Month: October 2018

Иргэний үнэмлэхийг нотариатаар батлуулах шаардлагагүй болсон талаар Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн төр, захиргааны байгууллагуудаар үйлчлүүлэх иргэн, хуулийн этгээд иргэний үнэмлэх, улсын бүртгэлийн гэрчилгээ болон холбогдох бусад албан бичгийг эх хувиар нь авчирсан тохиолдолд хуулбарыг нотариатаар баталгаажуулахыг шаардах явдлыг таслан зогсоохыг Засаг дарга Б.Батболд Нийслэлийн үйлчилгээний нэгдсэн төвүүд, Нийслэлийн Засаг даргын хэрэгжүүлэгч агентлаг, харьяа байгууллага, дүүргүүдийн Засаг даргын Тамгын газар, холбогдох байгууллагуудад тус тус үүрэг болгов.

Тухайлбал, Нийслэлийн үйлчилгээний нэгдсэн төвөөс иргэдэд 182 төрлийн үйлчилгээ үзүүлдэг. Үүнээс 29 нь бичиг баримтынхаа хуулбарыг нотариатаар баталгаажуулахыг шаарддаг байсан байна. Харин 2017 оны наймдугаар сарын 21-ний өдрөөс эхлэн хотын даргын захирамжийн дагуу эдгээр үйлчилгээг иргэд илүү хялбар авах боломж бүрдэж байгаа юм.

Монгол инженерүүдийн бүтээсэн “Мон-30” автобус нийслэлийн нийтийн тээврийн үйлчилгээнд явахад бэлэн болжээ. 2-3 цаг цэнэглээд 180-200 км зам туулах энэхүү автобусыг хүлээлгэн өгөх арга хэмжээ өнөөдөр боллоо. Улаанбаатар хотын нийтийн тээврийн салбарт Мон-30 автобусаар шинэчлэл хийх боломжтой эсэх талаар судалж, дотоодын үйлдвэрлэлээ дэмжихийг Ерөнхий сайд У.Хүрэлсүх үүрэг болголоо.

“Монгол машин” ХХК-ийн захирал н.Жаргалсайхан “Тэр хэмжээний автобус үйлдвэрлэх хүчин чадал байгаа төдийгүй, үйлдвэрлэл нэмэгдэхийн хэрээр жижиг, дунд үйлдвэрлэл хөгжиж, 2000 гаруй ажлын байр бий болно. Цахилгаан такси, ачааны автомашины угсарч, үйлдвэрлэх зорилт тавин ажиллаж байна” гэлээ. Энэ нь байгаль орчинд ээлтэй, эдийн засгийн үр ашигтай цахилгаан автобус нэвтрүүлэх, туршилт хийх тухай Засгийн газрын 2018 оны 5 дугаар сарын 22-ны 122 тоот тогтоолын хүрээнд хийгдэж буй ажил юм.

Нийслэлийн нийтийн тээврийн салбарт үйлчилгээнд явж буй нэг автобус жилд 45 сая төгрөгийн импортын шатахуун, газ, шатах тослох материал ашиглаж, нэг тонн гаруй хорт бодис ялгаруулдаг бол “Мон-30” загварын автобус нь жилд 6.6 сая төгрөгийн эрчим хүч худалдан авч, тус салбарын зардлыг 30-40 хувиар буулгах боломжтой ажээ. “Мон-30” автобус үйлдвэрлэн үйлчилгээнд явуулах болсон нь нийтийн тээврийн төдийгүй аж үйлдвэрлэлийн салбарт шинэ хуудас нээлээ гэж монгол инженерүүд ярьлаа.

Монголын залуу эрдэмтдийн холбоо, БСШУСЯ, ШУА, ШУТС-тай хамтран жил бүр зохион байгуулдаг “Хүрэл тогоот” эрдэм шинжилгээний бага хурал өнөөдөр эхэлжээ. Тус эрдэм шинжилгээний хурал нь залуу эрдэмтэн судлаачдын бүтээлийг олон нийтэд таниулах, дэвшилтэт техник, технологийн судалгаа шинжилгээний үр дүнг үйлдвэрлэл, бизнесийн үйл ажиллагаанд нэвтрүүлэх боломжийг буй болгох, салбар хоорондын хамтын ажиллагааг өргөжүүлэхэд чиглэгддэг байна.

