Month: October 2018

Ургацын штабаас мэдээлснээр аравдугаар сарын 12-ны байдлаар улсын хэмжээнд ургац хураалтын ажил дунджаар 65.5 хувьтай байна.

ХХААХҮЯ-наас мэдээлснээр улсын хэмжээнд нийт 194.7 мянган га-гаас 266.3 мянган тонн үр тариа, 158.6 мянган тонн төмс, 88.1 мянган тонн хүнсний ногоо тус тус хураан аваад байна. Энэ нь үр тарианы 57 хувь, төмсний 96.1 хувь, хүнсний ногооны 92.4 хувь, тэжээлийн 51.7 хувь, тосны ургамлын 30.2 хувийг хураан аваад байгаа үзүүлэлт аж. Аравдугаар сарын 9 буюу өнгөрсөн мягмар гарагт Ургацын штабаас ирүүлсэн мэдээгээр ургац хураалт 58 хувьтай байсан бол гурван өдрийн дараах байдлаар дээрх хувь 7.5 хувиар өсч ургац хураалтын ажил эрчимжиж байна. Тодруулбал, аравдугаар сарын 9-ны байдлаар 213.8 мянган тонн үр тариа хураан аваад байсан бол 12-ны өдрийн байдлаар 266.3 мянган тонныг авч нийт авсан ургацын хэмжээ 525.2 мянган тонн үр тариа болоод байна. Ус цаг уур, орчны шинжилгээний газраас ирүүлсэн мэдээгээр аравдугаар сарын 10-наас 17-ныг хүртэлихэнх нутгаар өдөртөө дулаарч, цаг агаар тогтуун байна гэж Ус, цаг уур, орчны шинжилгээний газраас мэдээллээ.

Иргэдийн санал хүсэлтээр нийтийн тээврийн үйлчилгээний дараах чиглэлүүдэд өглөөний үйлчилгээнд гарах цагийг урагшлуулахаар зохицуулалт хийж, энэ сарын 15-наас мөрдөхөөр болов. Энэ хүрээнд дараах автобусны чиглэлүүдэд цагийн хуваарь урагшилж өөрчлөлт оржээ.

1.Ч:28 “Сэлх 7 буудал- Ард кино театр” чиглэлийн үйлчилгээг Сэлх талаас 06:35 цагаас, Ард кино театр талаас 06:47 цагаас тус тус эхлүүлэх;

2.Ч:32 “Улиастай-Баянмонгол хороолол-ТЭЦ-III” чиглэлийн үйлчилгээг ТЭЦ-III талаас 06:46 цагаас эхлүүлэх;

3.Ч:38 “ХМК-Саппоро-3,4-р хороолол-Хайлааст” чиглэлийн үйлчилгээг Хайлааст талаас 06:45 цагаас эхлүүлэх;

4.Ч:41 “Баруун салаа-Их тойруу-Халдвартын эмнэлэг” чиглэлийн үйлчилгээг Халдвартын эмнэлэг талаас 06:55 цагаас эхлүүлэх;

5.Ч:42 “Сүлжмэл-Нарны гүүр-Зайсан” чиглэлийн автобусны гаралтын тоог нэмэгдүүлж автобусны хүлээгдлийн хугацаа 7-8 минут болгож бууруулах;

6.ХО:2 “Шарга морьт-Дүнжингарав худалдааны төв” чиглэлийн үйлчилгээг Дүнжингарав худалдааны төв талаас 06:45 цагаас тус тус эхлүүлэхээр болжээ.

Манай улсын хилээр 2018 оны эхний есөн сард давхардсан тоогоор 4.6 сая зорчигч нэвтэрсэн нь өмнөх оны мөн үеэс 68.2 (1.5%) мянгаар өсчээ. Улсын хилээр нэвтэрсэн зорчигчдын 38.7 хувь нь Замын-Yүд, 18.7 хувь нь Буянт-Ухаа, 11.8 хувь нь Гашуунсухайт, 11.4 хувь нь Алтанбулаг, 5.9 хувь нь Шивээхүрэн, 13.5 хувь нь бусад боомтоор орсон аж. Улсын хилээр 2018 оны эхний есөн сард гадаадын 485.6 мянган хүн орсон нь өмнөх оны мөн үеэс 45.7 (10.4%) мянгаар өсчээ.

