Month: October 2018

Орхон аймагт тохиолдох гамшгийн эрсдэл буюу үер, ган, зудын талаар мэргэжлийн байгууллагууд үнэлгээ хийжээ.

Тухайлбал, 2012-2018 онд Орхон аймагт нийт 10 удаа үер болж үүний улмаас найман хүн нас барж нэг хүн гэмтэж 55.4 тэрбум төгрөгийн хохирол учирчээ. Иймд үерийн далан, суваг, шуудуу барьж эрсдэлд ойрхон байгаа айл, өрхөнд анхааруулга зөвлөмж хүргүүлэх, Орхон аймагт нэн шаардлагатай байгаа 33.7 км үерийн даланг барих, барилгаажгүй газрыг хамгаалах хэрэгтэй гэсэн саналыг ОБГ-аас гаргажээ. Харин ган, зудын эрсдлийг тооцоход, сүүлийн арван жилийн хугацаанд Орхон аймагт нойтон цас орох, цасан болон шороон шуурга, мөндөр, хүйтэн бороо орох давтамж нь нэмэгджээ. Энэ нь хөдөө аж ахуйн салбарт ихээхэн хүндрэл учруулдаг байна. Иймд хөдөө аж ахуйн салбарт онцгой анхаарах хэрэгтэй гэж мэргэжлийн байгууллагууд аймгийн Засаг даргад танилцууллаа.

Булган аймгийн хүнс, хөдөө аж ахуйн газрын удирдлага мэдээлэхдээ энэ жил хур бороо элбэг зуншлага сайхан байж, газрын гарц сайн байсан нөхцөлд өөрсдийн боломжийг дайчлан өвс тэжээлээ базааж аваагүй малчдад өвөлжилт, хаваржилт тавгүйтсэн нөхцөлд аливаа нэгэн дэмжлэгийг түрүүлж хүртээхгүй чиглэл баримтална гэлээ.

Хадлан өвсөө хадаад авах боломжтой зарим нутгийн малчид налайж суусаар тэвэр өвс авалгүй тэсгим хүйтэнтэй золгож, “төрийн хамгаалалтад” байгаа мал хорогдлоо гэж гомдоллон тусламж, дэмжлэгийн үнэгүй өвс тэжээл аваад сурчихсан гэж сумын мал аж ахуй хариуцсан мэргэжилтнүүд тайлбарладаг. Аймгийн хэмжээгээр малчдын түвшинд бэлтгэх тэжээлийнхээ 84,0 хувийг базаажээ. Харин Гурванбулаг, Сайхан, Дашинчилэн суманд дөнгөж 24,0-43,8 хувийг бэлтгэсэн мэдээ байна. Сайхан сумын малчид 4000 тонн өвс бэлтгэхээс дөнгөж 960 тонныг авсан аж.

Самбо бөхийн залуучуудын болон өсвөрийн ДАШТ Гүрж улсын нийслэл Тбилис хотноо болж Монголын эмэгтэй самбочдын баг гуравдугаар байр эзэллээ.

Тус тэмцээний сүүлийн өдөр залуучуудын ДАШТ-ий эрэгтэй 56, 70, 87 кг, эмэгтэй 48, 60, 75 кг, өсвөрийн ДАШТ-ий хөвгүүдийн 57, 74, 100 кг, охидын 52, 64, 80 кг жингийн барилдаанууд болсон юм. Энэ удаагийн ДАШТ-ээс манай бөхчүүд энэ өдөр 1 хүрэл, 3 мөнгө нийт 4 медаль авсан байна.

Дэлхийн залуучуудын АШТ-ий эрэгтэйчүүдийн 56 кг-д “Женко” клубын Б.Цогтбаяр мөнгө, өсвөрийн ангилалын хөвгүүдийн 57 кг-д БТСДуС-ийн бөх А.Хатансайхан, 100 кг-д Д.Нямхүү нар мөнгө, охидын 80 кг-д Б.Эрдэнэт-Од хүрэл медаль хүртжээ.

Дэлхийн залуучуудын болон өсвөрийн АШТ-д манай улсаас 33 бөх зодоглож нэг алт, 8 мөнгө, 6 хүрэл нийт 15 медаль хүртсэнээс эмэгтэй баг 1 алт, 3 мөнгө, 4 хүрэл хүртсэн амжилтаар ийнхүү гуравдугаар байрт шалгарсан байна.

Нийслэлийн Газрын албанаас санаачлан Чингэлтэй, Сүхбаатар дүүрэг дэх зуслангийн амуудад зурагт мэдээллийн самбар байрлууллаа.

Мэдээллийн_самбарт газрын кадастрын мэдээллийн санд бүртгэлтэй нэгж талбар, автозам, зуслангийн хил, ой, ойн сан бүхий газрын хамгаалалтын бүс, гол, булаг, усан сан бүхий газрын эрүүл ахуйн бүс, намаг, үерийн далан, цахилгааны шугам, дэд өртөө зэрэг хориглолт хамгаалалтын бүсүүд болон зуслангийн амнуудын хэсэгчилсэн ерөнхий төлөвлөгөө зэргийг тусгасан.

Ингэснээр иргэд зураг мэдээллийн самбараас өөрт хэрэгтэй бүх төрлийн мэдээллийг авах бүрэн боломжтой юм.

Энэ сарын 18-ны өдөр ОХУ-ын Батлан хамгаалахын сайд, армийн генерал Сергей Кужугетович Шойгу Монгол Улсын Батлан хамгаалахын сайд Н.Энхболдын урилгаар манай улсад албан ёсны айлчлал хийх юм байна.

Тэрбээр 1955 оны тавдугаар сарын 21-нд Тувагийн Чадан хэмээх хотод мэндэлжээ. Түүний аав Кужугетович тува хүн. Сергей Шойгу 1977 онд Красноярскийн политехникийн дээд сургуулийг барилга байгууламжийн инженер мэргэжлээр дүүргэжээ. Дээд сургууль төгссөнийхөө дараагаас 1988 он хүртэл тэр Красноярск, Кызыл, Ачинск, Саяногорск, Абакан хотын барилгын үйлдвэрүүдэд доод тушаалын ажилтнаас эхлэн мастер, менежерийн тушаалд дэвшин ажилласан байна. Сергей Шойгу Путины хамгийн ойрын хамтрагчдын нэг юм. Сергей Шойгу ОХУ-ын дээд одон, медаль, цол хүртжээ. Шойгуг 1993 онд Чөлөөт Оросын медалиар шагнаж байсан бол 1999 онд ОХУ-ын баатар цолоор шагнасан байна. Тэрбээр хоёр охинтой. Түүний эхнэр бизнес эрхэлдэг. Сергей Шойгу чөлөөт цагаараа морь унаж, хөлбөмбөг тоглох дуртай ажээ.

Энэ сарын 14-ний орой АТГ-аас Эрчим хүчний яамны харъяа “Улаанбаатар дулааны сүлжээ” төрийн өмчит хувьцаат компанийн захирал Б-г баривчилсан байна. Түүнийг АТГ-ын алба хаагчид хахууль авч байхад нь үйлдэл дээр нь баримтжуулан саатуулжээ. Мөн түүнд хахууль өгсөн хүнийг баривчлан, ШШГЕГ-ын харьяа цагдан хорих 461 дүгээр ангид саатуулсан аж.

Өнгөрсөн долоо хоногийн зам тээврийн осол, хэргийн нөхцөл байдлын талаар мэдээлэл хүргэж байна.