Month: December 2018

Төв аймгийн Онцгой байдлын газрын хамт олон албаны үйл ажиллагааг олон нийтэд сурталчлах, алба хаагчдаа алдаршуулах зорилгоор Албаны түүхэн музейтэй боллоо. Музейд үе, үеийн удирдлагууд, алба хаагчдын танилцуулга, эдэлж, хэрэглэж байсан хувцас хэрэглэл, багаж, тоног төхөөрөмж, байгууллагын түүхэн гэрэл зургийн цомог, Бүгд найрамдах өмнөд Судан улсад энхийг сахиулах ажиллагаанд оролцсон алба хаагчдын бэлэг, дурсгалын зүйл, Гал унтраах техникийн олон төрөлт спортын тамирчин аврагчдын алдарын булан зэрэг 100 гаруй үзмэр дэлгэгдэж, олны хүртээл болж байна. Албаны музейтэй болсноор Онцгой байдлын газрын түүхэн замнал, үе, үеийн удирдлага, алба хаагчдыг үйл хэргийг алдаршуулах, хойч залуу үедээ өвлүүлэх, залуу болон ахмад үеийн залгамж холбоог бэхжүүлэх ач холбогдолтой юм гэж Төв аймгийн Онцгой байдлын газраас мэдээллээ

АТГ-аас сар бүрийн 25-нд хийдэг хэвлэлийн хурлыг хийлээ.

Урдчилан сэргийлэх, соён гэгээрүүлэх хэлтсийн дарга Т.Баярхүү: АТГ-ын судалгаа одоогийн нөхцөл байдалтай хэр уялдаж байгаа талаар онол практикийн бага хурлыг 2018 оны арванхоёрдугаар сарын 4-ний өдөр Азийн сантай хамтран зохион байгуулсан. Энэ хурлын дараа авилгын талаарх хийсэн судалгааг бодлого боловсруулах, шийдвэр гаргах түвшинд ашиглахгүй байгаа гэсэн дүр зураг гарсан. Жил бүр АТГ-аас шудрага байдлын үнэлгээг гаргаж ирдэг. Судалгааны дүн энэ сард зарлагдлаа. Энэ судалгаагаар боловсролын байгууллага 2016 онд есдүгээр байрт эрэмбэлэгдэж байсан бол 2018 онд тавдугаарт эрэмбэлэгдэж нөхцөл байдал муудсан байна. Үүнтэй холбогдуулан 2019 онд боловсролын байгууллагад хяналт шалгалт хийж, түүнтэй тэмцэх чиглэлээр иргэний нийгмийн байгууллагуудтай хамтран ажиллана. Мөн ЖДҮХС-ийн хөрөнгийн эх үүсвэр, үйл ажиллагааг нээлттэй байлгах, авилга ашиг сонирхлын зөрчлөөс ангид байлгах чиглэлээр АТГ, Засгийн газрын хэрэгжүүлэх агенлаг, МХАҮТ-тай хамтран хэлэлцүүлэг хийлээ.

Мөрдөн шалгах хэлтсийн ахлах мөрдөгч Ч.Жаргалбаатар: ЖДҮХС-аас улстөрийн албан тушаал хашиж байгаа этгээдүүд болон тэдний хамаарал бүхий этгээдүүд зээл авсан байж болзошгүй нөхцөл байдлууд тогтоогдож, мөрдөн шалгах ажиллагаа явагдаж байна. Үүнд маш олон аж ахуйн нэгжийг хамарсан 100 гаруй тэрбум төгрөгийн асуудлыг нэгбүрчлэн шалгаж байгаа учир цаг хугацаа их орж байна. Манай хэлтсийн хувьд бүх мөрдөгчдөө дайчлан, цагдаагийн алба хаагчидтай хамтарсан хэсэг байгуулан мөрдөн шалгах ажиллагааг явуулж байна. Мөрдөн шалгалтаар тогтоогдсон нөхцөл байдлыг хэргийг шийдвэрлэх үед дэлгэрэнгүй мэдээлэл өгнө.