Мөн шинжлэх ухаан, технологийн салбарын хүний нөөцийг чадавхижуулах, эрдэмтдийн залгамж халааг бэлтгэх, шинжлэх ухааны салбарт өндөр технологи, инновацийн бүтээлч тогтолцоог бий болгох, олон улсын зах зээлд өрсөлдөхүйц бүтээгдэхүүн гаргах зорилгоор төр, хувийн хэвшил, их дээд сургууль, эрдэм шинжилгээний байгууллагуудын хамтын ажиллагаанд тулгуурлан эрдэмтэд, багш судлаачид, инженер, менежерүүдийн онолын болон хавсрага судалгааны бүтээлүүдийг нэгтгэх, судалгааны чанар, үр өгөөжийг нэмэгдүүлэх, судалгаа – инновацийн үр дүнг нийгэм, эдийн засгийн салбарт өргөнөөр нэвтрүүлэх боломжийн талаар хэлэлцэх, дүгнэлт, санал зөвлөмжийг гаргахад энэ хурлын зорилго чиглэдэг юм.

Тус хурлаас шалгарсан шилдэг бүтээлүүд Монгол Улсын Ерөнхийлөгчийн нэрэмжит шагнал, БСШУС–ын сайдын нэрэмжит залуу судлаачийн грант, ШУА–ийн залуу судлаачийн тэтгэлэг зэрэг нэр хүндтэй шагналуудыг хүртдэг уламжлалтай. Өнө жил тус хуралд их, дээд сургууль, судалгааны байгууллага, хүрээлэнд ажиллаж, суралцаж буй 35 хүртэл насны залуу эрдэмтэн, судлаачид оролцож байна. Залуу эрдэмтэн, судлаачдын эрдэм шинжилгээний бага хурал нь шинжлэх ухааны үндсэн чиглэлүүд болох Анагаах ухаан, Байгалийн ухаан, Геологи-Газарзүй, Нийгэм-хүмүүнлэгийн ухааны салбар, ХАА-Биотехнологийн салбар, Эдийн засаг-менежмент гэсэн 6 салбар хуралдаанаар үргэлжилж байна.

Монголын Уран зургийн галерейн үзэсгэлэнгийн танхимд “Дүрслэх урлагийн шилдэг бүтээл-2018” үзэсгэлэнд оролцсон 87 уран бүтээлчийн монгол зураг, уран зураг, баримал, сийлбэр, өнгөт бар, арьсан урлал, график болон инстоляци чиглэлийн нийт 117 нэр бүхий бүтээлээс шилдгээр шалгарсан зургаан бүтээлийг улсын сан хөмрөгт худалдан авахаар боллоо. Шилдэг бүтээлээр Г.Одбаярын “Хүлэгү хаан” 2018 оны монгол зураг, Ц.Баттөрийн “Хар цас” 2017 оны уран зураг, Т.Нурмаажавын “Цагийн хүрдэн” 2017 оны монгол зураг, П.Ганбатын “Эх” 2017 оны уран зураг, С.Болдбаатарын “Парисын бороотой намар” 2016 оны уран зураг болон Т.Даваасамбуугийн “Тал нутгийн морьтон” 2017 оны уран баримлын бүтээл шалгарч өнөөдөр батламжаа гардан авлаа.

Хууль зүйн үндэсний хүрээлэн /ХЗҮХ/-гийн 40 гаруй албан хаагч өнөөдөр нийгмийн хариуцлагын хүрээнд Цус сэлбэлтийн судлалын үндэсний төв /ЦССҮТ/-д цусаа бэлэглэв.

Зөвхөн нэг удаа өгөөд зогсохгүй Төрөөс донорын цус, цусан бүтээгдэхүүний хангамжийг сайжруулах, аюулгүй байдлыг хангах талаар баримтлах бодлогын хүрээнд донорын үйлсийг сурталчлах олон нийтийн оролцоог нэмэгдүүлэх зорилгоор ХЗҮХ-гийннийт ажилчдын хурлаар жил бүрийн 10 дугаар сарын хоёр дахь долоо хоногийн “баасан гарагт” цусаа бэлэглэж байх шийдвэр гаргав.