Хилээр орсон гадаадын зорчигчдын 34.1 хувийг БНХАУ-ын иргэд, 21.0 хувийг ОХУ-ын иргэд, 15.8 хувийг БНСУ-ын иргэд, 3.8 хувийг Япон улсын иргэд, 3.4 хувийг АНУ-ын иргэд, 2.9 хувийг Казахстан улсын иргэд, 19.0 хувийг бусад улсын иргэд тус тус эзэлж байна.

Манай улсын давхардсан тоогоор 1.8 сая иргэн 2018 оны эхний есөн сард гадаадад зорчсоноос 1.3 (71.9%) сая нь хувийн журмаар зорчжээ.

Өнөөдөр бүх нийтээр мод тарих үндэсний өдөр тохиож байна. Энэхүү арга хэмжээг 2010 оноос уламжлал болгон зохион байгуулж ирсэн. НЗД-ын 2016-2020 оны үйл ажиллагааны “Аз жаргалтай хот” хөтөлбөрт Улаанбаатар хотыг дэлхийн жишигт нийцсэн, ногоон хөгжлийн үзэл баримтлалтай хот болгож, иргэдийн ая тухтай амьдрах нөхцлийг бүрдүүлнэ гэсэн байдаг. Тиймээс уг арга хэмжээнд Нийслэлийн төр захиргааны байгууллагууд болон ААН, иргэд өргөнөөр оролцож байна.

Жил бүр Үндэсний цэцэрлэгт хүрээлэнд мод тарьдаг бол энэ жил гурван газарт мод тарьж байна. “Монгол наадам” цогцолбор, цэвэрлэх лагийн талбайд УСУГ-ын зохион байгуулалттай мод тарьж байна. Иргэдийн оролцоог нэмэгдүүлэх, тэдэнд чирэгдэл учруулахгүйн тулд дүүрэг бүрт энэ арга хэмжээ болж байгаа бөгөөд үзэсгэлэн худалдаа ч нээн ажиллуулж байна хэмээн Нийслэлийн Байгаль орчны газрын Ойн хэлтсийн дарга М.Чинсанаа мэдээллээ.

2010-2017 оны хооронд нийт 2 сая 22 мянган мод тарьсан байдаг, эргээд арчилж, хамгаалан ургуулах нь хамгийн том ажил. Тэгэхээр иргэд тарьсан модоо цаашид байнга арчилж хамгаалан ургуулахыг мэргэжилтнүүд зөвлөж байна.

Мод тарьснаар ногоон байгууламж нэмэгдэхээс гадна уур амьсгалын өөрчлөлтөд эерэг нөлөө үзүүлэх, хөрсний бохирдол, хүнд металлуудыг задлах зэрэг маш ач холбогдолтой. Тэр тусмаа нэг га ой мод 18 сая шоо метр агаар цэвэршүүлж, утааны 30-35 хувийг өөртөө шингээн, дуу чимээний 25 хувийг замхруулж, тоос шороог 76 хувь хүртэл өөртөө барьдаг чанар нь хүн амын төвлөрөл ихтэй нийслэл хотын орчны бохирдлыг бууруулахад онцгой ач холбогдолтой гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Нийслэл хотын хэмжээнд замын хөдөлгөөний аюулгүй байдлыг хангах, ачааллыг бууруулах, түгжрэлийг багасгах зорилтын хүрээнд 342 алба хаагч хөдөлгөөн зохицуулалт, хяналт шалгалт хийж, үүрэг гүйцэтгэж байна. Алба хаагчид уртасгасан цагаар ажиллаж байгаа бөгөөд нийтийн тээврийн хэрэгслийг түргэн шуурхай зорчих нөхцөлийг бүрдүүлэхэд анхаарч ажиллаж байна.