Салхитын мөнгөний ордтой холбоотой 1.3 сая доллар хураагдсан хэрэгт мөрдөн шалгах ажиллагаа явагдаж байна. Энэ ордын тусгай зөвшөөрлийг эзэмшигчдийн хооронд тусгай зөвшөөрлөөс үүдэлтэйгээр төрийн албан хаагчдад их хэмжээний хээл хахуул өгсөн, өгөхийг завдсан хэрэгт мөрдөн шалгах ажиллагаа явуулж байна. Мөрдөн шалгах ажиллагаа одоогоор дуусах болоогүй байна.

Хөгжлийн банктай холбоотой 20 орчим дугаар бүхий хэрэг шалгагдсан. Энэ хэргүүд бүгд прокурор шүүхэд шилжсэн. Шүүхийн шатанд хянагдаж байгаа.

Өмнөговь аймгийн Ханбогд сумаас Оюутолгой чиглэлийн 35 км хатуу хучилттай замын зорчих хэсгийг нээлээ. Энэхүү 35 км хатуу хучилттай замын нийт өртөг нь 46 тэрбум төгрөг бөгөөд уг хөрөнгийг Оюутолгой ХХК гаргаж, “Оч-Наран” ХХК гүйцэтгэн ажилласан байна. Энэ замын тухай Оюутолгой ХХК-ийн ТУЗ-ийн дарга Г.Батсүх хэлэхдээ “Энэ зам бол Монголын ирээдүйн том уурхайн дэд бүтцийн чухал хэсэг гэдгийг дахин хэлэхийг хүсч байна. Энэ зам жирийн зам биш. Олон улсын технологийн болон стандартын шаардлага хангасан зураг төсөлтэй зам болно. Энэхүү замыг тавих явцад тус бүр 60-70 метрийн урттай хоёр том гүүр барина. Мөн 40-50 усны суваг тавигдана. Улсын III зэргийн чанартай энэхүү авто замыг барьж, ашиглалтад оруулсныхаа дараа орон нутагт хүлээлгэн өгнө. Өөрөөр хэлбэл, аймгийн өмчлөлд шилжинэ гэж ойлгож болно. Гүйцэтгэгчээр “Оч наран” ХХК ажиллана. Энэ зам байгаль орчин архелоги, соёлын өвд нэн ээлтэй зам байх болно. Бид замын зураг төслийг хийж байхдаа байгаль орчны нарийн шинжилгээ буюу архелоги, палентологийн тусгайлсан нарийн шинжилгээг хийж, өртөх боломжтой судалгаа шинжилгээг гаргаснаас гадна архелогийн олон олдворуудыг аймгийн болон улсын холбогдох байгууллагуудад хүлээлгэж өгсөн байгаа. 35 км зам барих явцдаа нэг ширхэг ч мод тайрахгүй маршрутыг тохиорсон. Зам барьж дуусч ашиглалтад орсны дараа одоогийн бидний ашиглаж байгаа сайжруулсан замыг сэргээж, тусгай хөрсөөр хучиж, цаашдаа байгаль орчин сэргэж өвс ургамал ургах нөхцлийг бүрдүүлж өгнө. Оюутолгой ХХК нийгмийн хариулцлагын хүрээнд бүтээн байгуулж байгаа бүхий л дэд бүтцийнхээ бүтээн байгуулалтдаа байгаль орчин, ан амьтан, жигүүртэн шувууд, архелоги болон палентологид ихээхэн анхаарал хандуулдаг” хэмээж байв.

Монголын үндэсний бөхийн холбоо, Бөхийн өргөөг тойрсон маргаан нэг талдаа гарч шийдвэрлэгдэж байгаа талаар Дархан аварга Х.Баянмөнх, Б.Бат-Эрдэнэ нар хэвлэлийн хурал хийлээ.

