан жилд хоёр удаа 65-аас дээш насны ахмадуудад “Насны хишиг”-ийг олгодог билээ. Үүнд,

• 65-69 настай ахмад настанд 50 мянган төгрөг;
• 70-79 настай ахмад настанд 80 мянган төгрөг;
• 80-89 настай ахмад настанд 150 мянган төгрөг;

90 ба түүнээс дээш настай ахмад настанд 250 мянган төгрөгийг тус тус олгохоор заасан байдаг. 2019 оны төсөвт “Насны хишиг” олгохоор 22.2 тэрбум төгрөг суулгажээ. Энэ нь өнгөрсөн оноос 1.6 тэрбум төгрөгөөр өссөн дүн /2018 онд 136 мянган ахмадад 20.6 тэрбум төгрөг олгосон/ юм.

Энэ жил 65 нас хүрч “Насны хишиг” авах болзол хангаж буй ахмадууд хороондоо хандаж бүртгүүлэх шаардлагатай бол өмнө нь “Насны хишиг” авч байсан ахмадуудын хувьд дахин бүртгүүлэх шаардлагагүйг ХНХЯ-ны мэргэжилтэн хэллээ.

Мөн жилд нэг удаа буюу Цагаан сарын өмнө Алдарт эхийн одонтой ээжүүдэд “Одонгийн мөнгө” олгодог. Өнгөрсөн жил 216,679 ээжид 28.5 тэрбум төгрөг олгож байсан бол энэ жилийн төсөвт 29.4 тэрбум төгрөг суулгажээ. Алдарт эхийн нэгдүгээр одонтой ээжид 200 мянга, хоёрдугаар одонтой ээжид 100 мянган төгрөгийг жилд нэг удаа олгодог. Цагаан сарын баяр жил бүр өөр өөр хугацаанд /аргын тооллоор/ таардаг учраас хуульд заасны дагуу баярын өмнө “Насны хишиг”, “Одонгийн мөнгө” олгох ажлыг зохион байгуулдаг байна.

Өнгөрөгч 12 сард ахуйн гал түймрийн 398 удаагийн тохиолдол бүртгэгдсэн байна. Ахуйн гал түймрийн улмаас 18 хүн амь насаа алджээ. Үүний 16 нь том хүн, 3 нь хүүхэд байгаа юм.

Иймд сурагчдын амралт эхэлсэнтэй холбогдуулан бага насны хүүхдийг хараа хяналтгүй гэрт нь цоожилж үлдээхгүй байх, пийшин, зуух яндангийн эвдрэл гэмтлийг засч, хүүхэд хүрч, түлэгдэх, гэмтэхээс сэргийлэх, цахилгааны утас, залгуур, ил гарах зүйлс, шатах, тослох материалыг бага насны хүүхдээс хол байлгах,

-Халуун үнс нурам, галтай хог хаягдлыг хогийн ил цэгт хаяхгүй байх, шингэрүүлсэн шатдаг хийгээр болон цахилгаанаар ажилладаг тулга, зуухыг ашиглахдаа аюулгүй ажиллагааны дүрэм, журмыг баримтлах,

-Цахилгааны шөнийн тарифыг хөнгөлсөнтэй холбогдуулан цахилгаан халаагуур, халаагчийг гэр, байшин, аж ахуйн нэгж, байгууллагадаа суурилуулахаар сонгосон бол цахилгаан ашиглалтын дүрэм, журмыг мөрдөх, аюулгүй ажиллагааны заавар, зааварчилгаа авах, мэргэжлийн цахилгаанчаар холбуулах, холбогдох байгууллагаас өгч байгаа заавар, зөвлөмжийг дагаж мөрдөх,

-Гарааш, ил зогсоолд автомашинаа байрлуулахдаа галын аюулгүйн зайн хэмжээг баримтлах, ил галаар автомашины мотор болон бусад явах эд ангийг халаахгүй байхыг Онцгой байдлын ерөнхий газраас анхааруулж байна.

Тээврийн цагдаагийн алба /ТЦА/ даваа гараг буюу өнгөрөгч оны сүүлийн өдөр 365 дуудлага хүлээн авчээ.

Зам тээврийн ослын шинжтэй 296 дуудлагын 15-д нь хүн гэмтсэн байна. Эл өдөр согтууруулах ундааны зүйл хэрэглэсэн үедээ тээврийн хэрэгсэл жолоодсон 22 зөрчил илэрсэн нь бусад өдрүүдийнхээс буурсан үзүүлэлт ажээ.

Багахангай дүүрэгт 39 настай, Э явганаар замын хөдөлгөөнд оролцохдоо автомашинд мөргүүлж амь насаа алдсан хэрэг гарсан байна. ТЦА-наас уг хэргийн шалтгаан нөхцлийг одоогоор шалгаж байгаа аж. Нийт бэртэж гэмтсэн осол хэргийн шалтгаан, нөхцөл нь явган зорчигчийн буруутай үйлдлээс болжээ. Иймд жолоочоос гадна явган зорчигчид ч шинэчлэн баталсан замын хөдөлгөөний дүрмийг уншиж судлахыг зөвлөж байна.

“Барс” худалдааны төвөөс бусад зах, худалдааны төвүүд амарч байна.

Захуудын ажиллах хуваарь:

“Хүчит шонхор” зах өнөөдөр амарна. Нэгдүгээр сарын 3-наас ажиллаж эхэлнэ.

Нарантуул ОУХТ:

2019 оны нэгдүгээр сарын 1-4-ний өдрүүдэд амраад нэгдүгээр сарын 5-ны өдрөөс ердийн цагийн хуваарийн дагуу ажиллана.

Хархорин зах:

Нэгдүгээр сарын 3-наас ажиллаж эхэлнэ.

“Да хүрээ” техникийн зах:

Нэгдүгээр сарын 3-наас ажиллаж эхэлнэ.

“Дүнжингарав” худалдааны төв

Нэгдүгээр сарын 4-нөөс ажиллаж эхэлнэ.

“Sunday” зах

Нэгдүгээр сарын 3-наас ажиллаж эхэлнэ.

“Бөмбөгөр” худалдааны төв

Нэгдүгээр сарын 3-наас ажиллаж эхэлнэ.