Уг ажилтай холбоотойгоор 07:00-22:00 цагийн хооронд үүрэг гүйцэтгэж буй алба хаагчдын өдрийн цайнд зориулан нийслэлийн Засаг даргаас тодорхой хэмжээний төсвийг шийдвэрлэж өгөхийн зэрэгцээ хөдөлгөөн зохион байгуулалтад хэрэглэдэг тумбо 2000 ширхгийг шийдвэрлэж өгчээ.

Дээрх арга хэмжээ энэ сарыг дуустал үргэлжлэх юм. Жолооч нарыг замын хөдөлгөөний дүрмийн дагуу, бие биедээ хүлээцтэй, хүндэтгэлтэй хандах, мөн автобусны буудал дээр нийтийн тээврийн хэрэгслийн хөдөлгөөнд саад учруулан тээврийн хэрэгслээ байршуулах, зорчихгүй байхыг зөвлөж байна.

Монголын эмэгтэйчүүдийн холбоо (МЭХ)-ны чуулганаас сэтгүүлч Б.Оюунгэрэлийг тус холбооны ерөнхийлөгчөөр сонгов. Тэрбээр CHUHAL.mn сайтын ерөнхий захирал бөгөөд Монголын сонины холбооны гүйцэтгэх захирал, Мэдээллийн Сайтуудын Ассоциацын тэргүүнээр ажиллаж байв.

МЭХ -ны ерөнхийлөгчид өмнөх ерөнхийлөгч Ж.Эрдэнэчимэг, Б.Оюунгэрэл, Н.Золзаяа, Д.Энхжаргал нар өрсөлдөхөөр хүсэлтээ ирүүлсэн бөгөөд Н.Золзаяа, Д.Энхжаргал нар нэрээ татаж, Ж.Эрдэнэчимэг, Б.Оюунгэрэл нар өрсөлдсөн. Нийт 143 төлөөлөгч саналаа өгснөөс Б.Оюунгэрэл 82 гишүүний, Ж.Эрдэнэчимэг 61 гишүүний санал тус, тус авчээ.

МЭХ-ны шинэ ерөнхийлөгч Б.Оюунгэрэл “Монголын эмэгтэйчүүдийн холбоог олон нийтэд нээлттэй байгууллага болгохоос гадна, эмэгтэйчүүдийн эсрэг гэмт хэрэг хүчирхийлэлтэй тэмцэх үйлсээр ажлаа эхлүүлнэ” гэв. Энэ удаагийн хуралдаанаас Монголын эмэгтэйчүүдийн холбоо нь дүрмийн шинэчлэл хийсэн нь чуулганы томоохон ололт байлаа гэдгийг төлөөлөгчид онцолж байна.

Өнөөдөр буюу аравдугаар сарын 13-нд “Гамшгийн эрсдэлийг бууруулах олон улсын өдөр” тохиож байна. Энэхүү өдрийг НҮБ-ын Ерөнхий Ассамблейн шийдвэрийн дагуу 1989 оноос эхлэн дэлхий нийтээр тэмдэглэж ирсэн уламжлалтай.

Гамшгийн эрсдэлийг бууруулахад иргэд, олон нийтийн оролцоог хангах, олон нийтийг аюулгүй амьдрах арга ухаанд сургаж, дадлагажуулах, гамшгийн эрсдэлийг бууруулахын ач холбогдлыг хүүхэд, залууст таниулан мэдүүлэх зорилготой “Гамшгийн эрсдэлийг бууруулах олон улсын өдөр”-ийг энэ жил дэлхий нийтээр “Иргэн бүрийн гамшигтай тэмцэх чадавхыг нэмэгдүүлэх нь” уриан дор тэмдэглэн өнгөрүүлж байна.

Энэхүү олон улсын өдрийн хүрээнд төв, орон нутгийн Онцгой байдлын анги байгууллагууд гамшгаас урьдчилан сэргийлэх чиглэлээр иргэд, олон нийтийн дунд хичээл, сургалт дадлагуудыг зохион байгуулж байна гэж Онцгой байдлын ерөнхий газраас мэдээллээ.

Эрүүл мэндийн яам (ЭМЯ)-наас өнөөдөр хэвлэлийн хурал зарлаж, сувилагчдын ажлын байр нэмэгдүүлэх асуудлаар мэдээлэл хийлээ.