Дархан аварга Б.Бат-Эрдэнэ “Үүсээд байгаа нөхцөл байдлыг хүмүүс мэдэж байгаа. Одоогоор Бөхийн өргөө хаалттай байгаа. Цагдаагийн байгууллагын зүгээс олон нийтийн өмч хөрөнгөөр бүтсэн Бөхийн өргөөг тал талаас эвдэж сүйтгэхгүй байх баталгаа гаргаж өг гээд хамгаалалтдаа байлгаж байгаа. Х.Баянмөнх аварга бид хоёр тал талаасаа ахмад настай нь, бид 20 насны зөрүүтэй хэдий ч аав хүү шиг, ах дүү шиг барилдлагатай хүмүүс. Бид хоёр хэд хэдэн удаа уулзсаны эцэст Монгол бөхийн төлөө санал санаачилга гаргая гэж ярилцсан. Ингээд Бөхчүүдийн хамтран ажиллах түр зөвлөлийг байгуулаад байна. Бидний зорилго бол шүүхээр явж байгаа маргаанаас тусдаа. Бид зөвхөн Бөхийн өргөөний үйл ажиллагаа болон бөхийн барилдаануудыг зохион байгуулах ажлыг хамтран зохион байгуулахаар тохиролцоонд хүрсэн. Бид хоёрт ямар нэгэн байдлаар санал бодол зөрөөд байх юм байхгүй. Би бол номхон даруу байхыг эрмэлздэг. Би хэзээ ч дээд үеийн ах, нар бөхчүүдийнхээ өмнөөс сөрж үг хэлж байгаагүй. Ер нь бол монгол бөхийн жудаг ёсыг хадгалж, харуулж явах нь гаргасан амжилтаас илүү гэдгийг үнэ цэнэтэй гэдэг дээр бид хоёр санал нэгтэй байдаг. Шүүхийн шийдвэр хаанаа яаж гарахаас үл хамаараад Бөхийн холбооны эв нэгдлийг хангах ёстой гэдэг дээр бид нэгдсэн байр суурьтай байгаа” гэв.

Дархан аварга Х.Баянмөнх “Б.Бат-Эрдэнэ аваргадаа баярлалаа. Яг зөв юм ярилаа. Бид хоёр бөхийн холбооны маргаанаас гадуур бурхнаас заяасан үүргийн дагуу өнөөдөр мэдээлэл хийж байна. Бид бөхийн холбооноос хамааралгүйгээр зэрэг зиндаагаараа бөхийн үйл хэргийг зохицуулах үүрэгтэй. Монгол бөх бол аваргуудынхаа жудаг ёс зүйг дагаад удирдагдаад яваад ирсэн түүхтэй. Бөхчүүд зодог шуудгаа цүнхэлчихсэн, барилдах газаргүй, үзэгчид үзэх барилдаангүй ийм нөхцөл байдал үүсээд байна. Бид хоёр шүүхээр явж байгаа асуудал дээр хоёр өөр байр суурьтай байгаа ч бөхийн үйл хэрэг, Монгол бөхийн жудаг ёсыг сэргээх дээр нэгдсэн байр суурьтай байна. Бид цэвэр Монгол бөхийн төлөө явна. Бидний бөхчүүдийн хамтарч байгуулсан түр зөвлөл Бөхийн өргөөг нээж, хэвийн үйл ажиллагаанд нь шилжүүлнэ. Шүүхийн шийдвэр аль талд гарна тэр цагт Бөхийн өргөөг холбоонд нь шилжүүлнэ. Аль ч холбооны талд шүүхийн шийдвэр гарсан бай тэр холбооныхон бид хоёртой зохицох ёстой. Дахин Бөхийн өргөөний хаалгыг түгжиж маргаан дэгдээхгүй. Бөхийн өргөөнд хоёр ижил өрөө тохижуулаад хоёр холбооны удирдлагуудыг хамтад нь ажиллуулна. Өнөөдөр бид хоёр гарын үсэг зурсан бичиг өгөөд Бөхийн өргөөг нээлгэнэ. Бурхнаас бид хоёрт энэ асуудлыг шийдвэрлэх үүрэг өгсөн. Бөхийн амьдралыг туулсан, үзсэн бид хоёр Монгол бөхийн хөгжлийн төлөө ажиллана” гэв.

