Month: November 2018

Замын хөдөлгөөний шинэчилсэн дүрмээр энэ сарын 01-нээс эхлэн тулгуур эрхтний бэрхшээлтэй иргэдийн унаж байгаа тээврийн хэрэгсэл нэгдүгээр эгнээгээр зорчихыг зөвшөөрсөн байна.

Мөн эдгээр тээврийн хэрэгсэлд “Хөдөлгөөн хориотой”, “Механикжсан тээврийн хэрэгслийн хөдөлгөөн хориотой”, ”Удаан зогсох хориотой” тэмдэг үйлчлэхгүй юм байна.

Автомашин жолоодож буй тулгуур эрхтний бэрхшээлтэй иргэд энэхүү зөвшөөрлийг авахын тулд
1.Иргэний үнэмлэх
2. Жолооны үнэмлэх
3. Хөгжлийн бэрхшээлтэйг тодорхойлсон комиссын шийдвэр бичиг
4. 15000 төгрөгтэй “Цаг үргэлж” жолооны курсын оффис дээр очиж цахим бүртгэлд бүртгүүлэх юм байна. Ингэснээр тухайн иргэн машинтайгаа нэгдүгээр эгнээгээр явах боломжтой болох бөгөөд камераар шүүж тулгуур эрхтний бэрхшээлтэй иргэний машин мөн эсэхийг шүүж байх ажээ.

Онцгой байдлын ерөнхий газраас Төв аймагт зохион байгуулж байгаа гамшгаас хамгаалах иж бүрэн сургууль хоёр дахь өдрөө үргэлжилж байна.

Гамшгаас хамгаалах иж бүрэн сургуулийн зорилго нь нутгийн захиргааны байгууллага, гамшгаас хамгаалах орон нутгийн албад, мэргэжлийн анги, төрийн бус байгууллагын гамшгаас хамгаалах төлөвлөлтийг бодит байдалд нийцүүлэн тодотгох, байгууллага хоорондын түншлэл хамтын ажиллагаа, салбар дундын удирдлага, зохицуулалтыг боловсронгуй болгох, гамшгаас хамгаалах хүч, хэрэгслийн бэлтгэл, бэлэн байдлыг дээшлүүлэх, үүрэг гүйцэтгэх чадавхыг нэмэгдүүлэхэд чиглэгддэг.

Энэ удаагийн гамшгаас хамгаалах иж бүрэн сургуулийн хувьд ч орон нутгийн бүх шатны удирдлага, гамшгаас хамгаалах албад, мэргэжлийн ангийн удирдах бүрэлдэхүүний гамшгаас хамгаалах менежмент эрсдэлийн үнэлгээний мэдлэгийг дээшлүүлэх, төрийн болон төрийн бус байгууллага, хувийн хэвшил хоорондын гамшгийн үеийн харилцан ажиллагааг жигдрүүлэх, гамшгийн голомтод эрэн хайх, аврах, хор уршгийг арилгах чиглэлээр аймгийн Онцгой комисс, гамшгаас хамгаалах алба, мэргэжлийн ангийн удирдах бүрэлдэхүүний шийдвэр гаргах явцад мэргэжил арга зүйн зөвлөгөө өгөх, аюул, осол тохиолдсон үед аврах, хор уршгийг арилгах, үйл ажиллагаанд гарах хүндрэл, бэрхшээлд аймаг, орон нутгийн бэлтгэл, бэлэн байдлыг хангах бодлогын хүрээнд зохион байгуулагдаж байгаа юм.

Аймгийн Онцгой комисс, сумдын Засаг дарга, гамшгаас хамгаалах орон нутгийн алба, аж ахуйн нэгж байгууллагуудын удирдах бүрэлдэхүүн “Бүх шатны нутгийн захиргааны байгууллага, гамшгаас хамгаалах орон нутгийн албад, мэргэжлийн анги, хуулийн этгээд, төрийн бус байгууллагын гамшгаас хамгаалах төлөвлөлт, бэлэн байдал, тэдгээрийн харилцан ажиллагаа” сэдвийн хүрээнд газар хөдлөлт, хүн, мал амьтны гоц халдварт өвчин, хүчтэй цасан шуурга, зудын нөхцөл байдлыг үнэлэх цагийн байдлын өгөгдлийн дагуу ажиллаж байна гэж Онцгой байдлын ерөнхий газраас мэдээллээ.