Төрийн байгууллагуудын дунд анх удаа цус бэлэглэх албан ёсны өдөртэй болж буй нь онцлог бөгөөд ЦССҮТ-өөс энэхүү уриалгыг санаачилсанд баяр хүргэн талархал гардуулав.

Засгийн газрын энэ оны нэгдүгээр сарын 31-ны хуралдаанаар Сонгинохайрхан дүүргийн нутагт байрлах зорчигч тээврийн “Драгон” вокзалыг Авто худалдааны цогцолбор руу шилжүүлэхээр шийдвэрлэсэн билээ. Үүний хүрээнд тус цогцолборт “Хангарьд” олон улс, хот хоорондын автобус терминал, олон улсын худалдаа логистикийн төвийг байгуулахаар болжээ.

Энэхүү төслийн хүрээнд баригдах шинэ авто вокзал нь Улаанбаатар хотоос аймаг орон нутаг болон Улаан-Үүд, Эрээн хотын хооронд зорчих зорчигчдод олон улсын жишигт хүрсэн үйлчилгээг үзүүлэх орчин үеийн шилдэг шийдэлтэй төв байх аж. Тийз борлуулах үйлчилгээг дотоодын болон гадаадын аялагч, жуулчдад хялбар хүргэх үүднээс бүрэн автомат онлайн худалдааны сүлжээг нэвтрүүлэх юм байна. Зорчигч тээврийн маршрут болон цагийн хуваарь нь ухаалаг програмаар зохицуулагдаж авто вокзал дээр түгжрэл, давхардлыг үүсгэхгүй байх нөхцөлийг бүрдүүлэх аж.

Нийт 24 автобусны гарцтай, 4200 ам метр талбай байхаар төлөвлөжээ. Мөн тус авто вокзалын дэргэд орон нутгийн зорчигч болон нийслэлийн иргэдэд зориулсан төрөл бүрийн хүнс, барааны бөөний зах байгуулахаар төлөвлөсөн байна. Бөөний худалдааны төв нь нийт 24000 ам метр талбайг хамарч 16-20 ам метр бүхий нийт 800 павильонтой байх аж. Мөн тус захтай залгаад 3000 ам метр агуулахын байр барихаар төлөвлөжээ. Барилгын ажил ирэх жилийн дөрөвдүгээр улиралд дуусч, ашиглалтад бүрэн орох юм байна.

Энэ талаар Нийслэлийн Засаг дарга С.Батболд “Улаанбаатар хотын төвлөрлийг сааруулах үүднээс үе үеийн хотын дарга нар тодорхой ажлуудыг санаачлан зохион байгуулж ирсэн. Үүний нэг нь хотын шинэ суурьшлын бүсүүд рүү захуудыг нүүлгэх ажил юм. 2014 онд нийслэлийн төсвөөс 20 гаруй тэрбум төгрөг гаргаж энэ цогцолборыг байгуулсан. 2016 онд энэ цогцолборын үйл ажиллагаа зогсонги болсон байсан. Нийслэлээс мэргэжлийн байгууллагуудтай хамтран ил задгай авто машины худалдааг хотоос нүүлгэсэн. Үүний үр дүнд цогцолборын үйл ажиллагаа сэргэж өнөөдрийн байдлаар 2300 орчим машин худалдаалагдахаар байршсан байна. Авто худалдааны цогцолборын бүтцийг өөрчилж, хувьцаат компани болгосноор гадна, дотны хөрөнгө оруулалтыг татах томоохон боломж бүрдэж байгаа. Энд зөвхөн авто худалдааны үйлчилгээ биш олон улсын логистикийн төв, зорчигч тээврийн төв, худалдааны төв болгох зорилт дэвшүүлэн ажиллаж байна. Дэд бүтэц шийдэгдсэнээр энд төвлөрөл, суурьшил бий болох боломжтой” гэсэн юм.