Г.Доржзодовын дэлгэсэн “60 тэрбум”-ын схемд МАН-ын цөөнгүй лидер нэр холбогдсон. Тус схемийг Доржзодовтой хамт танилцуулсан А.Ганбаатар нь 2017 оны наймдугаар сарын 17-ны өдөр хэвлэлийн бага хурал хийхдээ тэрхүү 60 тэрбумын схемийг танилцуулах хуралд Шадар сайд У.Хүрэлсүх, намын генсек Д.Амарбаясгалан, Л.Оюун-Эрдэнэ нар байсан гэж мэдээлсэн юм. Үүний дараа мань гурвыг төлөөлж МАН-ын ерөнхий нарийн бичгийн дарга Д.Амарбаясгалан Шүүхэд нэхэмжлэл гаргажээ. Тэрхүү нэхэмжлэлд Шүүх ямар шийдвэр гаргасныг нийтлэв. Бидэнд аль эрт олдсон энэхүү Шүүхийн шийдвэрийг одоо гаргаж байгаагийн учрыг ч бас хэлье. Өчигдрийн сонинд нийслэлийн МАН-ын хорооны дарга асан Ц.Сандуйгийн ярилцлага гарсан. Тэр ярилцлагад “… Доржзодовын танилцуулсан 60 тэрбумын схемийг У.Хүрэлсүх, Д.Амарбаясгалан, Л.Оюун-Эрдэнэ гуравт А.Ганбаатар бид хоёр үзүүлж, ярилцсан юм” хэмээн ярьжээ.

Тэгвэл Д.Амарбаясгалангаас нэхэмжлэлтэй Иргэний хэргийн шүүхийн шийдвэрт “…Хариуцагч А.Ганбаатарын хэвлэлийн хурал дээр нэхэмжлэгч Д.Амарбаясгалан нартай холбоотой хийсэн мэдээлэл нь үнэн зөв болох нь баримтаар тогтоогдохгүй байх тул хариуцагчийн хэвлэлийн хурал дээр хийсэн мэдээлэл нь нэхэмжлэгчийн нэр төр, ажил хэргийн нэр хүндийг гутаасан байна гэж дүгнэх үндэслэлтэй. Иймд дээрх үндэслэлээр хэвлэлийн хурлын нэхэмжлэгч Д.Амарбаясгалантай холбоотой хэлсэн мэдээлэлд хэвлэлийн бага хурал хийн няцаалт хийж, уучлалт гуйж, нэхэмжлэгчийн нэр төр, алдар хүнд, ажил хэргийн нэр хүндийг гутаасан мэдээллийг залруулахыг хариуцагч А.Ганбаатарт даалгаж шийдвэрлэх нь зүйтэй гэж Шүүх бүрэлдэхүүн дүгнэв” гэжээ. А.Ганбаатарт ирсэн Шүүхийн шийдвэр удахгүй Ц.Сандуйд ирэх нь бололтой. Яагаад гэвэл хүн гүтгэсэн хэргээр Шүүхийн шийтгэл авчихаад байгаа А.Ганбаатарын хууль бус үйлдлийг Ц.Сандуй сая давтлаа хэмээн нэр бүхий хүмүүс үзжээ.

Хүмүүс бүгдээрээ буруу сонсоогүй бол 60 тэрбумын схемийг танилцуулж буй 90 минутын бичлэг дотор “… ингэж л Хүрэлсүхийн гар хөлийг тасдана…” гэсэн яриа тууж явдаг байх аа. Хүрэлсүхийн гар хөлийг тасдах төлөвлөгөөг танилцуулж буй хурал дээр У.Хүрэлсүх нь өөрөө очоод сууж байсан юм байх даа. Нэгнийгээ ичгүүр сонжуургүйгээр гүтгэх, элэг доог болсон юмнууд ч болж байна даа. Удахгүй хэн нэг нь “…түүний хүн хөнөөж байхыг бид хамтдаа хараад зогсож байсан” гэж ярихав дээ.

Ч.БАЗАРГҮР

2019 онд бүх нийтээр амрах баярын өдрүүдэд хэд хоног амрах, тэдгээрийн хэд нь ажлын өдөр таарч байгааг дараах хүснэгтээс харна уу.