Улсын хэмжээнд төрийн өмчит ЕБС-ийн сурагчдын нэгдүгээр улирлын амралт аравдугаар сарын 27-нд эхэлсэн. Энэ улиралд нэг долоо хоног амрах хуваарьтай. Тиймээс сурагчдын хичээл арваннэгдүгээр сарын 5-нд буюу маргааш орно. Энэ жил идэр есийн хүйтний үед сурагчдыг амраах зорилгоор Боловсрол, соёл, шинжлэх ухаан, спортын яамнаас гаргасан 2018-2019 оны хичээлийн жилийн амрах хуваарь уян хатан байх онцлогтой аж.

2018-2019 ОНЫ ХИЧЭЭЛИЙН ЖИЛИЙН АМРАЛТЫН ХУВААРЬ

НИЙСЛЭЛИЙН СУРАГЧИД

1 дүгээр улирлын амралт:

Бүх ангийн сурагчид X сарын 27-ноос XI сарын 04-нийг дуустал 1 долоо хоног

2 дугаар улирлын амралт

-I-V ангийн сурагчид XII сарын 22-ноос I сарын 13-ныг дуустал 3 долоо хоног

-VI-XII ангийн сурагчид XII сарын 29-нөөс I сарын 13-ныг дуустал 2 долоо хоног

3 дугаар улирлын амралт

Бүх ангийн сурагчид III сарын 16-наас III сарын 31-нийг дуустал 2 долоо хоног

Зуны амралт

-I-II ангийн сурагчдын хувьд V сарын 25-наасIII-V ангийн сурагчдын хувьд VI сарын 01-нээс

-VI-XII ангийн сурагчдын хувьд VI сарын 8-наас эхэлнэ.

АЙМАГ, СУМ, ТОСГОН, БАГИЙН СУРАГЧИД

1 дүгээр улирлын амралт

Бүх ангийн сурагчид X сарын 27-ноос XI сарын 04-нийг дуустал 1 долоо хоног

2 дугаар улирлын амралт

-I-V ангийн сурагчид XII сарын 29-нөөс I сарын 13-ныг дуустал 2 долоо хоног

-VI-XII ангийн сурагчид XII сарын 29-нөөс I сарын 06-ныг дуустал 1 долоо хоног

3 дугаар улирлын дундуур

Цагаан сарын амралт 1 долоо хоног

3 дугаар улирлын амралт

Бүх ангийн сурагчид III сарын 16-наас III сарын 31-нийг дуустал 2 долоо хоног /бүс нутгийн онцлогтой уялдуулан энэ улирлын амралтыг нийслэлийн сурагчдын III улирлын амралттай харьцангуй 1 долоо хоногийн өмнө эхэлж болно эсвэл 1 долоо хоногийн сүүлд дуусгаж болно.

Зуны амралт

I-II ангийн сурагчдын хувьд V сарын 25-наас,
III-V ангийн сурагчдын хувьд VI сарын 01-нээс,
VI-XII ангийн сурагчдын хувьд VI сарын 8-наас эхэлнэ.

Улсын хэмжээнд ургац хураалт дуусч урьдчилсан дүнгээр 409.6 мянган тонн үр тариа хураан аваад байна.

Өнгөрсөн онтой харьцуулахад 172.6 мянган тонн үр тариа илүү хураан авчээ.

Ингэснээр манай улс улаанбуудайн болон төмсний дотоодын хэрэгцээг 100 хувь хангах боломж бүрдсэн талаар Ургацын төв штабаас мэдээлж байна.

Өнгөрсөн сарын сүүлчийн байдлаар 160.9 мянган тонн төмс, 93.6 мянган тонн хүнсний ногоо, 117.8 мянган тонн тэжээл, 19.3 мянган тонн тосны ургамал тус тус хураан аваад байна. Өмнөх онтой харьцуулахад төмс 44.5 мянган тонноор, хүнсний ногоо 14.5 мянган тонноор, тэжээл 57.3 мянган тонноор, тосны ургамал 7.2 мянган тонноор тус тус өссөн үзүүлэлттэй байна. Хаврын тариалалт, намрын ургац хураалтыг хэвийн явуулахад нь тариаланчдад бүхий талын дэмжлэг үзүүлснээр энэ жилийн тухайд урьд онуудаас тариалалт эрс нэмэгдэн, арвин ургац хураан аваад байна. Засгийн газраас долоон аймгийн 60 сумын 113 багийг газар тариалангийн бүс нутгаар тогтоон хашаажуулах ажлыг эхлүүлэн, газар тариалангийн салбарт үр, сорт, техникийн шинэчлэл хийж, усалгаатай талбайг нэмэгдүүлэх бодлого баримтлан ажиллаж ирсэн юм гэдгийг ХХААХҮЯ-наас онцолж байна.